MAmosi 2:1-16
2 Uburé Danhibꞌapito te tinha, ãne:
— Aꞌuwẽ norĩ Moabi na romnhisi ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa hã wa za hâ zaꞌra. Edõ ãma apito hâiba te te siwi iwazéb õ zarina, ma tô siwi hâiba zata pese, siꞌruꞌa da hã.
2 Tahawa, dazaꞌru Moabi na wa za unhama na ãma roꞌo. Tô õ uzâ hã te za duré Queriote na romnhisi ãma ꞌri norĩ siptete na ꞌre isimasa mono zama uprosi. Dasiꞌwapé te za watobro, ãma idasipãrĩ ahâ hã. Te za duré sõdadu norĩ hã ꞌre hãsi. Danhimnhihârâzém na te za duré amnhihãsi ni. Tawamhã te za tadâꞌâ zaꞌra ni.
3 Dazaꞌru Moabi ãma apito hã, uburé dama ipire norĩ me wa za uprosi. Wa hã Uburé Danhibꞌapito, wa tinha.
Zuda na romnhisi ãma aꞌuwẽ norĩ ma iromhâimanazé wasuꞌu
4 Uburé Danhibꞌapito hã te duré tinha, ãne:
— Aꞌuwẽ norĩ Zuda na romnhisi ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa hã wa za hâ zaꞌra. Ta norĩ hã ma tô ĩnhimiroti zahi te te siwi ꞌre wẽꞌõ zaꞌra. Duré ĩmreme te iꞌru hã te te ꞌre wapari zaꞌra mono ãna, te ꞌre hâimana zaꞌra. Ma tô duré ihâibaꞌõ senaiꞌõ na ꞌre ihâimana zaꞌra mono ãma si ꞌre wata zaꞌra, ihiꞌrata norĩ, tô õ norĩ ãma ꞌre iwata zaꞌra mono ãma si.
5 Tahawa, Zuda tiꞌai ãma unhama na wa za ãma sazu. Duré tô õ uzâ hã te za ꞌrinhoꞌu Zeruzalẽ ãma ꞌri norĩ siptete na ꞌre isimasa mono hã uprosi.
ꞌRe ihâimana uꞌâsi mono, aꞌuwẽ Izaraéu norĩ ma, te te tãma irobꞌmanharĩ zaꞌra zé wasuꞌu
6 Uburé Danhibꞌapito te duré tinha, ãne:
— Aꞌuwẽ Izaraéu nhihudu norĩ, wasété zaꞌẽtẽ uptabi zaꞌra di. Wasété ahâ zaꞌra wa, wa hã wa za hâ zaꞌra. Niꞌwam norĩ hã sena na ꞌre hâimana zaꞌra mono nherẽ, pawaꞌâbâ ãna te te dama ꞌre iromhuri zaꞌra mono hã te Izaraéu norĩ hã te te dama ꞌre wede zaꞌra, ropisutu na marĩ te te dawi ꞌre iwaibui mono te te ꞌre iwaꞌâbâ waihuꞌu zaꞌra mono õ norĩ hã, duré simarĩꞌõ uptabi na ꞌre hâimana zaꞌra mono wa, dapara uza te te ꞌre iwaibui mono, te te ꞌre iwaꞌâbâ waihuꞌu zaꞌra mono õ norĩ hã.
7 Te duré isibrobꞌõ norĩ zarina ꞌre nomro, te te ꞌre sisém nomri zaꞌra mono da. Te duré senaiꞌõ aꞌuwẽ dama wapu na ꞌre ihâimana zaꞌra mono ma hã te te ꞌre rowairébé zaꞌra, sada ꞌre hâimana zaꞌra mono wa. Damama norĩ tiꞌra norĩ me, te tô piꞌõ siwaꞌâbâ zô ꞌre isisõmri zaꞌra mono norĩ ãma ꞌre hâimana zaꞌra. Taha zarina te ĩnhisi iwazéb zahi wasété ãna ꞌre ihâimana mono ma, rowazé hã te te siwi ꞌre nomri.
8 Siwaꞌru ihâibaꞌõ norĩ ãma ꞌre idawata zaꞌra mono zé ꞌri ꞌrãihâ ꞌrata, te ta norĩ hã ꞌre sisimro sahâ na, daꞌuza te te dawi iwaibu zaꞌra nhisiwi, marĩ waꞌâbâzé ꞌrãsutuzéb da, te te dawi iwaibu zaꞌra na. Duré tite ihâibaꞌõ norĩ ãma ꞌre iwata zaꞌra mono ꞌri ꞌrãihâ ꞌremhã, te uva ꞌrãi waꞌuzé hã te te ꞌre âhuri, marĩ iwaꞌâbâ õ nhisiwi, te te dawi ꞌre iwaibu zaꞌra mono hã.
9 — E ma tô amoreu norĩ ma, te iꞌmanharĩzém na ãma aipoꞌre siꞌâri zaꞌra waꞌwa. Wa hã wa tô ã hã aibâ norĩ, cedru wede nhinihã ne ipoto ꞌrãihâ, duré wede carvalhu isiptete ne hã uprosi. Uburé wa uprosi pese, ta norĩ hã.
10 Wa hã wa tô Ezitu hawimhã asani zaꞌra waꞌwa. Wa tô duré 40 wahub ꞌremhã rop si ꞌre irosaꞌwari mono na hã te asimroi waꞌwa. Amoreu norĩ nhiptiꞌa hã wa tô duré aima sõmri zaꞌra waꞌwa.
11 Nima norĩ aiꞌra zaꞌra waꞌaba norĩ hã wa tô pisutu zaꞌra, ĩzadawa ꞌmahârâꞌwa na ꞌre hâimana zaꞌra mono da. Duré nima norĩ ate zaꞌra waꞌwa iprédupté ihâiba amo norĩ hã wa tô pisutu zaꞌra, nazireu na ꞌre hâimana zaꞌra mono da hã. E ãnei õ di bété, te iꞌmanharĩzé hã. Ãne hã wa tô ꞌmanha tô, wa hã.
12 Tane nherẽ, te a norĩ waꞌwa nazireu norĩ ma, uva ꞌrãi waꞌu isé hã tãma ꞌre iꞌõb zaꞌra waꞌaba mo. Te duré ĩzadawa ꞌmahârâꞌwa norĩ wi, te te ꞌre ĩmreme ꞌmahârâ zaꞌra mono tõ da hã tiwi ꞌre isawi zaꞌra waꞌaba mo.
13 Tahawa, awaꞌawi na hã wa za aihâpâ zaꞌra waꞌwa, wedewara zapore tiꞌa te te ꞌre ihâpâ zaꞌra mono ne, sibu ꞌrãihâ na amnho trigu te te ꞌre iꞌwasari mono hã.
14 Tawamhã saꞌẽtẽ waptu na isisaꞌrei mono hã simani waihuꞌu zaꞌra õ di za. Duré isiptete norĩ hã te za siptete haiꞌutõrĩ pese zaꞌra. Duré sibꞌru na ꞌre ihâimana zaꞌra mono norĩ hã, tihâimanazé te te isõꞌreptu zaꞌra da hã mare di za.
15 Simnhiꞌãsi ré, duré tiꞌi ré ihâimana zaꞌra norĩ hã te te daꞌãma iꞌaiꞌuté zaꞌra da hã mare di za. Duré hâiba ré dawi simani waihuꞌu zaꞌra õ di za. Duré para na tiꞌai baba isisaꞌrei mono norĩ zama simani waihuꞌu zaꞌra õ di za. Duré awaru na isisaꞌrei mono norĩ hã isimani zaꞌra da hã waihuꞌu õ di za.
16 Taha bâtâ na dasiꞌwapéi ꞌmanharĩꞌwa tisiré norĩ nhipaiꞌu isibꞌru uptabi norĩ hã te za tinhimnhiꞌã hã sisaꞌu sãmra zaꞌra. Taha pari te za oto aimani zaꞌra. Wa hã, Uburé Danhibꞌapito, wa ãne tinha.
