Amosi 3:1-15
3 Aꞌuwẽ Izaraéu norĩ, Uburé Danhibꞌapito, aihâiba zaꞌra waꞌaba na te te inharĩzé hã maꞌãpé wapari zaꞌra waꞌaba, Ezitu hawi we te te iꞌaiꞌawazere aba mreme hã:
2 — Uburé tiꞌai mono bâ ꞌre idahâimana zaꞌra mono norĩ nhipai u, a norĩ waꞌaba si ĩnhibꞌaꞌuwẽ na ĩma ꞌre aihâimana zaꞌra waꞌaba mono da hã wa tô ĩsima aipisutu zaꞌra waꞌwa. Tahawa, uburé aiwasédé ꞌre iꞌmanharĩ zaꞌra waꞌaba mono zarina, wa za aihâ zaꞌra waꞌwa.
ꞌRe ihâimana uꞌâsi mono zadawa ꞌmahârâꞌwa, ariꞌiwi ihâimana waihuꞌu õ zé wasuꞌu
3 E maparane aꞌuwẽ norĩ hã te za siré tineb zahuré, ãma sisaze siromo zahuré õ nherẽ.
4 E huꞌu zérépa marãi ãma abaze te te ꞌmasãmri õ nherẽ, te za tiwairõ.
E te za duré huꞌu zérépa hâiba tébre hã marĩ te te ꞌmaꞌâri õ nherẽ, abꞌre ꞌremhã nasi tiꞌéꞌé.
5 E sire te za timramizéb u hã aime, ĩsaire da te iwa sô hiri õ nherẽ.
E te za duré abaze mramizé hã siꞌuihâ na aiwasihu, abaze hã te te ꞌmaꞌâri õ nherẽ.
6 ꞌRi nhoꞌõmo ãma marĩ isimimnha watobro wamhã, dapoꞌre puꞌuzéb da, danhimnhihârâzé da te hãsi wamhã, e tãma dapahi zaꞌra õ di za bété.
Duré e ꞌri nhoꞌõmo nhisiwi te za niha na dama robꞌmanharĩ pipa zé hã waptãrã, Uburé Danhibꞌapito marĩ watobro da, te te tãma robꞌrui õ nherẽ.
7 Tane, e Uburé Danhibꞌapito ꞌRe ihâimana uꞌâsi mono te za marĩ hã ꞌmanha, tite romhuriꞌwa tizadawa ꞌmahârâꞌwai ma, niha na marĩ te te tãma hâiꞌré õ nherẽ.
8 Huꞌu zérépa wairõ wamhã, e niꞌwa hã tãma pahi õ di za.
Duré Uburé Danhibꞌapito ꞌRe ihâimana uꞌâsi mono te te nharĩ wamhã, e ꞌwa hã bété isadawa ꞌmahârâ na hâimana õ di za.
ꞌRi nhoꞌu Samaria ma iromhâimana wasété zé wasuꞌu
9 Maꞌãpé Asidodi ãma duré Ezitu ãma apito nhimiromhurizé ꞌri ꞌrãihâ ãmam norĩ ma, ãma robꞌmahârâ, ãne: “Maꞌãpé asiꞌrãꞌõtõ aba, Samaria ẽne te te siwi iꞌuirĩ ãma, ꞌmadâꞌâ zaꞌra waꞌaba da, ꞌri nhoꞌõmo ma, niha na rowaihuꞌuꞌõ we ihâimanazé hã, aꞌuwẽ norĩ marĩ iwasédé te te ꞌre iꞌmanharĩ zaꞌra mono uꞌâbâmhã.”
10 Uburé Danhibꞌapito, te tinha, ãne:
— Aꞌuwẽ Samaria ãma ꞌre ihâimana zaꞌra mono norĩ, sena na ꞌre ihâimana zaꞌra mono zé te te ꞌre iꞌmanharĩ zaꞌra mono da hã tãma waihuꞌu zaꞌra õ di. Ite zaꞌra apito nhimiromhurizé ꞌri ꞌrãihâ norĩ ꞌremhã, marĩ te te dawi ꞌre isimiꞌuri zaꞌra mono zém na si, te te sô ꞌre idanhimroi mono na, ma tô te te ãma siwi ꞌre ꞌri nhito.
11 Tahawa, iꞌruiꞌwa norĩ ite tiꞌai waꞌõtõ nhoꞌu te te siwi uirĩ wamhã, te za ꞌri siptete na ꞌre isimasa mono norĩ hã siwi uprosi. Te za duré apito nhimiromhurizé ꞌri ꞌrãihâ norĩ wa, uburé marĩ ꞌre isimiꞌwara mono hã siwi ꞌwasa.
12 Uburé Danhibꞌapito, te duré tinha, ãne:
— Huꞌu zérépa, poneꞌẽrebâ te te ꞌmaiꞌâri wamhã, iꞌmadâꞌâꞌwa ite siꞌuiwa si, niwamhã, ipoꞌre si te te tiwi iwazere ne, tane te za Izaraéu norĩ niꞌwam norĩ si umro na Samaria ãma ꞌre ihâimana zaꞌra mono hã sisõꞌreptu zaꞌra, waptâ ihâteteꞌõ wa, ãhã na ꞌre iwaꞌutu zaꞌra mono norĩ hã.
13 Maꞌãpé te inharĩzé hã wapari zaꞌra waꞌaba. Duré ĩnhibꞌaꞌuwẽ Zacoho nhihudu norĩ, ãne na ãma poꞌre puꞌu zaꞌra waꞌaba. Wa hã Uburé Danhibꞌapito ꞌRe ihâimana uꞌâsi mono, Ĩwaihuꞌu Pese Uptabi, wa tinha.
14 Wa hã, Izaraéu norĩ iwasété zaꞌra zarina, te tãma robꞌmanharĩ zaꞌra wamhã, wa za Bétéu ãma danhoprubzé zatazéb da, ẽtẽ zaꞌra hã prub zaꞌra. Duré uburé danhoprubzé zatazé sasé mono bâ maparane siꞌuiwa na isimasam norĩ hã wa za prub zaꞌra. Tawamhã te za tiꞌai u hã rere.
15 Wa za duré ꞌri ahâ ãma danhorõwa mono hã duré rom na danhorõwa mono hã te dawi apru. Danhorõwa iwaꞌâbâ zaꞌẽtẽ mono iwaipo hã duré uhâ nhisiꞌreti ꞌwaꞌrata hi poto na ꞌri wamnarĩ mono hã uburé wa za pru pese zaꞌra. Wa hã, Uburé Danhibꞌapito, wa tinha.
