MAmosi 4:1-13
4 ꞌRi nhoꞌu Samaria ãma piꞌõ ꞌre iꞌaihâimana zaꞌra waꞌaba mono norĩ, maꞌãpé ã hã wapari zaꞌra waꞌaba, powawẽ ihâipe Basã ãma ꞌre isimasa mono ne, aihâipese na si asima ꞌre irowẽ zaꞌra waꞌaba mono hã. A norĩ waꞌwa hã te marĩ zô tiwi ꞌre iroꞌwanhiꞌriti zaꞌra mono norĩ ma, ꞌre irobꞌmanharĩ wasété zaꞌra waꞌaba mo. Te duré isimarĩꞌõ norĩ hã ꞌre iwati pese zaꞌra waꞌaba mo. Aimro norĩ wi, te duré ꞌre iwaptẽrẽ uꞌâsi zaꞌra waꞌaba mo, uva ꞌrãi waꞌu isé hã te te aima ꞌre ꞌwasari aba mono da, ꞌre iꞌâhuri aba mono da hã.
2 Wa hã, Uburé Danhibꞌapito, ĩnhisi iwazéb zahi iwẽ uptabi na wa za ropisutu, bâdâ za we iwisizém na, azo na peꞌa, da te ꞌre waibui mono wa, da te ꞌre iꞌwani zaꞌra mono ne, azo ꞌwa nhiꞌoto na da te aiꞌãma irobâdâ zaꞌra waꞌaba mono da hã. Ãne wamhã, a norĩ waꞌwa hã tiwi iꞌaiꞌmasimani aba da hã, mare uptabi di za.
3 Tawamhã a norĩ waꞌwa hã te za asisarina misisi nasi aiwairébé ꞌwa, ꞌri ꞌwawi waꞌra isipru hawimhã. Hermo na ẽtẽ nhisi nhoꞌõmoi baba te za dasiwi asãmra aba ni.
Izaraéu norĩ, siwẽꞌõ zaꞌra da, te te sima iwẽ zaꞌra õ zé wasuꞌu
4 Uburé Danhibꞌapito ꞌRe ihâimana uꞌâsi mono, te tinha ãne:
— Aꞌuwẽ Izaraéu norĩ, e te tô asima iwẽ zaꞌra waꞌwa, ꞌre iꞌaiwasété zaꞌra waꞌaba mono zé hã. Tane ze te bâ, maꞌãpé Bétéu ãma duré Gilgau ãma ꞌRe ihâimana uꞌâsi mono ãma ꞌre idawata zaꞌra mono zém norĩ u, aiꞌabaꞌréi waꞌaba, tame asima iwẽ na ꞌre iꞌaiwasété zaꞌra waꞌaba mono zé hã waibui waꞌaba da! Mararé nhidâpâsi te za abaze zata na tãma ꞌre asõprub zaꞌra waꞌaba mo. Duré siꞌubdatõ bâdâ siꞌutõrĩ mono nhidâpâ te za aipawaꞌâbâ arĩ hã tãma ꞌre isõmri zaꞌra waꞌaba mo.
5 Maꞌãpé iꞌuꞌẽtẽ wapu na ꞌRe ihâimana uꞌâsi mono ma, ãma tãma irowẽzéb da hã asõprub zaꞌra waꞌaba. Taha parimhã te za aiwairébé ꞌwa za, uburé norĩ ma, asapaꞌabâ asihawim na iꞌmanharĩ zaꞌra waꞌaba zé hã dama wasuꞌu zaꞌra waꞌaba mono da. E marĩ wa. Ãne hã ꞌre ꞌmanharĩ zaꞌra waꞌaba mono da, tô asima ꞌre wẽ uptabi zaꞌra waꞌaba mono wa.
6 — Wa hã wa tô uburé ꞌri nhoꞌõmo mono na dasa zô roꞌwanhiꞌriti da hã ꞌmanha, mrab uptabi na uburé dahâimana zaꞌra da hã. Ãne nherẽ, a norĩ waꞌwa hã apâ ĩtẽme aipizari zaꞌra waꞌaba õ di.
7 Tã taꞌa da hã, wa hã te tãma saꞌréi õ di, siꞌubdatõ aꞌamo imorĩ ꞌremhã roptehârizé hâimana wana ré hã. Nimahã ꞌri nhoꞌõmo ãmap si tã sisaꞌwari da hã, wa tô ꞌmanha. Ihâiba amo norĩ u sisaꞌwari tõ da, wa tô duré ꞌmanha. Robꞌre te te idiꞌi mono da si hã, wa tô duré ꞌmanha. Robꞌre ihâiba amo norĩ u taꞌa tõ da hã, wa tô duré ꞌmanha. Tahawa, tamemhã ma tô uburé pese ꞌré zaꞌra mono.
8 Tawamhã duré ꞌri nhoꞌõmo hawi, ꞌri nhoꞌu ihâiba amoi u, â zô ꞌre darĩtĩ zaꞌra mono da hã, ma tô ꞌre danomro. Tane nherẽ, da te ꞌre sõpẽtẽ waihuꞌu zaꞌra mono õ di, â saꞌẽtẽ na ihâimana hã, ꞌrubu da te ãma dasima ꞌre isimroi mono da hã aré. Ãne nherẽ, a norĩ waꞌwa hã duré apâ ĩtẽme aipizari zaꞌra waꞌaba õ di. Wa hã, Uburé Danhibꞌapito, wa tinha.
9 — Wa hã wa tô rowaꞌuꞌu waꞌro uptabi na, duré robꞌre norĩ hâzé ipipa uptabi na aima robꞌmanharĩ wasété zaꞌra waꞌwa. Duré ꞌriti norĩ hã ma tô robꞌre te te siwi uprosi, uva ꞌru hã, robꞌrã figu wede norĩ hã, duré azeitona wede hã. Ãne nherẽ, duré ĩtẽme aipizari zaꞌra waꞌaba õ di.
10 Duré marĩ ipipa uptabi asisiwib zaꞌra waꞌaba waptãꞌã da hã, wa tô ꞌmanha, Ezitu da, ĩhâimana wa, te tãma iꞌmanharĩ ne. Wa tô ꞌmanha, aiꞌreputu norĩ aꞌubuni wi dasiꞌwapé na siꞌutõrĩ da hã. Duré isitobꞌru norĩ awaru na dasiꞌwapézé te te tiwi ꞌmapraba zaꞌra da hã wa tô saꞌré zaꞌra. Duré ihâiba wahu ꞌro, ꞌri tẽme te te ropéi mono da hã, wa tô tãma ꞌmanharĩ zaꞌra. Ãne nherẽ, ĩtẽme aipizari zaꞌra waꞌaba õ di. Wa hã, Uburé Danhibꞌapito, wa tinha.
11 — Wa hã wa tô ꞌri nhoꞌõmo norĩ hã uprosi, Sodoma duré Gomora me, te tãma iꞌmanharĩ zahuré ne. A norĩ waꞌwa, parawã pré pese õ ré, unhama hawi da te iwazere ne, ma tô aimani zaꞌra waꞌwa. Ãne nherẽ, duré ĩtẽme aipizari zaꞌra waꞌaba õ di.
12 Tahawa, aꞌuwẽ Izaraéu norĩ, wa za tô aihâ zaꞌra waꞌwa. Duré za te aihâ zaꞌra waꞌaba na dâꞌâsina, maꞌãpé asimire sina aihâimana zaꞌra waꞌaba, ate ꞌRe ihâimana uꞌâsi mono asiwi sõpẽtẽ aba da hã. Wa hã, Uburé Danhibꞌapito, wa tinha.
13 ꞌRe ihâimana uꞌâsi mono, ẽtẽ ꞌrãihâ norĩ hã ma tô te te apoto. Rowaꞌu hã ma duré ꞌmanha.Õ hã te aꞌuwẽ norĩ ma tinhimirowaꞌõno hã te te tãma ꞌre ahâiꞌré uꞌâsi.Rowaꞌa, mara u ꞌre sipizari mono da, te õ hã te te ꞌre ꞌmanharĩ uꞌâsi.Ẽtẽ ꞌrãihâ norĩ nhisiwi te duré ta hã ꞌre mo.Ãne isisi hã: Uburé Danhibꞌapito, ꞌRe ihâimana uꞌâsi mono Isiptete-Uptabi.
