Amosi 5:1-27
5 Izaraéu norĩ, maꞌãpé wapari zaꞌra waꞌaba robzei õ sina, aiꞌãma ĩnhoꞌre zaꞌra waꞌaba zé hã, ãne:
2 “Izaraéu, iꞌmadâꞌâ zei uptabi, uptob ãna hâiba ubuni na ꞌre ihâimana mono hã ma tô waptãrã. Niwa apâ iwahutu zahu da hã mare di za.Tô ꞌrâwi tinhiptiꞌai ꞌre, ma waptãrã. Niꞌwa apâ wahutu da, te te ipawaptob da hã ibaba uptabi.”
3 Uburé Danhibꞌapito ꞌRe ihâimana uꞌâsi mono hã te tinha, ãne:
— Nimahã ꞌri nhoꞌu, miu na aibâ norĩ dasiꞌwapéi u siꞌabaꞌré da, te te tãma irobꞌru zaꞌra hã, te za apâ niꞌwam norĩ si 100 na ihâiba na hâiba ré sina siri zaꞌra. Duré 100 na ihâiba na aibâ norĩ ma, te te tãma robꞌru zaꞌra wamhã, te za 10 na si ihâiba na apâ sina siri zaꞌra.
4 Uburé Danhibꞌapito te duré aꞌuwẽ Izaraéu norĩ ma tinha, ãne:
— Maꞌãpé apâ ĩtẽme aipizari zaꞌra waꞌaba, aiꞌutõrĩ aba ãna aihâiba ré ꞌre aihâimana zaꞌra waꞌaba mono da.
5 Tane nherẽ, Bétéu ãma hã, Gilgau ãma hã, duré Beseba ãma hã ĩzô asõpré waꞌaba tõ. E marĩ wa. Aꞌuwẽ Gilgau ãma hã za da te waibui wa, sito pese na dama ꞌre hâimana zaꞌra mono da, tiꞌai waꞌõtõ nhoꞌõmo hawi da te simroi mono wamhã. Ãhã wa, Bétéu ꞌri nhoꞌu hã te za oto sipru pese na tihâiba za.
6 Uburé Danhibꞌapito tẽme maꞌãpé apâ aipizari zaꞌra waꞌaba. Tawapsi aiꞌutõrĩ aba ãna aihâiba ré, te za ꞌre aihâimana zaꞌra waꞌaba mo. Apâ ĩtẽme aipizari zaꞌra waꞌaba õ wamhã, õ hã te za unhama roꞌo ne we siꞌra, Izaraéu tiꞌai waꞌõtõ nhoꞌu te te uprosi da. Duré Bétéu ãma hã niꞌwa uzâ te te wĩrĩ waihuꞌu õ di za.
7 A norĩ waꞌwa iꞌuwaibaba na marĩ na dama ꞌre rowairébé zaꞌra waꞌaba mono da nherẽ, te iꞌuwaibaba õ na si dama ꞌre irowairébé zaꞌra waꞌaba mo. Taha zarina te ro isé hã dama ꞌre isani zaꞌra waꞌaba mo. Duré ꞌre wazéb zaꞌra waꞌaba mono õ di, we ãma ꞌre idahâimana zaꞌra mono zé hã.
8 Uburé Danhibꞌapito, ma tô wasi norĩ hã te te apoto, siré ꞌre isimasa mono Pleiadi na isisi zaꞌra hã, duré Oriõ na isisi zaꞌra hã.Mara hã rowaꞌa u ꞌre sipizari mono da, te te ꞌre ꞌmanharĩ uꞌâsi.Rowaꞌa, mara u ꞌre sipizari mono da, te duré te te ꞌre ꞌmanharĩ uꞌâsi.Te duré âporé â hã te te ubumro, tiꞌa nhisiwi te te ꞌre azaꞌwari mono da.Taha nhisi hã Uburé Danhibꞌapito na.
9 Ta hã siptete na ꞌre ihâimana zaꞌra mono hã te duré te te ꞌre aꞌuprosi, duré ite zaꞌra ꞌri nhoꞌu siptete na ꞌre isimasa mono norĩ hã.
10 A norĩ waꞌwa ma tô ꞌre asitiꞌru zaꞌra waꞌaba mo, iꞌuwaibaba na dama rowairébézém na roꞌwapéiꞌwa norĩ zada. Te duré ꞌre iꞌruiwapari pese zaꞌra waꞌaba mo, sena na tisiwasuꞌu na te te ꞌre inharĩ zaꞌra mono norĩ hã.
11 Isibrobꞌõ norĩ hã te duré ꞌre iwati pese zaꞌra waꞌaba mo. Asiptede te duré sada ꞌre iꞌmanharĩ zaꞌra waꞌaba mo, amnho trigu te te aima ꞌre sõmri zaꞌra waꞌaba mono da hã. Tahawa, ẽtẽ na ꞌri iwẽ uptabi, asima ꞌre iꞌmanharĩ zaꞌra waꞌaba mono ꞌremhã, ꞌre iꞌaihâimana zaꞌra waꞌaba mono da hã mare di za. Duré uva ꞌru iwẽ uptabi ꞌrãi waꞌu hã niwamhã ꞌre iꞌâhuri aba mono da hã mare di za.
12 Ĩma waihuꞌu pese di, aiwasété zaꞌra waꞌwa iꞌahâ uptabi na hã, duré aiwasédé ipire uptabi ꞌre iꞌmanharĩ zaꞌra waꞌaba mono zém na hã. Iꞌuwaibaba na ꞌre ihâimana zaꞌra mono norĩ hã te ꞌre iwati pese zaꞌra waꞌaba mo. Duré robꞌuiprazé te piꞌuriwi dawi asima ꞌre iwaibui waꞌaba mo, iꞌuwaibaba na dama rowairébézé hã dawi ãma ꞌre siꞌoto zaꞌra waꞌaba mono da. Duré isibrobꞌõ norĩ ma, iꞌuwaibaba na rowairébézé hã ꞌre wazéb zaꞌra waꞌaba mono õ di.
13 Tahawa, rowaihuꞌu wẽ ꞌwa norĩ hã te ariꞌiwi mreme ãna ꞌre hâimana zaꞌra. E marĩ wa. Tô ãhã bâtâ mono na romhâimanazé hã wasété uptabi wa.
14 Asima ꞌre asõpré waꞌaba mono, marĩ iꞌuwaibaba si ꞌre iꞌmanharĩ zaꞌra waꞌaba mono zéb zô. Mare di, iꞌuwaibaba õ na marĩ ꞌre iꞌmanharĩ wasété zaꞌra waꞌaba mono na ꞌre iꞌaihâimana zaꞌra waꞌaba mono zéb zô hã. Ãne wamhã, te za tô sena na ꞌre inharĩ zaꞌra waꞌaba mo, Uburé Danhibꞌapito, ꞌRe ihâimana uꞌâsi mono Iwaihuꞌu pe Isiptete-Uptabi hã asiré ꞌre ihâimana zaꞌra waꞌaba mono na hã.
15 Maꞌãpé uburé marĩ iwasédé ꞌre ꞌruiwapari uꞌâsi zaꞌra waꞌaba mono. Iwẽ si te za asima ꞌre isawi pese zaꞌra waꞌaba mo. Te za duré ꞌre iꞌmanharĩ zaꞌra waꞌaba mo, dama rowairébézéb ãma iꞌuwaibaba na si dama rowairébézé hã da te dasima ãma ꞌre iꞌuwaimrami zaꞌra mono da si. Ãhã wamhã, Uburé Danhibꞌapito, ꞌRe ihâimana uꞌâsi mono Isiptete-Uptabi hã ãté te za daꞌãma ꞌre siwamri, tinhibꞌaꞌuwẽ isiꞌatarẽme norĩ ãma hã.
16 Uburé Danhibꞌapito, ꞌRe ihâimana uꞌâsi mono Iwaihuꞌu Pese Uptabi te tinha, ãne:
— ꞌRi nhoꞌõmo mono bâ te za robzé te, ꞌre dazadari zaꞌra za. Duré ꞌri nhiꞌridi hã te za daꞌahâ uptabi na dasiwi sitom ni, ꞌre idaꞌruꞌru mono hã. Tawamhã robzuriꞌwa norĩ zô zama te za tahãsi ni, idasiꞌutõrĩ hâiba na dame ꞌruꞌru da, tisiwaꞌõ na dapawaptoꞌwa norĩ siré.
17 Uburé te za uva ꞌru na taꞌruꞌru ni. Ãne te za uburé tiromhâiba, wa hã za we ĩmorĩ wa, te aihâ zaꞌra waꞌaba da. Wa hã Uburé Danhibꞌapito, wa tinha.
Uburé Danhibꞌapito te, bâdâ ihâimanazé wasuꞌu
18 A norĩ waꞌaba ma hã iropire za, Uburé Danhibꞌapito te, bâdâ za we iwisizéb zô iꞌasimipari zaꞌra waꞌaba ma. E marĩ da, ma tô ãhã bâdâ hã asima iwẽ zaꞌra waꞌwa. Ta hã te za robra na si tiromhâiba za, rowaꞌa ãna.
19 Aibâ, huꞌu zérépa wi simani da, wara nherẽ, robzahi ursu te te oto isõpẽtẽ ne, te za aima tiromhâimana zaꞌra waꞌwa. Duré niꞌwa tinhorõwa u sébré wa, tinhibꞌrada ꞌri naꞌrata na ãma siꞌupari da, te te hiri ré, wahi te te isari ne, te za tô tiromhâiba.
20 Uburé Danhibꞌapito te, bâdâ hã tô robra na si te za tihâiba. Rowaꞌa na iromhâimana da hã mare di za. Robra uptabi di za.
Uburé Danhibꞌapito, iꞌuwaibaba na si dama rowairébézé te te iwẽsãmrizé wasuꞌu, mare di danhoprubzém na hã
21 Uburé Danhibꞌapito te tite aꞌuwẽ ma tinha, ãne:
— Wa hã wa te te ꞌre ꞌruiwapari pese, dato ĩma ꞌre iꞌmanharĩ zaꞌra waꞌaba mono zé hã. Duré ĩma ꞌre iꞌaiꞌrãꞌõtõ waꞌaba mono zé hã te te ĩma ꞌre rowẽ zani mono õ di.
22 Abaze zata na ĩma ꞌre iꞌasõprub zaꞌra waꞌaba mono hã te ĩsima ꞌre wẽ mono õ di, duré amnho na danhoprubzé hã, duré abaze ihâipese na ãma irowẽ zaꞌẽtẽ na ꞌre iꞌasõprub zaꞌra waꞌaba mono zé hã.
23 Maꞌãpé sahâri zaꞌra waꞌaba, ĩma ꞌre iꞌaiꞌrãꞌõtõ aba mono zéb ãma, asõꞌre na ꞌre irobruruꞌu zaꞌra waꞌaba mono zé hã. Te ĩsima wẽ zahu õ di oto, harpa rowamremezém na roptaꞌazé te iwapari da hã.
24 Taha waꞌrãmi wa ĩsima wẽ upta, â ꞌre iꞌâpusi mono ꞌre ipraba zaꞌra mono ne, sena na iꞌuwaibaba na si dama rowairébézé hã sina hâꞌâ pese da, duré sena na ꞌre idahâimana zaꞌra mono zé hã, pa nhoꞌõmo â praba nhimizahâri ãna ihâimana ne, hâimana da hã.
25 — Aꞌuwẽ Izaraéu norĩ, e ma tô abaze zata na, duré amnho na danhoprubzém na ĩma ꞌre asõprub zaꞌra waꞌaba mo, 40 na wahub ꞌremhã supara ꞌré na rop si ꞌre irosaꞌwari mono na ꞌre anomro aba mono ré hã. Mare di.
26 Taha waꞌrãmi, te za oto Sicuti na ihâibaꞌõ nhisi hâibarĩ hã duré Quium na wasi hâibarĩ nhisi hã ꞌre iꞌwasari aba mo, ãma ꞌre aiwata zaꞌra waꞌaba mono da, asima ꞌre iꞌmanharĩ zaꞌra waꞌaba mono hã. Ãhã hâibarĩ norĩ hã te za tô ꞌre iꞌwasari aba mo,
27 Damascu u, te asimroi waꞌaba mono wamhã, aipawaꞌâbâ ãna tãma ꞌre romhuri zaꞌra waꞌaba mono da hã. Wa hã, Uburé Danhibꞌapito, Ĩwaihuꞌu pese-uptabi, wa tinha.
