Amosi 6:1-14
6 Aima zaꞌra waꞌaba hã tô sena iropipa uptabi za, Zeruzalẽ ãma asima iwẽ na ꞌre iꞌaihâimana zaꞌra waꞌaba mono norĩ, duré Samaria ãma aihâtâꞌâ ãna ꞌre iꞌaihâimana zaꞌra waꞌaba mono norĩ, duré ã hã tiꞌai waꞌõtõ nhoꞌu isaꞌẽne Izaraéu ãma aipire na ꞌre iꞌaihâimana zaꞌra waꞌaba mono norĩ, duré ꞌre dapawaptob zaꞌra waꞌaba mono da, da te aiwi ꞌre irowaptẽrẽ zaꞌra waꞌaba mono norĩ!
2 Ma tô aꞌuwẽ norĩ ma ãne na ꞌre inharĩ zaꞌra waꞌaba mo: “Maꞌãpé ꞌri nhoꞌu Calne na isisi ꞌmadâꞌâ zaꞌra waꞌaba da, aiꞌabaꞌréi waꞌaba. Taha parimhã te za duré ꞌri nhoꞌu Hamati na isisi isaꞌẽtẽ u aiꞌabaꞌréi waꞌwa. Ta hawi te za duré oto aihutu ꞌwa, Gati na ꞌri nhoꞌõmo nhisi u filisteu norĩ nhiptiꞌai ꞌremhã. E ta norĩ hã aꞌuwẽ isibro pese uptabi bâ wanhipai u zaꞌra. Duré e isaꞌru zaꞌra hã isaꞌẽtẽ uptabi bâ, wate dazaꞌru nhipai u hã.”
3 A norĩ waꞌwa, asima wẽ zaꞌra waꞌaba õ di, ãma asimizaze zaꞌra waꞌaba da hã, aima robꞌmanharĩ zaꞌra waꞌaba zé bâdâ oto ꞌrâwim na hã. Tane nherẽ, asimirobꞌmanharĩ wasété zaꞌra waꞌaba zéb zarina, te za ropipazé bâdâ hã iwa waptãꞌã su.
4 Aima zaꞌra waꞌaba hã tô sena iropipa uptabi za, dato isaꞌẽtẽ si aima iwẽ zaꞌra waꞌaba norĩ, dasimasisizé ihâ teteꞌõ wap si ꞌre iꞌasimiꞌwara aba mono norĩ hã, poneꞌẽrebâ zéré mapure iꞌrare nhi si powawẽ zapu hâipese nhi me ꞌre ihuri aba mono norĩ hã!
5 A norĩ waꞌwa, apito Davi tinhoꞌre te te ꞌre iꞌmanharĩ mono ne, te asõꞌre hã asima ꞌre iꞌmanharĩ zaꞌra waꞌaba mo. Te duré asima ꞌre iwẽ zaꞌra waꞌaba mo, ãma ꞌre iꞌasõꞌre zaꞌra waꞌaba mono da si, rowamremezé harpa isisi na hã.
6 Te duré hâsizé isaꞌẽtẽ ꞌrep si uva ꞌrãi waꞌu isé hã ꞌre iꞌâhuri aba mo. Duré dasisadazezé iwaꞌâbâ zaꞌẽtẽ na si te ꞌre asisada ze zaꞌra waꞌaba mo. Tane nherẽ, asaꞌru zaꞌra waꞌaba ꞌre, iromhâimana pipa zé hã te te aiwi ꞌre robzeiꞌõ zaꞌra waꞌaba mono õ di.
7 Tahawa, te za a norĩ waꞌwa hã uimrehẽne dawana aiwaibui aba ni, asaꞌru zaꞌra waꞌaba nhiti, da te asimroi waꞌaba mono da, asito pese na dama ꞌre aihâimana zaꞌra waꞌaba mono da. Ãhã wa, dato isaꞌẽne rowẽzéb da, aima ꞌre ihâimana zahu zaꞌra waꞌaba mono da hã mare di za oto.
8 Uburé Danhibꞌapito Isiptete uptabi, ãne te ꞌrâwi sima ropisutu:
— ꞌRi nhoꞌu Samaria hã wa za isitobꞌru norĩ nhibꞌrata tãma sõmri zaꞌra, uburé marĩ iwa ihâimana zaꞌra te te isõpẽtẽ zaꞌra mono hã te te ꞌwasari da. E marĩ wa. Aꞌuwẽ Izaraéu ꞌre isiꞌmadâꞌâ ze zaꞌra mono zé hã ĩma ꞌrui uptabi wa. Duré ta norĩ te, apito nhimiromhurizé ꞌri ꞌrãihâ norĩ hã ĩma ꞌrui uptabi wa.
9 Nimahã ꞌriꞌre 10 na aꞌuwẽ hã hâimana zaꞌra wamhã, te za uburé pese aiꞌutõ.
10 Duré niꞌwa, tisisãnawã hâiba hâ ꞌri para hawi te te wazere da, duré te te ꞌrãmi da, wisi wamhã, te za daꞌmazadanha za, zahadu dahâiba ré daꞌmaihâimana zô ꞌri paramhã: “E zahadu daré hã ꞌri paramhã.” Tawamhã ihâiba amo te za ãma sadaꞌâ za, ãne: “Mare di, daꞌmaihâimana õ di. Robaba di.” Tawamhã imorĩꞌrada hã te za tãma tinha za, ãne: “Ariꞌiwi asa na! Uburé Danhibꞌapito nhisi na, wa te inharĩ da hã, mare di za duré.”
11 E marĩ wa. Uburé Danhibꞌapito te za uburé ꞌri isaꞌẽtẽ norĩ ãma, duré isurure norĩ ãma tinhimiroti zahi hã ꞌmanha za, uburé pese za isiꞌutõrĩzém na hã.
12 E awaru norĩ hã ẽne isimiꞌwara norĩ na hã wara waihuꞌu pese di. E duré powawẽ norĩ, âporé na tiꞌai hâipoꞌozé hã te te sari waihuꞌu pese di. Mare di. Tane nherẽ, a norĩ waꞌwa iꞌuwaibaba na marĩ na dama ꞌre rowairébé zaꞌra waꞌaba mono da nherẽ, te ro isé si dama ꞌre isani zaꞌra waꞌaba mo. Iꞌuwaibaba õ na si te dama ꞌre irowairébé zaꞌra waꞌaba mo, iꞌuwaibaba na rowairébézé waꞌrãmi.
13 A norĩ waꞌwa hã ma tô ꞌre asiꞌmadâꞌâ ze zaꞌra waꞌaba mo, ꞌri nhoꞌu Lo-Deba na isisi ãma aiꞌuté zaꞌra waꞌaba wẽ te. Ãne te duré asima inharĩ zaꞌra waꞌwa: “Wa norĩ hã ꞌrâwi wanhiptete na si wa tô Carnaĩ ãma hã aiꞌuté zaꞌra ni.”
14 Uburé Danhibꞌapito, ꞌRe ihâimana uꞌâsi mono Isiptete-Uptabi hã te tinha, ãne:
— Aꞌuwẽ Izaraéu norĩ, wa za aꞌuwẽ aimawi ma robꞌru zaꞌra, asaꞌrui waꞌaba u sisisi da hã. Tawamhã te za uburé na aiꞌãma roꞌwaꞌrutu zaꞌra waꞌaba ni, Lebo-Hamati hawi hâiwa nhimiꞌe niwĩmhã, romharé Araba na isisi u, hâiwa nhimire niwĩmhã.
