MAmosi 7:1-17
7 Uburé Danhibꞌapito ꞌRe ihâimana uꞌâsi mono ma tô ĩnhotõ ꞌrowim ne marĩ te ꞌmadâꞌâ da hã, ĩma hâiꞌré, ãne: Re ihâimana uꞌâsi mono, ꞌriti norĩ ahâ uptabi na we sõꞌuma iwatobro te te ipodo hã wa tô ꞌmadâ. Apito te, amnho da te tehâri mono pari, apâ iꞌwanhipré wairébé zahu mono ãma ma tô ãne hã tiromhâiba.
2 ꞌRiti norĩ uburé robꞌre te te uprosi mono parimhã, wa hã wa tô Uburé Danhibꞌapito ma tinha, ãne:
— ꞌRe ihâimana uꞌâsi mono, wawasédé waꞌãma ꞌmadâꞌâ zaꞌra tõ da, wa ãma aiwi rowaptẽ. Ate aꞌuwẽ hã sibꞌuware di. E niha wa za bété wahâiba ré ré ꞌre wahâimana zaꞌra.
3 Tawamhã tinhimirosaꞌrata na ma tô ãma saprĩ. Ãne ma te ãma ĩzadaꞌâ:
— A hã marĩ iꞌmadâꞌâzéb zarina, iromhâimana da hã mare di za.
Amosi sõtõ ꞌrowim ne, uzâ te te duré iꞌmadâꞌâzé wasuꞌu
4 Uburé Danhibꞌapito, ĩnhotõ ꞌrowim ne marĩ ihâiba amo te duré ꞌmadâꞌâ da, ma tô ĩma hâiꞌré: Tite aꞌuwẽ ma, unhama na za oto te te robꞌmanharĩ da, te te sima irowairébézé hã wa tô ꞌmadâ. Ta hã uzâ, ma tô âporé tiꞌai ꞌrowi ihâiba hã te te âꞌré. Duré uburé pese robꞌre norĩ hã ma tô te te uprosi.
5 Uburé Danhibꞌapito ma, wa tô tinha ãne:
— ꞌRe ihâimana uꞌâsi mono, maꞌãpé ãma rosazâri! Ate aꞌuwẽ hã sibꞌuware di. E niha wa za bété wahâiba ré ꞌre wahâimana zaꞌra.
6 Tawamhã tinhimirosaꞌrata na te te ãma saprĩ wa, ma tô ãma ĩzadaꞌâ, ãne:
— Ãne zama tô iromhâimana da hã mare di za.
Amosi, marĩ nhoré ruiꞌõzé prumu te te iꞌmadâꞌâzé wasuꞌu
7 Uburé Danhibꞌapito ãne zama te ꞌmadâꞌâ da hã, ma tô duré ĩma hâiꞌré: Ta hã te ꞌri ꞌwawi waꞌra prumu na awaꞌawi si te te isõré ꞌrata ꞌrâwimhã tihâiba. Isibꞌrata te prumu hã tihâiba.
8 Ta hã te ãne ĩzadanha:
— Amosi, e marĩ te iꞌmadâ.
— Prumu, marĩ nhoré ruiꞌõzé! — Ãne wa ãma sadaꞌâ.
Ãne te ĩma tinha:
— Wa za aima hâiꞌré, ĩnhibꞌaꞌuwẽ iꞌuwaibaba ꞌre ihâimana mono õ zé hã. ꞌRi ꞌwawi waꞌra nhiꞌoto ne, prumu na ipibuzém nhiti, da te ꞌre isõré zaꞌra mono hã. Niwamhã ĩnhibꞌaꞌuwẽ ãma iwasédé hã te ãma ꞌre iꞌmadâꞌâ mono õ na ꞌre ĩhâimana mono da hã mare di za. Wa za tô te ãma ꞌre ꞌmadâꞌâ uꞌâsi.
9 Uburé ĩꞌãma dawatazé, ꞌre isimasa mono norĩ hã, duré Izaraéu tiꞌai ãma ihâiba amo norĩ dawatazéb da, ꞌre isimasa mono hã, te za dasiwi uprosi zaꞌra ni. Wa za duré uprosi, apito Zeroboã hã. Isihudu norĩ zama wa za uprosi.
Amosi duré Amaziaha me iwasuꞌu zahuré
10 Amazia, sasedoti Bétéu ãma ꞌre ihâimana mono hã ma tô ãne Izaraéu te, apito Zeroboãhã ma romreme hã tisõ:
— Amosi hã ma tô sima rowaꞌõtõ, asada hâimana da, aꞌuwẽ norĩ waꞌwa. Timreme hã ma tô tihi, dazaꞌrui ꞌremhã isimimnha hã.
11 Ta hã te te nasi ãma inharĩzé hã ãne: “Zeroboã te za dârâ, dasiꞌwapé na. Duré aꞌuwẽ Izaraéu te za waibu ni, da te simroi mono da, sito pese na dama ꞌre hâimana zaꞌra mono da, tizaꞌru nhiti.”
12 Taha pari te Amazia, Amosihi ma hã tinha ãne:
— ꞌRe ihâimana uꞌâsi mono zadawa ꞌmahârâꞌwa, maꞌãpé ã hawi aimorĩ! Apâ aimorĩ, Zuda asiptiꞌai u, tamep si ꞌRe ihâimana uꞌâsi mono mreme na ꞌre irobꞌmahârâ mono zarina asiꞌuparizéb da, ꞌre romhuri mono da.
13 Ãme Bétéu ãma dama ꞌre irobꞌmahârâ mono zé hã te za oto isazâ. E marĩ wa. Ã hã ꞌri, apito iwa ꞌre iwata mono zé wa, duré ã hã ꞌri, danhipaiꞌu ipire na dazaꞌrui ꞌre, ꞌre sa mono wa, ꞌRe ihâimana uꞌâsi mono ãma ꞌre idawata zaꞌra mono zéb da hã.
14 Amosi, ma te ãma sadaꞌâ ãne:
— Wa hã, ꞌRe ihâimana uꞌâsi mono zadawa ꞌmahârâꞌwa na ĩnhimiromhuri õ di. Duré taha na ĩsiꞌuparizéb da, te ꞌre romhuri mono õ di. Poneꞌẽrebâ ꞌmadâꞌâꞌwa na si, duré robꞌrã figu wede ꞌmadâꞌâꞌwa na zama wa tô ꞌre ĩhâimana.
15 Tane nherẽ, Uburé Danhibꞌapito, poneꞌẽrebâ ꞌmadâꞌâ na ĩnhimiromhuri te irẽme da hã, ma tô ĩma tiꞌru. Ma tô ĩma tinha ãne: “Mo oto aimorĩ, ĩnhibꞌaꞌuwẽ Izaraéu ma, ĩzadawa ꞌmahârâꞌwa na tãma aihâimana zaꞌra da.”
16 Tahawa, maꞌãpé Uburé Danhibꞌapito mreme hã wapari. A hã te inha, ãne: “Re ihâimana uꞌâsi mono zadawa ꞌmahârâ pipa na Izaraéu norĩ zada, ãma aihâimana tõ.”
17 Tane nherẽ, te duré Uburé Danhibꞌapito hã we aima tinha ãne: “Aimro te za aiwi aipiꞌra, siwaꞌâbâ zô aibâ ma, ꞌre isisõmri mono na tihâimanazéb u hã, ãme ꞌri nhoꞌõmo ãma. Aiꞌra siꞌaibâ norĩ hã, duré aiꞌra sipiꞌõ norĩ hã te za dasiꞌwapé na uburé pese aiwi tidâꞌâ zaꞌra za. Duré asaꞌru hã te za aꞌuwẽ norĩ te te sima waꞌõtõ. A hã te za atâ za, ꞌRe ihâimana uꞌâsi mono waihuꞌuꞌõꞌwa norĩ nhiptiꞌai ãma. Tawamhã aꞌuwẽ Izaraéu hã te za waibu ni, isiptiꞌa nhiti da te simroi mono da, sito pese na dama ꞌre hâimana zaꞌra mono da oto.”
