MAmosi 8:1-14
8 Uburé Danhibꞌapito, ãne marĩ te ꞌmadâꞌâ da hã, ma tô duré ĩnhotõ ꞌrowim ne ĩma hâiꞌré. Siꞌõno hã te nomro, robꞌrã isipo ré ꞌmasisi tâi uptabi na.
2 Te ãma ĩzadanha ãne:
— Amosi, e marĩ ma te merẽ iꞌmadâ.
— Siꞌõno ꞌmasisi na inomro, robꞌrã isipo ré hã! — Ãne wa tô ãma sadaꞌâ.
Tawamhã te duré ãne ĩma tinha:
— Robꞌrãsutuzé hã ma tô oto wi, aꞌuwẽ Izaraéu nhihudu norĩ ma hã, robꞌrã ꞌre isipo zaꞌra mono, za oto da te ꞌre isinarĩ zaꞌra mono ne. Ĩnhimihâzé hã te oto tãma ibaꞌa zahu zaꞌra da hã, mare di.
3 Tô taha bâtâ na hã danhoꞌre upana te za dasiwaꞌõ si tihâiba, apito nhimiromhurizé ꞌri ꞌrãihâ ꞌremhã. Duré daꞌahâ uptabi na te za tadâꞌâ zaꞌra ni. Te za duré dahâiba hâ norĩ hã siwaꞌru nimomo dasiwi sãmra zaꞌra ni. Taha wamhã, robꞌéꞌé zawi di za. Wa hã Uburé Danhibꞌapito, wa tinha.
ꞌRe ihâimana uꞌâsi mono, Izaraéu te te siwi iwẽꞌõ pese zé wasuꞌu
4 Isimarĩꞌõ norĩ ma, ꞌre irobꞌmanharĩ wasété zaꞌra waꞌaba mono norĩ, duré dama wapu na ꞌre ihâimana zaꞌra mono norĩ wi, ihâimanazé tiwi ꞌre iꞌuprosi zaꞌra waꞌaba mono norĩ, ĩwapari zaꞌra waꞌaba asiwi.
5 Ãne te asima ꞌre inharĩ uꞌâsi zaꞌra waꞌaba mo: “Aꞌamo itém na dato isiꞌutõrĩ suꞌu da si waptu na, amnho, wa te wede zaꞌra hâ! Duré dawaꞌutuzé sabadu isiꞌutõrĩ suꞌu da si, amnho trigu wa te wede zaꞌra hâ, ipibuzé pire, wa te ãma ꞌre tiꞌawi zaꞌra mono nherẽ, waꞌâbâ wazu na wa te oto ꞌre iwede zaꞌra mono da hã, senai õ na wa te dama ꞌre ipire pibu zaꞌra mono zéb zarina,
6 duré amnho trigu iwasétére hã wa te oto dama ꞌre iwede zaꞌra mono da hã. Isibrobꞌõ norĩ hã sirobꞌuiprazéb zaꞌra õ di za, marĩ waꞌâbâ ãna te te dawi ꞌre iwaibui mono te te ãma ꞌre iwaꞌâbâ zaꞌra mono zéb da hã, duré robꞌuiprazé ropisutu na te te dawi ꞌre iwaibui mono, tiparaꞌuza wapre te te ãma sima ꞌre iꞌuipra zaꞌra mono waꞌâbâ zéb da hã. Ãne wa, te za wama ꞌre siwede zaꞌra, taré wama romhuriꞌwa na pawaꞌâbâ ãna te te wama ꞌre romhuri zaꞌra mono da oto!”
7 Tahawa, Uburé Danhibꞌapito, aꞌuwẽ Izaraéu norĩ, tinhoꞌre na ãma ꞌre iwata zaꞌra mono hã ma tô ropisudu hã sima ꞌmanha ãne:
— Niwamhã ãma ĩpoꞌre siꞌâri da hã mare di za, uburé marĩ iwasédé te te ꞌre iꞌmanharĩ zaꞌra mono zém na hã.
8 Ãne wa, te za tiꞌa hã popo. Duré te za uburé iwa ꞌre idahâimana zaꞌra mono hã robzeiꞌõ zé te, ꞌre daꞌruꞌru. Tiꞌa hã hâimo siꞌréi mono nherẽ, te za duré apâ piꞌreba siꞌré, panhoꞌu Nilu â ne hã.
9 Taha bâtâ na hã wa za abzuma waꞌwam nherẽ, bâdâ isébré da hã ꞌmanha. Taha zarina, bâtâ ro te te robꞌuiwẽ ré hã, te za tiꞌa, robra hã suwa. Wa hã Uburé Danhibꞌapito, wa tinha.
10 Dato isaꞌẽne asima ꞌre iꞌmanharĩ zaꞌra waꞌaba mono hã, wa za ãma aiwi saprĩ zaꞌra waꞌwa za, adâꞌâ hâiba u, ꞌre idasiꞌrãꞌõtõ mono u. Tawamhã te za aiꞌruꞌru waꞌwa, iꞌasõꞌre zaꞌra waꞌaba upana. Robzeiꞌõ zé te, dasiꞌuzazém na te za asiꞌuza zaꞌra waꞌwa, daꞌuza ihâiro ꞌmanharĩ na. Te za duré asiꞌrãpari zaꞌra waꞌwa. Uburé te za a norĩ waꞌwa hã aiꞌruꞌru waꞌwa, damama iꞌra misi hã tiwi ꞌre idâꞌâ zaꞌra mono zô ꞌre iꞌruꞌru mono ne. Ã hã te za uburé isé pire na si tiꞌrãsutu.
11 — Bâdâ hã te za oto wi, uburé dazaꞌrui mono na mra, da te ꞌre isépata zaꞌra mono zé ma, te irobꞌruzé hã. Uburé te za mram na ꞌre dahâimana zaꞌra, dasazéb zô dawi sô ꞌre roꞌwanhiꞌriti zaꞌra mono õ nherẽ. Duré ꞌrubu na te za ꞌre dahâimana zaꞌra, â zô dawi sô ꞌre rowaptâꞌâ zaꞌra mono õ nherẽ. Uburé te za mrab zépatazém na, duré ꞌrubu zépata na ꞌre dahâimana zaꞌra, Uburé Danhibꞌapito mreme, da te ꞌre iwapari zaꞌra mono zéb zô si.
12 Tahawa, te za õne uꞌâ ꞌre dasisaꞌre, âporé Â warĩrĩ hawi, âporé Mediterãniu u. Hâiwa nhimire niwĩ ro ꞌre ihâimana mono u te za duré ꞌre dasisaꞌre, duré bâtâ pusizém niwĩ dazaꞌru ꞌre ihâimana zaꞌra mono norĩ u, Uburé Danhibꞌapito mreme zô ꞌre darĩtĩ zaꞌra mono da. Tane nherẽ, da te dasiwi isõpẽtẽ zaꞌra da hã mare di za.
13 Taha bâtâ mono na hã, aiꞌreputu norĩ, azarutu norĩ me siptete na ꞌre ihâimana zaꞌra mono norĩ hã te za ꞌre simizaꞌreseꞌõ siꞌutõrĩ zaꞌra, ꞌrubu zé te.
14 Samaria ãma romhâibarĩ norĩ nhisi na, te te dama ꞌre iropisutu zaꞌra mono norĩ hã, ãne te te dama ꞌre inharĩ zaꞌra mono hã: “Wa hã wa ropisutu, ihâibaꞌõ Dã na isisi na”, duré niha wamhã, “Wa ropisutu, Beseba na ihâibaꞌõ nhisi na” — uburé te za ã norĩ hã rere. Niwamhã iwahutu zahu zaꞌra da hã mare uptabi di za. Wa hã Uburé Danhibꞌapito, wa tinha.
