Amosi 9:1-15
9 Wa hã wa tô ꞌmadâ, Uburé Danhibꞌapito, danhimizama zatazéb ꞌrata sab ré hã. Ta hã te ãne ĩma tinha:
— Maꞌãpé ꞌri uparizé ꞌrãsutu mono bâ saꞌẽtẽ ahâ zaꞌra mono, uburé isãnaꞌratazé mono hã isãsãꞌã zaꞌra zéb u, uburé pese ꞌri para idahâimana zaꞌra norĩ ꞌrã nhisiwi ipru rereꞌe da. Tawamhã dahâiba ré idasimani zaꞌra hã, wa za dasiꞌwapé na uprosi. Niꞌwa isimani da hã mare di za. Duré niꞌwa hâiba ré ihâimana da hã mare uptabi di za.
2 Tiꞌai ꞌrowi sisisi nherẽ, adâ ꞌre ihâimana zaꞌra mono zéb u sihutu da, tane nherẽ, ta hawi wa za sani zaꞌra za. Duré hâimo hâiwa u te te saiꞌuri zaꞌra nherẽ, wa za apâ tiꞌai u ta hawi ãma siri zaꞌra.
3 Duré Carmeru na ẽtẽ ꞌrãihâ nhisi nhisiwi simaꞌuri zaꞌra nherẽ, isarina zaꞌra wa za ꞌre mo. Wa za waibu zaꞌra. Duré â ꞌrowi uptabi ĩwi simani zaꞌra nherẽ, wa za âporé â ꞌre wahi ihâimana ma tãma ꞌru zaꞌra, te te hâzub da.
4 Isitobꞌru norĩ te te siwi waibui wa, te te simroi mono wamhã, wa hã wa za dama waihuꞌu zahi, sibꞌézé ꞌwapa na da te dasiwi simro da. Wa za ta norĩ hã ꞌmadâꞌâ pese zaꞌra, mare di, iꞌwawib zaꞌra ĩsimapa zaꞌra da hã. Da te iꞌuprosi da si, wa za ꞌmadâꞌâ zaꞌra.
5 Uburé Danhibꞌapito, ꞌRe ihâimana uꞌâsi mono Iwaihuꞌu Pese Uptabi, tiꞌa te te upi wamhã, te za popo. Taha wa, iwa ꞌre idahâimana zaꞌra mono hã te za robzeiꞌõ zé te, taꞌruꞌru ni.Duré tiꞌa hâimo siꞌréi mono nherẽ, te za duré apâ piꞌreba siꞌré, panhoꞌu Nilu â ne hã.
6 ꞌRe ihâimana uꞌâsi mono, tinhorõwa hâimo uptabi ꞌre isãmra mono zéb da hã, te sima ꞌri. Te duré tiꞌa nhisiwi hâiwa tihi. Ta hã te duré âporé â te te ubumro, tiꞌa nhisiwi te te azaꞌwari mono da.Taha nhisi hã Uburé Danhibꞌapito.
7 Uburé Danhibꞌapito te tinha, ãne:
— Izaraéu nhihudu norĩ, ĩma aiwẽ uptabi na ꞌre aihâimana zaꞌra waꞌaba mono õ di, Etiopia ãma aꞌuwẽ norĩ nhipai u hã. Ezitu hawi te we iꞌasani zaꞌra waꞌaba ne, wa tô duré filisteu norĩ hã we sani zaꞌra, Creta na robꞌré zaꞌiti nhisi hawi. Arameu norĩ hã Qui na romnhisi hawimhã wa tô duré we sani zaꞌra.
8 Wa hã, Izaraéu dazaꞌru, ꞌre iwasété mono zé hã wa te te ꞌre ꞌmadâꞌâ. Tahawa, tiꞌa zô robaba da hã wa za ꞌmanha. Tane nherẽ, uburé Izaraéu nhihudu norĩ te iꞌuprosi da hã mare di. Wa hã Uburé Danhibꞌapito, wa tinha.
9 — Wa hã roti zahi te ãma ꞌmanharĩ zaꞌra wa, wa za iwẽ norĩ hã aimawi sõré, iwasété norĩ nhiti, Izaraéu ꞌremhã, trigu iwaꞌwa uptabi si da te ꞌre isaꞌwari zaꞌra mono ne, da te simini ãna, misi iwaꞌware hã.
10 Uburé ĩnhibꞌaꞌuwẽ norĩ wasété na ꞌre ihâimana zaꞌra mono norĩ hã te za dasiꞌwapé na aiꞌutõ, ãne na uburé te te inharĩ zaꞌra norĩ hã: “ꞌRe ihâimana uꞌâsi mono, siwaꞌru marĩ ipipa, ꞌrâwim na wazô watobro zaꞌra da, te te tãma isaꞌré da hã mare di za.”
Aptoꞌoré Izaraéu norĩ, rowẽ na si za oto ꞌre ihâimana zaꞌra mono zé wasuꞌu
11 Uburé Danhibꞌapito te tinha, ãne:
— Tô taha bâtâ mono na, apito Davihi nhimiꞌmadâꞌâzé wa za apâ wahutu, ꞌri iwaptãꞌã ne hã. Duré nima norĩ ꞌri naꞌrada isipru hã wa za apâ te anhito. Wa za duré apâ wahutu, ꞌri hã sipru pese na ihâimana hã, imorĩꞌrata na ꞌri wẽ na isam ne apâ sab da.
12 Tawamhã ĩnhibꞌaꞌuwẽ norĩ, Edõ na dazaꞌru nhisi isiꞌatarẽme ãma, duré ĩte na aré daro mono bâ aꞌuwẽ ĩma ꞌre ihâimana zaꞌra mono norĩ ãma, te za aiꞌuté zaꞌra. Wa za uburé ãne na marĩ hâimana da hã ꞌmanha. Wa hã, Uburé Danhibꞌapito, wa tinha.
13 — Bâdâ hã te za tô oto wi, trigu waptui pese na ꞌre prédub zaꞌra mono wa, da te ꞌre itehâri waihuꞌu zaꞌra mono õ zéb da hã. Duré uva ꞌru ꞌrã waptu na ꞌre ꞌrã zaꞌra mono wa, iꞌrãi waꞌu hã da te ꞌre isõꞌu waihuꞌu zaꞌra mono õ zéb da hã. Uva ꞌru ꞌrã hã ꞌrãi pese uptabi wa, te za iwaꞌu hã sima iwẽ na ꞌre praba, panhoꞌõmo â, ꞌre iprababa mono ne.
14 Ĩnhibꞌaꞌuwẽ norĩ, darob amoi ãma sito pese na ꞌre ihâimana zaꞌra mono zém hawi, wa za isiptiꞌai u hã apâ te simro. Ta norĩ hã te za apâ ꞌri nhoꞌõmo norĩ sipru pese na ihâimana zaꞌra norĩ hã te te siwi ꞌri nhoré, iwa ꞌre hâimana zaꞌra mono da oto. Tawamhã te za uva ꞌru hã iwa te te ꞌre zuri. Te za duré iwaꞌu hã te te ꞌre âhuri. Te za duré robꞌre te te ꞌre izuri mono ꞌrã hã te te ꞌre huri.
15 Ĩnhibꞌaꞌuwẽ norĩ na, wa za robꞌre, tiꞌa te tãma isõmri zaꞌra ꞌremhã. Tawamhã niwamhã taha wimhã da te isani zaꞌra da hã mare di za. Wa hã, Uburé Danhibꞌapito, ate zaꞌra waꞌwa, ꞌRe ihâimana uꞌâsi mono hã wa tinha.
