Éfézu 5:1-33
5 A norĩ waꞌwa hã, ꞌRe ihâimana uꞌâsi mono ꞌra tãma isawi uptabi na te oto ꞌre anomro aba mo. Tahawa, maꞌãpé ihâimanazé hã ꞌre sizusi uꞌâsi zaꞌra waꞌaba mono.
2 Maꞌãpé duré dazawizé hã aima ꞌre hâimana zaꞌra waꞌaba mono, Cristu hã te te ꞌre iwaꞌazawi pese mono ne. Ta hã danhoprubzém ne, ma tô wazada sisõmri zaꞌra, dâꞌâ da, danhimizama, da te ꞌre izata zaꞌra mono isadazei uptabi ꞌRe ihâimana uꞌâsi mono ma, te te ꞌre irowẽ mono ne.
3 A norĩ waꞌwa hã ꞌRe ihâimana uꞌâsi mono nhibꞌaꞌuwẽ te oto ꞌre aihâimana zaꞌra waꞌaba mo. Tahawa, dasina dahâimana hã duré danhiséb õ na marĩ ꞌmanharĩ wasédé duré marĩ iwasété zô si dasima robꞌruiwapari pe hã, ã norĩ hã ꞌre ꞌmanharĩ zaꞌra waꞌaba mono da, ãma asima ꞌre rosaꞌrata wasété zaꞌra waꞌaba mono tõ, isazeiꞌõꞌwa norĩ hã aiwasédé te te aiꞌãma ꞌre saꞌra zaꞌra waꞌaba mono tõ da.
4 Duré marĩ iwasété na aimreme nhisébꞌõ na asima ꞌre robzanhamri zaꞌra waꞌaba mono tõ, duré aimreme to na hã niwamhã duré aimreme nhipese na zama, ã norĩ hã aiꞌãma ꞌre ihâimana zaꞌra waꞌaba mono da hã, sadai õ wa. Tazahã, ꞌRe ihâimana uꞌâsi mono ãma aimreme na ꞌre aiwata zaꞌra waꞌaba mono sina asima ꞌre robzanhamri zaꞌra waꞌaba mono, sõpru uptabi wa, ta hã.
5 Ã hã tô sena na waihuꞌu pese sina ꞌre aihâimana zaꞌra waꞌaba mono: Niꞌwa hã sébré waihuꞌu õ di za, Cristu hã duré ꞌRe ihâimana uꞌâsi mono me daꞌãma ꞌre isibꞌaꞌuwẽ zahuré mono zéb u hã, dasina dahâimana na ꞌre ihâimana mono hã duré danhiséb õ na marĩ ꞌmanharĩ wasété na ꞌre ihâimana mono, duré marĩ iwasété zô si te te sima ꞌre irobꞌruiwapari pese mono hã. (Marĩ iwasété zô si dasima robꞌruiwapari pe hã, ta hã tô ꞌRe ihâimana uꞌâsi mono upana marĩ aimawi ãma ꞌre idawata zaꞌra mono zé).
6 ꞌRe asiꞌmadâꞌâ pese zaꞌra waꞌaba mono, niꞌwa hã tizadawa nhipese na te te ꞌre irowasuꞌu mono na te te aima ꞌre robꞌrãmi zaꞌra waꞌaba mono tõ da, senaiꞌõ nherẽ. E marĩ wa. Ãne uꞌâbâ te za ꞌRe ihâimana uꞌâsi mono nhimihâzé hã ꞌre rereꞌe, niꞌwam norĩ isimiroti te te ꞌre iꞌmadâꞌâ zaꞌra mono õ norĩ nhisiwimhã.
7 Tahawa, ãne na ꞌre idahâimana wasété zaꞌra mono norĩ siré hã, ꞌre aihâimana zaꞌra waꞌaba mono tõ.
8 Duréihã ꞌre saze zaꞌra waꞌaba mono õ ré hã, robra na te aré ꞌre aihâimana zaꞌra waꞌaba mono. Tane nherẽ, ãhã na hã oto Wanhibꞌapito ãma ꞌre anomro aba mono wa, te oto rowaꞌa na si ꞌre anomro aba mo. Tahawa, maꞌãpé rowaꞌa te aꞌuwẽ na si ꞌre anomro aba mono.
9 E marĩ wa. Rowaꞌa hã te za roptehâri isaꞌẽtẽ ne te te dama ꞌre aꞌmanharĩ, imono bâ dahâimana wẽ na ꞌre idanomro mono zé hã, duré awaꞌawi na dahâimanazé hã duré tô sena na dahâimanazéb zama.
10 Duré sô ꞌre robꞌruiwapari zaꞌra waꞌaba mono, marĩ Uburé Danhibꞌapito ma te te ꞌre irowẽ mono zéb zô si, ꞌre waihuꞌu zaꞌra waꞌaba mono da.
11 Robra na si ꞌre danomro mono wa, marĩ iwasédé da te ꞌre iꞌmanharĩ zaꞌra mono na dasiré ꞌre aihâimana zaꞌra waꞌaba mono tõ. Iwaꞌrãmi rowaꞌa u ꞌre ãwisi zaꞌra waꞌaba mono, dahâimanazé iwasédé hã.
12 E marĩ wa. Ta norĩ hã marĩ iwasédé piꞌuriwi te te ꞌre iꞌmanharĩ zaꞌra mono hã iwasuꞌu da hã sõꞌawi, wazéb di tô.
13 5:13-14 Tane nherẽ, uburé marĩ hã sõꞌawi te za oto ꞌre hâimana zaꞌra, rowaꞌa u da te ꞌre ãwisi zaꞌra mono wamhã. Duré uburé marĩ sõꞌawi oto ihâimana zaꞌra hã, rowaꞌa na te za oto ꞌre hâimana zaꞌra. Tahawa, wa wa te ꞌre nharĩ zaꞌra, ãne:
“A hã iꞌasõno hã, maꞌãpé atopoꞌo!Maꞌãpé aiwahutu, dadâꞌâ na ꞌre idahâimana zaꞌra mono zém hawi. Tawamhã Cristu hã te za oto aima robꞌuiwẽ.”
14 ꞌMadâꞌâ 5:13
15 Tahawa, maꞌãpé aihâimanazém na ãma ꞌre pibui pese zaꞌra waꞌaba mono. Iꞌrã nhimizaꞌreseꞌõ norĩ hâimanazém ne, ꞌre aihâimana zaꞌra waꞌaba mono tõ. Iꞌrã nhimizaꞌrese wẽ norĩ ꞌre ihâimana zaꞌra mono zém ne si ꞌre aihâimana zaꞌra waꞌaba mono.
16 Ãhã na bâtâ mono na ꞌre iwahâimana zaꞌra mono zé hã wasété uptabi di. Tahawa, maꞌãpé bâdâ aima ꞌre ihâimana zaꞌra waꞌaba mono hã ꞌre ꞌmanharĩ wẽ zaꞌra waꞌaba mono, ãma ꞌre pibui pese zaꞌra waꞌaba mono sina.
17 Tahawa, aiꞌrã nhimizaꞌrese ãna ꞌre aihâimana zaꞌra waꞌaba mono tõ. Tazahã, Uburé Danhibꞌapito te te sima ꞌre iwẽ mono zé, ꞌre waihuꞌu zaꞌra waꞌaba mono da si, asima sô ꞌre robꞌruiwapari zaꞌra waꞌaba mono.
18 Âzé na ꞌre asiꞌrãiwamnarĩ zaꞌra waꞌaba mono tõ. E marĩ wa. ꞌRe asiꞌrãiwamnarĩ zaꞌra waꞌaba mono wamhã, taha na te za aihâimanazé hã asiwi ꞌre iꞌuprosi zaꞌra waꞌaba mo. Tazahã, ꞌRe ihâimana uꞌâsi mono Pẽꞌẽzani na si aihâiba hã ꞌre ꞌmasisi zaꞌra waꞌaba mono.
19 Asiré ãma asima ꞌre rowẽ zaꞌra waꞌaba mono, Salmu ãma danhoꞌre na duré Uburé Danhibꞌapito ãma dawatazém na danhoꞌre na zama. Taha na aipẽꞌẽ na ãma ꞌre aiwata zaꞌra waꞌaba mono.
20 Wanhibꞌapito Zezu Cristuhu nhisi na, Wamama ꞌRe ihâimana uꞌâsi mono ãma ꞌre aiwata zaꞌra waꞌaba mono, uburé marĩ iwẽ waꞌãma ꞌre ihâimana zaꞌra mono zém na.
21 Asiré isazeiꞌwa norĩ zahâpâ ꞌre aihâimana zaꞌra waꞌaba mono da, ꞌre asiꞌmadâꞌâ zaꞌra waꞌaba mono aiwapu na, Cristu hã ꞌre iwazé pese zaꞌra waꞌaba mono zéb zarina.
Piꞌõ imro ré ma roti, duré aibâ imro ré ma zama
22 Piꞌõ imro ré norĩ, aimro zahâpâ ꞌre aihâimana zaꞌra waꞌaba mono, Wanhibꞌapito zahâpâ ꞌre iꞌaihâimana zaꞌra waꞌaba mono ne.
23 E marĩ wa. Damro aibâ hã timro ꞌrã na ꞌre hâimana zaꞌra mono wa, Cristu hã isazeiꞌwa norĩ ꞌrã na ꞌre ihâimana mono ne. Duré isazeiꞌwa norĩ hã Cristuhu hâiba te ꞌre hâimana zaꞌra. Cristu hã ta norĩ nhoꞌreptuiꞌwa, te ꞌre hâimana.
24 Tahawa, isazeiꞌwa norĩ hã Cristuhu zahâpâ ꞌre ihâimana zaꞌra mono ne, tane te za duré piꞌõ imro ré norĩ hã timro zahâpâ ꞌre hâimana zaꞌra.
25 Aibâ imro ré norĩ, aimro hã ꞌre sawi pese zaꞌra waꞌaba mono, Cristu hã tizazeiꞌwa norĩ te te ꞌre iꞌazawi pese mono ne, duré tihâiba hã sawi ãna te te sada isõmri zaꞌra ne, sawi te zaꞌra.
26 Isazeiꞌwa norĩ hã wẽ uptabi na wasété ãna ꞌre hâimana zaꞌra mono da, ma tô ãne hã ꞌmanha. Â na marĩ, da te ꞌre iꞌupsõ zaꞌra mono ne, ma tô tinhimiroti na aꞌupsõ, iwasété hawi.
27 Ma tô duré ãne hã ꞌmanha, isazeiꞌwa norĩ hã wẽ uptabi na sitẽme ꞌrâwi te te ãwisi zaꞌra da, wasété ãna duré iwasédé hã da te ãma ꞌre saꞌra waihuꞌu mono ãna, zazahâ ihâ uptob õ ne duré ihâꞌrãꞌru õ ne duré niwamhã marĩ siwaꞌru aimawi iwasédé ãma ihâimana õ ne.
28 Tane duré, aibâ imro ré norĩ hã timro te za te te ꞌre sawi pese zaꞌra, tihâiba hã ꞌrâwi te te ꞌre isawi pese zaꞌra mono ne. Aibâ hã timro te te ꞌre isawi pese mono hã, ta hã te tô ꞌre sisawi pese.
29 E marĩ wa. Niꞌwa hã tihâiba ꞌrâwimhã te te siwi ꞌruiwapari waihuꞌu õ di. Tazahã, te za te te tãma ꞌre a. Te za duré te te ꞌre ꞌmadâꞌâ wẽ tihâiba hã, Cristu hã tizazeiꞌwa norĩ te te ꞌre iꞌaꞌmadâꞌâ wẽ mono ne.
30 E marĩ wa. Wa norĩ hã Cristuhu hâiba, wa ꞌre wahâimana zaꞌra.
31 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré te nomro, ãne: “Ãne wa, aibâ hã mro wamhã, te za timama norĩ hã rẽme zahuré tina me, timro me, siꞌãma hâiba sitob zahuré da. Tawamhã maparane ihâiba nherẽ, misi ihâiba ne te za oto ꞌre hâimana zahuré.”
32 Ã hã ipire uptabi waihuꞌu ãna aré ꞌre ihâimana mono. Tazahã, wa hã te iwaihuꞌu na hã Cristuhu zama te wasuꞌu, duré isazeiꞌwa norĩ zama*.
33 Tahawa, aibâ imro ré norĩ, aihâiba mono bâ te za aimro ꞌre isawi pese zaꞌra waꞌaba mo, ꞌrâwi ꞌre iꞌasisawi pese zaꞌra waꞌaba mono ne. Tane duré piꞌõ imro ré norĩ, aimro te za ꞌre iwazé pese zaꞌra waꞌaba mo.
Ĩwaꞌõtõ piꞌreba watsuꞌu mono
^ 5:32 Aibâ imro hã, Cristu te wasuꞌu. Duré piꞌõ imro hã, isazeiꞌwa norĩ te wasuꞌu.
