Éfézu 6:1-24
6 Daꞌra norĩ, aimama hã ꞌre wapari pese zaꞌra waꞌaba mono, ana zama, Wanhibꞌapito ãma ꞌre aihâimana zaꞌra waꞌaba mono wa. E marĩ wa. Ã hã dahâimanazé iꞌuwaibaba hã.
2 ꞌRe ihâimana uꞌâsi mono tinhimiroti te te isõmri hã, imorĩꞌrata na te te iropisutu siré, ã hã: “Aimama ꞌre wazé pese mono duré ana zama,
3 uburé marĩ aima ꞌre wairébé wẽ mono da, duré ꞌre aihâimana hâ mono da, tiꞌai ãma hã.”
4 Damama norĩ, aiꞌra norĩ ma, ꞌre pẽtẽ uꞌâsi zaꞌra waꞌaba mono tõ, tiwi ꞌre robzeiꞌõ pese zaꞌra mono tõ da. Iwaꞌrãmi, ꞌre prédu wẽ zaꞌra waꞌaba mono ꞌrãi waihuꞌu wẽ na. Duré tãma ꞌre roti pese zaꞌra waꞌaba mono, Wanhibꞌapito nhimiroti na hã.
Wadaꞌuri zarina titedeꞌwa nhorõwa ꞌre romhuriꞌwa norĩ ma rotizé duré itedeꞌwa norĩ ma zama
5 Aiwadaꞌuri zarina atedeꞌwa nhorõwa ꞌre romhuriꞌwa norĩ, ꞌre wapari pese zaꞌra waꞌaba mono, tiꞌai ãma atedeꞌwa na aima ꞌre ihâimana zaꞌra waꞌaba mono hã, tãma aipahi sina duré ꞌre wazé pese zaꞌra waꞌaba mono sina. Ãne hã tô sena ꞌre ꞌmanharĩ zaꞌra waꞌaba mono aipẽꞌẽ na, Cristu hã ꞌre iwapari pese zaꞌra waꞌaba mono ne.
6 Isõꞌa si ꞌre iwapari pese zaꞌra waꞌaba mono da hã, mare di, te te ꞌre aiwẽsãmri zaꞌra waꞌaba mono zô hã. Tazahã, aiwadaꞌuri zarina Cristuhu ma romhuriꞌwa na ꞌre aihâimana zaꞌra waꞌaba mono. ꞌRe ihâimana uꞌâsi mono te te sima ꞌre iwẽ mono zép si ꞌre ꞌmanharĩ wẽ zaꞌra waꞌaba mono, aipẽꞌẽ na.
7 Ato sina ꞌre romhuri zaꞌra waꞌaba mono, atedeꞌwa norĩ ma hã. Wanhibꞌapito ma ꞌre iromhuri zaꞌra waꞌaba mono ne, ãma ꞌre rosaꞌrata zaꞌra waꞌaba mono. Mare di, tiꞌai ãma dama si hã.
8 Maꞌãpé ãma ꞌre aipoꞌre puꞌu zaꞌra waꞌaba mono, ãne na: Wanhibꞌapito hã te za te te dama ꞌre awaꞌâbâ, da te ꞌre iromhuri wẽ zaꞌra mono zéb zarina, wadaꞌuri zarina titedeꞌwa nhorõwa ꞌre romhuriꞌwa norĩ ma, duré niwamhã wadaꞌuri ãna ꞌre ihâimana zaꞌra mono norĩ ma zama.
9 Wadaꞌuri zarina romhuriꞌwa norĩ tedeꞌwa norĩ, maꞌãpé ta norĩ hã ꞌre wazé pese zaꞌra waꞌaba mono. Duré tãma ꞌre amhâzépa zaꞌra waꞌaba mono tõ, tãma ꞌre robꞌmanharĩ wasété zaꞌra waꞌaba mono da hã. Ãma ꞌre aipoꞌre puꞌu zaꞌra waꞌaba mono, a norĩ waꞌwa duré wadaꞌuri zarina titedeꞌwa nhorõwa ꞌre romhuriꞌwa norĩ me hã, simisutu ꞌre iꞌaihâimana zaꞌra waꞌaba mono na, asiré Asibꞌapito zaꞌra waꞌwa hâiwa ãma ꞌre isãmra mono te na, ta hã uburé aiwapsi te te ꞌre idaꞌaꞌmadâꞌâ mono te na.
ꞌRe ihâimana uꞌâsi mono hã, tiwaihuꞌu pese na te te ꞌre iwaꞌapawapto mono zé, waꞌruiꞌwa zada
10 Wa za oto aima roti ꞌrãsutu zaꞌra waꞌwa: Maꞌãpé ꞌre asiptete uꞌâsi zaꞌra waꞌaba mono, Wanhibꞌapito ãma hã duré iwaihuꞌu pe isiptete uptabi ãma zama.
11 Dasiꞌwapéi ꞌmanharĩꞌwa norĩ uza ihâtete ne, ꞌRe ihâimana uꞌâsi mono te te aima ꞌre iꞌanhomri aba mono na, asiꞌuza zaꞌra waꞌaba, asiptete sina ꞌre aihâimana zaꞌra waꞌaba mono da, Waꞌuburé nhimimramizé wi hã.
12 E marĩ wa. Tiꞌai ãma wasiré aꞌuwẽ norĩ hã wa te ꞌre ꞌwapé zaꞌra mono õ wa. Tazahã, hâiwa nhoꞌre na siptete na ꞌre ihâimana zaꞌra mono, wa wa te ꞌre ꞌwapé zaꞌra, roti wasétéꞌwa norĩ duré isimiroti wasété pire norĩ duré siptete na tiꞌai ãma isazeiꞌõꞌwa norĩ robra na ꞌre ihâimana zaꞌra mono norĩ te te ꞌre iwadaꞌuri wasété zaꞌra mono norĩ hã.
13 Tahawa, uburé dasiꞌwapéi ꞌmanharĩꞌwa norĩ uza ihâtete ne, ꞌRe ihâimana uꞌâsi mono te te aima ꞌre iꞌanhomri aba mono na, asiꞌuza zaꞌra waꞌaba, asiptete sina ꞌre aihâimana zaꞌra waꞌaba mono da, bâdâ iwasédé asô ꞌre sihutu aba mono wamhã, duré marĩ te te ꞌre airési zaꞌra waꞌaba mono ãna asiptete sina ꞌre aihâimana zaꞌra waꞌaba mono da, aiꞌwapé zaꞌra waꞌaba zé hã ꞌre ꞌrãsutu zaꞌra mono parimhã.
14 Tahawa, asiptete sina ꞌre anomro aba mono. Dasiꞌwapéi ꞌmanharĩꞌwa norĩ usisizém ne, tô sena ꞌRe ihâimana uꞌâsi mono nhimiroti na asiꞌusisi zaꞌra waꞌaba. Duré dasiꞌwapéi ꞌmanharĩꞌwa norĩ tinhoꞌutu ubuzé te te sima ꞌre iséme mono ne, asima séme aba. Ta hã ꞌre iꞌanomro wẽ waꞌaba mono zé, te wasuꞌu.
15 Duré aipara uza ne asima séme aba, ꞌre iꞌasisaꞌra pese aba mono zé hã, Rowasuꞌuwẽ ité rowẽ uꞌâsi ꞌre idanomro mono zé hã dama ꞌre ꞌmahârâ zaꞌra waꞌaba mono da.
16 Duré ibaihâ zapoto ꞌmanharĩ na dasimapazém ne, ꞌRe ihâimana uꞌâsi mono hã asina ꞌre umnhasi zaꞌra waꞌaba mono, taha na ꞌre aimapa zaꞌra waꞌaba mono da, Iwasété Uptabi nhimihâzé poꞌo ꞌwa roꞌo wi hã.
17 Daꞌrãzaza itete ne* waibui waꞌaba danhoꞌreptuzé hã. Duré ꞌRe ihâimana uꞌâsi mono nhimiroti hã sibꞌézé ꞌwapa ne, ꞌre ꞌwasari aba da, waibui waꞌaba, ꞌRe ihâimana uꞌâsi mono Pẽꞌẽzani te te aima ꞌre iꞌanhomri aba mono hã.
18 Uburé ãne hã ꞌre ꞌmanharĩ zaꞌra waꞌaba mono, ꞌRe ihâimana uꞌâsi mono wi ꞌre rowaptẽrẽ zaꞌra waꞌaba mono sina, duré isimipawaptobzé tiwi ꞌre waptẽrẽ zaꞌra waꞌaba mono sina. Tiwi ꞌre rowaptẽrẽ uꞌâsi zaꞌra waꞌaba mono, ꞌRe ihâimana uꞌâsi mono Pẽꞌẽzani te te aima ꞌre iwaihuꞌu zaꞌra waꞌaba mono zéb zarina. Asimizaꞌrese sina ꞌre aihâimana zaꞌra waꞌaba mono. Aiwi ꞌre robzeiꞌõ zaꞌra waꞌaba mono tõ. Duré ꞌre rowaptẽrẽ uꞌâsi zaꞌra waꞌaba mono, uburé ꞌRe ihâimana uꞌâsi mono nhibꞌaꞌuwẽ norĩ ropâ ꞌre ihâimana zaꞌra mono ãma.
19 Duré ĩꞌãma zama ꞌre rowaptẽrẽ zaꞌra waꞌaba mono, ꞌRe ihâimana uꞌâsi mono hã iꞌuwaibaba na tizadawa wasuꞌu hã te te ĩma ꞌre awaihuꞌu mono da, taha na te ꞌre rowasuꞌu mono wamhã, ĩpahi ãna te dama ꞌre rowasuꞌu mono da, Rowasuꞌuwẽ ité waihuꞌu ãna aré ꞌre ihâimana mono hã sõꞌawi te dama ꞌre wasuꞌu mono da, da te oto ꞌre waihuꞌu wẽ zaꞌra mono da.
20 Cristuhu wasuꞌuꞌwa na wa ꞌre ĩhâimana. Rowasuꞌuwẽ ité hã te ꞌre iwasuꞌu mono uꞌâbâ, wa dazazéb ꞌremhã za. Tahawa, ĩꞌãma ꞌre rowaptẽrẽ zaꞌra waꞌaba mono, ĩpahi ãna ꞌre ĩhâimana mono da, duré Rowasuꞌuwẽ itém na te dama ꞌre robꞌmahârâ mono da, te ãma ꞌre uwaimrami mono da, iwasuꞌu na hã.
Paulu hã te te iroti ꞌrãsutuzé
21 Tiquicu, wasisãnawã wama isawi pe hã duré Wanhibꞌapito ma umnhasi na romhuriꞌwa hã, te za aima ĩwasuꞌu pese zaꞌra waꞌwa, waihuꞌu zaꞌra waꞌaba da, ãhã na niha ĩhâimanazém na.
22 Wa ãma atẽme satõrĩ zaꞌra waꞌwa, te te aima wawasuꞌu zaꞌra waꞌaba da, niha hã ãme iwahâimana zaꞌra zém na, te te aima wawasuꞌu zaꞌra waꞌaba wa, taha na asima rowẽ zaꞌra waꞌaba da.
23 Wamama ꞌRe ihâimana uꞌâsi mono wi, wa te te ꞌre rowaptẽrẽ, duré Wanhibꞌapito Zezu Cristuhu wi, rowẽ uꞌâ hã te te aima ꞌre sõmri zaꞌra waꞌaba mono da, duré asimizawizé hã, asina ꞌre iꞌumnhasi zaꞌra waꞌaba mono siré.
24 Duré ꞌRe ihâimana uꞌâsi mono nhimizawizé hã Wanhibꞌapito Zezu Cristu uburé te te ꞌre iꞌazawi pese mono norĩ ãma ꞌre ihâimana mono da si iwẽ hã, isimizawizé iꞌrãsutu waihuꞌu õ hã!
Ĩwaꞌõtõ piꞌreba watsuꞌu mono
^ 6:17 Daꞌrãzaza itede “danhoꞌreptuzé” te wasuꞌu. Duré sibꞌézé ꞌwapa hã “ꞌRe ihâimana uꞌâsi mono nhimiroti ibaihâ” te wasuꞌu.
