Filemo 1:1-25
1 1:1-2 Wa hã Paulu, Cristu Zezusihi zazeiꞌwai uꞌâbâ, dazazéb ꞌre, ꞌre ĩza mono hã, duré wasisãnawã Timotiuhu siré, wa ãma aima robꞌuiꞌéré, Filemoho ma, wasiwaihu duré Wanhibꞌapito ma wasiré romhuriꞌwai ma, duré wasiré isazeiꞌwa norĩ, asõrõwa ãma ꞌre isiꞌrãꞌõtõ mono norĩ ma hã. Ã hã robꞌuiꞌéré hã duré wahidiba Afia ma, duré wasisãnawã Arquipu ma zama, robzépata na wasiré ꞌre ihâimana mono ma, Wanhibꞌapito ma romhuri na.
2 ꞌMadâꞌâ 1:1
3 ꞌRe ihâimana uꞌâsi mono nhimizawizé iwaꞌâbâ õ, duré rowẽ Wamama te hã duré Wanhibꞌapito Zezu Cristuhu te zama, asiré ꞌre ihâimana uꞌâsi zaꞌra mono da si, iwẽ hã.
4 ꞌRe ihâimana uꞌâsi mono ãma wa ꞌre ĩwata uꞌâsi. Wa duré aiꞌãma ꞌre ĩpoꞌre puꞌu uꞌâsi, te ꞌre rowaptẽrẽ mono nhidâpâ,
5 uburé ꞌRe ihâimana uꞌâsi mono nhibꞌaꞌuwẽ norĩ, ꞌre iꞌazawi pese mono zém na te ꞌre wapari mono wa, duré Wanhibꞌapito Zezu Cristu hã asina ꞌre iꞌumnhasi mono zém na zama.
6 ꞌRe ihâimana uꞌâsi mono wi, wa te te ꞌre waptẽrẽ, asina ꞌre iꞌumnhasi mono zéb zarina, marĩ iwẽ na wama ꞌre isõpru mono zé hã, da te ꞌre ꞌmadâꞌâ waihuꞌu zaꞌra mono da, marĩ iwẽ hã waꞌãma ꞌre ihâimana zaꞌra mono hã, Cristuhu ma romhurizéb ꞌremhã.
7 Ĩsisãnawã, asimizawi pese na ꞌre iꞌaihâimana mono zé hã, rowẽ isaꞌẽne hã te te ĩma sina ꞌre sani, duré ĩnhibꞌru hã. Te duré uburé ꞌRe ihâimana uꞌâsi mono nhibꞌaꞌuwẽ norĩ hã ꞌre iꞌarowẽ zani mo.
8 Tahawa, wasiré Cristuhu zazeiꞌwa na ꞌre wahâimana mono wa, ĩma waihuꞌu pese di, te ãma aiwi iwaptẽrẽ zahi da hã, marĩ ꞌre iꞌabꞌmanharĩ mono da hã.
9 Tane nherẽ, ĩma iꞌasawi zarina, marĩ misi, wa za aiwi waptẽ. Wa hã Paulu, wa tô ĩhâiba prédu duré dazazéb ꞌre wa za, Wanhibꞌapito Cristu Zezusihi uꞌâbâ.
10 Taha wa, wa aiwi waptẽ, ĩzawi zarina Onezimuhu ma. Ta hã ma tô oto ĩꞌra na* ĩma tihâiba, ãme dazazéb ꞌremhã.
11 Duréihã, aré marĩ da, aima ꞌre hâimana mono õ di. Tane nherẽ, ãhã na hã wẽ di oto marĩ da hã, duré ĩma zama.
12 Ãhã na hã, apâ wa ãma atẽme satõ. Duré isiré wa za ĩpẽꞌẽ na ĩhâiba, tame.
13 Wa aré ĩsima wẽ, Rowasuꞌu wẽ itéb uꞌâbâ, dazazéb ꞌre ĩzab ꞌré, ãme ĩꞌrata aꞌâ sãmra da hã, te te ĩpawaptob da, asibrob ꞌre.
14 Tane nherẽ, ãne hã te ꞌmanharĩ õ di za, ĩma ꞌrui õ nherẽ, te aiwi iwaptẽrẽzé hã aiwati zahi zarina ꞌmanharĩ tõ da. Tazahã, asima iwẽ zéb zarina.
15 Ãté niwamhã, Onezimu hã ma tô aiwi aiꞌré suru na, niwa apâ atẽme wisi wa, asiré ꞌre hâimana uꞌâsi mono da oto.
16 Asiré te za apâ tihâiba za, mare di romhuriꞌwa na hã. Tazahã, romhuriꞌwa na ꞌre idahâimana zaꞌra mono nhipai u, asisãnawã aima isawi uptabi na oto. Ĩma sawi uptabi di. Tane ĩnhipai u aima sawi uptabi di za oto, ta hã. Asiré hâimana wapsi õ di. Tazahã duré asisãnawãi wa, asiré Wanhibꞌapito zazeiꞌwai wa.
17 Tahawa, asiré romhuriꞌwa na ꞌre ĩꞌmadâꞌâ mono wamhã, maꞌãpé âri wẽ na Onezimu hã, wa hã aré ĩꞌâri wẽ ne.
18 Marĩ hã te te aima ꞌmanharĩ wasété wamhã, duré marĩ te te aima iwaꞌâbâ õ, iré wamhã, ta hã uburé ĩma hâimana, ĩte marĩ te dama ꞌre iꞌawaꞌâbâ mono zéb ꞌre.
19 Wa hã Paulu, ĩnhibꞌrata na wa za oto ãma robꞌuiꞌéré, ĩsiꞌuihâ na: Uburé wa za waꞌâ za. (Tawamhã duré wa hã ĩnhimnhasi õ di za, te aima inharĩ da hã, azama aihâimanazém na ĩma iwaꞌâbâ da hã, wa hã te aiꞌãwisi wa, Cristu hã saze da hã.)
20 Tahawa, ĩsisãnawã, wa ãma aiwi waptẽ, maꞌãpé ꞌmanharĩ ã hã ĩzawi zarina, te ãma aiwi iwaptẽrẽzé hã, Wanhibꞌapito uꞌâbâ, ĩpẽꞌẽ ꞌremhã ĩma rowẽ da, wasiré Cristuhu zazeiꞌwai wa.
21 Te ãma aiwi iwaptẽrẽzém na te iꞌaiꞌumnhasizéb zarina wa ãne hã ãma aima robꞌuiꞌéré, za iꞌmanharĩ na hã. Duré ĩma aiwaihuꞌu pese di, te ãma aiwi iwaptẽrẽzém nhipai u, za iꞌmanharĩ na hã.
22 Duré taha siré hã, dazaꞌwarizé hã ĩzô ꞌmaipisutu. E marĩ wa. Wa robꞌumnhasi, ĩꞌãma irowaptẽrẽ zaꞌra waꞌaba zéb zarina, ꞌRe ihâimana uꞌâsi mono hã te te ĩma irowairébé da si, apâ duré ãma ĩwisi da, te asabu zaꞌra waꞌaba da.
23 Epafra hã, wasisãnawã Wanhibꞌapito Cristuhu uꞌâbâ dazazéb ꞌre ĩsiré isa hã, te ãma asawi zaꞌra waꞌwa.
24 Duré Marcu, Aristarcu, Demasi, duré Lucas, ĩsiré Wanhibꞌapito ma romhuriꞌwa norĩ hã te duré ãma asawi zaꞌra waꞌwa.
25 Wa hã wa duré ꞌre ĩmreme uꞌâsi, Wamama ma, aiꞌãma zaꞌra waꞌaba, Wanhibꞌapito Zezu Cristu hã aipẽꞌẽ ꞌre, te te ꞌre aipawaptob uꞌâsi zaꞌra waꞌaba mono da, robzei uꞌâsi, ãma ꞌre anomro aba mono da.
Ĩwaꞌõtõ piꞌreba watsuꞌu mono
^ 1:10 Paulu hã dazazéb ꞌre sab ré, ma tô Filemo hã pawapto, Cristu hã te te saze da. Tahawa, te iꞌra ne tãma ꞌre hâimana.
