Galata 6:1-18
6 Ĩsisãnawã norĩ, niꞌwa hã da te upsibi mei wamhã tiwasédé te te iꞌmanharĩ na, a norĩ waꞌwa, ꞌRe ihâimana uꞌâsi mono Pẽꞌẽzani ré ꞌre iꞌaihâimana zaꞌra waꞌaba mono hã, tô asiwi pawapto waꞌaba apâ bâdâdi iwẽ u te te sina siri da. Tane nherẽ, ãne hã ꞌre ꞌmanharĩ zaꞌra waꞌaba mono ꞌre asiꞌmadâꞌâ ze zaꞌra waꞌaba mono ãna, duré ãma ꞌre pibui pese zaꞌra waꞌaba mono, a norĩ waꞌaba zama, aipibu zé hã asada ꞌre hâimana zaꞌra waꞌaba mono tõ da.
2 ꞌRe asipawaptob zaꞌra waꞌaba mono, ãne wapsi, te za ꞌre iꞌmanharĩ zaꞌra waꞌaba Cristuhu nhimiroti zahi hã.
3 Niꞌwa hã ꞌrâwi te te sina ꞌre rosaꞌrata mono wamhã tipire na, pire na ꞌre hâimana mono õ nherẽ, ta hã te za niꞌwa hã ꞌrâwi te te sima ꞌre robꞌrãmi.
4 6:4-5 Dahâiba mono bâ dahâimana zé da te ꞌre ipibu zaꞌra mono da si, iwẽ hã, iwẽ zô. Iwẽ wamhã, niꞌwa hã te te sima rowẽ iwẽ te te iꞌmanharĩ zém na hã, tihâimana zé hã dahâimana zém na te te ãma dawi ꞌmadâꞌâ da simnhasi ãna. E marĩ wa, wahâiba mono bâ, wa za wa te ꞌre ꞌmadâꞌâ pese zaꞌra romhuri iwẽ ꞌRe ihâimana uꞌâsi mono te te wama ꞌre iꞌanhomri mono hã.
5 ꞌMadâꞌâ 6:4
6 Niꞌwa hã Cristu wasuꞌuwẽ te te awaihuꞌu mono wamhã, marĩ iwẽ hã te te ꞌre apoꞌo mono, ãma tãma isisanho ꞌwai ma rowasuꞌuwẽ iwẽ na hã.
7 Asima ꞌre robꞌrãmi zaꞌra waꞌaba mono tõ: Niꞌwa hã ꞌRe ihâimana uꞌâsi mono ãma hã sima toi waihuꞌu õ di. Niꞌwa marĩ te te iꞌaꞌre hã, ta hã te za duré ꞌrãihâ.
8 Niꞌwa hã marĩ te te iꞌaꞌre hã, te te ãma rowẽ da te te sima ꞌre iwẽ mono zarina ꞌre ihâimana mono zé, tiwasédé te te ãma ꞌre iꞌmanharĩ mono hã, taha zarina iwaꞌâ hã te za tiꞌâ dadâ isiꞌutõrĩ õ hã. Tanei õ di, niꞌwa hã marĩ iwẽ te te iꞌaꞌre hã, ꞌRe ihâimana uꞌâsi mono Pẽꞌẽzani ma te te rowẽ da, ꞌRe ihâimana uꞌâsi mono Pẽꞌẽzani hawi te za sõpẽtẽ za dahâimana zé isiꞌutõrĩ õ hã.
9 Wa te ꞌre sahâri zaꞌra mono ãna, wa iwẽ hã, wa te ꞌre ꞌmanharĩ uꞌâsi zaꞌra. E marĩ wa, wa te sahâri zaꞌra õ wamhã, bâdâ te za iwa waptãrã za, wa te oto iꞌrãihâri zaꞌra zé hã.
10 Tahawa, bâdâ wama ꞌre hâimana zaꞌra mono wamhã iwẽ wa te ꞌre iꞌmanharĩ zaꞌra mono da hã, wa za tô wa te ꞌre ꞌmanharĩ zaꞌra uburé dama. Tane nherẽ wasiré isazeiꞌwa norĩ ma wa za iwẽ hã wa te ꞌre ꞌmanharĩ zaꞌra mono isazeiꞌõꞌwa norĩ ma, wa te ꞌre iꞌmanharĩ zaꞌra mono nhipai u.
Paulu tinhimiꞌuiꞌéré na roti te te iꞌrãsutu zé
11 Maꞌãpé ꞌmadâꞌâ zaꞌra waꞌaba, ĩnhimiꞌuiꞌéré zaꞌẽtẽ na te te ãma aima irobꞌuiꞌéré zaꞌra waꞌaba zé hã, ĩnhibꞌrata na.
12 Asisihâiwata nhihâri zaꞌra waꞌaba da te te iꞌai wati pese zaꞌra waꞌaba norĩ hã, ta norĩ hã marĩ dai õ nherẽ, ãma siꞌmadâꞌâ ze zaꞌra da te sima wẽ zaꞌra. Ta norĩ hã te ãne hã ꞌmanharĩ zaꞌra Cristu wede poꞌo nhonhiꞌrãmi na isaꞌo wasuꞌu uꞌâbâ da te tãma ꞌre robꞌmanharĩ wasété zaꞌra mono tõ da.
13 E marĩ wa, sihâiwata nhihâri ré ꞌre inomro mono norĩ hã, uburé te te ꞌre ꞌmadâꞌâ pese zaꞌra mono õ wa, ꞌRe ihâimana uꞌâsi mono nhimiroti zahi na Mozési te te ãma iꞌarobꞌuiꞌéré zé hã. Tane nherẽ, ta norĩ hã te sima wẽ zaꞌra, asisihâiwata nhihâri zaꞌra waꞌaba wamhã, ꞌre siꞌmadâꞌâ ze zaꞌra mono da, asisihâiwata nhihâri zaꞌra wa wẽ te isimiroti zarina zaꞌra.
14 Tazahã, niwa ĩsiꞌmadâꞌâ zei õ di, wa za te ĩsima ꞌre rowẽ Wanhibꞌapito Zezu Cristu wede poꞌo nhonhiꞌrãmi na isaꞌo zém na si. Taha uꞌâbâ wa ĩdâꞌâ na ꞌre ĩhâimana tiꞌai isazeiꞌõꞌwa ꞌre ihâimana zaꞌra mono norĩ hâimana zé ma hã, tane duré te dâꞌâ na ĩma ꞌre hâimana tiꞌai ãma isazeiꞌõꞌwa norĩ hâimana zé hã.
15 Aiwab õ hã hâimana õ di, niꞌwa hã isihâiwata nhihâri ré wamhã, duré niwamhã isihâiwata nhihâri õ wamhã. Ipire hã niꞌwa ipẽꞌẽ ꞌre poto tém na ꞌre hâimana mono wap si.
16 ꞌRe ihâimana uꞌâsi mono te rowẽ uꞌâ duré isimizawizé hã, ãma ꞌre ihâimana zaꞌra mono da si, niꞌwam norĩ hã ãhã romhâimana zéb zarina ꞌre ihâimana zaꞌra mono norĩ ãma duré uburé ꞌRe ihâimana uꞌâsi mono nhibꞌaꞌuwẽ na ꞌre ihâimana zaꞌra mono norĩ ãma.
17 Tazahã oto wa hã, niꞌwa hã roꞌwaꞌrudu te te ĩzada iwazere õ da si. E marĩ wa, ĩhâiba na hã wa ꞌre tiꞌâ ĩꞌuiꞌéré ne ꞌre ĩhâimana mono zé Zezusihi te na.
18 Ĩsisãnawã norĩ, wa tete aiꞌãma ꞌre rowaptẽrẽ uꞌâsi zaꞌra waꞌwa Wanhibꞌapito Zezu Cristuhu ma, isimizawi zé hã, aiꞌãma ꞌre hâimana uꞌâsi zaꞌra waꞌaba mono da.
Tane tô.
