Zenezi 10:1-32
10 Ã hã Noéhé ꞌra norĩ nhihudu zaꞌratazé, Sẽhẽ nhihudu norĩ, duré Cã, duré Zafé. Ta norĩ ꞌra hã ma tô â pusi mono parimhã, tãma ꞌre poto zaꞌra.
2 Zaféhé ꞌra norĩ nhisi hã ãne: Gome, Magogui, Madaꞌi, Zavã, Tubaꞌu, Meseque, duré Tira.
3 Gomehẽ ꞌra norĩ nhisi hã ãne: Asquenasi, Rifate, duré Togama.
4 Zavãhã ꞌra norĩ nhisi hã ãne: Elisa, Tarsi, Quitĩ, duré Rodani.
5 Ãne Zaféhé nhihudu norĩ hã. Ta norĩ hã te â poré zadaꞌré ãma duré robꞌré zaꞌiti mono wa, ꞌre siꞌubumro. Misi si, te aꞌuwẽ na tiwamri ré si tisihâiba ré si, duré timreme na ꞌre imreme zusi mono ré si, siré si ꞌre hâimana zaꞌra, upsãtã pese na.
6 Tawamhã duré Cãhã ꞌra norĩ nhisi hã ãne; Cuxe, Mizraꞌĩ, Futi, duré Canaꞌã.
7 Cuxehe ꞌra norĩ nhisi hã ãne; Seba, Havira, Sabta, Raꞌama, duré Sabteca. Raꞌamahã ꞌra norĩ nhisi hã ãne; Saba, duré Dedã.
8 Tawamhã Cuxe, Nirodi na isisi hã ma tô poto, tiꞌai ꞌremhã danhibꞌihâꞌa imorĩꞌrata na siptete uptabi na dama ꞌre ihâimana mono hã.
9 Ta hã Uburé Danhibꞌapito nhimipawaptobzéb zarina, ma tô abaꞌwa dama iwasuꞌu zaꞌẽtẽ na ꞌre hâimana. Tahawa te dasima da te ꞌre nharĩ zaꞌra, ãne: “Maꞌãpé, Nirodihi ne hã ꞌre aiꞌmaihâimana aba mono, Uburé Danhibꞌapito nhimipawaptobzéb zarina aba pese ꞌwa dama isaꞌẽtẽ na hã.”
10 Tawamhã dama iꞌrãnhoꞌõmo na ꞌre ihâimana mono na hã ma tô sãnaꞌrata, ꞌrinhoꞌu Babilonia ãma, duré Erequi na ꞌri nhoꞌõmo nhisi ãma, duré Acade na ꞌri nhoꞌõmo nhisi ãma, tô Sina na romnhisi ãma siꞌubdatõ ꞌri nhoꞌu ꞌre ihâimana zaꞌra mono ãma hã.
11 Tawamhã ta hawi Nirodi ma tô mo, Asiria u. Tame ꞌri nhoꞌu Ninive hã ma tô tawamhã ꞌmanha, Reobote-Ir na ꞌri nhoꞌõmo nhisi hã, Cala na ꞌri nhoꞌõmo nhisi hã,
12 duré Resẽ, Ninive norĩ ꞌre, Cala na isisi ꞌre, ꞌri nhoꞌu isaꞌẽne ꞌre ihâimana mono hã.
13 Mizraꞌĩhĩ nhihudu norĩ hã ãne: Lidia norĩ hã, Ana norĩ hã, Leabehe norĩ hã, Naptuhu norĩ hã,
14 Patrusihi norĩ hã, duré Calu norĩ hã, duré Creta norĩ hã, filisteu na aꞌuwẽ iwamri ihawi ꞌre ihâimana zaꞌra mono da hã.
15 Tawamhã duré Canaꞌã hã maparane iꞌra norĩ nhisi hã ãne: Idubꞌrata nhisi hã Sidõ na, duré ino nhisi hã, Hete na.
16 Canaꞌã nhihudu norĩ hã ãne: Zebuzeu norĩ, amoreu norĩ, gigazeu norĩ,
17 heveu norĩ, arquita norĩ, zineu norĩ,
18 arvadita norĩ, zemareu norĩ, duré hamateu norĩ.
19 Tawamhã cananeu norĩ nhiptiꞌa zadaꞌré Sidõ na ꞌri nhoꞌõmo nhisi hawi, Gera na ꞌri nhoꞌõmo nhisi u hã ma tô ꞌre hâimana, Gaza na ꞌri nhoꞌõmo nhisi ꞌrata ꞌre ihâimana mono u. Sodoma na ꞌri nhoꞌõmo nhisi u, Gomora na ꞌri nhoꞌõmo nhisi u, Adma na ꞌri nhoꞌõmo nhisi u, duré Zeboꞌĩ na ꞌri nhoꞌõmo nhisi u, ma tô ꞌre hâimana, Lasa na ꞌri nhoꞌõmo nhisi ꞌrata ꞌre ihâimana mono tẽme.
20 Ãne Cãhã nhihudu norĩ hã. Misi si, te aꞌuwẽ na tiwamri ré si duré tisihâiba ré si, duré timreme na ꞌre imreme zusi mono ré si, siré hã ꞌre hâimana zaꞌra, upsãtã pese na.
Sẽhẽ nhihudu norĩ wasuꞌu
21 Tawamhã Sẽ, Zaféhé dubꞌrada hã, uburé Ebreu norĩ hiꞌrata na te ꞌre hâimana.
22 Sẽhẽ ꞌra norĩ nhisi hã ãne: Elã, Assur, Arpaxade, Lude, duré Arã.
23 Arãhã ꞌra norĩ nhisi hã ãne: Uz, Huli, Gété, duré Mas.
24 Arpaxade hã, Selaha mama. Duré tô Sela hã, Ébéhé mama.
25 Tawamhã Ébéhé ꞌra hã te maparane ꞌre hâimana zahuré. Ihâiba amo nhisi hã, Pelegui* na. E marĩ wa. Ta hã ꞌre hâimana mono ré, dasima dasipo hã hâimana dâꞌâsina. Isisãnawã nhisi hã Zoctã na.
26 Tawamhã duré Zoctã hã, Almodaha mama, Selefehe mama, Haza-Mavéhé mama, Zeraha mama,
27 Adonirãhã mama, Uzaꞌuhu mama, Diclaha mama,
28 Obaꞌuhu mama, Abimaꞌéhé mama, Sabaha mama,
29 Ofihi mama, Haviraha mama, duré Zobabehe mama. Ã norĩ hã uburé pese te Zoctãhã ꞌra hã ꞌre hâimana zaꞌra.
30 Ta norĩ hã ma tô Mesa na ꞌri nhoꞌõmo nhisi hawimhã, Sefa na ꞌri nhoꞌõmo nhisi u ꞌre hâimana zaꞌra, bâtâ pusizém niwĩ ẽne ꞌre ihâimana mono ãma.
31 Ãne Sẽhẽ nhihudu norĩ hã. Misi si te aꞌuwẽ na tiwamri ré si duré tisihâiba ré si, duré timreme na ꞌre imreme zusi mono ré si, te siré hã ꞌre hâimana zaꞌra, upsãtã pese na.
32 Ã hã Noéhé hawimhã te aꞌuwẽ mono bâ ꞌre dahâimana zaꞌra, isihudu na we ꞌre idahâimana zaꞌra mono sidâpâsi. Tawamhã ta hã â pusi mono parimhã, Noéhé nhihudu dawamri mono bâ ꞌre idahâimana zaꞌra mono norĩ, ma tô tiꞌai mono bâ da te ropé.
Ĩwaꞌõtõ piꞌreba watsuꞌu mono
^ 10:25 Pelegui hã Ebreu norĩ mreme na “Ma te ãma aipoꞌo”, aiwa prã na ne iwapari na hã.
