Zenezi 11:1-32
11 Tawamhã tô tame we ꞌre romhâimana mono ré, ma tô misi damreme na si dasima ꞌre damreme zusi. Tô õhõ na si te uburé dasima da te ꞌre robzanhamri zaꞌra.
2 Tawamhã niꞌwam norĩ aꞌuwẽ bâtâ pusizém hawi isiꞌabaꞌré norĩ hã, ma tô Sina na romharé nhisi u hã aihutu, tame iwa ꞌre hâimana zaꞌra mono da.
3 Tawamhã niꞌwam norĩ hã te nimahã bâtâ na ãne sima nharĩ zaꞌra:
— Oto tiꞌa uꞌẽne, wa te uꞌẽtẽ zaꞌra waꞌaba mono, sebre pese na!
Ãne wa, te ta norĩ ma, tiꞌa uꞌẽtẽ zebre hã tãma tihâimana zaꞌra, te te ãma siwi iꞌri da hã, ẽne hã ihâimana zaꞌra upana. Wedewaꞌu top si te duré tãma tihâimana zaꞌra, te te ãma siwi iꞌri uptob da hã, tiꞌai waiꞌo hã ihâimana upana.
4 Tawamhã te ãne oto sima nharĩ zaꞌra:
— Oto ꞌrinhoꞌu, wa te wasiwi ꞌri aba. Tawamhã taha ꞌremhã wa za ꞌri ꞌrãihâ wada hã wasiwi ꞌmanharĩ ni, hâiwa te te sina itété pese da hã. Ãhã wamhã, dama wawasuꞌu zaꞌẽtẽ na wa za ꞌre wahâimana zaꞌra. Duré wa te ꞌre iropéi mono da hã mare di za, tiꞌai mono bâ ꞌre wahâimana zaꞌra mono da hã.
5 Tawamhã Uburé Danhibꞌapito, ꞌri ꞌrãihâ aꞌuwẽ te te siwi iꞌri, te te ꞌmadâꞌâ da hã ma tô siꞌra.
6 Tahawa, te ãne ꞌrâwi sima tinha:
— Ã hã aꞌuwẽ norĩ, te misi haré iwamri na hã ꞌre hâimana zaꞌra. Duré misi timreme na te uburé ꞌre mreme zusi, misi haré. Ãne te te siwi iꞌmanharĩ naꞌrata zarina te za oto niha hã uburé marĩ sima iwẽ na te te ꞌre ꞌmanharĩ zaꞌra.
7 Tahawa, oto wa te siꞌra zaꞌra na, ꞌre imreme zusi mono zé hã wa te tiwi ꞌwaꞌrutu zaꞌra da, marĩ na te te sima ꞌre nharĩ zaꞌra mono wa, oto ꞌre sisadaihuꞌu zaꞌra mono tõ da.
8 Ãne ma tô tawamhã Uburé Danhibꞌapito hã te te daꞌãma ropé, tiꞌai mono bâ. Tahawa ꞌri nhoꞌu te te siwi iꞌri na hã te te ãma siwi ꞌrãiwaꞌõmo õ di. Ma tô siwi sazâ.
9 Tawamhã ꞌri nhoꞌu ma tô Babé* na dasiwi sisi ni. E marĩ wa. Tame Uburé Danhibꞌapito, tiꞌai ꞌre, ꞌre idahâimana zaꞌra mono wi damreme te te tiwi ꞌwaꞌrutu zaꞌra wa, uburé ãma ꞌre idamreme zusi mono zé hã. Duré ta hawi ma tô Uburé Danhibꞌapito hã daꞌãma te te ropé, tiꞌai mono bâ oto ꞌre dahâimana zaꞌra mono da hã.
Sẽhẽ ꞌra norĩ wasuꞌu, isihudu norĩ wasuꞌu me
10 Ã hã Sẽhẽ ꞌra norĩ zaꞌratazé, duré isihudu norĩ zaꞌratazé. Iꞌâ pusi mono zém na maparane wahu parimhã, Sẽhẽ ãma 100 na ãma iwahub ãma ma tô iꞌra hã tãma podo, Arpaxade na isisi hã.
11 Taha pari ma tô duré 500 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
12 Tawamhã duré Arpaxade ãma 35 na ãma iwahub ãma, ma tô iꞌra Sela na isisi hã tãma podo.
13 Taha pari ma tô duré 403 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
14 Selaha ãma 30 na ãma iwahub ãma, ma tô iꞌra Ébé na isisi hã tãma podo.
15 Taha pari ma tô duré 403 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
16 Tawamhã duré Ébéhé ãma 34 na ãma iwahub ãma ma tô iꞌra Pelegui hã tãma podo.
17 Taha pari ma tô duré 430 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
18 Peleguihi ãma 30 na ãma iwahub ãma, ma tô Reu na isisi hã tãma poto.
19 Taha pari ma tô duré 209 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
20 Tawamhã duré Reuhu ãma 32 na ãma iwahub ãma, ma tô iꞌra Serugui na isisi hã tãma podo.
21 Taha pari ma tô duré 207 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
22 Seruguihi ãma 30 na ãma iwahub ãma, ma tô iꞌra Naor na isisi hã tãma podo.
23 Taha pari ma tô duré 200 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
24 Tawamhã duré Naoho ãma 29 na ãma iwahub ãma, ma tô iꞌra Tera na isisi hã tãma podo.
25 Taha pari ma tô duré 119 na wahub ꞌremhã ꞌre hâimana. Taha ré, ma tô duré iꞌra siꞌaibâ norĩ, iꞌra sipiꞌõ norĩ me hã tãma tipoto zaꞌra.
26 Tawamhã Tera ãma 70 na ãma wahu pari, ma tô siꞌubdatõ iꞌra norĩ hã tipoto zaꞌra, ãne isisi zaꞌra hã: Abrã, Naor, Harã.
Teraha ꞌra norĩ wasuꞌu, isihudu norĩ wasuꞌu me
27 Ã hã Teraha ꞌra norĩ wasuꞌu, isihudu norĩ wasuꞌu me. Tera hã, Abrãhã mama, Naoho mama, duré Harãhã mama. Tawamhã duré Harã hã, Loho mama.
28 Tawamhã Tera, Babilonia ãma iꞌra Harã idâꞌâ uirĩ na hã te zahadu ꞌre hâimana, ꞌri nhoꞌu Ur na isisi wa ipotozéb ãma.
29 Tawamhã Abrã hã ma tô Saraꞌihi ãma timro. Duré Naor, Milca na isisi ãma ma tô timro. Milca norĩ, Iscaha me hã, Harãhã ꞌra sipiꞌõ zahuré.
30 Tawamhã Saraꞌi hã te ꞌra waihuꞌu ãna ꞌre hâimana, ꞌrazé wasété wa.
31 Tawamhã Tera, ꞌri nhoꞌu Ur na isisi hawi watobro wamhã, Canaꞌã na romnhisi u morĩ da, ma tô tiꞌra Abrãhã siré, tinhihudu Lo hã siré saprõ, Harãhã ꞌra hã. Duré tisaniꞌwa Saraꞌi, tiꞌra mro hã ma tô duré siré saprõ. Tawamhã Harã na ꞌri nhoꞌõmo nhisi u oto sihutu wamhã, ma tô duré oto tamemhã ꞌre hâimana zaꞌra.
32 Ãhã wamhã Tera, Harã ãma ma tô 205 na ãma iwahub ãma oto dârâ.
Ĩwaꞌõtõ piꞌreba watsuꞌu mono
^ 11:9 Babé hã Ebreu norĩ mreme na “roꞌwaꞌrudu” aiwa prã na ne iwapari na hã.
