Zenezi 15:1-21
15 Tawamhã ãhã parip si Abrã ma tô sõtõ ꞌrowim ne marĩ ꞌmadâ. Taha na te Uburé Danhibꞌapito ãne tãma tinha:
— Abrã, aipahi tõ. Marĩ isimimnhasi wi wa za wa hã ꞌre ĩsimapa, aiꞌwawi. Duré iwẽ wa za te aima ꞌre anhomri.
2 Tawamhã Abrã asa ma te ãma sadaꞌâ ãne:
— Uburé Danhibꞌapito, ĩte ꞌRe ihâimana uꞌâsi mono! Ĩma hã marĩ dai õ di, iwẽ ĩma ꞌre iꞌanhomri mono zé ĩꞌra ãna za ꞌre ĩhâimana uꞌâsi mono da nherẽ. Eliézéhé si Damascu ãma, te za uburé ĩꞌuirĩ na ĩnhibrob na hã ãma ate zaꞌra.
3 Ĩꞌra hã ĩma ꞌmanhomri õ di. Tahawa ĩma romhuriꞌwa ĩnhorõwa ꞌre, ipoto si te za ĩꞌuirĩ na ĩnhibrob na hã ãma ate zaꞌra za.
4 Tawamhã Uburé Danhibꞌapito te duré ãne tãma nharĩ na sahu:
— Mare di. Aiꞌra uptabi ma si, te za asimarĩ hã tãma irẽme zaꞌra. Mare di za, aima romhuriꞌwa Eriézéhé ma irẽme zaꞌra da hã.
5 Tawamhã Uburé Danhibꞌapito, rob u te te saprõni wamhã, te Abrãhã ma tinha ãne oto:
— Maꞌãpé hâiwa ꞌmadâꞌâ, wasi norĩ saꞌrata waihuꞌu pese wamhã, azaꞌrata da pé. Tane asihudu norĩ hã, ahâ uptabi di za.
6 Tawamhã Abrã, Uburé Danhibꞌapito te te tãma iwaihuꞌuzém na ma tô sina mreme umnhasi oto. Tahawa Uburé Danhibꞌapito, ma tô duré wẽsã, te te sina wawãi õ wa oto.
7 Tawamhã te duré sina tãma tinha ãne:
— Wa hã, Uburé Danhibꞌapito. Wa hã wa tô Babilonia hawimhã we aiwaze, ꞌrinhoꞌu Ur na isisi hawimhã, ã hã tiꞌa te aima isõmri da hã ãma ꞌre airo mono da oto.
8 Tawamhã Abrã te asa tãma tinha ãne:
— Uburé Danhibꞌapito, ĩte ꞌRe hâimana uꞌâsi mono, e niha wa za waihuꞌu, sena na ã tiꞌa na za ãma ĩsite da na hã.
9 Tawamhã Uburé Danhibꞌapito, ma asa ãma tãma waꞌrã ãne:
— Maꞌãpé pozé wasédé we ĩma ꞌmazaprõni, poneꞌẽrebâ zéré uzé sipiꞌõ hã, poneꞌẽrebâ zéré mapure siꞌaibâ hã, uburé siꞌubdatõ ãma iwahum norĩ hã. Duré te za we ĩma iꞌmaimra naire norĩ hã, utuꞌure me.
10 Tawamhã imreme zarina abaze norĩ, ma tô te te tãma simro. Tahawa, ma tô duré roꞌwa na aiwa ãma sipoꞌo. Tawamhã ipoꞌo mono bâ ma tô sitẽmemhã sõꞌre sina te te azaꞌra. Tane nherẽ, si norĩ ãmap si ma tô wahuré hã ãma aiwãnhiza, ãma sipoꞌo zahuré ãna.
11 Tawamhã sipahutu norĩ abaze na ãma isipoꞌo mono zô ma tô aré nasi ana. Tane nherẽ, Abrã hã te nasi ãma te te awanoꞌõ apâ.
12 Tawamhã oto mara wamhã, ma tô Abrã hã sina tipahâ pese, aptâ ãma isimei pese zarina sõtõ pese wa. Taha nherẽ, waptu na ma tô tipahi. Ma tô ipẽꞌẽwara hã iwab ãzé.
13 Tawamhã Uburé Danhibꞌapito te tãma tinha ãne:
— Maꞌãpé waihuꞌu. Sena na te za asihudu norĩ tisiré aꞌuwẽꞌõ norĩ te tiꞌai waꞌõtõ nhoꞌõmo ãma ꞌre hâimana zaꞌra. Tame te za pawaꞌâbâ ãna te te dama ꞌre romhuri zaꞌra. Tahawa, te za da te tãma ꞌre robꞌmanharĩ wasété zaꞌra, 400 wahub ꞌremhã.
14 Tane nherẽ, pawaꞌâbâ ãna te te ꞌre romhuri zaꞌra mono da, te te tãma ꞌre irobꞌmanharĩ wasété zaꞌra mono norĩ hã wa za hâ zaꞌra. Tawamhã asihudu norĩ aptoꞌo ré te za ta norĩ nhiptiꞌai hawimhã sima iwẽ na wairé. Tahawa, te za isimarĩ pese zaꞌra hã siré ꞌwasa, iwaꞌâbâ zaꞌẽtẽ mono hã.
15 A hã atâꞌâ wamhã, te za aima rowẽ sina aihiꞌrata norĩ u aimo. Asiꞌihi pese wapsi te za aiꞌãma tiꞌa ni.
16 Asihudu norĩ, maparane siꞌuiwa na ãma idapoto ãmap si te za apâ we sina siri zaꞌra. E marĩ wa. Zahadu amoreu norĩ wasété zé ibâ na hâimana õ wa, niha na te tãma irobꞌmanharĩ zaꞌra da hã.
17 Tawamhã oto we robra siꞌréi mono wamhã, ma tô oto tirobra pese. Taha wi, ma tô préꞌa ré pizaꞌa ꞌre wawẽ waptu na sihâiꞌré, ihawi isisédé isiꞌréi mono hã. Tahawa, ꞌrãsitõ ma duré isiré hã sihâiꞌré. Tawamhã ta norĩ hã ma tô abaze na ãma isipoꞌo mono waꞌwaibaba roꞌrahâri zahuré.
18 Tawamhã tô taha bâtâ na ma tô Uburé Danhibꞌapito, Abrãhã ma, tinhimiropisutuzé hã tãma ꞌmanha, ãne:
— Asihudu norĩ ma, ã hã tiꞌa te tãma sõmri zaꞌra da wa ĩnhimiropisutu zahi hã ꞌmanha, Ezitu ãma tiꞌa zadaꞌré inomro hawi, panhoꞌu Eufrati na isisi u hã,
19 queneu norĩ nhiptiꞌa hã, quenezeu norĩ nhiptiꞌa hã, cadimoneu norĩ nhiptiꞌa hã,
20 hitita norĩ nhiptiꞌa hã, perizeu norĩ nhiptiꞌa hã, refaꞌĩ norĩ nhiptiꞌa hã
21 amoreu norĩ nhiptiꞌa hã, cananeu norĩ nhiptiꞌa hã, gigazeu norĩ nhiptiꞌa hã, duré zebuzeu norĩ nhiptiꞌa hã.
