Zenezi 17:1-27
17 Tawamhã Abrãhã ãma 99 na iwahub ãma, ma tô Uburé Danhibꞌapito tãma sihâiꞌré. Tahawa, ma tô ãne tãma tinha:
— Wa hã ꞌRe ihâimana uꞌâsi mono, ĩwaihuꞌu pese uptabi. Aipẽꞌẽ na te za ĩꞌãmap si ꞌre aimo. Te za duré ĩmreme ꞌre iwapari pese mo.
2 Ĩnhimiropisutuzé te aima iꞌmanharĩzéb zarina, wa za asihudu norĩ ahâ uptabi na ꞌre ihâimana zaꞌra mono da hã aima ꞌmanha.
3 Tawamhã Abrã, hiꞌrãtitõ ma tô tãma nhamra. Tiꞌai u tiꞌubu na ma tô ãma ropto. Tahawa, te ꞌRe ihâimana uꞌâsi mono ãne duré tãma tinha:
4 — Ĩnhimiropisutuzé wa aima ꞌmanha, ãne: Aꞌuwẽ wamri mono bâ daꞌahâ uptabi hiꞌrata na ꞌre aihâimana mono da, wa aima ropisutu, ãhã na hã.
5 Tahawa ã hawimhã za oto asisi hã Abraꞌã* na. Asisi õ di za oto, Abrã* na hã. E marĩ wa. Aꞌuwẽ wamri mono bâ daꞌahâ uptabi hiꞌrata na ꞌre aihâimana mono da, za te aima ꞌmanharĩ wa.
6 Asihudu ahâ uptabi di za. Te za duré ta norĩ ꞌremhã nima norĩ dama ꞌre siꞌapito zaꞌra.
7 Ĩnhimiropisutuzé õne uꞌâ aima ꞌre hâimana mono da, duré asihudu norĩ ma zama õne uꞌâ tãma ꞌre hâimana zaꞌra mono da zama wa aima ꞌmanha ãne: Õne uꞌâ, ate ꞌRe ihâimana uꞌâsi mono na, duré asihudu norĩ te ꞌRe ihâimana uꞌâsi mono na, wa za tãma ꞌre ĩhâimana zaꞌra.
8 Tiꞌa wa za aima tisõ. Asihudu norĩ ma zama wa za tisõ, dasiré aꞌuwẽꞌõ na iwa ꞌre iꞌaihâimana mono zé hã. Uburé Canaꞌã ãma tiꞌa te za õne uꞌâ asihudu norĩ ma, ite na tãma ꞌre hâimana zaꞌra. Tawamhã wa za duré ite zaꞌra na ꞌRe ihâimana uꞌâsi mono na tãma ꞌre ĩhâimana zaꞌra.
9 ꞌRe ihâimana uꞌâsi mono te duré zahadu ãne tãma tinha:
— Abraꞌã, a hã te za aima ĩnhimiropisutuzém na, asihudu norĩ me ãma ꞌre aihâimana uꞌâsi zaꞌra waꞌaba mo.
10 Ĩnhimiropisutuzé aima, duré asihudu norĩ ma, te iꞌmanharĩzéb zarina, te za uburé aiꞌreb zaꞌra waꞌaba aibâ norĩ tinhihâiwata nhihârizé te te sima ꞌre ꞌmanharĩ zaꞌra.
11 Danhihâiwata nhihârizé hã, wanhimiropisutuzé wa te wasima iꞌmanharĩzé aime, te wasuꞌu.
12 Tahawa ã hawim haré te za oto uburé ꞌwatébrémi na aiꞌuté ꞌre ipoto zaꞌra mono ãma 8 na bâdâ ipotozém na ãma ꞌre isiꞌutõrĩ zaꞌra mono ãma ꞌre iꞌanhihâiwata nhihâri mo. Asõrõwa ꞌre, ꞌre ipoto zaꞌra mono pawaꞌâbâ ãna aima romhuriꞌwa norĩ, asiré aꞌuwẽꞌõ norĩ wi iꞌuipra zaꞌra norĩ zama te za ꞌre iꞌanhihâiwata nhihâri mo.
13 Uburé te za ꞌre iꞌanhihâiwata nhihâri mo, taré hã ꞌmaihâimana ãna. Aihâiba na zaꞌra waꞌaba ihâiba hã te za aima ĩnhimiropisutu zaꞌra waꞌaba zé waihuꞌuzéb da hã õne uꞌâ ꞌre hâimana.
14 Niꞌwa da te sihâiwata nhizâri ãna hâimana wamhã, asiré zaꞌra waꞌaba ꞌre ihâimana mono da hã mare di za. E marĩ wa. Ĩnhimiropisutuzé te te wazéb õ na hâimana wa.
15 Taha pari ꞌRe ihâimana uꞌâsi mono, te Abraꞌãhã ma, duré tãma tinha ãne:
— Ã hawimhã za oto aimro nhisi, Saraꞌi na iꞌmahârâzé ihâimana da hã mare di za, Sara* na za oto isisi hã.
16 Ĩwẽ uptabi wa za te tãma ꞌre anhomri. Tahawa wa za duré aiꞌra aima tisõ, iséꞌre hawimhã. Wa za tô iwẽ hã te tãma ꞌre anhomri. Tahawa te za aꞌuwẽ wamri mono bâ daꞌahâ uptabi hiꞌrata sipiꞌõ na dama ꞌre hâimana. Te za isihudu norĩ ꞌremhã nima norĩ hã dama ꞌre siꞌapito zaꞌra.
17 Tawamhã Abraꞌã, hiꞌrãtitõ ma tô nhamra. Tiꞌubu na tiꞌai u hã ma tô ropto. Tahawa, te te tãma iwaihuꞌuzém na ma tô aihâ. Tahawa te ãne ꞌrâwi sima tinha: “E aibâ 100 na ãma iwahu hã sidamama waihuꞌu pese di. E niha te za merẽ Sara ãma 90 na iwahum nherẽ tiꞌra.”
18 Tawamhã Abraꞌã, te ꞌRe ihâimana uꞌâsi mono ma, ãne tãma tinha:
— Tô aré iwẽ, iwẽ hã ĩma ꞌre iꞌanhomri mono ne, ĩhâiba uꞌâbâ Ismaeu ma, iwẽ hã duré ꞌre anhomri mono da, taha ré ꞌre hâimana uꞌâsi mono da.
19 Tane nherẽ, ꞌRe ihâimana uꞌâsi mono, ma te ãne asa ãma tãma waꞌrã:
— Te inharĩzéb zarina te za tô aimro Sara aima tiꞌra. Tawamhã a hã te za isisi, Izaqui* na. Tawamhã taha ma, wa za ĩnhimiropisutu zahi isiꞌutõrĩꞌõ õne uꞌâ te tãma ꞌre ꞌmanharĩ, isihudu norĩ ma ropibu ma.
20 Tawamhã duré Ismaeu ma irowaptẽrẽzéb zama wa tô wapa. Tahawa iwẽ hã wa za te tãma ꞌre anhomri. Iꞌra norĩ, duré isihudu norĩ ahâ uptabi na ꞌre hâimana zaꞌra mono da hã wa za ꞌmanha. Tahawa te za 12 na dama ipire norĩ mama na ꞌre hâimana. Duré isihudu norĩ hã aꞌuwẽ misi ãma isitom na dama siptete na ꞌre hâimana zaꞌra mono da, wa za ꞌmanha.
21 Tane nherẽ, wa za aiꞌra Izaquihi ma, ĩnhimiropisutu zahi hã tãma ꞌmanha, tô ãhã aꞌamo wahup tém na Saraha zéꞌre ipoto ma.
22 Tawamhã Abraꞌãhã ma, ãne na te te tãma nharĩ mono pari, ma tô ꞌRe ihâimana uꞌâsi mono hã oto tiwi mo hâimo.
23 Tawamhã tô taha bâtâ na Abraꞌã, ꞌRe ihâimana uꞌâsi mono te te tãma iwaihuꞌuzéb zarina ma tô ꞌmanha. Tahawa tiꞌra Ismaeu ma tô sihâiwata nhizâ. Uburé aibâ isõrõwa ꞌre, ꞌre ihâimana zaꞌra mono norĩ zama hã ma tô anhihâiwata nhihâ. Isiré aꞌuwẽꞌõ te te tãma ꞌre iromhuri zaꞌra mono, te te iꞌuipra zaꞌra norĩ zama ma tô anhihâiwata nhihâ.
24 17:24-25 Tawamhã Abraꞌãhã ãma 99 na iwahub ãma ma tô sihâiwata nhizâri ni, iꞌra Ismaeu hã 13 na ãma iwahub ãma.
25 ꞌMadâꞌâ 17:24
26 Tô taha bâtâ na ma tô sahuré sihâiwata nhihâri zahuré ni, Abraꞌã norĩ hã iꞌra me.
27 Pawaꞌâbâ ãna tãma romhuriꞌwa norĩ zama ma tô uburé sihâiwata nhihâri zaꞌra ni, isõrõwa ꞌre, ꞌre ipoto zaꞌra mono hã duré isiré aꞌuwẽꞌõ norĩ wi, te te ꞌre iꞌuipra zaꞌra mono norĩ zama hã.
Ĩwaꞌõtõ piꞌreba watsuꞌu mono
^ 17:5 Abraꞌã hã Ebreu norĩ mreme na “daꞌahâ mama” aiwa prã na ne iwapari na hã.
^ 17:15 Sara hã Ebreu norĩ mreme na “dama ipire sipiꞌõ” aiwa prã na ne iwapari na hã.
^ 17:5 Abrã hã Ebreu norĩ mreme na “dahiꞌrada dama iwaihuꞌu zaꞌẽne” aiwa prã na ne iwapari na hã.
^ 17:19 Izaqui hã Ebreu norĩ mreme na “Te aihâ”, aiwa prã na ne iwapari na hã.
