Zenezi 19:1-38
19 Tawamhã robzaꞌrã wi, ma tô hâiwa ãma romhuriꞌwa norĩ aimasisi zahuré, Sodoma u. Tahawa, te Lo hã ꞌri nhoꞌõmo te ꞌridawa zaꞌẽtẽ ãma nhamra. Taha ré hâiwa ãma romhuriꞌwa itẽme isimasi te te ꞌmadâꞌâ zahuré wamhã, ma tô wahudu, te te sina uzusi zahuré da. Tawamhã hiꞌrãtitõ ma tô isõꞌreb zahuré hã nhamra. Ipaparab zahuré, ma tô tiꞌubu na tiꞌai u hã ropto.
2 Taha sina, ma tô ãne tãma nharĩ zahuré:
— Ĩnhibꞌapito norĩ, maꞌãpé asibꞌaꞌuwẽ nhorõwa u ĩsiré ãma ane waꞌaba da asima wẽ waꞌaba. Tawamhã õmep si te za ꞌrâwi asipara upsõi waꞌwa. Te za duré tame asõtõ ꞌwa. Tawamhã awẽ wi mararé te za ane waꞌaba zém na ãma iꞌuzusi ꞌwa za.
— Mare di. ꞌRe idasisõpẽtẽ pese zaꞌra mono zéb ãma rowip si wa za wanhotõ ni. — Ãne ma te asa ãma sadaꞌâbâ zahuré.
3 Tane nherẽ, Lo te nasi satõrĩ zadawa zaꞌréi õ zahuré. Tahawa ma tô isõrõwa u oto isiré tineb zahuré. Tawamhã Lo, te danhimiꞌru zaꞌra, dasa iwẽ na tãma danhipi zahuré da hã. Duré iꞌuꞌẽtẽ wapu mapu ãna, da te tãma ꞌmazebre zahuré da, ma tô dama tiꞌru. Tahawa itẽme isimasi hã taha na te oto tisa zahuré.
4 Tane nherẽ, zahadu sõtõ zahuré õ ré, Sodoma ãma aibâ ꞌre ihâimana zaꞌra mono norĩ, ipréduptém norĩ, duré ihi norĩ, ma tô iré zahuré hã ꞌri siwi uirĩ.
5 Tawamhã ta norĩ ma tô Lo hã siwi ꞌmahâ, ãne:
— E mahãta aibâ norĩ, ã barana asõrõwa u we izasi zahuré hã. Maꞌãpé we rob u wama zaꞌra sani zahuré na. Wa wasima wẽ zaꞌra ni, ãma zahuré wahâimana zaꞌra da.
6 Tawamhã Lo, rob u ma te watobro, aibâ norĩ ma, te te tãma nharĩ zaꞌra da hã. Tawamhã sisaꞌu ꞌridawa te te tété wamhã,
7 ma tô ãne dama tinha:
— Ĩzawi na hã ĩsiwaihuꞌu norĩ, maꞌãpé ãne na aiwasédé ꞌmanharĩ zaꞌra waꞌaba tõ!
8 Maꞌãpé asiwi ĩwapari aba! Ĩꞌra sipiꞌõ norĩ ihâiba ubuni zahuré te maparane tihâimana zahuré, ꞌriparamhã. Ta norĩ hã wa za we rob u aima zaꞌra waꞌaba hã sani zahuré, ta norĩ ãmap si marĩ hã asima iwẽ na ãma ꞌmanharĩ zaꞌra waꞌaba da. Taré oto ã hã aibâ norĩ ãma marĩ hã iꞌmanharĩ zaꞌra waꞌaba da hã, mare di za. E marĩ wa. Ta norĩ hã ĩnhorõwa u te ꞌmazasi zahuré wa, wa hã iꞌwawib zahuré isimapaꞌwa na ĩhâimana wa.
9 Tane nherẽ, ma te ãne asa ãma tãma waꞌrãmi zaꞌra:
— Wanhoꞌre hawimhã aiꞌré na!
Tawamhã te ãne duré sima nharĩ zaꞌra:
— Ã hã aibâ wasiré aꞌuwẽꞌõ, te sima wẽ, marĩ hã te te wama ꞌre aꞌrui mono da!
Taha pari Loho u, ma apâ itẽme aipizari zaꞌra. Tawamhã te ãne tãma nharĩ zaꞌra:
— Ãhã na wa za marĩ iwasété uptabi hã aima ꞌmanharĩ zaꞌra ni, asõrõwa u iꞌmazasi norĩ ma, marĩ hã wa te aré tãma iꞌmanharĩ zaꞌra zém nhipai u.
Tawamhã Sodoma ãma aibâ norĩ, ma tô Lo ꞌridawa nhiti siwi time. Taha pari, ma tô ꞌridawa tẽme aihutu, te te siwi prub da aré.
10 Tane nherẽ, itẽme isimasisi zahuré hã ma tô Lo hã sitẽme ꞌwani zahuré, ꞌri para u. Taha pari ma tô ꞌridawa hã iré sitob zahuré.
11 Tahawa, niha ma te aibâ norĩ ma, iprédupté ma, duré ihi rowi isimasam norĩ ma hã tãma robꞌmanharĩ zaꞌra, tobꞌa na hâimana zaꞌra da hã. Ãne wa, ꞌridawa te te siwi uwaimrami waihuꞌu õ di oto.
Lo, Sodoma hawi iwatobrozé wasuꞌu
12 Tawamhã itẽme isimasi, te ãne Loho ma tãma nharĩ zahuré:
— E ãme te asiré ꞌri nhoꞌõmo ꞌremhã, ꞌre daꞌmaihâimana, aiꞌra siꞌaibâ norĩ hã, aiꞌra sipiꞌõ norĩ hã, asaꞌõmo norĩ hã, duré asisãnawã norĩ hã. Iré wamhã, maꞌãpé ã hawimhã uburé pese sani zaꞌra na.
13 E marĩ wa. Ã hã dazaꞌru wa za wa norĩ hã uprosi ni. Uburé Danhibꞌapito, iwa ꞌre idahâimana zaꞌra mono norĩ nhimiꞌmanharĩ wasété zarina, iwasédé da te ãma ꞌre inomro mono zé hã, ma tô te te ꞌre wapari. Tahawa ma tô wama tiꞌru, Sodoma hã wa te uprosi da.
14 Tawamhã ãne te te tãma waihuꞌu zahuré wa, ma tô Lo, tiꞌra sipiꞌõi mro norĩ da hã, te te poꞌre puꞌu zaꞌra da hã mo. Tahawa, ma tô ãne tãma nharĩ zaꞌra:
— Awaꞌawi ã hawimhã aiwairébé aba. Uburé Danhibꞌapito, ã hã ꞌri nhoꞌu hã te za uprosi!
Tane nherẽ, te ãma rosaꞌrata zaꞌra, sima to na te te tãma nharĩ zaꞌra newa.
15 Tawamhã hâiwa ãma romhuriꞌwa norĩ, robzaꞌrã ré te Loho ma robꞌru zahi zaꞌra, ãne:
— Maꞌãpé aiꞌabaꞌré na aimro norĩ, aiꞌra sipiꞌõ maparane ihâimana zahuré me ã hawimhã sani zaꞌra na, ꞌri nhoꞌu siꞌutõrĩ wa, dame aiꞌutõrĩ aba tõ da.
16 Tawamhã Lo, timro ré duré tiꞌra norĩ ré ꞌre siwairĩ mono wa, ma tô hâiwa ãma romhuriꞌwa norĩ hã pawaibu zaꞌra. Tahawa ma tô ꞌri nhoꞌõmo hawi oto te te simro. E marĩ wa. Uburé Danhibꞌapito, Loho ãma siwamri wa.
17 Tawamhã ꞌri nhoꞌõmo hawi te te oto sani zaꞌra wamhã, te ãne nima hã hâiwa ãma romhuriꞌwa tãma tinha, Loho ma:
— Maꞌãpé aiwara sina si aiwara, asisõꞌreptu da! Asiwaꞌrãmi hã we robꞌmadâꞌâ tõ. Romharé rowaꞌwa ꞌre ihâimana mono ãma hã asimizazâri tõ. Ẽtẽ u si ãma aiwara waré na. Tamomo aiwara õ wamhã, te za atâ.
18 Tane nherẽ Lo, ma te duré ãne asa ãma tãma waꞌrã:
— Ĩnhibꞌapito, ãne te ꞌmanharĩ da hã ĩma ꞌrui õ di za. Ĩꞌãma aiwamri na, ĩzawi na hã!
19 Ma tô ĩꞌãma iꞌaiwamrizéb zarina ĩma iꞌmanha. Ma tô ĩnhoꞌreptu. Ã hawimhã ẽtẽ u ĩwara da hã ĩma romhâ uptabi di. Marĩ iwatobro, ĩwara ré te te ĩzasãmri wamhã, ĩsisõꞌreptu dai õ di za, wa hã. Te za ĩwĩ.
20 Õhõta te ꞌri waꞌõno hã waꞌrata tihâiba, ꞌrâwibre hã. Ĩsisõꞌreptu da, tamomop si ĩwara da hã ĩma rowairébé. ꞌRi surure nherẽ, tamep si wa za ĩsisõꞌreptu za.
21 Tawamhã hâiwa ãma romhuriꞌwa te asa ãne tãma tinha:
— Wẽ di tô! Wa ãma asaze. Ta hã ꞌri nhoꞌu hã te uprosi õ di za tô.
22 Maꞌãpé tô tamomop si aiꞌabaꞌré na saꞌẽtẽ hã aiwara. E marĩ wa. Tamomo zahadu aiwisi õ ré, marĩ hã te ꞌmanharĩ waihuꞌu õ di za aꞌâ.
Tahawa ꞌri nhoꞌu hã ma tô Zoa* na da te ꞌre sisi zaꞌra.
ꞌRi nhoꞌu Sodoma norĩ, Gomora me isiꞌutõrĩ zahuré zé wasuꞌu
23 Tawamhã Lo, bâdâ ꞌrãi watobro parip si ma tô Zoa u hã wi.
24 Wisi wi, ma tô Uburé Danhibꞌapito, hâiwa hawi tã ꞌre itaꞌa mono ne unhama norĩ, ẽtẽ roꞌo nhizédé uzé pire me sisaꞌwari zahuré mono da hã ꞌmanha, Sodoma norĩ nhisiwi Gomora me.
25 Tahawa, maparane ꞌri nhoꞌõmo norĩ, ma tô uprosi zahuré. Romharé wa ꞌre idahâimana zaꞌra mono norĩ hã, robꞌre norĩ hã, duré taha tiꞌai ꞌre, wede ꞌre isimasa mono norĩ zama ma tô uburé uprosi pese.
26 Tane nherẽ, Loho mro hã ma tô siwaꞌrãmimhã ꞌrãihaipiꞌra, te te robꞌmadâꞌâ da. Tahawa, te te robꞌmadâꞌâ wamhã, ma tô dasai warĩrĩzé te te ihâiba ubu zarina siꞌmanha, sa na.
27 Tawamhã awẽ wi mararé Abraꞌã, ma tô wahudu. Tahawa Uburé Danhibꞌapito nhoꞌre ihâimanazéb u hã ma tô oto mo.
28 Tawamhã Sodoma norĩ nhoꞌõmoi baba Gomora me, uburé romharé na zama ma tô te te robꞌmadâꞌâ. Tahawa, ma tô tiꞌai hawimhã unhama nhizé ꞌre isiꞌré mono hã ꞌmadâ, robzebrezém hawi unhama nhizé ꞌre isiꞌréi mono ne hã.
29 Ãne ꞌRe ihâimana uꞌâsi mono, romharé na ꞌri nhoꞌõmo norĩ ãma ma tô daꞌuprosi. Tane nherẽ, ma tô Abraꞌã ãma hã poꞌre puru. Tahawa Lo, ꞌri nhoꞌõmo ꞌre, ꞌre ihâimana mono zéb ãma te te daꞌuprosi wamhã, dazu dâꞌâ tõ da hã, ma tô tinhimihâzé wi hã waze.
Loho nhihudu norĩ wasuꞌu
30 Tawamhã Lo, Zoa ãma ꞌre ihâimana mono da hã pahi di. Tahawa tiꞌra sipiꞌõ norĩ ré, ma tô ẽtẽ u hã mo, tame siré ꞌre siꞌubumroi mono da. Tawamhã tame ẽtẽ na abꞌre wa, ma tô tiꞌra sipiꞌõ norĩ maparane ihâimana zahuré ré hã ꞌre hâimana.
31 Tawamhã nimahã bâtâ na te iꞌra dubꞌrada tinoi ma hã tãma tinha ãne:
— Wamama hã ma tô oto siꞌihire. Niꞌwa hã aibâ aimawi hã ã hã tiꞌai ꞌremhã hâimana õ di, iré ꞌre wazaꞌwari mono wa, te te iwaꞌra da hã, daro mono bâ dahâimanazéb zarina.
32 Tahawa oto wamama ma, uva ꞌrãi waꞌu isé wa te tãma õ na, te te iꞌrãiwamnarĩ pese zéb u. Tawamhã wa za iré wazaꞌwari ni. Ãhã wamhã, te za iꞌra hã wa hawimhã wama tiꞌmaihâimana za.
33 Tawamhã tô taha mara na, ma tô uva ꞌrãi waꞌu isé hã timama ma tãma õb zahuré. Tahawa iꞌra dubꞌrada ma tô oto iré nomro. Tawamhã imama ꞌrãi wasété uptabi ré wa, iꞌra iꞌrata nomro ré hã, duré apâ ihawi wahutu ré hã te te waihuꞌu õ di, ꞌrãihâ zaꞌõtõ ré wa.
34 Tawamhã awẽm na iꞌra dubꞌrada te tinoi ma hã tinha ãne:
— Ahâmhâ barana ĩmama ré, wa tô nomro. Tahawa, duré ã mara na wa te ꞌrãiwamnarĩ zahu na za apâ. Tawamhã a hã te za oto iré ano za. Ãhã wamhã, wazahuré te za waꞌra hã wama tiꞌmaihâimana, isihudu zahuré da hã.
35 Tawamhã tô taha mara na te te duré tãma õb zahuré wamhã, ma tô oto ino hã iré nomro. Ãhã wa, iré nomro wa, duré apâ ihawi wahutu wamhã, imama hã te te duré sina waihuꞌu õ di.
36 Ãne Loho ꞌra norĩ hã ma tô imama hã ꞌrâwi wasã zahuré.
37 Tawamhã idubꞌrata ma iꞌra hã, ma tô tãma podo. Ta hã ma tô sisi, Moabi* na. Ta hã te moabita norĩ hiꞌrata na hã ꞌre hâimana, ãhã na hã.
38 Tawamhã duré inoi ma zama iꞌra hã, ma tô tãma podo. Ta hã ma tô duré sisi, Bẽ-Ami* na. Ta hã te oto amonita norĩ hiꞌrata na ãhã na hã ꞌre hâimana.
