Zenezi 20:1-18
20 Tawamhã Abraꞌã, Mare na romnhisi hawimhã, ma tô watobro. Tahawa hâiwa nhimiꞌe niwĩ Canaꞌã tiꞌai waꞌõtõ nhoꞌõmo u te mo, Cadi na romnhisi norĩ waꞌwa, Su na romnhisi waꞌwa me ꞌre hâimana mono da oto. Tawamhã nimahã na Gera na ꞌri waꞌõtõ nhisi ãma ꞌre hâimana mono ré hã,
2 Abraꞌã, te Sara tihidiba na dama wasuꞌu. Tahawa Abimelequi, Gera ãma apito hã ma tô Sara dama tiꞌru, isimiromhurizéb u ꞌri ꞌrãihâ u da te itẽme tãma saprõni da.
3 Tawamhã ꞌRe ihâimana uꞌâsi mono, barana Abimelequi sõtõ ré isimirosawẽrẽ na ma tô itẽme wi. Tahawa, ma tô ãne tãma tinha:
— Te za atâ, piꞌõ imro ré zô daꞌmazatõrĩ wa, sô daꞌmaimorĩ da hã.
4 Tane nherẽ Abimelequi, zahadu Saraha ãma hã sihâiba tob õ wa, te te upi õ di. Tahawa te ãne tãma tinha asa:
— Apito, marĩ na te upai õ di! E tane nherẽ, te za niha hã ĩma irobꞌmanha. Duré e ĩnhibꞌaꞌuwẽ norĩ ma zama te za niha na hã tãma irobꞌmanharĩ zaꞌra.
5 Abraꞌã siꞌuihâ na ma tô wasuꞌu, Sara tô ihidiba na hã. Õhõ zama ma tô õne na hã siwasuꞌu. Wa hã, ĩhâimana wẽ zarina wa tô iwẽ na marĩ hã aré tãma ꞌmanharĩ zahuré. Tahawa tô wa hã, marĩ na iꞌupaiꞌwa na hã ĩhâimana õ di.
6 Tawamhã ꞌRe ihâimana uꞌâsi mono, sõtõ ꞌrowim na nherẽ, ma te ãma sadaꞌâ ãne:
— Tô ĩma waihuꞌu pese di, uburé marĩ aihâimana wẽ zarina iwẽ iꞌmanharĩzé hã. Tahawa tô aiwasété tõ da, wa hã wa tô aiwi tété, piꞌõ upi tõ da hã.
7 Maꞌãpé ãhã na apâ imro ma, piꞌõ hã tãma sõmri. Õ hã ĩzadawa ꞌmahârâꞌwa, te za aiꞌãma ĩwi hã rowaptẽ, atâꞌâ tõ da hã. Ãne na hã wa za aipoꞌre puꞌu siro. Apâ imro tãma sõmri õ wamhã, te za tô atâ za. Duré uburé aima ꞌre ihâimana zaꞌra mono norĩ hã te za aiꞌutõ za.
8 Tawamhã awẽm na mararé uptabi Abimelequi hã ma tô udu. Utu wamhã, uburé tite romhuriꞌwa norĩ zô hã ma tô hâ. Tawamhã sõtõ ꞌrowi marĩ te te iwaihuꞌuzé hã ma tô tãma wasuꞌu zaꞌra. Ãhã wa, ta norĩ hã ma tô tãma tipahi pese zaꞌra.
9 Taha pari Abimelequi, Abraꞌãhã zô hârâ wamhã, ma tô ãne tãma tinha:
— E marĩ ma tô wama iꞌmanharĩ zaꞌra. E marĩ iwasédé hã te aiwi ꞌmanharĩ bâ, ma tô niha na ĩma iromhâimanazé ĩnhisiwi, duré ĩte tiꞌai waꞌõtõ nhoꞌõmo nhisiwi ropipa iwasété uptabi hâimana da hã ĩma iꞌmanha! Ãne na asimiꞌmanharĩzé hã ibâi õ di, da te dasima ꞌre irobꞌmanharĩ zaꞌra mono zéb zarinai õ wa.
10 E marĩ zarina ma tô ãne na iꞌmanharĩ da hã asima irosaꞌra.
11 Tawamhã Abraꞌã, ma te ãne asa ãma sadaꞌâ:
— Wa tô rosaꞌrata aré, ã hã dazaꞌrui ꞌre, ꞌRe ihâimana uꞌâsi mono wazéꞌwa ꞌre daꞌmaihâimana mono õ wa, za niꞌwa ĩmro hâiba zô te te ĩwĩrĩ na hã.
12 Taré oto tô taha nhipai u hã, ĩmama hawib dâꞌâsina te tô ĩhidiba na sena na õ hã ĩma tihâiba. Ãne nherẽ, wa hã wa tô ãma ĩmro, ĩna zéꞌre hawi ipoto õ dâꞌâsina.
13 ꞌRe ihâimana uꞌâsi mono, ĩmama nhorõwa hawi wasiré aꞌuwẽꞌõ norĩ nhiptiꞌai mono bâ ꞌre ĩmorĩ da, we te te ĩwazere wamhã, wa tô Saraha ma, wa hã tãma tinha ãne: “Uburé dazaꞌrui mono bâ ꞌre wane mono sidâpâsi ĩzawi na hã dama ꞌre asiwasuꞌu mono za, wa hã tô aihitébré na hã.”
14 Tawamhã Abimelequi, Abraꞌãhã ma, ma tô Sara hã apâ tãma hâiba nho. Taha nhipai u hã ma tô poneꞌẽrebâ norĩ hã, powawẽ norĩ hã, duré pawaꞌâbâ ãna romhuriꞌwa siꞌaibâ norĩ hã romhuriꞌwa sipiꞌõi me hã tãma sõmri zaꞌra.
15 Taha pari, te duré tãma tinha ãne:
— Abraꞌã, ãhãta te ĩnhiptiꞌa hã asõꞌremhã tihâiba. Maꞌãpé asima iwẽzéb uwaibaba, nimame iwa ꞌre aihâimana mono da, asima ro hã ꞌmaipisutu.
16 Abimelequi, te duré Saraha ma, ãne tãma tinha:
— Aihitébré ma, 11 kilu na ẽtẽ waipo prã prata hã wa tô tãma tisõ, marĩ iꞌmanharĩ wasété õ zém na asiré norĩ hã te te ãma siwi aiwaihuꞌu da hã. Ãhã zarina te za uburé waihuꞌu zaꞌra ni, aihâimanazém na iꞌupai õ zé hã.
17 20:17-18 Tawamhã Abraꞌãhã mro Saraha ma, iromhâimanazéb uꞌâbâ ma te Uburé Danhibꞌapito, Abimelequihi nhorõwa ꞌre, uburé piꞌõ norĩ, ꞌre ihâimana zaꞌra mono wi, ꞌre iꞌra zaꞌra mono zé hã tiwi anhito, ꞌre ꞌra zaꞌra mono tõ da. Tawamhã Abraꞌã, ꞌRe ihâimana uꞌâsi mono wi te te rowaptẽrẽ wamhã, ma tô Abimelequi hã hâiba pese. Duré imro, tãma iromhuriꞌwa norĩ me ma tô duré apâ hã hâiba pese zaꞌra, apâ ꞌre iꞌra zaꞌra mono zém na.
18 ꞌMadâꞌâ 20:17
