Zenezi 23:1-20
23 Tawamhã Sara 127 na ãma iwahum na ma tô ꞌre hâimana.
2 Tawamhã ꞌri nhoꞌu Hebrõ na isisi, Quiriate-Arba na isisi amoi ãma ma tô oto dârâ, Canaꞌã tiꞌai ãma. Siꞌutõrĩ wamhã, ma tô Abraꞌã hã ãma aiwaꞌõ, pẽꞌẽzé uptabi wa.
3 Taha pari ihâiba hâ inomrozém hawi ma tô watobro, hitita norĩ ma, te te nharĩ da hã. Tawamhã te ãne tãma nharĩ zaꞌra:
4 — Wa hã asiré zaꞌra waꞌaba aꞌuwẽ õ nherẽ, wa tô aiwaꞌwa waꞌaba ꞌre ĩhâimana. Tahawa te za tiꞌai waꞌõno hã asiwi ĩma iꞌmaiwede ꞌwa, ĩmro te iwa ãma tiꞌa da.
5 Tawamhã hitita norĩ hã ma te ãne asa ãma sadaꞌâbâ zaꞌra:
6 — Wanhibꞌapito, maꞌãpé asina wawapari zaꞌra na! A hã wanhibꞌihâꞌa zaꞌra te asiptete uptabi na wama ꞌre aihâimana zaꞌra mo. Tahawa te za ꞌre iwasiséme mono zé iwẽ uptabi ꞌre, aimro ãma hã itiꞌa. Aimro ãma itiꞌa da hã wa norĩ wa te aiwi sawi zaꞌra dai õ di.
7 Tawamhã Abraꞌã hâiwi sa wamhã oto, ma tô hitita norĩ nhoꞌremhã tãma aiwẽꞌẽ zaꞌra.
8 Ãhã wa, te ãne tãma nharĩ zaꞌra:
— Ãme ĩmro na te tiꞌa da, a norĩ waꞌwa asima wẽ zaꞌra waꞌaba wamhã, maꞌãpé Efrõ, Zoaha ꞌra wi tiwi waptẽrẽ zaꞌra waꞌaba,
9 Maquipela na rowamri ãma ẽtẽ na abꞌre siro hã te te ĩma wede da, isiptiꞌa zadaꞌré ãma ꞌre ihâimana mono hã. Tawamhã wa hã ibâ na hã wa za tãma waꞌâ. Ãhã wamhã, wa za iwa daꞌru tedeꞌwa na hã ꞌre ĩhâimana.
10 Tawamhã te Efrõ tinhibꞌaꞌuwẽ siꞌrãꞌõtõzéb ãma iwaꞌwab zaꞌra hã nhamra, ꞌri nhoꞌõmo te, ꞌridawa zaꞌẽtẽ na ꞌre idanhisisi mono zéb ãma. Tawamhã te mreme ꞌrãihâ na uburé da te wapari zaꞌra da tinha ãne:
11 — Mare di, ĩnhibꞌapito. Tanei õ di za. Ĩwapari pé! Taré wa za aima tisõ tiꞌai waꞌõno hã, duré ẽtẽ na abꞌre siro iwa ꞌre ihâimana mono zama. Ĩnhibꞌaꞌuwẽ norĩ nhoꞌa wa aima saꞌré, aimro iwa isẽrẽ da hã.
12 Tawamhã Abraꞌã, ma tô hitita norĩ nhoꞌre apâ hã tãma aiwẽꞌẽ zaꞌra.
13 Tawamhã Efrõhõ ma, te te inharĩzém na uburé da te dasiwi wapari da hã, ma tô mreme ꞌrãihâ na duré tãma tinha ãne:
— Maꞌãpé ĩwapari! Wa ĩsima wẽ tô, tiꞌai waꞌõno te aiwi uipra da. Tahawa, za te aima iwaꞌâbâzéb da hã maꞌãpé ãma ĩzaze na. Taha parip si wa za ĩmro na ãma tiꞌa, õmemhã.
14 Tawamhã Efrõ, ma te asa ãne duré ãma tãma waꞌrã:
15 — Ĩnhibꞌapito, iwaꞌâbâzém na te za ĩwapa! Tiꞌai waꞌõtõ waꞌâ hã ãne 400 na ẽtẽ waipo prã prata waꞌõtõ waré na. Taré, marĩ dai õ di, wama hã. Õne haré tô oto aimorĩ, tame aimro na hã tiꞌa da.
16 Tawamhã Abraꞌã ma tô ãma saze. Tahawa te ẽtẽ waipo prã prata hã oto apire pibu, Efrõ, danhoꞌa te te iwaꞌâbâ wasuꞌuzéb zarina, iwaꞌâ ibâ na te te ãma tãma iwaꞌâbâzéb da hã, dama rowedeꞌwa norĩ 4 kilu nhipai u prã na te te siwi ipire pibuzéb zarina.
17 Ãne Abraꞌã, ma tô Efrõhõ te, Maquipela na romnhisi ãma oto ãma ate tiꞌai waꞌõtõ na, Mare na romnhisi bâtâ pusizém niwĩmhã. Tiꞌai waꞌõtõ wa, ẽtẽ na abꞌre siromo tedeꞌwa na duré uburé wede, tiꞌa zadaꞌré u ꞌre isimasa mono tedeꞌwa na hã te oto ꞌre hâimana.
18 Tawamhã uburé hitita norĩ dasiꞌrãꞌõtõ ãma ihâimana zaꞌra, te te iꞌuipra na hã ma tô ãma ꞌmadâꞌâ zaꞌra.
19 Taha pari Abraꞌã, ma tô timro Saraha ãma hã oto tiꞌa, ẽtẽ na abꞌre siro tiꞌai waꞌõno Maquipela wa ihâimana ãma, Mare bâtâ pusizém niwĩmhã, Hebrõ na isisi amoi ãma, Canaꞌã tiꞌai ꞌremhã.
20 Ãne hitita norĩ te, tiꞌai waꞌõno hã, duré tô iwa ẽtẽ na abꞌre zama ma tô Abraꞌãhã ma tãma sõmri zaꞌra, itedeꞌwa na ꞌre hâimana mono da, iwa da te ꞌre idanheme mono pibu ma.
