Zenezi 25:1-34
25 Tawamhã Abraꞌã, piꞌõ aimawi na ma tô duré timro, Quetura na isisi na.
2 Taha zéꞌre hawim norĩ nhisi hã ãne: Zĩrã, Zocsã, Medã, Midiã, Isibaque, duré Suꞌa.
3 Zocsã hã ma tô Seba norĩ poto zahuré, Dedãhã me. Tawamhã Dedãhã nhihudu norĩ hã, Assurĩ, Retusĩ, duré Reumi.
4 Midiãhã ꞌra norĩ nhisi hã ãne: Efa, Éfer, Enoqui, Abida, duré Elda. Uburé ã norĩ hã, Queturaha nhihudu.
5 Tawamhã Abraꞌã, Izaquihi ma, ma tô uburé tinhimarĩ tãma pisutu zaꞌra, iꞌuirĩ na ãma site zaꞌra da.
6 Tane nherẽ, timro prãi ꞌra norĩ ma, ma tô taré tinhimarĩ na hã ãma tãma tinhoprub zaꞌra. Tawamhã dâꞌâ wana ré, ma tô timro prãi ꞌra norĩ hã Izaquihi nhiti satõrĩ zaꞌra, bâtâ pusizém niwĩ ꞌre hâimana zaꞌra mono da.
Abraꞌãhã dâꞌâzé wasuꞌu
7 Tawamhã Abraꞌã, 175 na ãma iwahum na ma tô ꞌre hâimana.
8 Tawamhã siꞌihi uptabi wa, oto dâꞌâ wamhã, ma tô oto tihiꞌrata norĩ siré hã simisutu ꞌre hâimana.
9 Tawamhã iꞌra Izaqui norĩ, Ismaeu me ma tô Maquipela ãma ẽtẽ na abꞌre siromo wa, sẽrẽ zahuré, Mare bâtâ pusizém niwĩ, Efrõ Zoaha ꞌra te itehutu ãma. Ta hã, Zoa hitita norĩ siré hã.
10 Ã hã itehudu, Abraꞌã, hitita norĩ wi te te iꞌuipra. Tame ma tô Abraꞌã norĩ Saraha me ãma tiꞌa zahuré ni.
11 Tawamhã Abraꞌã dâꞌâ parimhã, ma tô ꞌRe ihâimana uꞌâsi mono hã, iꞌra Izaquihi ma, iwẽ hã ma tô te te tãma ꞌre apisutu. Izaqui hã Beꞌe-Laꞌai-Roꞌi ꞌratamhã ma tô ꞌre hâimana.
Ismaeu nhihudu norĩ wasuꞌu
12 Ã hã, Ismaeu nhihudu norĩ nhisi na robꞌuiꞌéré. Ta hã, Abraꞌãhã ꞌra, Agaha wa te te ipodo, Saraha ma romhuriꞌwa, ezipsiu ꞌra. Taha sipoto norĩ nhisi hã ãne,
13 sisãnaꞌre ipoto zaꞌra mono bâ hã: Nebaiote ipotoꞌrada. Isõsi hã Queda, Adbeꞌu, duré Mibsã,
14 Misma, Duma, Masa,
15 Hadade, Tema, Zetu, Nafis, duré Quedema.
16 Ã norĩ hã Ismaeu ꞌra 12 na ihâiba zaꞌra hã. Tawamhã ta norĩ zaꞌru zaꞌra hã, duré ite mono bâ romhâ ꞌmanharĩ na ꞌri nhoré mono ma tô isisi mono bâ da te ãma ꞌre waptẽrẽ zaꞌra. Tawamhã ta norĩ hã ma tô tinhibꞌaꞌuwẽ mono bâ danhibꞌihâꞌa na sima ꞌre hâimana zaꞌra.
17 Tawamhã Ismaeu ãma 137 na ãma iwahub ãma, ma tô oto dârâ. Tahawa, ma tô oto tihiꞌrata norĩ siré simisutu ꞌre hâimana.
18 Tawamhã Ismaeu nhihudu norĩ, ma tô Havira na romnhisi norĩ waꞌwamhã, Su na duré romnhisi waꞌwa ꞌre hâimana zaꞌra, Ezitu bâtâ pusizém niwĩmhã, Asiria nhoꞌõmoi baba bâdâdi ihâimana niwĩ. Ta norĩ hã ma tô romhâ na Abraꞌãhã nhihudu norĩ amo nhiti hã ꞌre hâimana zaꞌra.
Ezau norĩ, Zacoho me ipoto zahuré zé wasuꞌu
19 Ã hã Izaqui, Abraꞌãhã ꞌra wasuꞌu.
20 Tawamhã Izaqui 40 na ãma iwahub ãma, ma tô Betuꞌéhé ꞌra Rebecaha ãma timro, Labãhã hidiba ãma hã. Ta norĩ hã Arameu norĩ siré, te Mezopotãmia na romnhisi ãma ꞌre hâimana zahuré.
21 Rebeca hã ꞌrazéb ꞌré wa, te ꞌra ãna ꞌre hâimana. Tahawa te Izaqui, Uburé Danhibꞌapito ma ãma mre. Tawamhã Uburé Danhibꞌapito te te tiwi irowaptẽrẽzém na te te wapari wa, ma tô Rebeca hã oto tiwasã.
22 Tawamhã idiꞌi ꞌremhã aiꞌuté hã isiꞌubza. Tahawa tina diꞌi ꞌremhã te nasi siwabzuri zahuré. Ãhã wa, te ãne sina rosaꞌrata: “E tihai wamhã, ma ãne hã ĩma tiromhâiba.” Tahawa te Uburé Danhibꞌapito te te sadanharĩ da hã mo.
23 Tawamhã ma te ãma sadaꞌâ ãne:“Adiꞌi ꞌremhã te maparane aꞌuwẽ hiꞌrata da hã tihâimana zahuré.Aiꞌra te za aima tipoto zahuré, maparane aꞌuwẽ norĩ, tinhitobꞌru na sima ꞌre ihâimana zahuré mono da hã.Aiꞌra hâiba amo hã te za siptete na tihâiba amo nhipai u ꞌre hâimana.Duré dadubꞌrada hã te za tino zapari ꞌre hâimana.”
24 Tawamhã Rebecaha ma, iꞌra tãma ipoto zahuré zé bâdâ oto wisi wamhã, ma tô ꞌwatébrémi na maparane tãma tipoto zahuré.
25 Imorĩꞌrata na ipodo hã ihâiba pré ro, duré ihâiba sui ꞌré, daꞌuza hâ pa ihâi ro ne hã. Tahawa ma tô sisi zahuré, Ezau* na.
26 Taha pari isãnaꞌre ipodo ma tô tinhibꞌrata amo na tidubꞌrada Ezauhu para naꞌrada hã te te tété mono sina watobro. Tahawa ma tô sisi zahuré, Zaco* na. Ãne ma tô Izaquihi ãma 60 na iwahub ãma Rebecaha ma aiꞌuté isiꞌubza ꞌwatébrémi hã tãma tipoto zahuré.
Ezau dama ipotoꞌrata wa, ãma ꞌre ihâimana mono zé, tino Zacoho ma, te te isaꞌrézé wasuꞌu
27 Tawamhã ꞌwatébrémi norĩ ma tô oto tiprédub zahuré. Tahawa Ezau ma hã wẽ uptabi di, rom na ꞌre ihâimana mono da hã. Tahawa ma tô sisõpãrĩ pese na hã ꞌre hâimana. Tane nherẽ, Zaco, sima iwẽ na ꞌri ꞌrep si ꞌre ihâimana mono da si, tãma iwẽ hã.
28 Tawamhã Izaqui, ma tô Ezau te te ꞌre sawi pese, ino nhipai u, iꞌabaze nhi na ꞌre sai pese mono wa. Tane nherẽ, Rebeca ma tô Zacoho si te te ꞌre sawi pese, idubꞌrata nhipai u.
29 Tawamhã nimahã bâtâ na Zaco dasai waiꞌo ise na sipi ré, ma tô Ezau aꞌubuni hawimhã wi, sadâꞌâ uptabi na, duré mram uptabi na.
30 Tahawa te ãne tiwi waptẽ:
— Mrab uptabi di, ĩma hã. Tahawa maꞌãpé ĩzawi na hã dasai waiꞌo pré suru na we ĩma aꞌâri. (Tahawa Ezau ma tô sisi ni Edõ* na isisi amo na.)
31 Tawamhã Zaco, asa ma te ãma sadaꞌâ ãne:
— Wa za tô aima saꞌré, a hã ĩma aipoto ꞌrata wa, aima ꞌre ihâimana mono, ĩma saꞌréi wamhã.*
32 Tawamhã Ezau te duré asa tãma tinha ãne:
— Marĩ õre di, wẽ di. Wa aré oto dârâ. E marĩ da bâ ĩma hã, dama ipotoꞌrata ma, ꞌre ihâimana mono hã.
33 — Tahawa maꞌãpé imorĩꞌrata na aꞌâ ĩma ãma ropisutu. — Ãne te Zaco tãma tinha.
Tawamhã Ezau, ma tô ropisudu tãma ꞌmanha. Te te tãma iꞌmanharĩ zarina, ma tô dama ipotoꞌrata na ꞌre ihâimana mono zé hã oto tãma saꞌré.
34 Tawamhã Zaco iꞌuꞌẽtẽ wapu, duré dasai waiꞌo pré hã ma tô tãma tisõ. Tawamhã te te ꞌrẽne parimhã, duré te te simizâri parimhã, ma tô oto wahudu, morĩ da. Ãne ma tô Ezau dama ipotoꞌrata ma, ꞌre ihâimana mono zé hã siwi wẽꞌõ.
Ĩwaꞌõtõ piꞌreba watsuꞌu mono
^ 25:25 Ezau hã Ebreu norĩ mreme na “isuiꞌré” aiwa prã na ne iwapari na hã.
^ 25:30 Edõ hã Ebreu norĩ mreme na “ipré” aiwa prã na ne iwapari na hã.
^ 25:26 Zaco hã Ebreu norĩ mreme na “dapara naꞌrada” aiwa prã na ne iwapari na hã.
^ 25:31 Dama ipotoꞌrada hã te za uburé tisiré aꞌuwẽ norĩ ma, isibꞌapito zaꞌra na ꞌre hâimana. Te za duré ino norĩ nhipai u timama nhibro hã iꞌuirĩ na sima waibu.
