Zenezi 26:1-35
26 Tawamhã taha tiꞌai ꞌre, mra te da te ꞌre sépata zaꞌra, Abraꞌã, ꞌre hâimana mono ré, amnho ihâimana õ wam ne. Tahawa Izaqui, ꞌri nhoꞌu Gera na isisi u ma tô mo, Abimelequi filisteu norĩ nhibꞌapito ꞌre ihâimana mono zéb u hã.
2 Tawamhã tame Uburé Danhibꞌapito ma tô Izaquihi ma, sihâiꞌré. Tahawa, te ãne tãma tinha:
— Ezitu u hã aimorĩ õ di za. Tiꞌa te aima ipisutuzéb ãmap si te za ꞌre asãmra mo.
3 Ãme te za tô aꞌâ ꞌre aihâimana mo. Tawamhã wa hã wa za asiré ꞌre ĩhâimana. Wa za duré iwẽ hã te aima ꞌre apisutu uꞌâsi. Asihudu norĩ ma, wa za ã hã uburé tiꞌa hã te tãma ꞌre anhomri. Ãhã wamhã, wa za ãma tãma uwaimra, aimama Abraꞌãhã ma, ĩnhimiropisudu te tãma iꞌmanharĩzé hã.
4 Wa hã wa za pisutu, asihudu norĩ ahâ na ꞌre hâimana zaꞌra mono da hã, wasi hâiwa na ꞌre isimasa mono ne. Wa za duré uburé ã hã tiꞌa te tãma ꞌre anhomri. Asihudu norĩ uꞌâbâmhã, wa za aꞌuwẽ mono bâ iwẽ hã te tãma ꞌre pisutu zaꞌra, ro pâ.
5 E marĩ wa. Abraꞌã hã ma tô ĩmreme duré ĩnhimiroti te te ꞌre wapari pese. Ma tô te tãma ꞌre iwaihuꞌu mono zé hã te te ĩma ãma ꞌre uwaimrami.
6 Ãne ma tô tawamhã Izaqui, Gera ãma hã ꞌre sãmra.
7 Tawamhã aibâ norĩ tô õhõ ꞌre, ꞌre irob zaꞌra mono, imro na te te sadanharĩ zaꞌra wamhã, ma tô tihidiba na tãma wasuꞌu zaꞌra. Rebeca hã piꞌõ iwẽ uptabi. Tahawa Izaqui timro na te te iwasuꞌu da hã pahi di, õhõ ꞌre, aibâ norĩ ꞌre irob zaꞌra mono hã te te siwi wĩrĩ õꞌumnhasite, imro zô.
8 Tawamhã Izaqui, taha ꞌremhã ma tô ꞌre hâimana hâ pese. Tawamhã nimahã bâtâ na Abimelequi, filisteu norĩ nhibꞌapito hã ma tô Izaqui, timro Rebeca tinhibꞌrata na te te hâiba upi mono ré, zanela ꞌri zadazâri hâimo hawi sipapara ꞌmadâ.
9 Tahawa, Izaquihi zô hârâ wamhã, ma tô sadanha ãne:
— Sena õ hã tô aimro. E marĩ da, ma tô bété aihidiba na iwasuꞌu.
— Wa hã te rosaꞌrata wa ãne, ĩmro na te aima wasuꞌu zaꞌra waꞌaba wamhã, asiwi ĩwĩrĩ aba õꞌumnhasite. — Ãne Izaqui ma te asa ãma tãma waꞌrã.
10 Tawamhã Abimelequi te duré tãma tinha ãne:
— E marĩ da, ma tô ãne hã wama iꞌmanharĩ zaꞌra. Wama zaꞌra aré wapure di, iré iwaꞌmanomro da hã waptâ wa. Ane ꞌwaꞌâhã, asimiꞌmanharĩzéb zarina te aré wawasédé hã wama iwazere zaꞌra.
11 Tawamhã Abimelequi, ma tô uburé tinhibꞌaꞌuwẽ norĩ ma, dapoꞌre pu hã ꞌmanha, ãne: “Niꞌwa ã hã aibâ norĩ ma, imro me, marĩ iwasédé te te tãma ꞌmanharĩ zahuré wamhã, te za wĩrĩ ni za.”
12 Tawamhã Izaqui, taha wahum na ma tô tame robꞌre hã ꞌmanha. Tawamhã te te oto tehâri wamhã, te te iꞌaꞌre nhipai u ma tô waze, 100 na isaꞌrata nhipai u. E marĩ wa. Uburé Danhibꞌapito iwẽ na te te pawapto wa.
13 Tawamhã we oto simarĩ pese mono wamhã, te oto sibro pese na ꞌre hâimana.
14 Izaquihi nhimizama poneꞌẽrebâ hã, poneꞌẽrebâ zéré uzé hã, powawẽ hã, duré tãma iromhuriꞌwa norĩ hã ahâ uptabi di. Tahawa te filisteu norĩ hã te te siwi ꞌre ꞌruiwapari oto.
15 Tahawa, ma tô uburé â zô abꞌre hã tiꞌa na te te sitob zaꞌra, Izaquihi mama, Abraꞌã ꞌre hâimana mono ré, tãma iromhuriꞌwa norĩ te te siwi iꞌabꞌre mono hã.
16 Tawamhã Abimelequi, te Izaquihi ma, nimahã bâtâ na tãma tinha ãne:
— Te za oto aimo, wanhiptiꞌa zaꞌra hawimhã. Asiptete uptabi na te wama zaꞌra hã ꞌre aihâimana mo.
17 Tawamhã Izaqui, ta hawi oto watobro wamhã, ma tô romharé Gera na isisi ãma romhâ ꞌmanharĩ na ꞌri hã sima sõré, tame aꞌâ ꞌre hâimana mono da.
18 Tawamhã Abraꞌã ꞌre hâimana mono ré, â zô da te iꞌabꞌre zaꞌra mono hã, duré dâꞌâ pari filisteu norĩ te te aré siwi isitob zaꞌra hã ma tô apâ abꞌre hawimhã tiꞌa te te siwi sãmra, Izaquihi ma romhuriꞌwa norĩ hã. Tawamhã imama te te isisi zaꞌra zém na ma tô duré apâ tô õhõ na te te anhisi.
19 Tawamhã nimahã bâtâ na Izaquihi ma romhuriꞌwa norĩ romharé ãma te te siwi iꞌabꞌre ãmamhã ma tô siwi sõpẽtẽ, ubꞌre nasi ipu hã.
20 Tane nherẽ, Gera ãma poneꞌẽrebâ ꞌmadâꞌâꞌwa norĩ, Izaquihi ma, poneꞌẽrebâ ꞌmadâꞌâꞌwa norĩ me hã ma tô ãma sisadaꞌâbâ zaꞌra, õ hã â zô abꞌre ite zaꞌra na hã. Tahawa Izaqui â zô abꞌre hã ma tô sisi ãne, “ãma idasisadaꞌâbâ zaꞌra zém” na.
21 Taha pari Izaquihi ma romhuriꞌwa norĩ, ma tô aimawi hã siwi abꞌre. Tawamhã ma tô duré taha na ãma sisadaꞌâbâ zaꞌra. Tahawa ma tô duré ta hã sisi, “dazahi na dasisada ꞌre idahâimana zaꞌra mono zém” na.
22 Tawamhã Izaqui ta hawi oto watobro wamhã, ma tô duré â zô abꞌre hã ꞌmanha. Tawamhã ãma idasisadaꞌâbâzé tame hâimana õ wa, ma tô sisi, “Robꞌre Zaꞌẽtẽ” na. Tahawa te duré tinha ãne:
— Uburé Danhibꞌapito, ã hã ro isaꞌẽne iwa ꞌre iwahâimana zaꞌra mono zéb da, ma tô oto wama sõmri zaꞌra. Tahawa wasima iwẽ na wa za oto ãmemhã ꞌre wasiꞌubumro.
23 Ta hawi Izaqui ma tô oto mo, Beseba na ꞌri nhoꞌõmo nhisi u hã.
24 Tawamhã tô taha mara na, Uburé Danhibꞌapito tãma sihâiꞌré wamhã, te ãne tãma tinha:
— Wa hã, Abraꞌã aimama te, ꞌRe ihâimana uꞌâsi mono. Aipahi õ di za, wa hã asiré ꞌre ĩhâimana uꞌâsi mono wa. Ĩma romhuriꞌwa Abraꞌãhã uꞌâbâ, wa za iwẽ hã te aima ꞌre apisutu. Duré asihudu norĩ ahâ uptabi na ꞌre hâimana zaꞌra mono da wa za aima ꞌmanha.
25 Tawamhã Izaqui, tame ẽtẽ zaꞌra te te ꞌmanharĩ wamhã, ma tô Uburé Danhibꞌapito ãma tiwata. Duré tô taha tiꞌai ꞌre romhâ ꞌmanharĩ na te te sima ꞌri nhoré mono wamhã, ma tô duré tame tãma romhuriꞌwa norĩ hã â zô abꞌre hã siwi abꞌre.
Izaqui norĩ, Abimelequihi me roti na isisaze zahuré zé wasuꞌu
26 Tawamhã nimahã bâtâ na Abimelequi Gera hawi ma tô mo, Izaquihi ma te te robzanhamri da. Tahawa, isiré ma tô isiwaihu Auzate hã mo, Fico dasiꞌwapéi ꞌmadâꞌâꞌwai me.
27 Tawamhã te Izaqui sadanha ãne:
— E marĩ zô, te we ĩtẽme aiꞌabaꞌréi waꞌwa, ĩma robzanhamri zaꞌra waꞌaba da. Oro ĩzada asitiꞌru zaꞌra waꞌaba za nimahã na hã. Oro duré asiwi ĩwazere aba za, asiptiꞌa zaꞌra waꞌaba hawimhã.
28 Tawamhã asa ma te siwi sadaꞌâ ãne:
— Uburé Danhibꞌapito, sena na asiré ꞌre ihâimana mono na hã wa tô oto aiꞌãma waihuꞌu zaꞌra ni. Tahawa, wa ãne wasima nharĩ zaꞌra ni: Ropisutu zahi hã wa za wasima ꞌmanharĩ zaꞌra ni, itete na, ãne na:
29 A hã niwamhã iwasédé hã wama ꞌmanharĩ zaꞌra õ di za. Duré wa norĩ hã niwamhã iwasédé wa te aima ꞌmanharĩ zaꞌra õ di za. Iwẽ na hã wa tô wa te aima ꞌre ꞌmanharĩ uꞌâsi zaꞌra. Duré rowẽ na warob zaꞌra hawi aiwatobro da hã wa tô aima waprosi zaꞌra ni. Ãhã na wa tô oto waihuꞌu zaꞌra ni, Uburé Danhibꞌapito iwẽ te te aima ꞌre iꞌapisutu mono zém na hã.
30 Tawamhã Izaqui, dasa isaꞌẽne te te tãma ꞌmanharĩ zaꞌra wamhã, ma tô duré isimihârizé te te tãma iꞌmanharĩ zaꞌra zém na tisa hã uburé ãma simihâri zaꞌra.
31 Tawamhã duré awẽm na mararé uptabi utu zahuré wamhã, ma tô roti na hã sisaze zahuré. Ma tô duré ropisudu hã sima ꞌmanharĩ zahuré. Taha pari Izaqui sisaꞌu te te sawi wamhã, ma tô oto rowẽ sina hã aiꞌabaꞌré.
32 Tawamhã tô taha bâtâ na Izaquihi ma romhuriꞌwa norĩ te te siwi iꞌabꞌre wa, ubꞌre nasi ipu ãne te te tãma wasuꞌu zaꞌra da hã, ma tô itẽme aiꞌabaꞌré: “Wa te wasiwi iꞌabꞌre ꞌremhã â hã wa tô wasiwi sõpẽtẽ ni!”
33 Tahawa Izaqui, ma tô â zô abꞌre hã sisi, Seba na. Tawamhã ta hawim haré ã hã ꞌri nhoꞌõmo nhisi hã, Beseba na te oto ꞌre hâimana.
Ezau mro norĩ wasuꞌu
34 Tawamhã Ezau ãma 40 na ãma iwahub ãma, ma tô Zudite, Beeri ꞌra ãma hã timro, duré Basemate, Elõhõ ꞌra sipiꞌõi ãma hã, hitita norĩ siré azarutu norĩ ãma.
35 Tawamhã duré ã hã azarutu norĩ hã ma tô Izaqui norĩ ma, Rebecaha me roꞌwaꞌrézé hã te te sina tãma ꞌre sõmri zahuré, siꞌuiwa na.
