Zenezi 30:1-43
30 Tawamhã Raqueu, ꞌra waihuꞌu õ na siwaihuꞌu wamhã, ma tô tidubꞌrada Léia hã ꞌruiwapa, õhõ si ꞌra siwapto wa. Tahawa te timro ma tãma tinha ãne:
— Maꞌãpé ĩꞌra da, ĩma sô romhuri. Ãnei õ wamhã, wa za dârâ.
2 Tawamhã Zaco, Raqueu zada ma tô tizahi. Tahawa te ãne tãma tinha:
— E wa hã ꞌRe ihâimana uꞌâsi mono bâ ma tô ĩꞌãma irosaꞌra. Ta hã te te tô aima saꞌréi õ di, iꞌaiꞌra da hã.
3 Tahawa te Raqueu ãne duré tãma tinha:
— Ãhãta te ĩma romhuriꞌwa Bira hã tihâiba. Maꞌãpé õhõ ãma si pé aihâimana mono. Ta hã ꞌra wapsi, te za tô ĩꞌra ne ĩma ꞌre hâimana. Taha uꞌâbâ, wa za tawamhã ina na tãma ꞌre ĩhâimana, wa hã.*
4 Tahawa Raqueu, Zacoho ma, tite romhuriꞌwa Bira na isisi hã ma tô tãma hâiba nho, imro prã na tãma ꞌre hâimana mono da. Tawamhã õhõ ré si ma tô oto nomro.
5 Tahawa, Bira oto wasã wamhã, ma tô iꞌra hã tãma podo.
6 Tawamhã Raqueu te tinha ãne:
— ꞌRe ihâimana uꞌâsi mono, ma tô iꞌuwaibaba na ĩma ꞌmanha. Te tiwi iwaptẽrẽzém na hã ma tô ĩwapa. Tahawa ꞌwatébrémi ma tô ĩma tisõ.
Ãne wa, ma tô ꞌwatébrémi hã sisi, Dã* na.
7 Tawamhã Bira, ma tô duré apâ tiwasã. Tahawa, Zacoho ꞌra isõsi ma tô duré tãma podo, ꞌwatébrémi na.
8 Tawamhã Raqueu te duré tinha ãne:
— Ã hã ꞌwatébrémi nhisi hã za, Nafitali* na. E tihai wa. Ĩdubꞌrata na ĩsina ĩnhimirosaꞌrata na te iroꞌwapé na hã te ãma aiꞌuté wa.
9 Tawamhã Léia, ꞌra zahu õ na siwaihuꞌu wamhã, ma tô tite romhuriꞌwa Ziupa na isisi hã tãma hâiba nho Zacoho ma, imro prã na tãma ꞌre hâimana mono da.
10 Ãhã wamhã Ziupa zéꞌre hawimhã, ma tô Zacoho ꞌra hã tãma podo.
11 Tawamhã Léia te tinha ãne:
— E niha ma tô iwẽ hã ĩma watobro.
Tahawa ꞌwatébrémi hã ma tô sisi, Gadi* na.
12 Tawamhã nimahã na ma tô duré Ziupaha zéꞌre hawi, Zacoho ꞌra hã tãma ꞌmaipodo.
13 Ãhã wamhã, te Léia duré tinha ãne:
— E niha ĩtoi uptabi, ãhã na hã. Tahawa te za oto piꞌõ norĩ, ĩtoi uptabi na ĩhâimanazém na hã te te sima ꞌre ĩwasuꞌu zaꞌra.
Tahawa ma tô ꞌwatébrémi hã sisi, Asé* na.
14 Tawamhã nimahã bâtâ na amnho trigu, da te ꞌre itehâri zaꞌra mono ré, ma tô Rubẽ roptehutu na daburu u hã mo. Tame ma tô mandragora* na robꞌrã nhisi hã sãmri zaꞌra. Ta hã te te isãmri zaꞌra hã ma tô tina Léiaha ma hã tãma tidu. Tawamhã ã hã Raqueu te te ꞌmadâꞌâ wamhã, ma tô Léiaha ma tinha ãne:
— Ĩzawi na hã, aiꞌra mandragora we te te aima iꞌãwisi zaꞌra hã, maꞌãpé ĩma ꞌmanhomri.
15 Tawamhã Léia ma te ãma sadaꞌâ ãne:
— E niha ĩmro na ãma ĩwi ate nherẽ, te za duré niha hã ĩma irobꞌmanha. E te duré asima iwẽ, robꞌrã ĩꞌra te te ĩma isõmri zama, ĩwi âri da hã.
Tawamhã Raqueu te asa tãma tinha ãne:
— Tane wamhã, wa te ãma wasiwi saprĩ na pé. A hã te za robꞌrã mandragora hã ĩma isõmri zaꞌra. Tawamhã taha waꞌrãmi wa za Zacoho ré, ã mara na anomro da hã aima saꞌré.
16 Tawamhã Zaco, roptehutu na daburu hawi hâiwahâ pesere wisi wamhã, ma tô Léia hã watobro, te te sina uzusi da. Tahawa te ãne tãma tinha:
— Ã mara na hã te za oto ĩré ano, taha da, robꞌrã, ĩꞌra te te ĩma isõmri na te aiwaꞌâbâ siromo wa.
Tawamhã tô taha mara na iré nomro wamhã, ma tô ãma tihâiba.
17 Tawamhã ꞌRe ihâimana uꞌâsi mono te te irowaptẽrẽzém na te te wapari wa, ma tô duré oto tiwasã Léia hã. Tawamhã Zacoho ꞌra, 5 ãma hã ma tô duré oto tãma podo, iséꞌre hawimhã.
18 Tawamhã Léia te tinha ãne:
— ꞌRe ihâimana uꞌâsi mono, ma tô iwẽ na ãma ĩma waꞌrã, ĩte aibâ ma, ĩma romhuriꞌwa te tãma sõmri wa.
Tahawa, ꞌwatébrémi hã ma tô sisi, Isaca* na.
19 Tawamhã 6 na iꞌra ãmab da hã ma tô duré tiwasã. Tawamhã iꞌra ꞌwatébrémi ma tô duré oto tãma podo.
20 Tawamhã te tinha ãne:
— ꞌRe ihâimana uꞌâsi mono, iwẽ uptabi na hã ma tô ĩma tinhopru. Tahawa te za oto ĩmro hã te te ꞌre ĩꞌmadâꞌâ wẽ uꞌâsi, 6 na iꞌra hã ĩhawimhã oto hâimana zaꞌra wa.
Tahawa, ta hã ma tô duré sisi, Zébulõ* na.
21 Tawamhã daꞌrãirẽme hã, ma tô duré iꞌra baꞌõtõ na hã tãma podo. Ta hã ma tô sisi, Dina na.
22 Tawamhã ꞌRe ihâimana uꞌâsi mono, Raqueu ãma ma tô oto poꞌre puru. Tahawa te te tiwi irowaptẽrẽzém na te te wapari wa, ma tô oto tãma rowairébé, ꞌra da.
23 Tawamhã ma tô tiwasã. Tahawa, ma tô iꞌra ꞌwatébrémi na tãma podo. Tahawa te tinha ãne:
— ꞌRe ihâimana uꞌâsi mono, ĩma irowazébzé hã ma tô oto ĩma tipa.
24 Uburé Danhibꞌapito, ĩꞌra siꞌaibâ te te duré ĩma sõmri neza, ꞌwatébrémi hã.
Tahawa, Zuzé* na ma tô sisi.
Zaco norĩ, Labãhã me roti na isisaze zahuré zé wasuꞌu
25 Tawamhã Zuzé poto pari, Zaco te Labãhã ma tãma tinha ãne:
— Maꞌãpé ĩma rowairébé, apâ ĩnhiptiꞌai u ĩmorĩ da hã.
26 Tahawa maꞌãpé duré ĩꞌra norĩ, duré ĩmro norĩ hã ĩma hâiba zaꞌré zaꞌra na, te aima ꞌre iromhuri mono zarina ĩma ꞌre ihâimana zaꞌra mono hã. Ĩmorĩ da oto. Aima waihuꞌu pese di, saꞌẽtẽ na te aima ꞌre iromhuri mono zém na hã.
27 Tawamhã Labã, ma te ãma sadaꞌâ ãne:
— Ĩzawi na hã maꞌãpé ĩꞌrata ꞌre aihâimana uꞌâsi mono. E marĩ wa. Wa hã marĩ te iꞌmanharĩ nhipese na, wa tô waihuꞌu, aihâiba uꞌâbâmhã Uburé Danhibꞌapito iwẽ na te te ꞌre ĩpawapto mono zéb zarina hã.
28 Tahawa maꞌãpé asima iwẽzém na ĩma waihuꞌu, za nasi te aima iwaꞌâbâzéb da hã.
29 Tawamhã Zaco, asa ma te ãne ãma tãma waꞌrã:
— Te aima ꞌre iromhuri mono zé hã aima waihuꞌu pese di. Duré asimizama te aima ꞌre iꞌaꞌmadâꞌâ mono zé hã aima waihuꞌu pese di.
30 We ãwa ĩwisi wana ré hã asimarĩ hã aré umrore di. Tane nherẽ, ma tô oto sina hâ. Duré ꞌRe ihâimana uꞌâsi mono, nimomo ꞌre ĩne mono sidâpâsi ma tô iwẽ hã te te aima ꞌre apisutu. Tane nherẽ, oto wa hã ãhã na hã ĩhawi aꞌuwẽ norĩ si te oto ꞌre iꞌaꞌmadâꞌâ mono da si, wa tô oto ĩsima wẽ zahi.
31 Tawamhã Labã te duré ãma sadanha ãne, tô õhõ na:
— E niha te asima iwẽ, za nasi te aima iwaꞌâbâzéb da hã.
Tawamhã Zaco, ma te ãma sadaꞌâ ãne:
— Te ĩsima wẽ õ di, dapawaꞌâbâzé hã. Wa za tô asimizama ꞌmadâꞌâ na romhuri na ãma aima uzusi za, ãne na ĩnhimirosaꞌrada te aima ipibuzém na ãma ĩzaze da hã wamhã.
32 Ãne na ĩnhimirosaꞌrada te aima ipibuzém na hã: Ã bâtâ na wa za uburé asimizama waꞌwaibaba hã ꞌre mo, te ĩsima azani mono da, poneꞌẽrebâ iꞌrare iꞌrãdâꞌâ norĩ hã, poneꞌẽrebâ zéré mapure iꞌupto norĩ hã, duré poneꞌẽrebâ zéré uzé iꞌupto norĩ hã. Ã norĩ na si ĩpawaꞌâbâ da hã, wa tô oto wa hã ĩsima wẽ zahi.
33 Aptoꞌo ré wamhã, sena na ꞌre ĩhâimana mono zém na ĩwaihuꞌu da hã aima wapure di za. Nimahã na ãma ĩpawaꞌâbâ da, azaꞌrata wamhã, poneꞌẽrebâ iꞌrare iꞌrãdâꞌâꞌõ norĩ, poneꞌẽrebâ zéré mapure iꞌuptoꞌõ norĩ, duré poneꞌẽrebâ zéré uzé iꞌuptoꞌõ norĩ ꞌmasãmri wamhã, te za iwaihuꞌu, wa hã te aiwi iꞌmanhimiꞌuri na hã.
34 Tawamhã Labã, Zaco te te sina tãma ipibuzém na te te ãma sazei wa, ma tô ãne tãma tinha:
— Wẽ di, ĩma ipibuzé hã. Wa te wasima ꞌmanharĩ tô.
35 Tane nherẽ, Labã, tô taha bâtâ na ma tô uburé poneꞌẽrebâ zéré uzé siꞌaibâ iꞌupto norĩ hã, isipiꞌõ iꞌupto norĩ hã, duré uburé poneꞌẽrebâ iꞌrare iꞌrãdâꞌâ norĩ me hã sima sani zaꞌra. Taha pari, ma tô ã norĩ hã tiꞌra norĩ ma tãma saꞌré zaꞌra, te te siwi ꞌmadâꞌâ da hã.
36 Ãne pari, Zacoho nhiti siꞌubdatõ bâdâ ãma ĩmorĩ na ma tô romhâ na hã tiwi tihâiba, tinhimizama norĩ iꞌupto ré. Taha ré te Zaco, timama waptém na timaprebaba ma, isimizama hâiba amo hã tãma ꞌmadâꞌâ zaꞌra.
37 Tawamhã Zaco, estoraqui na rowede nhisi panhipti hã, amedowera na rowede nhisi panhipti hã duré platano na rowede nhisi panhipti hã ma tô waibu. Tahawa, ma tô te te ahâiwazu, iwaihõꞌa hã te te iꞌaꞌurĩrĩzéb u.
38 Tawamhã duré ta hã timaprebaba nhimizama nhoꞌremhã ma tô saꞌra, te te ꞌre iꞌâhuri mono zéb ãma, tame danhimizama siꞌaibâ norĩ, piꞌõ hã te te ꞌre wasã uꞌâsi zaꞌra mono wa.
39 Tawamhã rowede panhipti nhoꞌre te te ꞌre wasã zaꞌra mono sidâpâsi, ma tô poneꞌẽrebâ ꞌra norĩ iwawi na hã duré iꞌupto na hã nasi tãma rere.
40 Tawamhã Zaco, poneꞌẽrebâ ꞌra norĩ hã ma tô te te sima ꞌre azani. Tahawa, ma tô Labãhã nhimizama norĩ iwawi na hã duré iꞌrãdâꞌâ na hã ãma atob zaꞌra. Ãne ma tô Zaco, tinhimizama uptabi da hã oto sima tébré, Labãhã nhimizama hawimhã.
41 Tawamhã poneꞌẽrebâ sipiꞌõ ihâiba nhiptete norĩ, aibâ te te ꞌre wasã zaꞌra mono ré, ma tô wede panhipti isõꞌreb zaꞌra hã nasi saꞌra, te te ꞌre iꞌâhuri mono zéb ꞌre. Taha zarina ma tô wede panhipti ꞌratamhã ꞌre wasã zaꞌra.
42 Tane nherẽ, Zaco, poneꞌẽrebâ ihâiba nhibꞌuware norĩ nhoꞌremhã, wede panhipti te te nasi azaꞌra õ di. Tahawa ihâiba nhibꞌuware norĩ, Labãhã ma si ma tô tãma ꞌre hâimana zaꞌra. Duré Zacoho ma, ihâiba nhiptete norĩ si ma tô tãma ꞌre hâimana zaꞌra.
43 Tawamhã ãne wa, ma tô oto sisibro pese. Isimizama poneꞌẽrebâ zéré mapure norĩ, poneꞌẽrebâ zéré uzé norĩ, tãma iromhuriꞌwa siꞌaibâ norĩ, tãma iromhuriꞌwa sipiꞌõ norĩ zama, awaru baꞌõmore norĩ hã, duré awaru poꞌre pore norĩ hã ahâ uptabi di oto.
Ĩwaꞌõtõ piꞌreba watsuꞌu mono
^ 30:24 Zuzé hã Ebreu norĩ mreme na “ĩma sõmri zahu na” aiwa prã na ne iwapari na hã.
^ 30:20 Zébulõ hã Ebreu norĩ mreme na “danhoprubzé” aiwa prã na ne iwapari na hã.
^ 30:3 Pawaꞌâbâ ãna dama romhuriꞌwai ꞌra hã te za isibꞌihâꞌa ꞌra ne tãma ꞌre hâimana.
^ 30:8 Nafitali hã Ebreu norĩ mreme na “dasina roꞌwapé” aiwa prã na ne iwapari na hã.
^ 30:6 Dã hã Ebreu norĩ mreme na “iꞌuwaibaba na si rowairébézé” aiwa prã na ne iwapari na hã.
^ 30:13 Asé hã Ebreu norĩ mreme na “datoi uptabi” aiwa prã na ne iwapari na hã.
^ 30:11 Gadi hã Ebreu norĩ mreme na “iwẽ hã dama iwatobrozé” aiwa prã na ne iwapari na hã.
^ 30:18 Isaca hã Ebreu norĩ mreme na “marĩ waꞌrãmi dama danhoprubzé” aiwa prã na ne iwapari na hã.
^ 30:14 Mandragora na robꞌrã nhisi hã, aiꞌutézé ꞌridawaꞌwa na hã dama iꞌumnhasi zaꞌẽne, duréihã.
