Zenezi 31:1-55
31 Tawamhã Zaco, Labãhã ꞌra norĩ, te te nasi inharĩ zaꞌra zé ma tô waihuꞌu:
— Wamama zaꞌra te, Zaco hã ma tô uburé sima sani zaꞌra. Taha zarina ma tô oto sisibro pese ãma.
2 Tawamhã Zaco ma tô duré ꞌmadâꞌâ waihuꞌu, Labã imorĩꞌrata na isiwaihuꞌu na tãma ihâimana nei õ na isihâiꞌrézém na hã.
3 Tawamhã Uburé Danhibꞌapito te Zacoho ma tinha ãne:
— Aimama norĩ nhiptiꞌai u te za oto apâ aimo, asiré aꞌuwẽ asisãnawã norĩ ꞌre ihâimana zaꞌra mono zéb u. Wa hã wa za asiré ĩhâiba.
4 Tahawa Zaco, te Raqueu norĩ zô, Léiaha me sô tihârâ zahuré, isimizama norĩ rom na isimasabzéb u itẽme neb da.
5 Tawamhã itẽme simasisi wamhã, te ãne tãma nharĩ zahuré:
— Aimama ꞌwa ĩsiwaihuꞌu na imorĩꞌrata na ĩma ihâimana nei õ na isihâiꞌrézém na wa tô ꞌmadâꞌâ waihuꞌu. Tane nherẽ, ĩmama te, ꞌRe ihâimana uꞌâsi mono hã te ĩsiré ꞌre hâimana uꞌâsi.
6 Aima hã waihuꞌu pese aba di, aimama aba ma ĩnhiptete sina te ꞌre iromhuri pese mono zém na hã.
7 Tane nherẽ, ma tô ĩma sadawa hapese. 10 na ãma isahu na ĩpawaꞌâbâ na ma to ĩwĩ ãma tiꞌawi. Tane nherẽ, ꞌRe ihâimana uꞌâsi mono, marĩ hã te te ĩꞌãma iꞌmanharĩ wasété da hã te te tãma ĩhâiba nhomri õ di.
8 Ãne te te ĩma nharĩ wamhã: “Poneꞌẽrebâ ꞌra iꞌupto na si za aipawaꞌâ hã”, tawamhã ma tô nasi isarina si tipoto zara, iꞌupto na. Duré te te ĩma nharĩ wamhã ãne: “Poneꞌẽrebâ zéré uzé ꞌra iwawi na si aipawaꞌâ hã za”, tahawa ma tô duré tô nasi isarina iwawi na si tipoto zaꞌra.
9 Ãne ma tô ꞌRe ihâimana uꞌâsi mono, aimama aba wi isimizama hã tiwi sani zaꞌra, te te ĩma sõmri zaꞌra da.
10 — Tawamhã nimahã bâtâ na poneꞌẽrebâ siꞌaibâ norĩ, tinhipiꞌõ te te wasã zaꞌra ré, wa tô te saho ãne. Poneꞌẽrebâ zéré uzé siꞌaibâ norĩ, tinhipiꞌõ te te iwasã zaꞌra hã iwawi si, duré iꞌupto si wa tô abꞌmadâ.
11 Tawamhã taha ré ma tô ꞌRe ihâimana uꞌâsi mono ma, Hâiwa ãma Romhuriꞌwa ĩnhisi na hã ĩꞌmahâ. Ãhã wa, wa tô sadaꞌâ ãne: “E marĩ! Ãhãta wa ãme ĩhâiba.”
12 Timreme na ma duré ãma ĩma uzusi ãne: “Maꞌãpé ꞌmadâꞌâ zaꞌra na, uburé poneꞌẽrebâ zéré uzé siꞌaibâ norĩ, tinhipiꞌõ te te iwasã zaꞌra hã iwawi si, duré iꞌupto si. Labã te te aima iꞌmanharĩzé hã te ꞌmadâꞌâ wa, wa tô ãne wa hã aima ꞌmanha.
13 Wa hã, ꞌRe ihâimana uꞌâsi mono, Bétéu ãma aima ĩsihâiꞌré, ẽne ĩma ipisutu ãma, azeitona waꞌu tom na isisiwi ĩma isaꞌwari ãma, duré asina ĩma iropisutuzé hã iꞌmanharĩzéb ãma. Tahawa awaꞌawi na te za asima irobꞌubumro, ã hã tiꞌai hawi aiwatobro da, apâ aimorĩ da, tiꞌai ꞌre iꞌaipotozéb u.”
14 Tawamhã Raqueu norĩ Léiaha me, ma tô ãne sadaꞌâbâ zahuré:
— Wamama nhiptiha hã siꞌmairẽme õ di, iꞌuirĩ na niwa ãma iwasite da hã.
15 Te tô isiré aꞌuwẽꞌõ ne taré titõmo na te te ꞌre waꞌmadâꞌâ. Ma tô duré wawede. Taha pari ma tô wawaꞌâbâzé hã taré pese uprosi.
16 ꞌRe ihâimana uꞌâsi mono, uburé wamama nhiptiha pe te te tiwi isani zaꞌra hã ta hã oto wate zaꞌra, waꞌra norĩ me. Tahawa, te za a hã ꞌRe ihâimana uꞌâsi mono te te aima iꞌruzé hã tô uburé iꞌaꞌmanha.
17 Tawamhã Zaco, ma tô tiꞌra norĩ, duré timro norĩ, awaru baꞌõmore ba nhisiwimhã anhoré, oto siꞌabaꞌré da.
18 Taha pari ma tô uburé tinhimizama te te simro, Canaꞌã tiꞌai u imama Izaqui ꞌre ihâimana mono zéb u. Padã-Arã na romnhisi ãma uburé marĩ te te sima ꞌre iꞌawaibui mono zama ma tô siré tidu.
19 Tawamhã Labã, Raqueu mama, tinhimizama poneꞌẽrebâ te te azéré nhihâri da, morĩ ré, ma tô iꞌra Raqueu, isõrõwa ꞌre, romhâiba norĩ ãma ꞌre iwata zaꞌra mono hã ma tô tiwi simiꞌuri zaꞌra, timama wi.
20 Ãne ma tô Zaco hã hâimana nhipese na, Labã arameu hã te te sina poꞌre puꞌu ãna hã
21 uburé tinhimarĩ ré piꞌuriwimhã tiwi aimani, siꞌabaꞌré na. Tawamhã Eufrati â na te te saprĩ wamhã, ma tô Giliadi tiꞌai ꞌre ẽtẽ nhoꞌõmoi baba mo.
Labã, Zacoho zarina imorĩzé wasuꞌu
22 Tawamhã siꞌubdatõ bâdâ ãma ne pari, ma tô Labã waihuꞌu, Zaco isimanizém na hã.
23 Tahawa ma tô aibâ isiwapru norĩ, isiré ꞌre ihâimana zaꞌra mono hã sima ꞌrãꞌõtõ. Te te ꞌrãꞌõtõ wamhã ma tô Zacoho zarina aiꞌabaꞌré. Tahawa, 7 na bâdâ ãma siꞌutõrĩ pari, ma tô Labã norĩ, Zaco hã siwi sasĩ, Giliadi na romnhisi ãma ẽne ihâimana zaꞌra ãma.
24 Tawamhã tô taha mara na sõtõ ꞌrowi ma tô Labãhã u, ꞌRe ihâimana uꞌâsi mono hã sihâiꞌré. Tahawa te ãne tãma tinha:
— Niꞌã pé! Niha na Zacoho ma hã tãma robꞌmanharĩ tõ. Tôꞌã!
25 Tawamhã tô Giliadi niwĩ ẽne ihâimana zaꞌra ãma, ma tô Labã, Zaco hã sasĩ, te te sima iꞌri nhorézéb ãma. Labã norĩ, tô tame ma tô duré sima te te ꞌri nhoré.
26 Tawamhã Labã, ma te Zacoho ma hã priꞌi ãne:
— E marĩ da, ma tô ĩwi aihâimana nhipese na hã aihâiba. Ĩꞌra norĩ hã dasiꞌwapéi wa, da te daꞌãma ꞌre aiꞌuté zaꞌra mono wa, da te ꞌre idawaibui mono ne ma tô we piꞌuriwi isaprõni zahuré.
27 E marĩ da, ma tô ãne ĩwi aihâimana nhipese na aihâiba, za we iꞌaimani na ĩma asiwasuꞌu ãna. Ĩma asiwasuꞌu ꞌwaꞌâhã, wa aré dasa isaꞌẽne hã aiꞌãma ꞌmanha, rowẽzé roptaꞌazém na, duré isõrõtaꞌare na danhoꞌrezém na hã.
28 A hã, ĩnhihudu norĩ duré ĩꞌra norĩ, irẽme ma itobꞌrata hârâ na te sawi zaꞌra da hã asina ĩpoꞌre puꞌu õ di. Ãne na asimiꞌmanharĩzé hã asimizaꞌreseꞌõ zarina.
29 Ãhã zarina wa aré iwasété uptabi hã tô aima ꞌmanha. Tane nherẽ, mara we isiꞌutõrĩ na hã aimama te, ꞌRe ihâimana uꞌâsi mono hã ma tô ĩma tinha ãne: “Niꞌã pé! Niha na Zacoho ma hã robꞌmanharĩ tõ.”
30 Tô oto ĩhawi iꞌaiwatobrozé hã ĩma waihuꞌu pese di, aimama norĩ nhorõwa na aipẽꞌẽzé te te aiwĩrĩ wa. Tane nherẽ, e marĩ da, ma tô bété ĩnhorõwa ꞌre, ĩte romhâibarĩ norĩ hã ĩwi isimiꞌuri zaꞌra.
31 Tawamhã Zaco, ma te asa ãma sadaꞌâ ãne:
— Wa tô ĩpahi pese, aiꞌra asiptete na ĩwi ãma ropti zahuré õꞌumnhasite.
32 Ate romhâibarĩ norĩ, niꞌwai ãma sãmri zaꞌra wamhã, te za ta hã wĩrĩ ni za. Wasiré norĩ nhoꞌa, siwaꞌru danhimarĩ ãma marĩ ate ꞌmasãmri wamhã, te za iꞌâ za, apâ.
Tane nherẽ, Zaco, Raqueu romhâibarĩ norĩ te te isimiꞌuri zaꞌra na hã te te waihuꞌu õ di.
33 Tawamhã Labã, Zacoho te romhâ ꞌmanharĩ na ꞌri u ma tô ãzé. Taha pari ma tô duré ãzé Léiaha nhibꞌri u hã, duré maparane tãma iromhuriꞌwa norĩ nhibꞌri u zama. Tane nherẽ, romhâibarĩ hã te te sãmri zaꞌra õ di. Tawamhã ta norĩ hawi watobro wamhã, Raqueu nhibꞌri u hã ma tô duré oto ãzé.
34 Tahawa, ma tô uburé na te te sô rowaimrami. Tane nherẽ, te te sãmri zaꞌra õ di, Raqueu awaru baꞌõmore bazadâ siwapsẽrẽ ꞌre te te simiꞌuri zaꞌra wa, duré isisiwi sãmra wa.
35 Tawamhã Raqueu te timama ma tinha ãne:
— Ĩzada asahi tõ, ĩwahutu õ wa. Wahâzé hã te ĩꞌãma tihâiba.
Ãne Labã tite romhâibarĩ zô hã ma tô ꞌre rĩtĩ, te te ꞌmasãmri da ne.
36 Tawamhã Zaco ma tô tinhitiꞌrui pese. Tahawa, ma te ãne Labãhã ma priꞌi:
— E marĩ te ꞌmanharĩ bâ bété, iꞌupa hã. E marĩ na wa tô bété ĩwasétézé hã aiwi ꞌmanha, asahi sina we ĩzarina iꞌaimorĩ da hã.
37 Ãhã na uburé ĩnhimarĩ hã ma tô sô iꞌawahui mo. Tahawa, e ma tô asimarĩ norĩ hã iꞌmasã. Ta hã maꞌãpé saꞌra na, uburé wanhibꞌaꞌuwẽ norĩ nhoꞌremhã, ta norĩ hã niha hã te te siwi wawaihuꞌu da, iꞌuwaibaba a hã iꞌmanharĩ na, niha wamhã, wa hã te iꞌmanharĩ na.
38 20 wahum na wa tô te aima ꞌre romhuri. Tane nherẽ, niwamhã poneꞌẽrebâ zéré mapure ꞌra hã, duré poneꞌẽrebâ zéré uzé ꞌra hã dâꞌâ siromomhã ꞌmaipoto õ di, aiwi hã. Duré niwamhã ate poneꞌẽrebâ zéré mapure siꞌaibâ te aiwi ꞌmaiꞌrẽne õ di.
39 Niwamhã asimizama, abaze zahi te te ꞌre isimroi mono hã te aima ꞌre aꞌãwisi mono õ di. Wa hã wa tô, tô ꞌre ĩsiꞌmadâꞌâ, ꞌre isimani zaꞌra mono na hã. A hã ma tô duré ꞌre ĩwati mo bâtâ na, duré barana da te ꞌre simiꞌuri zaꞌra mono na hã.
40 Ãne aré ĩnhimiromhurizé hã: Bâtâ na hã rowaꞌro wa tô te ꞌre sépata. Bara na zama wa tô duré mara wahâ hã te ꞌre sépata. Tahawa, ma tô ĩnhotõ ãna ĩꞌãma ꞌre awẽ.
41 20 wahum na wa tô asõrõwa ꞌremhã ꞌre ĩhâimana. Duré 14 wahum na wa tô aiꞌra norĩ zô hã te aima ꞌre romhuri. Duré 6 wahum na asimizama norĩ zô, wa tô te aima hã ꞌre romhuri. Ãne nherẽ, ãhã nhisiwimhã ma tô ĩpawaꞌâbâ na 10 ãma isahu na ãma ĩwi itiꞌawi.
42 Tawamhã duré ĩhiꞌrata norĩ te, ꞌRe ihâimana uꞌâsi mono, Abraꞌãhã te, duré Izaquihi te te ꞌre iwazé pese mono hã, ĩsiré ꞌre hâimana mono õ ꞌwaꞌâhã, a hã te aré ĩzatõ, ĩnhibꞌrata baba na ĩmorĩ da. Tane nherẽ, õ hã ma tô te irobzépatazé hã duré te ꞌre iromhuri mono zé hã te te ꞌre ꞌmadâꞌâ. Tahawa, ahâmhâ barana ma tô õ hã niha na aiꞌãma rowairébé, te te iwaihuꞌuzéb zarina.
Zaco norĩ, Labãhã me roti na isisaze zahuré zé wasuꞌu
43 Tawamhã Labã, ãne ma te Zaco hã sadaꞌâ:
— Ã hã ĩꞌra norĩ hã, duré ĩnhihudu norĩ hã, duré robzari norĩ hã ĩte. Duré uburé marĩ iꞌaꞌmadâꞌâ norĩ hã tô ĩte si. Tane nherẽ, ĩꞌra norĩ ꞌrata duré iséꞌre hawib zahuré iꞌra tãma ipoto zaꞌra ꞌrata ĩhâimana waihuꞌu õ wa,
44 niha ropisudu hã wa te wasima ꞌmanharĩ da hã wa oto mare. Tahawa oto ẽne hã wa te saꞌra na, wa te wasima iropisutuzém na hã ãma ꞌre iwasipoꞌre puꞌu mono zéb da hã.
45 Tawamhã Zaco, ẽne itõmo waré pa hã ma tô ꞌmaiꞌâ. Te te ꞌmaiꞌâri wamhã, ma tô hâiwi para na hã tisã.
46 Taha pari ma tô tisiré norĩ ma tãma nharĩ zaꞌra, ẽne hã te te siwi saꞌra ꞌrãihâ da. Tawamhã ta norĩ hã ẽne ma tô siwi saꞌra sisiwipsi. Taha pari ma tô isababa tisa hã tihu.
47 Tawamhã Labã ma tô taha ro hã sisi, Zega-Saꞌaduta* na. Duré Zaco ma tô taha ro aimawi isisi amo na sisi, Galeedi* na.
48 Taha pari te Labã hã tinha ãne:
— Ã hã ẽtẽ zaꞌra hã roti na iwasisazezém na wa te wasima iropisutuzém na ãma ꞌre iwasipoꞌre puꞌu uꞌâsi mono zéb da hã te za ꞌre sa.
Tahawa ã hã romnhisi hã Galeedi na.
49 Mispa* na zama isisi hã, Labã te te nharĩ wa ãne:
— Uburé Danhibꞌapito, niha wasima wasiwãnhizari ré hã te te iwaꞌmadâꞌâ da si tô iwẽ hã.
50 Tawamhã duré ĩꞌra norĩ ma ꞌre robꞌmanharĩ wasété zahuré mono wamhã, duré ĩma isaꞌrese õ na nherẽ, aimawi piꞌõ norĩ na aimro wamhã, a hã te za ãma aipoꞌre pu za, ꞌRe ihâimana uꞌâsi mono wahâiba siꞌuiwa na te te ꞌre iwaꞌmadâꞌâ uꞌâsi mono na hã.
51 Ãhãta ẽtẽ zaꞌra hã duré ẽtẽ tõmo waré pa, wawaꞌwa isimaꞌwara hã.
52 Ã hã ẽtẽ zaꞌra hã, duré ẽtẽ tõmo waré pa hã wa te wasima iropisutuzém na ãma ꞌre iwasipoꞌre puꞌu mono zéb da hã. Tawamhã wa hã niwamhã ã hã ẽtẽ zaꞌra te ãma isaꞌre da hã mare di za, te iꞌasusi da hã. Tane duré a hã niwamhã we ẽtẽ zaꞌra isaꞌre da hã mare di za, we ĩsusi da hã.
53 Abraꞌãhã te, ꞌRe ihâimana uꞌâsi mono, duré Naoho te, ꞌRe ihâimana uꞌâsi mono, te za niha wasima wawasété zarina waꞌãma rowairébéꞌwa na hã ꞌre hâimana.
Tawamhã Zaco, imama Izaqui, ꞌRe ihâimana uꞌâsi mono te te ꞌre iwazé mono nhisi na ma tô ropisudu hã ꞌmanha.
54 Tawamhã tame ẽtẽ nhisiwi ma tô danhimizama zata na hã oto tinhopru, ꞌRe ihâimana uꞌâsi mono ma. Tahawa ma tô tisiré norĩ hã waptẽrẽ zaꞌra, siré saihuri da. Tawamhã saihuri pari, tô taha mara na ma tô oto tame tinhotõ zaꞌra.
55 Tawamhã awẽm na mararé uptabi ma tô Labã hã udu. Utu wamhã, ma tô tiꞌra norĩ hã, duré tinhihudu norĩ hã tobꞌrata hârâ na azawi, irẽme ma. Taha pari, te oto mo, apâ tinhiptiꞌai u hã.
Ĩwaꞌõtõ piꞌreba watsuꞌu mono
^ 31:47 Zega-Saꞌaduta hã Arameu norĩ mreme na “dasipoꞌrepuꞌuzéb da, ẽtẽ zaꞌra ꞌrãihâ” aiwa prã na ne iwapari na hã.
^ 31:49 Mispa hã Ebreu norĩ mreme na “rom hawi robꞌmadâꞌâzé” aiwa prã na ne iwapari na hã.
^ 31:47 Galeedi hã Ebreu norĩ mreme na “dasipoꞌrepuꞌuzéb da, ẽtẽ zaꞌra ꞌrãihâ” aiwa prã na ne iwapari na hã.
