Zenezi 32:1-32
32 Tawamhã Zaco timorĩ na te te oto uzusi wamhã, ma tô hâiwa ãma romhuriꞌwa norĩ te te siwi sõpẽtẽ da hã ĩtẽme aihutu.
2 Tawamhã Zaco te te ꞌmadâꞌâ zaꞌra wamhã, te ãne tinha:
— Ã hã ꞌRe ihâimana uꞌâsi mono te, ꞌri nhoré mono hã dasiꞌwapéi ꞌmanharĩꞌwa norĩ ubumrozé.
Tahawa ma tô duré romnhisi, Maꞌanaꞌĩ* na.
3 Tawamhã Zaco, tite romreme ꞌwapéiꞌwa norĩ, ma tô satõrĩ zaꞌra Seꞌi na rowamri u, Edõ na rowamri amo hã Ezau te te siwi sõpẽtẽ da, iwana.
4 Tahawa, te ãne sina tãma nharĩ zaꞌra, te te siwi mreme âri da: “Wa hã Zaco, asimiroti zarina wa za marĩ hã te ꞌre abꞌmanharĩ aima. Wa tô Labãhã nhorõwa ãma ꞌre ĩhâimana hâ pese pari.
5 Ĩnhimizama powawẽ hã ahâ di, awaru poꞌre pore hã, poneꞌẽrebâ hã, poneꞌẽrebâ zéré uzé hã, ĩma romhuriꞌwa sipiꞌõ hã, duré ĩma romhuriꞌwa siꞌaibâ hã. Ĩnhibꞌapito, ã hã romreme hã wa ãma aima tisõ, ĩꞌâriwẽzéb da hã.”
6 Tawamhã romreme ꞌwapéiꞌwa norĩ, Ezauhu ma te te sadawa wasuꞌu zaꞌra pari, apâ siꞌabaꞌréi wamhã, te ãne Zacoho ma rowasuꞌu zaꞌra:
— Adubꞌrada Ezauhu u wa tô aihutu ni. Ta hã te we oto mo, te te sina aiꞌuzusi da, 400 na aibâ norĩ ihâiba zaꞌra siré.
7 Tawamhã ãne hã Zaco te te wapari wamhã, ma tô tãma tipahi pese. Hâtâꞌâ uptabi di. Tahawa tinhibꞌaꞌuwẽ norĩ ãma ma tô maparane iwaꞌõtõ na ãma aipoꞌo. Duré tinhimizama poneꞌẽrebâ norĩ na zama, poneꞌẽrebâ zéré uzé norĩ na hã, powawẽ norĩ na hã, duré awaru poꞌre pore norĩ na hã ma tô duré aiwa ãma sipoꞌo zaꞌra.
8 Tawamhã te ãne tipẽꞌẽ na sima rosaꞌrata: “Ezau, sena tô we watẽme morĩ zaꞌra wamhã, ãté te za ĩnhibꞌaꞌuwẽ waꞌõtõ hâiba amo hã aꞌwapé. Tawamhã ta norĩ na ꞌrãzaꞌõtõ ré, ãté te za duré ĩnhibꞌaꞌuwẽ waꞌõtõ hâiba amo hã tiwi aimani zaꞌra, wanhimizama ré.”
9 Tawamhã Zaco, ãne te ꞌRe ihâimana uꞌâsi mono ma hã mre:
— Uburé Danhibꞌapito, ĩhiꞌrata Abraꞌãhã te, duré ĩmama Izaquihi te ꞌRe ihâimana uꞌâsi mono, maꞌãpé aima ĩmremezém na hã ĩwapari. A hã ma tô we ĩzatõ, apâ ĩnhiptiꞌai u we ĩmorĩ da, ĩsiwapru norĩ u. Duré iwẽ na si ĩma romhâimana mono da hã, ma tô ĩma iropisu.
10 Wa hã asibꞌaꞌuwẽ, tarére na ꞌre ĩhâimana mono nherẽ, ĩma asimizawi pese zé hã duré aiꞌumnhasi uꞌâsi wa, ĩꞌãma ꞌre aiwamri mono zé hã aré tô ĩma hã ibâi õ di. Panhoꞌu Zodã pa na te saprĩ wamhã, ĩsiwazusizéb ré si wa tô saprĩ. Tane nherẽ, ãhã na awaꞌawi na hã wa oto maparane dawaꞌõtõ na abaze norĩ ré hã apâ ĩsina siri.
11 Uburé Danhibꞌapito, wa aiwi waptẽ, ĩdubꞌrada Ezauhu wi ĩnhoꞌreptu da. We imorĩzé ma hã wa tô ĩpahi pese, te te ĩwĩrĩ õꞌumnhasite, piꞌõ norĩ zama, aiꞌuté norĩ zama te te ĩwi uprosi õꞌumnhasite.
12 Maꞌãpé ãma aipoꞌre puꞌu. A hã ma tô ĩma iropisu, iwẽ na si ĩma romhâimana da hã. Duré ĩnhihudu norĩ, supara â zaihâ na ꞌre isimiꞌwara mono ne, saꞌrata waihuꞌu ãna ꞌre hâimana zaꞌra mono da hã ma tô ĩma iropisu.
13 Tawamhã taha mara na te Zaco tame nhono. Tawamhã ãma awẽ wamhã, te tinhimizama Ezauhu ma ãma isõprubzéb da hã sima aꞌupsãtã.
14 Poneꞌẽrebâ zéré uzé sipiꞌõ 200 na, poneꞌẽrebâ zéré uzé siꞌaibâ 20 na, poneꞌẽrebâ zéré mapure sipiꞌõ 200 na, poneꞌẽrebâ zéré mapure siꞌaibâ 20 na
15 30 na awaru baꞌõmore sipiꞌõ zahadu tiꞌra tihâ na te te ꞌre iwapsõmri zaꞌra mono hã, 40 na powawẽ hã, powawẽ ibaꞌu 10 na, 20 na awaru poꞌre pore sipiꞌõ hã, duré 10 na awaru poꞌre pore siꞌaibâ hã ma tô te te aꞌupsãtã.
16 Tawamhã Zaco taha na ma tô oto ãma sipoꞌo. Duré imono bâ iꞌmadâꞌâꞌwa da hã ma tô tinhibꞌaꞌuwẽ norĩ te te sõré. Tahawa, te ãne ta norĩ ma tãma waihuꞌu zaꞌra:
— Taha ré te za ĩnhowa asima asaꞌo hâ na iꞌupsãtã mono bâ iré aiꞌabaꞌréi waꞌwa.
17 Tawamhã Zaco danhowa imorĩꞌrata na iꞌmaimorĩ ma, ma tô ãne tãma tinha:
— Ĩdubꞌrada Ezau bâdâdi na te te asõpẽtẽ wamhã, ãté te za asadanha ãne: “E ꞌwa hã asibꞌihâꞌa. E momo te aimo. E ꞌwa simizama te duré we isimroi mo.”
18 Tawamhã te za ãne ãma isadaꞌâ za: “Ã norĩ hã asibꞌaꞌuwẽ Zacoho nhimizama, tinhibꞌihâꞌa Ezauhu ma, we ãma tãma isõprub zaꞌra. Taha zama te we zahadu wazaꞌu zaꞌra hã mo.”
19 Tawamhã isãnaꞌre, siꞌubdatõ ãma, duré uburé iꞌmadâꞌâꞌwai mono bâ ihâimana zaꞌra ma, te ãne Zaco hã tãma nharĩ zaꞌra:
— Ezau asiwi sõpẽtẽ aba wamhã, te za tô õne tãma inharĩ zaꞌra waꞌwa.
20 Ãne na tãma irowasuꞌu zaꞌra waꞌaba zéb da hã ãma aipoꞌre siꞌâri zaꞌra waꞌaba õ di za: “Asibꞌaꞌuwẽ Zaco hã zahadu te we wazaꞌu zaꞌra mo.”
Ãne Zaco ma tô rosaꞌrada sima ꞌmanha: “Ezauhu ma, ĩnhoprum na ĩsisõwa te isõmri zaꞌra na hã wa za hâimana wahâ. Tahawa oto duré nimahã na wasisõpẽtẽ wamhã, ãté te za ĩꞌâri wẽ.”
21 Tawamhã taha zarina ma tô, isõprubzéb hã, iwana te te simroi mono da hã, tinhibꞌaꞌuwẽ norĩ ma tãma robꞌru zaꞌra. Tane nherẽ, ma tô Zaco hã isaꞌu zaꞌra te te sima iꞌri nharĩ ꞌremhã ãma tiꞌawẽ.
Zaco Penué ãma, ꞌRe ihâimana uꞌâsi mono te te iꞌwapézé wasuꞌu
22 Tawamhã tô taha mara na Zaco hã ma tô udu. Utu wamhã, ma tô Zaboqui panhoꞌõmo na saprĩ. Ãhã wa, ma tô timro norĩ siré saprõni zahuré. Ma tô duré timro prã norĩ, 11 na tiꞌra siꞌaibâ norĩ me siré te te simro.
23 Tawamhã uburé iwana da te saprĩ zaꞌra pari, ma tô Zaco hã dama tiꞌru, iwana isimarĩ ré duré da te saprĩ zaꞌra da hã.
24 Tane nherẽ, te tawamhã dazaꞌu siwaprosi za, zara niwĩ. Taha ré tame siwaprosi hâimana ré, aibâ itẽme we imorĩ hã ma tô Zaco ꞌwamhâ, ãma irowaꞌa zahuré zéb u.
25 Tawamhã aibâ, Zacoho ãma te te ãma iꞌaiꞌuté waihuꞌu õ na siwaihuꞌu wa, ma tô upata upi. Ãhã wa, ma tô upata hi watobro, Zaco hã.
26 Tawamhã aibâ, te Zacoho ma tinha ãne:
— Ĩma asimirẽme, ĩmorĩ hâ. Ma tô we oto tirowaꞌa.
Tawamhã Zaco, ma te ãma tãma waꞌrã ãne:
— Aima ĩnhimirẽme õ di za aꞌâ, ĩwẽ hã ĩma ꞌre apisutu mono da, asina ĩma ropisutu õ nherẽ.
27 Tawamhã aibâ te sadanha ãne:
— E niha asisi hã.
Tawamhã Zaco ma te ãma sadaꞌâ ãne:
— Zaco.
28 Tawamhã te duré tãma tinha ãne:
— Asisi õ di za oto, Zaco na. ꞌRe ihâimana uꞌâsi mono ma tô iꞌwapé. Duré aibâ norĩ zama ma tô iꞌwapé zaꞌra. Tahawa, ma tô ãma iꞌaiꞌuté zaꞌra. Ãhã wa, asisi hã za oto Izaraéu* na.
29 Tawamhã Zaco tãma sisisi da, te duré tiwi waptẽ, aibâ wi hã ãne:
— Maꞌãpé, asa ĩma asisisi na, te waihuꞌu da, duré wa hã.
Tawamhã aibâ ma te ãma tãma waꞌrã ãne:
— E marĩ da, te ĩnhisi asima iwẽ, waihuꞌu da hã.
Tawamhã tame iwẽ te te tãma ꞌre apisutu mono da, ma tô oto sina tãma ropisutu.
30 Tawamhã Zaco te ãne sima tinha:
— ꞌRe ihâimana uꞌâsi mono, ꞌrâwi pesere wa tô oto ꞌmadâ. Tane nherẽ, wa zahadu ĩhâiba ré ꞌre ĩhâimana.
Tahawa ma tô ro hã sisi, Penué* na.
31 Tawamhã Zaco, Penué hawi morĩ ré, ma tô bâdâ hã ꞌrãiwatobro. Tahawa, te morĩ sina ꞌrãtẽ, te te iꞌupata upi hawi.
32 Tawamhã duré ã hawim haré Izaraéu nhihudu norĩ hã marĩ upata nhi hã te te ꞌre huri mono õ di, tame te te upi wa.
Ĩwaꞌõtõ piꞌreba watsuꞌu mono
^ 32:2 Maꞌanaꞌĩ hã Ebreu norĩ mreme na “ꞌri nhoré mono hã dasiꞌwapéi ꞌmanharĩꞌwa norĩ ubumrozé” aiwa prã na ne iwapari na hã.
^ 32:30 Penué hã Ebreu norĩ mreme na “ꞌRe ihâimana uꞌâsi mono ubu” aiwa prã na ne iwapari na hã.
^ 32:28 Izaraéu hã Ebreu norĩ mreme na “Ta hã te ꞌRe ihâimana uꞌâsi mono hã ꞌwapé”, aiwa prã na ne iwapari na hã.
