Zenezi 33:1-20
33 Tawamhã Zaco, tidubꞌrada Ezau, 400 na aibâ norĩ ré we imorĩ hã te te ꞌmadâꞌâ wamhã, ma tô tiꞌra norĩ hã ina mono bâ tina siré hâimana zaꞌra da hã ãma sipoꞌo, Léiaha siré, Raqueu siré, duré maparane imro prã norĩ siré.
2 Tawamhã imro prã norĩ, tiꞌra norĩ ré danhowamhã ma tô iré zaꞌra tihâimana zahuré. Taha parimhã isãnaꞌreb zahuré hã Léia ma tô duré tiꞌra norĩ ré hã tihâiba. Tawamhã daꞌrãsutuꞌwai ãma ma tô duré Raqueu tiꞌra Zuzéhé ré hã te te daꞌubumro.
3 Taha parimhã Zaco ma tô oto sina sõꞌre zaꞌra, isõwab zaꞌra hâimana da. Tawamhã Ezauhu tẽme te te sina rotété mono sidâpâsi ma tô 7 na ãma isahu na hiꞌrãtitõ tãma simasisi, tiꞌai u tiꞌubu na te te tãma ropto mono sina.
4 Tane nherẽ, Ezau, Zaco te te sõpẽtẽ da ma tô wara sina, sina uzusi. Te te sina uzusi wamhã, ma tô ibutu na hã sitẽme ꞌwani, te te sawi da, tino hã. Ma tô duré tobꞌrata hârâ na sawi. Tawamhã ma tô duré sina aiwaꞌõ zahuré, sipẽꞌẽ rĩ wa.
5 Tawamhã Ezau ꞌrãi wahutu wi, ma tô piꞌõ norĩ, aiꞌuté norĩ me ꞌmadâꞌâ zaꞌra. Tahawa, te ãma sadanha ãne:
— E ꞌwam norĩ bété õ hã we asiré isiꞌabaꞌré hã.
Tawamhã Zaco ma te ãma sadaꞌâ ãne hã:
— Ã norĩ hã ĩꞌra, ꞌRe ihâimana uꞌâsi mono, ĩꞌãma siwamri wa, aima romhuriꞌwai ma, te te ĩma isõmri zaꞌra.
6 Tawamhã imro prã norĩ, ma tô tiꞌra norĩ ré Ezau tẽmemhã oto ꞌrâwimhã sina rotété zahuré. Tahawa ma tô duré isõꞌremhã tãma aiwẽꞌẽ zaꞌra.
7 Taha pari, ma tô duré Léia tiꞌra norĩ ré isãnaꞌremhã itẽme sina rotété. Ta norĩ zama ma tô tãma aiwẽꞌẽ zaꞌra. Tawamhã daꞌrãsutu ãma ma tô duré Zuzé norĩ, Raqueu me itẽme sina rotété zahuré, tãma siwẽꞌẽ zahuré da.
8 Tawamhã taha pari te duré Ezau ãne sadanha:
— E niha da hã bété, asimizama upsãtã pese na bâdâdi wamhã te isõpẽtẽ zaꞌra hã.
Tawamhã Zaco ma te ãne asa tidubꞌrada hã ãma sadaꞌâ:
— Taha uꞌâbâ ĩwẽsãmri da hã, wa tô we ĩsiwana hã satõrĩ zaꞌra.
9 Tawamhã te Ezau ãne tãma tinha asa:
— Ĩno, mare di. Ĩnhimizama hã ahâ uptabi di. Tahawa tô aima hâimana zaꞌra, ate bâ.
10 Tane nherẽ, te Zaco te te tãma iꞌruzém na ãma tãma sahu ãne:
— Wẽꞌõ tõ! Sena ĩwẽsãmrizé aima hâimana wamhã, maꞌãpé tô aima ĩnhoprubzé hã waibui wẽ na. Wa hã we aimorĩ ré, te aiꞌubu ꞌmadâꞌâ wamhã, ꞌRe ihâimana uꞌâsi mono ubu te iꞌmadâꞌâzém ne aiꞌubu hã, a hã ĩꞌâri wẽ zarina.
11 Tahawa maꞌãpé ĩzawi na hã aima ĩnhoprubzé te we isimroi mono hã asima wẽ zaꞌra na. ꞌRe ihâimana uꞌâsi mono ma tô iwẽ na si ĩma ꞌre hâimana. Tahawa uburé marĩ ĩwi sô ꞌre irobaba mono hã ma tô te te ĩma ꞌre anhomri.
Tawamhã Zaco, Ezauhu ma hã te te nasi tãma ꞌruzadawa zaꞌreiꞌõ wa, ma tô oto sima wẽ.
12 Tawamhã Ezau te te ãma sazei wa, te ãne tãma tinha oto:
— Tane wamhã, oto wane na pé. Wa hã wa za asiré mo.
13 Tawamhã Zaco ma te ãne ãma sadaꞌâ asa:
— Ĩnhibꞌapito, aima waihuꞌu pese di, aiꞌuté norĩ isibꞌuwa na hã. Duré ĩnhimiꞌmadâ poneꞌẽrebâ norĩ hã, duré powawẽ norĩ hã iꞌra ré hã te iꞌmadâꞌâ wẽ zaꞌra da si, ĩma hã ĩbâre. Tahawa, saꞌẽtẽ siꞌabaꞌré da, wa te susi zaꞌra mono wamhã, te aré misi bâtâ na nherẽ, uburé ĩwi aiꞌutõ.
14 Ĩnhibꞌapito, tahawa tô iwẽ hã ĩnhowa iꞌaimorĩ da si. Tawamhã wa hã wa za atãma asaꞌu ãma mo, ĩnhimizama norĩ, duré ĩꞌra norĩ atãma na ãma isiꞌabaꞌré zarina, ĩwisizéb u atẽme, Edõ ãma ꞌre iꞌaihâimana mono zéb u.
15 Tawamhã Ezau te ãne duré tãma tinha:
— Tane wamhã, aꞌâ ĩma romhuriꞌwa norĩ aiꞌrata ꞌmasiꞌubumro, te te ãma siwi iꞌaipibu zaꞌra mono da hã.
Tawamhã Zaco ma te duré ãne ãma tãma waꞌrã:
— E marĩ da bâ. Tô ĩwẽsãmri nherẽ, taha nhipai u marĩ zô hã te oto robꞌmadâꞌâ õ di.
16 Tawamhã tô taha bâtâ na ma tô Ezau oto apâ hã sina siri, Edõ u.
17 Tane nherẽ, Zaco ma tô rob amoi u hã apa, Sucoti* na ꞌri nhoꞌõmo nhisi u. Tawamhã tame ma tô oto sima ꞌri. Duré tinhimizama powawẽ norĩ ma zama ma tô ꞌri awãzé hã tãma ꞌmanharĩ zaꞌra. Tahawa ma tô ã hã ro hã sisi, Sucoti na.
18 Ãne ma tô Zaco hã Mezopotãmia hawimhã wi. Tahawa, rowẽ na ma tô wi, Siquẽ na ꞌri nhoꞌõmo nhisi u, Canaꞌã na romnhisi ãmamhã. Tamomo wisi wamhã, ma tô ꞌri nhoꞌõmo ꞌrata sima te te ꞌri nhoré.
19 Tawamhã duré ẽtẽ waipo prã prata 100 na iwaꞌõtõ waré na ma tô Siquẽhẽ mama Hamo na isisi taha nhihudu norĩ wi hã, tiꞌai waꞌõno ꞌmaiꞌuipra, te te sima iwa iꞌri nhoré zaꞌra zéb da hã.
20 Tawamhã tame ma tô ꞌRe ihâimana uꞌâsi mono ma, danhimizama zatazéb da ẽne hã tisã, hâiwi. Ta hã ma tô sisi El na, Izaraéu nhihudu norĩ te, ꞌRe ihâimana uꞌâsi mono nhisi na.
Ĩwaꞌõtõ piꞌreba watsuꞌu mono
^ 33:17 Sucoti hã Ebreu norĩ mreme na “ꞌri awãzé” aiwa prã na ne iwapari na hã.
