Zenezi 34:1-31
34 Tawamhã nimahã bâtâ na Dina, Zacoho ꞌra, Léiaha zéꞌremhã ma tô mo, taha tiꞌai ꞌre, tisiré piꞌõ norĩ hã te te sabu zaꞌra da.
2 Tamemhã te heveu norĩ siré ꞌre hâimana, Hamo na isisi hã, taha tiꞌai ꞌre, danhibꞌihâꞌa na ꞌre ihâimana mono hã. Taha ꞌra, Siquẽ na isisi te duré ꞌre hâimana. Tawamhã ta hã Dina we imorĩ na te te ꞌmadâꞌâ wamhã, ma tô siptete sina te te sima âri wa, tãma robꞌmanha.
3 Tipẽꞌẽ na ma tô sima ꞌmadâꞌâ ze pese. Tahawa, te piꞌõ zô roꞌwapé, te te sawi âri da apâ.
4 Taha pari te timama ma tãma tinha ãne:
— Azarudu maꞌãpé imama wi ĩma waptẽrẽ, ãma ĩmro da.
5 Tawamhã Zaco, iꞌra Dina, aibâ te te tãma irobꞌmanharĩzé hã ma tô waihuꞌu. Tane nherẽ, te aꞌâ ariꞌiwi tihâiba, iꞌra siꞌaibâ norĩ aꞌubuni ãma powawẽ te te ꞌre iꞌmadâꞌâ zaꞌra mono zém hawi isihutuzéb u.
6 Taha ré, te Siquẽhẽ mama Hamo hã Zacoho u mo, te te tãma robzanhamri da.
7 Tawamhã Zacoho ꞌra norĩ, aꞌubuni hawi oto sihutu wamhã, duré ãne na te te waihuꞌu zaꞌra wamhã, ma tô romhâimanazé iwasété uptabi na hã titobꞌuzu zaꞌra. Ma tô duré tizahi pese zaꞌra. E marĩ wa. Siquẽ hã, Izaraéu nhihudu norĩ ma rowazé te te tãma wazere zaꞌra wa, Zacoho ꞌra hâiba te te iwamnarĩ uꞌâbâmhã.
8 Tane nherẽ, te Hamo tãma nharĩ zaꞌra ãne:
— Ĩꞌra Siquẽ hã ma tô aiꞌra zaꞌra waꞌwa sawiꞌâ. Tahawa wa aiwi tãma waptẽrẽ zaꞌra waꞌwa, tãma hâiba nhomri zaꞌra waꞌaba da, ãma mro da.
9 Ãhã zarina wasiwadi na wasima ꞌre iwahâimana zaꞌra mono da hã e wẽ õ di za bété. Ãne wamhã, te aré waꞌra sipiꞌõ norĩ hã aiꞌra zaꞌra waꞌaba norĩ na hã ꞌre mro zaꞌra. Duré aiꞌra waꞌaba sipiꞌõ norĩ te aré duré waꞌra norĩ na ꞌre mro zaꞌra.
10 Ãme wanhiptiꞌai ꞌre, wasiré ꞌre aihâimana zaꞌra waꞌaba mono. Asima iwẽ na duré tiꞌai waꞌõtõre norĩ hã uipra zaꞌra waꞌaba mono. Duré asima iwẽ na marĩ wede na duré marĩ uipra na hã ꞌre romhuri zaꞌra waꞌaba mono.
11 Tawamhã Siquẽ te ãne timama ma tinha, duré Dinaha hitébré norĩ ma hã:
— Maꞌãpé ãne na ãma ĩzaze zaꞌra waꞌaba. Tawamhã wa hã asima iwẽ zaꞌra waꞌaba zéb zarina wa za marĩ aima sõmri zaꞌra waꞌwa iwaꞌrãmimhã.
12 Asima iwẽ na damro waꞌrãmi danhoprubzé hã ĩwi waptẽrẽ zaꞌra waꞌaba. Duré maꞌãpé damro waꞌâ, te aima iwaꞌâbâ zaꞌra waꞌaba da hã, niha hã ĩma pisutu zaꞌra waꞌaba. Tô ĩma hâiba zaꞌré zaꞌra waꞌaba, ãma ĩmro hâ.
13 Tawamhã Zacoho ꞌra norĩ ꞌrãnhipese sina ma tô Siquẽ, imama me hã ãma siwi sadaꞌâ, ihidiba zaꞌra Dina te te tiwi ihâiba wamnarĩ zarina.
14 Tahawa te ãne tãma nharĩ zaꞌra:
— Wahidiba, wa te wasiwi ihâiba zaꞌré da hã mare di, aibâ isihâiwata nhizâri õ, ãma imro da hã, ãne hã wama ꞌre irowazéb zaꞌra mono zé wa.
15 Ãne wapsi wa za ãma wasiwi asaze ni za: Wasine zaꞌra, uburé asiré norĩ waꞌwa aibâ norĩ sihâiwata nhihâri na hâimana zaꞌra wapsi.
16 Ãne wapsi te za waꞌra norĩ na ꞌre aimro zaꞌra waꞌaba mo. Duré taha wapsi wa za wa norĩ hã aiꞌra norĩ na asa ꞌre wamro zaꞌra. Tawamhã duré aiwaꞌwa zaꞌra waꞌaba ꞌre wahâimana zaꞌra mono wamhã, wa za misi wawamri aꞌuwẽ ne hã wasiré ꞌre wahâimana zaꞌra.
17 Tane nherẽ, asihâiwata nhihâri na ꞌre iꞌaihâimana zaꞌra waꞌaba mono na ãma wazaze zaꞌra waꞌaba õ wamhã, wa za õne haré oto aiꞌabaꞌré ni, wahidiba ré.
18 Tawamhã Hamo, tiꞌra Siquẽhẽ me ma tô Zacoho ꞌra norĩ, tinhimirosaꞌrada te te tãma ipibu zaꞌra zém na hã oto ãma saze zaꞌra.
19 Tawamhã iprédupté Siquẽ hã imama nhorõwa ꞌremhã dama iwazéb zaꞌẽne hã ma tô bâdâ te te simini tõ da, õne haré sihâiwata nhizâri ni, Zacoho ꞌra hã tãma sawi uptabi wa.
20 Taha pari Hamo norĩ, tiꞌra Siquẽhẽ me hã ma tô oto ꞌri nhoꞌõmo te, ꞌridawa zaꞌẽtẽ na ꞌre idanhisisi mono zéb u hã tineb zahuré, dasiꞌrãꞌõtõzéb u, ꞌri nhoꞌõmo wa, ꞌre idahâimana zaꞌra mono norĩ ma, te te ãne dama anharĩ zahuré da:
21 — Ã aꞌuwẽ norĩ hã isahiꞌõ, marĩ na isiꞌwapé da hã imare. Tahawa maꞌãpé wa te tãma waprosi zaꞌra waꞌaba, wanhiptiꞌai ꞌre, ꞌre hâimana zaꞌra mono da, duré wawaꞌwab zaꞌra marĩ iwede na duré marĩ iꞌuipra na te te ãma ꞌre romhuri zaꞌra mono da, sima duré wama zaꞌra. Tiꞌa hã saꞌẽtẽ uptabi di, tô iwab zaꞌra ite zaꞌra da hã. Ãhã wa, wa za iꞌra na hã ꞌre wamro zaꞌra. Duré õ norĩ hã te za waꞌra norĩ na ꞌre mro zaꞌra.
22 Taré oto wanhibꞌaibâ norĩ, isine zaꞌra sihâiwata nhihâri na ꞌre hâimana zaꞌra mono da, wa te ãma saze zaꞌra wapsi, te za õ norĩ hã duré ãma wazaze zaꞌra, wawaꞌwa ꞌre ihâimana zaꞌra mono da hã, misi aꞌuwẽ wamri ne wasiré ꞌre wahâimana zaꞌra mono da.
23 E ãne wamhã, uburé isipowawẽ norĩ hã, duré uburé isibrom norĩ hã duré uburé isimizama hâiba amo norĩ hã wama ꞌre hâimana zaꞌra mono õ di za bété. Te za tô wama ꞌre hâimana zaꞌra. Tinhimirosaꞌrada te te wama ipibu zaꞌra zém na wa te ãma saze zaꞌra wamhã, te za tô wawaꞌwamhã ꞌre hâimana zaꞌra.
24 Tawamhã uburé dasiꞌrãꞌõtõ u aibâ isiꞌabaꞌré norĩ hã ma tô Hamo, duré iꞌra Siquẽ hã ãma saze zaꞌra. Tahawa ma tô uburé ꞌri nhoꞌõmo ꞌre aibâ norĩ hã sihâiwata nhihâri zaꞌra ni.
25 Tawamhã duré siꞌubdatõ bâdâ ãma ne pari, zahadu aibâ norĩ tinhihâiwata nhizârizé te te sépata zaꞌẽtẽ zaꞌra ré, ma tô Zacoho ꞌra norĩ, Simiã norĩ, Levihi me, Dinaha hitébré norĩ hã tite sibꞌézé ꞌwapa hã timra. Te te mrami zahuré wa, saꞌrese ãna duré piꞌuriwi ꞌri nhoꞌõmo u zasi zahuré wamhã, ma tô uburé aibâ norĩ hã aꞌmapãrĩ zahuré.
26 Tahawa, ma tô duré Hamo norĩ zama Siquẽhẽ me dazu pãrĩ ni. Taha pari ma tô Simiã norĩ, Levihi me õne haré Siquẽhẽ nhorõwa hawimhã Dina hã wazere zahuré. Tawamhã ma tô duré oto iré tipusi zahuré.
27 Tawamhã dapãrĩ hâimana pari, Zacoho ꞌra hâiba amo norĩ, ma tô ꞌri nhoꞌõmo ꞌre marĩ iwaꞌâbâ zaꞌẽne ꞌre ihâimana zaꞌra mono hã siwi waibu, ihidiba zaꞌra, aibâ te te ihâiba wamnarĩ waꞌrãmimhã.
28 Tawamhã ma tô te te siwi simro poneꞌẽrebâ norĩ hã, poneꞌẽrebâ zéré uzé norĩ hã, powawẽ norĩ hã, duré awaru poꞌre pore norĩ hã. Ma tô duré siwi ꞌwasa, uburé ꞌri nhoꞌõmo ꞌre, duré aꞌubuni wi marĩ ꞌre ihâimana zaꞌra mono hã.
29 ꞌRi ꞌre, marĩ iwaꞌâbâ zaꞌẽne ꞌre ihâimana zaꞌra mono te te siwi sani zaꞌra wamhã, ma tô uburé piꞌõ norĩ hã, duré aiꞌuté norĩ hã te te siwi simro.
30 Tahawa te Zaco, Simiã norĩ ma, Levihi me, tãma nharĩ zahuré ãne:
— A norĩ waꞌwa ma tô ropire ĩzada iwazere ꞌwa. Tahawa te za aꞌuwẽ cananeu norĩ, perizeu norĩ, duré uburé ã hã tiꞌai ꞌre, ꞌre idahâimana zaꞌra mono norĩ hã te te siwi ꞌre ĩꞌruiwapari uꞌâsi. Duré ĩnhibꞌaꞌuwẽ siꞌaibâ norĩ ahâ õ di, wa hã. Tahawa ĩzada siꞌrãꞌõtõ wa, te te duré siwi ĩꞌwapéi wamhã, te za uburé ĩsiwapru norĩ hã duré ĩꞌra norĩ hã aiꞌutõ.
31 Tane nherẽ, ma te ãne asa hã ãma sadaꞌâbâ zaꞌra:
— Wahidiba taré piꞌõ, siwaꞌâbâ zô ꞌre isisõmri mono ne, da te tãma robꞌmanharĩ nherẽ, marĩ wa te wasiwi ꞌmanharĩ ãna iwahâimana zaꞌra da hã waihuꞌu õ di.
