Zenezi 35:1-29
35 Tawamhã ꞌRe ihâimana uꞌâsi mono, Zacoho ma, te ãne tinha:
— Maꞌãpé asima robꞌubumro na, Bétéu u apâ aimorĩ da, tame ꞌre aihâimana mono da. Tame te za ẽtẽ zaꞌra ĩma danhoprubzé zata zéb da hã ĩma iꞌmanha, wa hã ꞌRe ihâimana uꞌâsi mono, adubꞌrada Ezauhu wi aimani wa, aima ĩsihâiꞌré ma.
2 Tawamhã Zaco te uburé isõrõwa ꞌre, ꞌre ihâimana zaꞌra mono norĩ ma nharĩ zaꞌra, ãne:
— Wasiré aꞌuwẽꞌõ norĩ te, ihâibaꞌõ norĩ ma, romhâibarĩ na ãma ꞌre idawata zaꞌra mono hã aima ihâimana zaꞌra waꞌwa hã, te za asiwi isãmra ꞌwa. Maꞌãpé asipese zaꞌra waꞌaba. Duré daꞌuza ihâi uptobꞌõ na te za asiꞌuza zaꞌra waꞌwa.
3 Maꞌãpé asima robꞌubumro zaꞌra waꞌaba, Bétéu u wasiꞌabaꞌré da. Tame wa za ꞌRe ihâimana uꞌâsi mono, te robzépata ré, te te ꞌre ĩpawapto mono ma hã, duré uburé daro mono bâ ꞌre ĩmorĩ ré, ĩsiré ꞌre ihâimana mono ma ꞌmanha, ẽtẽ zaꞌra hã.
4 Tawamhã Zacoho ma, ma tô isiré aꞌuwẽꞌõ norĩ te romhâibarĩ hã duré dapoꞌre zaꞌruzé tãma sõmri zaꞌra. Tahawa, Siquẽ ꞌrata rowede iwazéb zahi ꞌre isa mono zahâpâ ma tô uburé ãma tiꞌa zaꞌra.
5 Tawamhã duré oto siꞌabaꞌréi wamhã, ꞌRe ihâimana uꞌâsi mono, Zaco norĩ waptoma ꞌri nhoꞌõmo norĩ ꞌre, ꞌre idahâimana zaꞌra mono ma hã, ma tô dapahi uptabi sina dahâimana zaꞌra da hã dama ꞌmanha. Tahawa Zacoho zarina dasiꞌabaꞌréi õ di, da te ãma dasiwi roꞌwaꞌrutu da hã.
6 Ãne ma tô Zaco, uburé tite aꞌuwẽ norĩ ré hã wi, Rowaꞌa na ꞌri nhoꞌõmo nhisi u, Bétéu na isisi amoi u, Canaꞌã tiꞌai ꞌremhã.
7 Tawamhã tame ma tô ẽtẽ zaꞌra hã ꞌmanha, ꞌRe ihâimana uꞌâsi mono ma. Ta hã ma tô sisi, “Bétéu te, ꞌRe ihâimana uꞌâsi mono” na. E marĩ wa. Tame tãma sihâiꞌré wa, tidubꞌrata ma, simani wamhã.
8 Ta rob ãma Débora, Rebeca te te iwarahu hã ma tô dârâ. Dâꞌâ wamhã, wede iwazéb zahi, ꞌre isa mono zahâpâ ma tô siwi tisẽ, Bétéu hâiwa nhimire niwĩ ꞌre ihâimana mono ãma. Tahawa isisi hã ãne: “Wede iwazéb zahi ãma datõmoꞌu dawi ꞌre ipraba mono” na.
9 Tawamhã Zaco, Mezopotãmia hawi apâ te te sina siri wamhã, ma tô ꞌRe ihâimana uꞌâsi mono hã tãma isihâiꞌré na ãma tãma sahu. Tahawa, iwẽ te te tãma ꞌre iꞌapisutu mono zéb na hã
10 te ãne tãma tinha:“A hã Zaco na asisi tô. Tane nherẽ, ãne hã oto asisi õ di za.Asisi hã za oto Izaraéu na.” Ãne ꞌRe ihâimana uꞌâsi mono, ma tô Izaraéu na sisi.
11 Tawamhã ãne na zama te duré sina tãma tinha:“Wa hã ꞌRe ihâimana uꞌâsi mono, danhipai u pese ĩwaihuꞌu pese uptabi.Maꞌãpé atébré za, aiꞌra ahâ da, duré asihudu ahâ da.Aihawimhã te za aꞌuwẽ misi ãma isitom na dasipuꞌu pese na daro mono bâ ꞌre dasitébré.Duré asihudu norĩ ꞌremhã te za dama ꞌre siꞌapito zaꞌra za.
12 Tawamhã Abraꞌãhã ma, duré Izaquihi ma, tiꞌa te isõmri hã, ta hã aima zama wa za oto tisõ.Taha parimhã wa za asihudu norĩ ma tãma sõmri zaꞌra, aiꞌuirĩ na.”
13 Tawamhã ꞌRe ihâimana uꞌâsi mono, Zacoho ma, te te tãma nharĩ pari, ihawimhã ma tô hâimo oto mo.
14 Tahawa Zaco, ꞌRe ihâimana uꞌâsi mono te te tãma inharĩzéb ãma, ma tô ẽne itõmo waré hã ꞌmaiꞌâ, hâiwi te te sãrĩ da. Ta hã ꞌRe ĩhâimana uꞌâsi mono te da, te te tãma pisutu wa, ma tô duré uva ꞌrãi waꞌu isé hã, duré azeitona ꞌrãi waꞌu to hã isisiwimhã saꞌwa.
15 Tawamhã ta hã ro, ma tô duré sisi, Bétéu na.
Raqueu idâꞌâzé wasuꞌu
16 Tawamhã Zaco norĩ ma tô Bétéu hawimhã oto wairé. Duré Efrata na ꞌri waꞌõtõ nhisi u ꞌrâwi te te oto sina rotété zaꞌra wamhã, ma tô oto Raqueu ãma iwasã hã sépu. Tahawa, te sépata hâ pese.
17 Tawamhã oto saꞌẽtẽ iwasã ãma sépuꞌu wamhã, te isapariꞌwa hã tãma tinha ãne:
— Aipahi tõ. Aibâ na te za duré aiꞌra hã aima podo.
18 Tane nherẽ, tãma irobꞌrãsutuzéb u hã romhuture di oto. Tawamhã ipẽꞌẽzani tiwi watobro wana ré, ma tô sisõꞌa ré tiꞌra siꞌwatébrémi sisi, Benoni* na. Tane nherẽ, imama ma tô sisi, Bẽzami* na.
19 Raqueu dâꞌâ wamhã, ma tô Efrata u bâdâdi zadaꞌré ãma dasiwi sẽrẽ ni, ãhã na ꞌri waꞌõtõ nhisi hã Belẽ na.
20 Tahawa Zaco, iꞌru ãma ma tô ẽne itõmo waré hã hâiwi tisã. Ta hã te zahadu ãhã na hã ipibui pese zéb da, iꞌru ãma ꞌre sa.
21 Taha pari Zaco, ta hawi oto watobro wamhã, ma tô Éde na romnhisi ãma dasipapara robꞌmadâꞌâzéb da, ꞌri ꞌrãihâ ꞌre isa mono zababa romhâ ꞌmanharĩ na ꞌri hã sima sõré.
Zacoho ꞌra norĩ wasuꞌu
22 Tawamhã taha rob ãma Zaco ꞌre hâimana mono ré, ma tô iꞌra Rubẽ, Zacoho mro prã na Bira tãma ihâiba hã tiwi upi wasété. Ãne hã imama te te waihuꞌu wamhã, ma tô abꞌrui pese.
Zacoho ꞌra uburé hã 12 na.
23 Ã norĩ hã, Léiaha zéꞌre hawi ipoto zaꞌra: Rubẽ, Zacoho ꞌra dama ipotoꞌrada, Simiã, Levi, Zuda, Isaca, duré Zébulõ.
24 Ã norĩ, Raqueu zéꞌre hawi ipoto zahuré hã: Zuzé, duré Bẽzami.
25 Bira, Raqueu ma romhuriꞌwa zéꞌre hawi ipoto zahuré hã ã norĩ: Dã, duré Nafitali.
26 Ziupa, Léiaha ma romhuriꞌwa zéꞌre hawi ipoto zahuré hã ã norĩ: Gadi, duré Asé. Ã norĩ hã Zacoho ꞌra, Mezopotãmia na romnhisi ãma hã ma tô tipoto zaꞌra.
Izaqui idâꞌâzé wasuꞌu
27 Tawamhã Zaco, timama Izaquihi siré ꞌre hâimana mono da hã ma tô mo Mare na ꞌri nhoꞌõmo nhisi u, Arba na isisi amoi u, Hebrõ na ꞌri nhoꞌõmo nhisi ꞌrata ꞌre ihâimana mono u, Abraꞌã, Izaquihi siré aré ꞌre isãmra mono zéb u.
28 Tawamhã Izaquihi ãma hã ma tô oto tiwahu, 180 na.
29 Tawamhã siꞌihi pese wamhã, Izaqui hã ma tô oto dârâ. Tahawa, iꞌra Ezau norĩ, Zacoho me ma tô sẽrẽ zahuré.
