Zenezi 37:1-36
37 Tawamhã Zaco, Canaꞌã tiꞌai ꞌre, imama ꞌre ihâimana mono zéb ãma te oto ꞌre hâimana.
2 Ã hã Zacoho ꞌra norĩ wasuꞌu.
Tawamhã Zuzé 17 na ãma iwahub ãma ma tô timama mro norĩ zéꞌre hawi ipoto zaꞌra norĩ siré tisisãnawã Biraha ꞌra norĩ me, Ziupaha ꞌra norĩ me, poneꞌẽrebâ norĩ hã, duré poneꞌẽrebâ zéré uzé norĩ hã te te ꞌre aꞌmadâꞌâ. Tawamhã isisãnawã norĩ, marĩ iꞌupa te te ꞌre iꞌmanharĩ zaꞌra mono zé hã, ma tô timama ma hã te te ꞌre awasuꞌu.
3 Zaco hã hâiba prédum nherẽ, ma tô Zuzé hã podo. Tahawa uburé tiꞌra norĩ nhipai u ma tô te te ꞌre sawi pese. Te te ꞌre sawi pese mono wa, ma tô iꞌuzazé ihâpa ipano pa na hã sada ꞌmaꞌmanha.
4 Tawamhã Zuzéhé si, imama isipai u zaꞌra te te ꞌre isawi pese mono na, ma tô isisãnawã norĩ hã ãma siwi waihuꞌu. Tahawa te tino hã te te siwi ꞌre ꞌru ꞌmanharĩ. Te duré timreme tete na si te te tãma ꞌre nharĩ zaꞌra.
5 Tawamhã nimahã bâtâ na ma tô Zuzé hã rosawẽ. Ta hã ma tô tisisãnawã norĩ ma tãma wasuꞌu zaꞌra. Ãhã wa, ma tô oto sima ꞌruiwazere pese zaꞌra,
6 ãne te te tãma nharĩ zaꞌra wa, ino uptabi zaꞌra nherẽ, tidubꞌrata norĩ ma:
— Maꞌãpé ĩwapari zaꞌra waꞌaba, te irosawẽrẽzé, za te aima iwasuꞌu zaꞌra waꞌaba zém na hã.
7 Ĩnhotõ ꞌrowimhã wa tô roptehutu na daburu ãma trigu teihi hã wasisi zaꞌra ni wasiré. Tawamhã te iwasi, ma tô uihâ na wahudu, sab da hâiwi. Tawamhã te iwasisi mana wawi te asimiwasisi zaꞌra waꞌwa hã aimasa. Ãhã wa, te iwasisi ma, ma tô asimiwasisi zaꞌra waꞌwa hã tãma aiwẽꞌẽ zaꞌra, tãma ipire zaꞌra zarina.
8 Tawamhã isisãnawã norĩ ma te ãma sadaꞌâbâ zaꞌra ãne:
— E a hã wanhibꞌapito na wama ꞌre aihâimana zaꞌra mono da bâ. E duré ꞌre waꞌawadaꞌuri mono da bâ.
Tawamhã ma tô oto tame sima ꞌrui poto pese zaꞌra, tinhimirosawẽrẽ te te tãma iwasuꞌu zaꞌra zéb ãma, ãne na hã.
9 Tawamhã ma tô duré rosawẽ, Zuzé hã. Tahawa, ma tô duré taha zama tãma wasuꞌu zaꞌra, tisisãnawã norĩ ma. Ãne te tãma wasuꞌu zaꞌra:
— Wa duré rosawẽ ãne. Bâtâ norĩ hã aꞌamoi me, duré wasi 11 na ihâiba zaꞌra norĩ me, ma tô ĩma aiwẽꞌẽ zaꞌra, tãma ĩpire zaꞌra zarina.
10 Tawamhã ã hã Zuzé te te irosawẽrẽzé, timama ma, duré tisisãnawã norĩ ma, te te tãma wasuꞌu zaꞌra wamhã, ma tô imama te te ãma mreme wẽꞌõ wa, ãne mreme tete na tãma tinha:
— E marĩ te wasuꞌu, irosawẽrẽzé hã. E niha wa za wa hã ana me, asisãnawã norĩ siré asõꞌremhã wahiꞌrãtitõ aima aimasisi ni, waꞌubu na tiꞌai u wa te roptop sina wama aipire zarina.
11 Tawamhã isisãnawã norĩ te duré siwi ꞌruiwapa, tino hã. Tane nherẽ, te imama si taré ãma rosaꞌrata uꞌâsi, tiꞌra nhimirosawẽrẽ na hã.
Zuzé, isisãnawã norĩ te te siwi wede wa, Ezitu u da te isaprõnizé wasuꞌu
12 Tawamhã nimahã bâtâ na Zuzéhé sisãnawã norĩ, romhâ u te timama nhimizama poneꞌẽrebâ norĩ hã, duré poneꞌẽrebâ zéré uzé norĩ hã te te ubumro, du ꞌri nhoꞌu Siquẽ na isisi ꞌrata ꞌre ihâimana mono u.
13 Tawamhã Zaco, te tiꞌra Zuzéhé ma tinha ãne:
— Aima waihuꞌu pese di, asisãnawã norĩ, Siquẽ ꞌrata poneꞌẽrebâ te te ꞌre iꞌmadâꞌâ zaꞌra mono na hã. Tahawa, wa hã wa ĩsima wẽ, itẽmeb zaꞌra aimorĩ da.
— Wa ĩsina mare tô, ĩzatõrĩzéb zô. — Ãne ma te Zuzé asa timama sadaꞌâ.
14 Tawamhã Zaco te duré tãma tinha ãne:
— Te za aimo, asisãnawã norĩ rowẽ zô, duré poneꞌẽrebâ norĩ rowẽ na simasab zô sabu zaꞌra da, iwasuꞌu zaꞌra we ĩma âri da.
Tawamhã ta hawi Hebrõ na romharé nhisi hawi ma tô Zaco tiꞌra Zuzé hã satõ, Siquẽ u morĩ da. Tahawa Zuzé ma tô oto mo. Tawamhã tamomo oto wisi wamhã,
15 ma tô taha rom na hã sô ꞌre rĩtĩ zaꞌra, tidubꞌrata norĩ zô hã. Tahawa ãne ré aibâ ma tô ꞌmadâ. Te te ꞌmadâꞌâ wamhã, ma tô sadanha ãne:
— E marĩ zô, te ꞌre airĩtĩ mo.
16 — Ĩdubꞌrata norĩ zô wa ꞌre ĩrĩtĩ. Ãhã rob ꞌre, te poneꞌẽrebâ isai ꞌrata te te ꞌre ꞌmadâꞌâ zaꞌra. E aima waihuꞌu pese di, nimomo isiꞌabaꞌrézé hã.
17 Tawamhã aibâ ma te sadaꞌâ ãne:
— Ta norĩ hã ã hawi ma tô aiꞌabaꞌré. Dotã na ꞌri nhoꞌõmo nhisi u siꞌabaꞌré da, wa tô imreme hã wapari zaꞌra.
Tawamhã Zuzé ma tô mo, tidubꞌrata norĩ zô ꞌre rĩtĩ mono da hã. Ãhã wa, ma tô oto sõpẽtẽ zaꞌra, Dotã ãma.
18 Tawamhã Zuzé ma tô romhâ ré siwi tisã. Tahawa, ꞌrâwi itẽme wisi zaꞌra õ ré, ma tô te te sima ãma irowairébé zaꞌra da hã rosaꞌrada siwi ꞌmanha, te te siwi wĩrĩ da.
19 Tahawa te ãne sima ꞌmahârâ zaꞌra:
— Õhõta te wei mo, rosawẽrẽ pese ꞌwa hã.
20 Oto wa te wasiwi wĩrĩ aba. Taha parimhã ihâiba, â zô abꞌre iꞌré ꞌre, wa za wasiwi me ni. Duré abaze zahi te te iꞌrẽne na wa za wamama ma hã wasiwi wasuꞌu ni. E ãne wamhã, tinhimirosawẽrẽ na te te ãma wama uwaimrami zaꞌra da bâ.
21 Tawamhã Rubẽ, ãne na te te mreme wapari zaꞌra wa, tino tisisãnawã norĩ wi te te sõꞌreptu da, te ãne tãma nharĩ zaꞌra:
— Tôꞌã! Wano hã wa te wasiwi wĩrĩ aba tõ.
22 Asiwi wapru puꞌu aba tõ. Taré te za ãme rop si ꞌre irosaꞌwari mono ãma â zô abꞌre ꞌre, asiwi imei waꞌwa, asiwi uꞌa aba ãna.
Ãne ma tô Rubẽ tãma ꞌru zaꞌra. E marĩ wa. Tino tisisãnawã norĩ wi, te te sõꞌreptui wa, apâ timama u te te satõrĩ da, te ãne na sima rosaꞌrata.
23 Tawamhã tisisãnawã norĩ u, oto Zuzé wisi wamhã, ma tô iꞌuza ihâpa ipano pa na ãma isiꞌuzazé te te tiwi hâiwazu zaꞌra sina tiwi wazere zaꞌra.
24 Taha pari te te oto siwi âri wamhã, ma tô â zô abꞌre iꞌré ꞌre siwi time, taha ꞌre sab da.
25 Taha pari ma tô saihuri da hã asimro. Taha ré, saihuri sina ma tô romhâ ré sãmri zaꞌra, Ismaeu nhihudu norĩ, Giliadi hawi we isiꞌabaꞌré hã awaru baꞌõmore na dasisadazezém na ꞌre idasiꞌmaꞌwamarĩ zaꞌra mono zé, duré dasai warĩrĩzé Ezitu u te te iꞌwasari hã.
26 Tawamhã Zuda te tisisãnawã norĩ ma nharĩ zaꞌra ãne:
— E niha marĩ iwẽ wama watobro zaꞌra da bâ, wano wa te wasiwi wĩrĩ wamhã, duré taha pari wa te wasiwi iwapru puꞌu zé wa te wasiwi simiꞌuri wamhã dawi.
27 Wasisãnawã nherẽ, wa te wasiwi wĩrĩ tõ da, taré wa te oto wasiwi wede aba, Ismaeu nhihudu norĩ ma. E marĩ wa. Õ hã tô wasisãnawã, duré wasiwapru ꞌrâwibre hã.
Tawamhã ãne te te tãma waihuꞌu zaꞌra wa, ma tô isisãnawã norĩ hã ãma siwi saze.
28 Tawamhã Midiã hawi Ismaeu nhihudu norĩ rowedeꞌwa iwaꞌwaibaba zaꞌra te te roꞌrahâri zaꞌra wamhã, ma tô Zuzé isisãnawã norĩ hã â zô abꞌre hawimhã oto siwi waze. Te te siwi wazere wi, ma tô Ismaeu nhihudu norĩ ma siwi wede, ẽtẽ waipo prã prata 20 na iwaꞌõtõ waré na. Tawamhã Ezitu u te oto Zuzé hã siwi saprõ.
29 Tawamhã Rubẽ, â zô abꞌre u apâ wisi wamhã, ma tô abꞌre baba na Zuzéhé zô hã sabu. Tahawa ma tô tiꞌuza hâiwazu, robzeiꞌõ zé te.
30 Tawamhã tisisãnawã norĩ u apâ te te sina siri wamhã, ma tô tãma nharĩ zaꞌra ãne:
— Abꞌre hã baba di, wano ꞌritéiꞌwa zabzé hã. E marĩ, wa za ꞌmanha.
31 Tawamhã isisãnawã norĩ, poneꞌẽrebâ zéré uzé siꞌaibâ ma tô siwi ꞌmaiwĩ. Te te siwi ꞌmaiwĩrĩ wamhã, taha wapru na ma tô Zuzéhé uzazé ihâ pa hã ãma siwi hâzapré.
32 Taha pari timama u iꞌuza ihâ pa te te siwi âri wamhã, ma tô ãne tãma wasuꞌu zaꞌra:
— Wa tô wasiwi sãmri ni, ã hã. Maꞌãpé ꞌmadâꞌâ, aiꞌra uza na hã pé hâi waihuꞌu da.
33 Tawamhã Zaco tiꞌra uzazém na te te tô hâi waihuꞌu wa, te ãne tãma nharĩ zaꞌra:
— Ĩhe, tahata tô ĩꞌra uzazé ihâ pa na hã wa tô hâi waihuꞌu. Abaze zahi ma te tô sima te te nhinhinarĩ, te te ꞌrẽne da.
34 Tawamhã robzeiꞌõ zé te, ma tô Zaco tiꞌuza hã hâiwazu. Taha pari ma tô daꞌuza ihâiro na siꞌuza. Tahawa, ma tô bâtâ ahâ na tiꞌra zô hã aiwaꞌõ.
35 Tawamhã uburé iꞌra siꞌaibâ norĩ iꞌra sipiꞌõ norĩ me, ma tô aré itẽme aihutu, te te sina pẽꞌẽtété zaꞌra da. Tane nherẽ, tisiwaꞌõ na te te ãma rosazâri da, te te sima wẽ õ wa, te ãne tãma nharĩ zaꞌra:
— Ĩꞌra zô ꞌre ĩsiwaꞌõi mono ré, te za ĩpẽꞌẽzé ré ĩꞌãma hã tiꞌa ni.
Tawamhã tiꞌra Zuzéhé zô ꞌre isiwaꞌõ mono na hã ma tô, te te ãma uzusi uꞌâsi.
36 Taha ré ma tô midiãnita norĩ hã, Zuzé, Ezitu ãma apito ꞌmadâꞌâꞌwa norĩ nhibꞌihâꞌa Potifaha ma hã siwi wede.
