Zenezi 38:1-30
38 Tawamhã ãne na Zuzéhé ma romhâimana ré, ma tô Zuda tisisãnawã norĩ hã rẽme zaꞌra. Ma tô mo, aibâ Hira na isisi nhorõwa ãma ꞌre hâimana mono da hã, ꞌri nhoꞌu Adulã na isisi ãmamhã.
2 Tawamhã tame Zuda ma tô cananeu norĩ nhipiꞌõ hã ꞌmaiwaihuꞌu, Suꞌa na isisi hã. Tawamhã taha na Zuda mro wamhã,
3 ma tô iꞌra hã tãma podo. Tawamhã Zuda ma tô sisi, Er na.
4 Taha pari duré wasã wamhã, ma tô iꞌra hã tãma podo. Tawamhã ta hã ma tô oto ina hã sisi, Ona na.
5 Tawamhã ma tô duré iꞌra hã tãma podo, Sela na ina te te isisi hã. Zuda hã Quezibe ãma hâimana ré, ma tô iꞌra siꞌwatébrémi isaꞌreꞌra hã podo.
6 Tawamhã Zuda, tiꞌra potoꞌrada Er na isisi hã ma tô Tama na piꞌõ nhisi na hã mro.
7 Tane nherẽ, Uburé Danhibꞌapito, Er hâimana wasété zé hã te te tãma rowẽ õ di. Tahawa ma tô tiwĩ.
8 Tawamhã Zuda, te Onahã ma tinha ãne:
— Asisãnawã asédéꞌaba mro, mro ãna ihâimana ãma te za aimro, dasidaimama damro uirĩ na ãma ꞌre imro zaꞌra mono zém na dahâimanazéb zarina, ãma tãma uwaimrami wa, asisãnawã nhihudu hã aihawimhã ꞌre hâimana zaꞌra mono da.*
9 Tane nherẽ, Onahã ma tãma waihuꞌu pese di, ihawi za iꞌra tãma iꞌmaipodo itei õ na hã. Tahawa tisisãnawãi mrotõ na nasi hâimana mono sidâpâsi, ma tô nasi tiꞌai u tihâiba waꞌu hã saꞌwa, ihawimhã isisãnawã nhihudu hã tãma ꞌmaihâimana tõ da.
10 Tawamhã Uburé Danhibꞌapito, Ona nasi te te iꞌmanharĩzé hã ma tô wẽꞌõ pese. Tahawa taha zama ma tô tiwĩ.
11 Tawamhã Zuda, tisaniꞌwa Tamahã ma, ma tô tãma tinha ãne:
— Aimama nhorõwa u te za apâ aimo, aimro ãna aꞌâ tame ꞌre aihâimana mono da, ĩꞌra Sela hã isiꞌaibâzéb u.
Ãne ma tô tãma tinha, Selaha zama dâꞌâ õꞌumnhasite, isisãnawã norĩ ma tãma iromhâimana zahuré ne hã. Tahawa, Tama hã ma tô apâ mo, timama nhorõwa u, tame ꞌre hâimana mono da.
12 Tawamhã ãne na romhâimana mono pari, ma tô Zudaha mro hã dârâ. Tawamhã we ꞌre siwaꞌõi mono pari, ma tô Zuda, Timnate na ꞌri waꞌõtõ nhisi u mo, isimizama da te tãma ꞌre séré nhihâri zaꞌra mono ré, te te ꞌre aꞌmadâꞌâ mono da hã. Tahawa, te isiwaihu Hira na isisi, Adulã hawimhã isiré mo.
13 Tawamhã Tamahã ma, imaprewa Timnate u tinhimizama te te azéré nhihâri da imorĩ na hã, ma tô tãma ꞌmairowasuꞌu ni.
14 Tahawa Tama, imrotõ ãma ꞌre isiꞌuza zaꞌra mono zé hã ma tô oto waze, aimawi na te te ãma saprĩ da. Ma tô duré zazahâ ihâi baihâire na siꞌubu ubu, da te waihuꞌu tõ da. Taha pari te oto mo, Enaꞌĩ na ꞌri nhoꞌõmo u ꞌre idanhisisi mono zéb ãma sãmra da, Timnate u bâdâdi inomro uiwada. Ãne hã ma te tawamhã ꞌmanha, Sela hã iprédub na te te ꞌmadâꞌâ nherẽ, zahadu duré imama ãma imro da hã te te tãma saꞌréi õ wa.
15 Tawamhã Zuda, tisaniꞌwa te te ꞌmadâꞌâ wamhã, ma tô piꞌõ, siwaꞌâbâ zô ꞌre isisõmri mono ãma rosaꞌrata, ubu ubu ré sãmra wa.
16 Tawamhã tisaniꞌaba na hã te te waihuꞌu õ wa, ma tô bâdâdi zadaꞌré u hã itẽme mo, te te sima sadawa pibu da. Tawamhã te ãne tãma tinha:
— We! We aimorĩ! Wa ĩsima wẽ, airé ĩnomro da.
Tawamhã ma te isaniꞌwa hã ãma tãma waꞌrã ãne:
— E niha te za tawamhã ĩma iwaꞌâ.
17 Tawamhã imaprewa ma te asa ãma sadaꞌâ ãne:
— Wa za dama ꞌmaiꞌru aima da, ĩnhimizama poneꞌẽrebâ zéré uzé ꞌra hã da te we aima ꞌmazaprõni da.
— Wẽ di tô. Tane nherẽ, te za tiha hã ĩma ihi, poneꞌẽrebâ zéré uzé we ĩma da, dama iꞌmaiꞌru we da te isaprõnizéb u te te aꞌâ roptété da. — Ãne te asa isaniꞌwa hã tãma tinha.
18 Tawamhã Zuda te ãne sadanha:
— E marĩ te tawamhã asima iwẽ, te aima ihiri da hã.
Tawamhã ma te ãne ãma tãma waꞌrã:
— Ta asõꞌrebzu na isaꞌo isihâtâ ré hã, duré asibꞌrata asiwã ꞌre iꞌâri me hã te za ĩma ino.
Tawamhã Zuda, tinhimarĩ hã ma tô oto tãma sõmri zahuré. Ãhã wa, duré oto ãma hâimana wa, ma tô tiwasã oto, piꞌõ hã.
19 Taha pari Tama ꞌri u oto apâ morĩ wamhã, ma tô tiꞌrã ubuzé hã waze. Taha pari ma tô duré imrotõ ãma ꞌre isiꞌuza zaꞌra mono zém na hã apâ ãma siꞌuza.
20 Tawamhã nimahã na Zuda, tisiwaihu Hiraha ma, ma tô tãma tiꞌru, poneꞌẽrebâ zéré uzé ꞌra hã te te tãma saprõni da, piꞌõi ma, duré apâ marĩ te te iꞌrata inomri hã te te tãma ãwisi zahuré da. Tane nherẽ, Hira hã te te sõpẽtẽ waihuꞌu õ di, piꞌõ hã.
21 Tahawa te aibâ norĩ, Enaꞌĩ ãma ꞌre ihâimana zaꞌra mono hã sadanharĩ zaꞌra, piꞌõ, siwaꞌâbâ zô ꞌre isisõmri mono, bâdâdi zadaꞌré ãma ꞌre isimasisi mono hã nimame sãmra zô.
— Ãmemhã piꞌõ siwaꞌâbâ zô ꞌre isisõmri mono hã ꞌre ꞌmaihâimana mono õ di. — Ãne ma te asa sadaꞌâbâ zaꞌra.
22 Tawamhã Hira apâ te te sina siri wamhã, ma tô ãne Zudaha ma hã tãma rowasuꞌu:
— Piꞌõ hã te sõpẽtẽ õ di. Aibâ norĩ õme ꞌre ihâimana zaꞌra mono hã te ĩma rowasuꞌu zaꞌra, niwamhã u, õmemhã piꞌõ siwaꞌâbâ zô ꞌre isisõmri mono hã ꞌre ꞌmaihâimana mono õ di, u.
23 Tawamhã Zuda te ãne tãma tinha:
— Tane wamhã, ĩnhimarĩ te tãma inomri zahuré hã tãma hâimanare. Ãne wamhã, niꞌwa waꞌãma iwaꞌẽ da hã mare di za. Wa tô aré poneꞌẽrebâ zéré uzé ꞌra hã tãma ꞌmaiꞌru. Tane nherẽ, a hã tô sõpẽtẽ waihuꞌu õ di.
24 Tawamhã aꞌamo siꞌubdatõ ãma siꞌutõrĩ wamhã, ma tô Zudaha ma tãma ꞌmaiwasuꞌu ni ãne:
— Asaniꞌwa, te siwaꞌru siwaꞌâbâ zô ꞌre isisõmri mono na hã ꞌre hâimana. Tahawa, ma tô tiwasã.
Tawamhã Zuda te ãne asa tãma tinha:
— Hâiba ré, pré asiwi ꞌrãmi aba da, te za ꞌri nhoꞌõmo ꞌwawi waꞌra nhiti rob u we asiwi iwazere ꞌwa, piꞌõ hã.
25 Tawamhã ꞌri hawi da te oto dasiwi wazere ré, ma tô isaniꞌwa timaprebaba ma timreme hã tãma tisõ ãne: “Ã tiha te te ĩma isõmri zahuré tedeꞌwa hã ma tô ĩdupu. Maꞌãpé ꞌmadâꞌâ zahuré na, danhoꞌrebzu na isaꞌo isihâtâ ré hã, duré danhiwã hã niꞌwa hã tô itedeꞌwa zô pé.”
26 Tawamhã Zuda, tinhimarĩ te te waihuꞌu zahuré wamhã, te ãne tinha:
— Ĩnhipai u te iꞌuwaibaba na õ hã tihâiba. E marĩ wa. Wa hã wa tô tãma ropisutu aré, ĩꞌra Sela na mro da hã. Tane nherẽ, te tãma iropisutuzém na hã te ãma tãma uwaimrami õ di.
Tawamhã Zuda, niwamhã te te oto upi wasété na hã sahu õ di.
27 Tawamhã duré oto Tamahã ma, iꞌra tãma poto da wamhã, ma tô isiꞌubza na idiꞌi ꞌremhã waihuꞌu zaꞌra ni.
28 Oto iwasã ãma sépuꞌu wamhã, ma tô isiꞌubza hâiba amo hã rob u siꞌuihâ na tinhibꞌrada hã waze. Tahawa isapariꞌwa ma tô abazi isidi pré na hã ãma simizu wasisi. Tahawa te ãne tinha:
— Ã hã ma tô imorĩꞌrata na tiwatobro ꞌrata.
29 Tane nherẽ, aré imorĩꞌrata na iwatobro da hã ma tô apâ sibꞌrata dahudu. Tahawa, isiꞌubza hâiba amo ma tô aré isãnaꞌre ipoto da hã oto iwana podo. Tahawa te isapariꞌwa hã tãma tinha ãne:
— E niha ma tô aiwatobro da hã, asémere hã asina iꞌrida.
Tahawa, ma tô sisi Periz* na.
30 Taha pari ma tô duré ihâiba amo abazi isidi pré na isimizu wasi ipodo hã sisi, Zera* na.
