Zenezi 4:1-26
4 Tawamhã Adã, timro Evaha ãma nasi sapaꞌa wamhã, ma tô tiwasã. Iꞌra duré oto tãma waptãꞌã wamhã, te ãne tinha:
— Uburé Danhibꞌapito nhimipawaptobzéb zarina, ma ĩꞌra aibâ na ĩma podo.
Tawamhã ma tô sisi, Caĩ* na.
2 Tahawa, nimahã na ma tô duré iꞌra hâiba amo hã tãma podo, isisi hã Abéu na, Caĩhĩ sisãnawã hã. Abéu te poneꞌẽrebâ ꞌmadâꞌâꞌwa na ꞌre hâimana. Caĩ hã te robꞌre na si te te ꞌre romhuri.
3 Tawamhã we ropsiꞌutõrĩ mono pari, nimahã bâtâ na Caĩ ma tô tiburu nho hã ꞌmaiꞌâ, Uburé Danhibꞌapito ma, ãma tãma isõprubzéb da hã.
4 Duré Abéu tinhimizama poneꞌẽrebâ ꞌra potoꞌrada hã ma tô duré ꞌmaiꞌâ. Tawamhã taha na nimahã inhi wẽ uptabi na ma tô Uburé Danhibꞌapito ma ãma tãma tinhopru. Tawamhã Abéu ma hã duré isibzari ma zama toi uptabi di.
5 Tane nherẽ, Caĩhĩ nhibzari si te te wẽsãmri õ di. Ma tô wẽꞌõ. Tahawa, ma tô Caĩ abꞌrui pese. Duré ma tô tiꞌubu zeiꞌõ pese.
6 Tahawa te Uburé Danhibꞌapito hã tãma tinha ãne:
— E marĩ wa, ma tô asahi. Duré e marĩ wa, te aiꞌubu zeiꞌõ na si nasi ane.
7 Tô iꞌuwaibaba na a hã ꞌmanharĩ ꞌwaꞌâhã, te aré ꞌre aihâ mo, rowẽ te. Tane nherẽ, ma tô asiwasé, a hã. Tahawa te iꞌaiwasétézé hã ꞌridawa ãma asô mapa. Ta hã te sima wẽ, siptete na asada ꞌre hâimana mono da. Tane nherẽ, te za a hã asiptete na ãma aiꞌuté da sada asipte.
8 Tawamhã Caĩ, tisisãnawã Abéu ma, te ãne tãma tinha:
— Oto wane na, aꞌubuni u.
Tawamhã rom na oto siré hâimana zahuré wamhã, ma tô Caĩ, tisisãnawã Abéu da asapẽtẽ. Tahawa, ma tô tiwĩ.
9 Tawamhã Uburé Danhibꞌapito, nimahã na te Caĩ hã sadanha ãne:
— E mahãta asisãnawã Abéu.
— Me! Wa hã te waihuꞌu õ di. E wa hã ĩsisãnawã ꞌmadâꞌâꞌwa pâ. — Ãne Caĩ ma te asa ãma sadaꞌâ.
10 Tawamhã ꞌRe ihâimana uꞌâsi mono te ãne tãma tinha:
— E marĩ da, ma tô ãne hã iꞌmanha. Asisãnawãi wapru te tiꞌai hawimhã ꞌre sadari. Te duré waptẽ, tiꞌruiwaꞌâbâzé hã.
11 Tahawa wa za iwẽꞌõ hã aima pisutu. Tiꞌai wamhã ꞌre irobꞌre mono da hã mare di za oto. E marĩ wa. Asisãnawã wĩrĩ wamhã, tiꞌa iwapru zô hã siꞌridawa wa, te te waprui hârâ da.
12 Tahawa duré tiꞌa na ꞌre robꞌre mono da, sada ꞌre ropese mono wamhã, aima ꞌre iꞌrãi mono da hã mare di za. A hã te za hâiwi si õne uꞌâ daro mono bâ ꞌre aimo.
13 Tawamhã Caĩ, te Uburé Danhibꞌapito ma asa tãma tinha ãne:
— Ã hã ipire uptabi na ĩma irobꞌmanharĩzé hã, te ꞌwapéi waihuꞌu õ di za.
14 Ã bâtâ na te za ã hã tiꞌai hawi ĩzatõ. Tahawa wa za aiꞌubu wi hã ꞌre ĩsimaꞌuri uꞌâsi. Duré siwaꞌru wa za daro mono bâ ꞌre mo, hâiwi si. Tawamhã duré siwaꞌru da te dasiwi ꞌre ĩnhopẽtẽ mono wamhã, te za dasima da te ꞌre wẽ zaꞌra, da te dasiwi ĩwĩrĩ da hã.
15 Tane nherẽ, Uburé Danhibꞌapito asa ma te ãne ãma tãma waꞌrã:
— Mare di! Tane aima ꞌre iromhâimana mono da hã mare di za. E marĩ wa. Niꞌwa te te aiwĩrĩ wamhã, taha waꞌrãmi te za 7 na ihawi aꞌuwẽ ꞌre ihâimana zaꞌra mono norĩ hã aiꞌutõ, taha na si da te dasiwi ãma asé nhiꞌra da.
Tawamhã Uburé Danhibꞌapito, Caĩhĩ ãma ipibui pese zéb da, ma tô marĩ hã ãma tihi, da te dasiwi ꞌre sõpẽtẽ mono wa, da te wĩrĩ tõ da.
16 Tawamhã Caĩ, Uburé Danhibꞌapito ꞌre ihâimana mono zém hawimhã ma tô watobro. Tahawa, ma tô mo, Nodi* na romnhisi ãma ꞌre hâimana mono da oto, Édẽ bâtâ pusizém niwĩ ꞌre ihâimana mono ãma.
Caĩhĩ nhihudu wasuꞌu
17 Tawamhã Caĩ norĩ imro me hã, ma tô iꞌra tãma tiꞌmaipoto zahuré. Ta hã ma tô duré sisi zahuré, Enoqui na. Tawamhã duré nimahã na, Caĩ ꞌri nhoꞌu te te iꞌri hã, ma tô tiꞌra nhisi na hã sisi, Enoqui na.
18 Ta hã Enoqui, Iradehe mama, duré Irade hã, Meuzaꞌéhé mama, duré Meuzaꞌé hã, Metuzalẽhẽ mama, duré Metuzalẽ hã, Lamequihi mama.
19 Tawamhã Lamequihi mro zahuré hã, imorĩꞌrata na imro nhisi hã Ada na, duré imro zahu nhisi hã Zila na.
20 Tawamhã Adaha ma, iꞌra hã ma tô tãma podo. Isisi hã Zaba na. Ta hã danhimizama tébréꞌwa norĩ hiꞌrata naꞌrada, duré romhâ ꞌmanharĩ na te te sima ꞌre iꞌri nhoré zaꞌra mono ꞌre, ꞌre ihâimana zaꞌra mono norĩ hiꞌrata naꞌrada.
21 Tawamhã duré Zabaha sisãnawã hã te ꞌre ꞌmaihâimana, isisi hã Zubaꞌu na. Ta hã, uburé isõrõtaꞌare na te te ꞌre iroptaꞌa zaꞌra mono norĩ hiꞌrata naꞌrada, duré ibuhârâ na ꞌre isimnhihãsi zaꞌra mono norĩ hiꞌrata naꞌrada.
22 Tawamhã Zilaha ma zama, ma tô duré iꞌra hã tãma ꞌmaipodo. Isisi hã Tubalcaꞌĩ na, ẽtẽ topsada brõzi na duré isiꞌuwazi tete na marĩ hã te te ꞌre iꞌabꞌmanharĩ mono. Duré taha hidiba hã te ꞌre ꞌmaihâimana, isisi hã Naꞌama na.
23 Tawamhã nimahã bâtâ na Lamequi te timro norĩ ma hã tãma nharĩ zahuré ãne:“Ada, Zilaha me, te za ĩwapari ꞌwa;Rametihi mro norĩ, ĩmreme hã wapari pese aba.Aibâ hã wa tô ꞌmaiwĩ, te te ĩꞌuꞌa wa.Tô aiꞌrepudu hã wa tô ꞌmaiwĩ. E marĩ wa. Tô duré te te ĩꞌuꞌa wa.
24 Caĩ, da te iwĩrĩzé 7 na dahâiba na da te ãma dasiwi ꞌruiwaꞌâbâ da wamhã, duré niꞌwa te te ĩwĩrĩ da wamhã, te za 77 na dahâiba na idadâꞌâ zaꞌra na ãma isahu na hã ãma dasiwi ĩꞌruiwaꞌâbâ ni.”
Setihi waptãꞌãzé wasuꞌu
25 Tawamhã Adã norĩ imro me, ma tô duré iꞌra hã tãma tiꞌmaipoto zahuré. Tahawa te ãne tinha imro piꞌõ hã:
— ꞌRe ihâimana uꞌâsi mono, Abéu nhowaꞌreꞌremhã ma tô duré ĩꞌra hã ĩma tisõ, Caĩ te te ĩwĩrĩ nhibrobꞌre ĩma ꞌre ihâimana mono da hã.
Tawamhã ta hã ma tô sisi, Seti* na.
26 Tawamhã duré Setihi ma, ma tô iꞌra hã tãma ꞌmaipodo. Ta hã ma tô duré sisi, Enosi na. Tawamhã tame ma tô oto Uburé Danhibꞌapito nhisi waptẽrẽ na hã ãma ꞌre dawata naꞌrata zaꞌra.
