Zenezi 40:1-23
40 Tawamhã we romhâimana mono pari, Ezitu te, apito ma, ma tô tãma romhuriꞌwa norĩ, marĩ te te tãma iꞌmanharĩ zahuré zéb zarina sima ꞌruzani zahuré, apito ma, uva ꞌrãi waꞌu isé zaꞌwariꞌwa norĩ nhibꞌihâꞌa hã, duré, iꞌuꞌẽtẽ wapu ꞌmanharĩꞌwa norĩ nhibꞌihâꞌa me.
2 Tahawa sada sitiꞌru zahuré wa,
3 ma tô dazazéb ꞌre simiꞌwara da dama ꞌru zahuré, uburé apito ꞌmadâꞌâꞌwa norĩ nhibꞌihâꞌa nhorõwa ꞌre, tô Zuzé hã ꞌre isa mono zé dazazéb ꞌre.
4 Tawamhã tame ma tô ta norĩ hã ꞌre hâimana hâ zahuré. Tawamhã danhibꞌihâꞌa ma tô Zuzé hã pisutu, te te duré ꞌre ꞌmadâꞌâ zahuré mono da.
5 Tawamhã nimahã mara na ma tô uva ꞌrãi waꞌu isé zaꞌwariꞌwa norĩ, iꞌuꞌẽtẽ wapu ꞌmanharĩꞌwai me hã siꞌuiwa na te te saho zahuré. Isimirosawẽrẽ zahuré siꞌuiwa na marĩ te te iwasuꞌu hã.
6 Tawamhã Zuzé awẽm na te te sabu zahuré da, itẽmeb zahuré morĩ wamhã, ma tô hâtâꞌâ na ihâimana zahuré na ubu waihuꞌu zahuré.
7 Tahawa, te ãne sadanharĩ zahuré:
— E marĩ wa, te ãhã na hã aiꞌubu zei ãna aihâimana ꞌwa.
8 Tawamhã ma te ãne ãma tãma waꞌrãmi zahuré:
— Wahâiba siꞌuiwa na wa tô rosawẽrẽ ni. Tane nherẽ, niꞌwa hâimana õ di, te te ãma wama isaprĩ da hã, wa te isahoi mono zé, marĩ te te iwasuꞌuzé, wa te iwaihuꞌu da hã. Tahawa ma tô wawi tirobzeiꞌõ pese.
Tawamhã Zuzé te asa ãne tãma nharĩ zahuré:
— ꞌRe ihâimana uꞌâsi mono si te za rosawẽrẽ na isaprĩ waihuꞌuzé hã te te dama ꞌre anhomri. Tahawa, maꞌãpé, irosawẽrẽ aba zé hã ĩma wasuꞌu aba, te waihuꞌu da.
9 Tawamhã uva ꞌrãi waꞌu isé zaꞌwariꞌwa norĩ nhibꞌihâꞌa hã ma tô tinhimirosawẽrẽ tãma wasuꞌu, ãne:
— Ĩnhotõ ꞌrowimhã uva ꞌru ĩnhoꞌre
10 siꞌubdatõ iꞌru sisaꞌridi hã wa tô ꞌmadâꞌâ zaꞌra. Tawamhã isu norĩ hã wairébé wi, ma tô duré isirãrã norĩ hã wairébé. Wairébé mono wamhã, ma tô uva ꞌru ꞌrã pré wa isipo na hã siꞌmanharĩ zaꞌra, õne haré.
11 Tawamhã wa hã wa tô apito nhimihâsizé ĩnhibꞌratamhã ꞌre tiꞌâ. Tahawa, wa tô iwaꞌu zô hã iꞌremhã ꞌrãiwati zaꞌra. Taha pari apito ma hã, wa tô duré tãma tisõ, te te hâꞌrẽne da.
12 Tawamhã Zuzé te tãma tinha ãne:
— Irosawẽrẽzé, ãne hã te wasuꞌu: Siꞌubdatõ uva ꞌru panhipti sisaꞌridi hã siꞌubdatõ bâdâ te wasuꞌu.
13 Bâdâ siꞌubdatõ aiꞌãma ne pari, te za apito Faraꞌo hã dama aiꞌru, da te aiwazere da, dazazém hawi. Tawamhã te za apâ hã asã za, ꞌre iromhuri ꞌrata mono zéb u, apito ma, uva ꞌrãi waꞌu isé zaꞌwari na ꞌre romhuri mono da, iwana wam ne.
14 Tawamhã õme apâ rowẽ na aima ꞌre romhâimana mono wamhã, ĩꞌãma hã aipoꞌre puꞌu za, iwẽ na hã ĩpawaptob da. Apito ma, ĩhâiba na hã tãma nharĩ za, dazazém hawimhã te te apâ ĩwazere da.
15 Sena ĩzada iropsisapẽtẽ hawimhã ma tô Ebreu norĩ nhiptiꞌai hawimhã dasiwi ĩwazere ni, Ezitu u we da te dasiwi ĩzaprõni da hã. Duré ãme Ezitu ꞌremhã marĩ te ꞌmanharĩ õ nherẽ, ma tô dazazéb u hã we ĩnherẽ ni, ĩzab da.
16 Tawamhã ihâiba amo iꞌuꞌẽtẽ wapu ꞌmanharĩꞌwa norĩ nhibꞌihâꞌa, rosawẽrẽ na ãma isaprĩzé te te wapari wẽ wa, ma tô duré ãne tãma wasuꞌu:
— Ĩzama wa tô duré rosawẽ. Te irosawẽrẽ ꞌremhã wa tô siꞌubdatõ siꞌõno iꞌuꞌẽtẽ wapu ré ĩꞌrã na hã timra.
17 Tawamhã siꞌõno danhisiwi inomro ꞌremhã te siwazari dasa sipuꞌu pese na dabaꞌwara, iꞌuꞌẽtẽ wapu ꞌmanharĩꞌwa norĩ, apito ma, te te isebre zaꞌra hã. Taha zô, si norĩ we isisaꞌrei mono dasa norĩ te te siwi ihâtoꞌo na ma tô siwi uprosi.
18 Tawamhã Zuzé, isimirosawẽrẽ na ma tõ ãma tãma saprĩ ãne:
— Irosawẽrẽzé, ãne hã te wasuꞌu. Siꞌubdatõ siꞌõno hã te siꞌubdatõ bâdâ wasuꞌu.
19 Siꞌubdatõ bâdâ hã aiꞌãma ne pari, te za apito hã dama aiꞌru, da te aiwazere da, dazazém hawi. Tawamhã te za dama aiꞌru, da te dasiwi aiꞌrã nhizâri da. Taha parimhã te za aihâiba wede na hã dasiwi sasõmri ni, hâiwi saꞌo da. Tawamhã si norĩ hã te za aihâiba nhi ihâtoꞌo na si siwi uprosi.
20 Tawamhã siꞌubdatõ bâdâ ãma ne pari, apito Faraꞌo tiwaptãꞌãzém na dasa te te ꞌmanharĩ wamhã, ma tô uburé tite romhuriꞌwa norĩ ma, dasa hã tãma ꞌmanharĩ zaꞌra. Tawamhã uva ꞌrãi waꞌu isé zaꞌwariꞌwa norĩ nhibꞌihâꞌa, iꞌuꞌẽtẽ wapu ꞌmanharĩꞌwa norĩ nhibꞌihâꞌa me apâ da te sani zahuré da hã ma tô dama ꞌru zahuré. Tahawa, ma tô duré dama ꞌru zahuré, dasa te te iꞌmanharĩ u, da te dasiwi saprõni zahuré da.
21 40:21-22 Tawamhã ãne na Zuzé te te tãma iwaihuꞌu zahuré zéb zarina si, ma tô tãma tiromhâimana zahuré: Tahawa, apito, uva ꞌrãi waꞌu isé zaꞌwariꞌwa norĩ nhibꞌihâꞌa hã ma tô apâ tisã, uva ꞌrãi waꞌu isé zaꞌwariꞌwa na te te tãma ꞌre romhuri mono da. Ma tô duré iꞌuꞌẽtẽ wapu ꞌmanharĩꞌwa norĩ nhibꞌihâꞌa, hâiwi isaꞌo na da te wĩrĩ da hã dama tiꞌru.
22 ꞌMadâꞌâ 40:21
23 Tane nherẽ, uva ꞌrãi waꞌu isé zaꞌwariꞌwa hã, ma tô Zuzéhé na hã poꞌre haꞌâri pese. Ãhã wa, tinhimirosaꞌrata na hã niwamhã ãma poꞌre puꞌu õ di tô.
