Zenezi 41:1-57
41 Tawamhã ma tô oto maparane tiwahu. Nimahã bâtâ na Ezitu te, apito hã ma tô rosawẽ, Nilu na panhoꞌõmo nhisi zaihâ na isam na.
2 Taha ré powawẽ ihâipe iwẽ ihâsu 7 na â hawimhã ma tô wairé. Wairébé wi, te duré pazaihâ na du teihi po hã te te ꞌre huri.
3 Taha wi, ma tô duré isarina â hawimhã powawẽ 7 na ihâiba amo norĩ hã wairé, iꞌwahi pesere iwasété uptabire hã. Ta norĩ hã te imorĩꞌrata na pazaihâ na isimasab siré aimasa.
4 Tawamhã powawẽ iꞌwahire iwasétére hã ma tô ihâipe iwẽ ihâsu hã siwi uprosi.
Tawamhã apito ma te oto toporo.
5 Taha pari ma tô duré apâ hã tõmo hato. Tõmo sito wamhã, ma tô duré rosawẽ. Sõtõ ꞌrowimhã, ma tô ꞌmadâ, amnho trigu te, misi nherẽ, 7 na ihawi iteihi mono bâ iꞌrã iwairébé mono hã. Ta norĩ hã iwẽ uptabi iꞌrã zurutu na hã.
6 Taha wi, ma tô duré 7 na iꞌrãi ꞌré hã wairé, rop si ꞌre irosaꞌwari mono hawi rowaꞌuꞌu waꞌro te te iteihi ꞌré mono ꞌrã hã.
7 Tawamhã ta norĩ hã ma tô 7 na iꞌrãi wẽ norĩ ré hã siwi sõmri zaꞌra.
Tawamhã apito, oto apâ topoꞌo wamhã, ma tô waihuꞌu, sõtõ ꞌrowi te te irosawẽrẽzém na si.
8 Tawamhã awẽm na mararé te te isahoi mono zém na hã hâtâꞌâ di, duré tãma robzei õ di. Tahawa Ezitu ãma romhõsiꞌwa norĩ zô, duré rowaihuꞌu pese norĩ zô te uburé sô tihârâ zaꞌra. Tawamhã apito te tinhimirosawẽrẽ hã tãma wasuꞌu zaꞌra. Tane nherẽ, niꞌwa te te ãma tãma saprĩ waihuꞌu õ di.
9 Tahawa uva ꞌrãi waꞌu isé zaꞌwariꞌwa norĩ nhibꞌihâꞌa hã ma tô apito ma tinha ãne:
— Ãhã na ĩwasété na te ãma iꞌupazém na hã wa oto ĩsina poꞌre puru.
10 Nimahã bâtâ na ĩzada asitiꞌrui wamhã, duré iꞌuꞌẽtẽ ꞌmanharĩꞌwa zada asitiꞌrui wamhã, ma tô dama iwahâiba ꞌru, dazazéb ꞌre, da te waza da, apito ꞌmadâꞌâꞌwa norĩ nhibꞌihâꞌa nhorõwa ãma.
11 Tawamhã nimahã mara na hã wa tô wahâiba siꞌuiwa na rosawẽrẽ ni. Wanhimirosawẽrẽ, aiwabꞌõ na marĩ te te wama iwasuꞌuzém na.
12 Tamemhã te Ebreu wasiré hã ꞌre hâimana, apito ꞌmadâꞌâꞌwa norĩ nhibꞌihâꞌa ma, romhuriꞌwa hã. Tawamhã taha ma, wa tô wanhimirosawẽrẽ hã tãma wasuꞌu ni. Tahawa ma tô ãma wama saprĩ, wa te irosawẽrẽzé, marĩ te te iwasuꞌuzém na hã.
13 Tawamhã te te ãma wama isaprĩzéb zarina ma tô watobro. Wa hã wa tô te ꞌre iromhuri ꞌrata mono zéb u hã apâ ãzé. Duré iꞌuꞌẽtẽ ꞌmanharĩꞌwa hã ma tô ibutu wazi na hã dasiwi wĩrĩ ni, tô te te wama ãma isaprĩzéb zarina rosawẽrẽ hã.
14 Tawamhã apito Faraꞌo, Zuzéhé zô ma tô hâ. Sô hârâ wamhã, te waptu na sô taꞌmaimorĩ ni, dazazém hawi da te dasiwi wazere da. Tahawa, ma tô aꞌâ siwatasu pa. Ma tô duré tiꞌuza na hã aꞌâ saprĩ. Taha pari te oto apito u hã mo, isõꞌre sab da.
15 Tawamhã te apito hã tãma tinha ãne:
— Wa tô rosawẽ, niꞌwa te te ĩma ãma isaprĩ waihuꞌu õ na hã. Tane nherẽ, rosawẽrẽ na ãma isaprĩ waihuꞌuꞌwa na wa tô aiwasuꞌu hã wapa.
16 Tawamhã Zuzé ma te asa ãma tãma waꞌrã, ãne:
— Ta hã, ĩsiꞌuihâ na hãi õ di. ꞌRe ihâimana uꞌâsi mono si, te za irosawẽrẽzém na hã ãma asadaꞌâ, marĩ hã za ihâimanazé romnhowam na ãma iwaihuꞌu wẽ zéb da hã.
17 Tawamhã apito, ma tô tãma wasuꞌu ãne, tinhimirosawẽrẽ hã:
— Te irosawẽrẽ ꞌrem hã Nilu panhoꞌõmo zaihâ na wa tô za.
18 Taha ré powawẽ ihâipe iwẽ ihâsu 7 na â hawimhã ma tô wairé. Wairébé wi, te duré pazaihâ na du teihi po hã te te ꞌre huri.
19 Taha pari, ma tô duré isarina â hawimhã powawẽ 7 na ihâiba amo norĩ hã wairé, iꞌwahi pesere iwasété uptabire hã. Niwamhã õ norĩ sine hã Ezitu ꞌremhã te iꞌmaiꞌmadâꞌâ õ, wa ĩnhotõ ꞌrowimhã abꞌmadâ, iwasété uptabi na hã.
20 Tawamhã powawẽ iꞌwahire iwasétére hã ma tô ihâipe iwẽ ihâsu hã siwi sõmri zaꞌra.
21 Tane nherẽ, ihâipe te te sõmri zaꞌra nherẽ, te ãma sidupu zaꞌra ãna aimasa, ꞌwahi uꞌâsi. Tawamhã wa tô oto toporo.
22 Taha parimhã wa tô duré rosawẽ. Ĩnhotõ ꞌrowimhã wa tô ꞌmadâ, amnho trigu te, misi nherẽ, 7 na ihawi iteihi mono bâ iꞌrã iwairébé mono hã. Ta norĩ hã iwẽ uptabi isu wawẽ iꞌrã zurutu na hã.
23 Taha pari ma tô duré 7 na iꞌrãi ꞌré hã wairé, rop si ꞌre irosaꞌwari mono hawi rowaꞌuꞌu waꞌro te te iteihi ꞌré mono ꞌrã hã.
24 Tawamhã ta norĩ hã ma tô 7 na iꞌrãi wẽ norĩ ré hã duré siwi sõmri zaꞌra. Ã hã wa tô romhõsiꞌwa norĩ ma hã aré tãma wasuꞌu zaꞌra. Tane nherẽ, niꞌwa te te ĩma ãma saprĩ waihuꞌu õ di.
25 Tawamhã Zuzé, te apito ma tãma tinha ãne:
— Maparane isahoi mono zé te misi haré marĩ hã wasuꞌu zahuré. Ta norĩ na hã ma tô ꞌRe ihâimana uꞌâsi mono, marĩ hã aima waihuꞌu siro, za marĩ te te iꞌmanharĩzéb da hã.
26 Powawẽ iwẽ ihâipe, 7 na ihâiba hã te 7 na wahu hã wasuꞌu. Duré 7 na amnho te hawi iteihi mono bâ iꞌrã iwairébé, iꞌrã iwẽ uptabi isu wawẽ isurudu hã, aiwa te tô 7 na wahu hã wasuꞌu zahuré.
27 Tawamhã duré powawẽ iꞌwahire iwasétére, powawẽ ihâipe iwẽ zaꞌu, â hawi 7 na iwairébé hã, duré iꞌrãi ꞌré rop si ꞌre irosaꞌwari mono hawi rowaꞌuꞌu waꞌro te te iteihi ꞌré mono ꞌrã 7 na ihâiba hã, aiwa te duré wahu hã wasuꞌu zahuré, 7 na za daꞌãma iwahu, mra da te ꞌre isépata zaꞌra mono na hã.
28 Iꞌuwaibaba na wa tô ĩmreme na hã ãma aima rowasuꞌu. ꞌRe ihâimana uꞌâsi mono, ma tô marĩ za te te iꞌmanharĩzé hã aima hâiꞌré siro, apito.
29 Ezitu ꞌremhã te za 7 na daꞌãma tiwahu, daro mono bâ danho ahâ ré hã.
30 Taha pari, 7 na te za duré daꞌãma tiwahu, mra da te ꞌre sépata zaꞌra mono ré hã.
31 Mra da te ꞌre sépata zaꞌẽtẽ zaꞌra mono wa, Ezitu ãma mrab ahâ dama ꞌre ihâimana zaꞌra mono na ꞌre idapoꞌre puꞌu zaꞌra mono da hã mare di za.
32 Asimirosawẽrẽ na ãma isahu hã, ꞌRe ihâimana uꞌâsi mono, za marĩ te te iꞌmanharĩ suꞌu da, te te sima irowairébézé, te wasuꞌu.
33 Tawamhã Zuzé, ma te duré ãma uzusi, ãne timreme na tãma:
— Tahawa aré iwẽ, apito, aibâ iꞌrã nhimizaꞌrese wẽ isimirowaihuꞌu pe ipisutu da hã, tiꞌai waꞌõtõ nhoꞌu Ezitu ꞌre, te te ꞌre irobꞌmadâꞌâ mono da hã.
34 Tawamhã apito te za duré aibâ norĩ romhuri ꞌmadâꞌâꞌwa da, ipisutu zaꞌra, Ezitu ꞌre uburé dazaꞌrui mono bâ ꞌre inomro mono da hã, amnho tehâri ré misi saꞌu na imrotõ hawip sidâpâsi da te ꞌre poꞌo zaꞌra mono da, te te dama ꞌre iꞌru zaꞌra mono da hã, 7 na wahu morĩ ré danho ahâ ré, da te ꞌrãꞌõtõ mono da hã, ꞌri nhoꞌõmo mono bâ.
35 Tawamhã oto wahu iwẽ we hâimana zaꞌra mono ré hã, te za tô aibâ norĩ amnho trigu hã te te ubumro zaꞌra, ꞌri nhoꞌõmo mono bâ amnho ubumrozéb ꞌre, te te ꞌrãꞌõtõ mono da, asimiwadaꞌuri zarina.
36 Tawamhã amnho ubumro hã te za 7 na mrab zépata ré wahu morĩ ré hã dama tihâimana zaꞌra, tiꞌai waꞌõtõ nhoꞌu Ezitu ꞌre. Tahawa, mrap te, idasiꞌutõrĩ da hã mare di za.
Zuzé hã, apito zapari Ezitu ãma isiꞌiꞌrãnhoꞌõmozé wasuꞌu
37 Tawamhã Zuzéhé nhimirowaꞌõtõ ꞌmanharĩzé, ma tô apito hã wẽsã. Tãma iromhuriꞌwa norĩ zama ma tô duré siwi wẽsã.
38 Tahawa te apito, tite romhuriꞌwa norĩ ma nharĩ zaꞌra ãne:
— Niꞌwa hã wa te wasiwi sãmri õ di, aibâ Zuzéhé ne hã, ꞌRe ihâimana uꞌâsi mono Pẽꞌẽzani ré ꞌre ihâimana mono hã, wate tiꞌai waꞌõtõ nhoꞌõmo ꞌre, dama isiꞌrãnhoꞌõmo da hã.
39 Ãne te te tãma nharĩ zaꞌra pari, ma tô Zuzéhé u hã oto aipiꞌra. Tawamhã te ãne tãma tinha:
— ꞌRe ihâimana uꞌâsi mono, ma tô ãne na hã uburé aima hâiꞌré. Tahawa niꞌwa asipai u marĩ waihuꞌuꞌwa hã, duré isimizaꞌrese wẽ hã hâimana õ di.
40 Tahawa te za a hã ĩnhimiromhurizé ꞌri zaꞌẽtẽ ꞌremhã, dama iꞌrãnhoꞌõmo na hã ꞌre aihâimana mo. Tahawa, te za uburé ĩnhibꞌaꞌuwẽ norĩ asimiwadaꞌurizém na hã te te siwi ꞌre aimreme wapari pese. Tawamhã ĩwétési wa za asipai u dama ĩpire na hã ꞌre ĩhâimana, wa hã apito uptabi na ꞌre ĩhâimana mono wa.
41 Tahawa, ãhã na wa za oto aipisutu, Ezitu ãma uburé dazaꞌrui mono bâ dama asiꞌrãnhoꞌõmo da.
42 Tawamhã apito Faraꞌo, ma tô tinhiptõmohi wasisizé danhibꞌapito waihuꞌuzém na isihâtâ ré hã waze. Te te wazere wamhã, ma tô Zuzé hã ãma siptõmohi wasisi. Taha pari, ma tô duré daꞌuza ihâ suꞌu na hã uza. Ẽtẽ waipo pré oru ꞌmanharĩ na tinhoꞌrebzu hã ma tô duré tãma tisẽ.
43 Taha pari, Ezituhu nhibꞌapito uptabi zapari dama iꞌrãnhoꞌõmo te, awaru na wedewara zapore na ꞌre wara da hã, ma tô duré tãma saꞌré, apito na da te ãma waihuꞌu zaꞌra da. Tahawa, ma tô duré tite aibâ norĩ ma, isõwab zaꞌra ãne hãsi mono sina siꞌabaꞌré da hã, duré tãma robꞌru zaꞌra: “Tãma hã asiwasi aba mono!” Ãne ma tô Zuzé hã dama siꞌrãnhoꞌu, Ezitu ãma.
44 Tawamhã apito Faraꞌo, te Zuzéhé ma tinha ãne:
— Wa hã apito. Tane nherẽ, a hã dama ꞌre rowairébé mono õ nherẽ, niꞌwa Ezitu tiꞌai ꞌremhã marĩ te te iꞌmanharĩ da hã mare di za.
45 41:45-46 Tawamhã apito, ma tô Zuzé hã sisi, Zafenate-Panéia na. Duré piꞌõ Asenati na isisi, Potifera, sasedoti ꞌri nhoꞌu Heliopoli na isisi ãma ꞌre ihâimana mono ꞌra hã, ma tô duré tãma tisõ, imro da hã.
Tawamhã Zuzé, 30 na ãma iwahub ãma ma tô Ezitu ãma apito ma romhurizéb u hã ãzé. Tawamhã apito nhoꞌre hawimhã ma tô oto watobro. Watobro wamhã, Ezitu tiꞌai mono bâ hã te te oto rowaimrami.
46 ꞌMadâꞌâ 41:45
47 Tawamhã 7 na daꞌãma wahub ré hã, tiꞌa hã sõ pese di, amnho na hã.
48 Tawamhã Zuzé, ma tô uburé amnho hã te te aꞌubumro. Te te aꞌubumroi mono wamhã, ma tô ꞌri nhoꞌõmo mono bâ te te aꞌmaza, siwaptoma roptehutu na daburu na da te ꞌre itehâri zaꞌra mono hã.
49 Ãne ma tô Zuzé hã trigu saꞌẽtẽ uptabi na te te aꞌrãꞌõtõ, pazaihâ na supara ꞌré ꞌre isimiꞌwara mono ne. Saꞌẽtẽ uptabi wa, ma tô isaꞌrada hã oto sazâ, da te dasiwi saꞌrata waihuꞌu õ wa oto.
50 Tawamhã mrab zépata te, wahum norĩ te te ãma sãnaꞌrata wana ré, ma tô Zuzé, piꞌõ Asenatihi wamhã, tiꞌra hã maparane wabzu.
51 Tawamhã ipotoꞌrada hã ma tô sisi, Manasé* na. Ãne ma te tawamhã, isisi na hã ãma dama tinha: “ꞌRe ihâimana uꞌâsi mono hã ma tô ĩpawapto, te ꞌre irobzépata mono na hã ĩpoꞌre siꞌâri da, duré uburé ĩmama ꞌra norĩ na zama ĩpoꞌre siꞌâri da.”
52 Tawamhã duré isãnaꞌre ipodo hã ma tô sisi, Efraĩ* na. Tahawa te duré tinha ãne: “ꞌRe ihâimana uꞌâsi mono, ma tô ĩꞌra hã ĩma sõmri zahuré, tiꞌai waꞌõtõ nhoꞌõmo ꞌre, te ꞌre irobzépata mono zéb ꞌremhã”.
53 Tawamhã Ezitu ãma danho ahâ na ꞌre romhâimana mono ré, ma tô oto 7 wahu hã aiꞌutõ.
54 Tawamhã Zuzé te te iwaihuꞌuzéb zarina, ma tô 7 wahub da hã oto tinhanaꞌrata, mra da te ꞌre isépata zaꞌra mono da hã. Tiꞌai waꞌõtõ nhoꞌu ihâiba amo norĩ ãma hã ma tô mra hã da te ꞌre sépata zaꞌra. Tane nherẽ, Ezitu tiꞌai mono na dazaꞌru norĩ na hã te mra na dasima iwẽ na ꞌre dahâimana zaꞌra.
55 Tawamhã ezipsiu norĩ mrab zépata na te te sãnaꞌrata zaꞌra wamhã, ma tô apito u hã aiꞌabaꞌré, te te tiwi rowaptẽrẽ zaꞌra da, mram na. Tahawa, te ãne tãma nharĩ zaꞌra:
— Zuzéhé u si aiꞌabaꞌréi waꞌaba. Tawamhã taha si te te aima iwaihuꞌu zaꞌra waꞌaba zéb zarina si, te za niha hã asiwi iꞌmanharĩ ꞌwa za.
56 Tawamhã tiꞌai waꞌõtõ nhoꞌu Ezitu ꞌre uburé dazaꞌrui mono bâ mra da te oto ꞌre sépata zaꞌra mono wamhã, ma tô Zuzé, uburé amnho ubumrozé ꞌri hã dama ꞌridawa zaꞌra, amnho wede na ezipsiu norĩ ma, te te ãma sãnaꞌrata da hã.
57 Tawamhã uburé tiꞌai waꞌõtõ nhoꞌu ihâiba amo norĩ ãma ꞌre idahâimana zaꞌra mono, ma tô Ezitu u hã ꞌre danomro, Zuzéhé wi amnho, da te ꞌre uipra zaꞌra mono da, dasa zô hã ropâ dawi sô ꞌre robaba zaꞌra mono wa.
