Zenezi 42:1-38
42 Tawamhã Zaco, Ezitu ãma amnho ahâ wasuꞌu te te wapari wamhã, ma tô ãne tiꞌra norĩ ma nharĩ zaꞌra:
— E marĩ da, te taré nasi asiꞌmadâꞌâ zaꞌra waꞌwa.
2 Ezitu ãma amnho ahâ wasuꞌu hã wa tô wapa. Tahawa te za tamomo aiꞌabaꞌréi waꞌwa, dawi ꞌmaiꞌuipra zaꞌra waꞌaba da, mrap te, wasiꞌutõrĩ tõ da ãmemhã.
3 Tawamhã Zuzéhé dubꞌrata norĩ 10 na ihâiba zaꞌra hã te oto Ezitu u aiꞌabaꞌré, amnho te te dawi ꞌmaiꞌuipra zaꞌra da hã.
4 Tane nherẽ, Zaco Zuzéhé noi uptabi Bẽzamihĩ ma hã te te waprosi õ di, isiré zaꞌra morĩ da hã, marĩ sô watobro õꞌumnhasite, ãne na ãma hâtâꞌâ siromo wa.
5 Tawamhã Zacoho ꞌra norĩ ma tô niꞌwam norĩ aimawi siré amnho te te ꞌmaiꞌuipra zaꞌra da hã aiꞌabaꞌré, tô uburé tiꞌai waꞌõtõ nhoꞌu Canaꞌã na romnhisi ãma mra da te sépata zaꞌra wa, idasiꞌabaꞌré norĩ siré.
6 Tahawa, Zuzé dama iꞌrãnhoꞌõmo dâꞌâsina dazaꞌrui amoi hawi ꞌre idasihutu mono ma hã ma tô amnho te te dama ꞌre awede. Tawamhã idubꞌrata norĩ itẽme sihutu wamhã, ma tô isõꞌremhã hiꞌrãtitõ tãma asimro. Ma tô duré tiꞌubu na tiꞌai u hã tãma roptob zaꞌra.
7 Tawamhã Zuzé tisisãnawã norĩ te te ꞌmadâꞌâ zaꞌra wi, ma tô waihuꞌu zaꞌra. Tane nherẽ, te te iwaihuꞌu zaꞌra õ ne, te mreme tete na hã sadanharĩ zaꞌra ãne:
— E ma hawimhã bété, a norĩ waꞌwa hã.
— Canaꞌã hawimhã wa norĩ wa we aiꞌabaꞌré ni. Wa tô wasima wẽ zaꞌra ni, mra wa te ꞌmaiꞌuipra zaꞌra da. — Ãne ma tô asa ãma tãma waꞌrãmi zaꞌra, timreme na hã.
8 Zuzé hã ma tô tisisãnawã norĩ waihuꞌu zaꞌra. Tane nherẽ, tino hã asa te te siwi waihuꞌu õ di.
9 Tawamhã Zuzé te te ãma isaho zaꞌra mono na hã ma tô oto poꞌre puru. Tahawa, te ãne tãma nharĩ zaꞌra:
— Ĩma hã a norĩ waꞌwa, dama wapsãiꞌaꞌwa norĩ te we aiꞌabaꞌréi waꞌwa, tiꞌai waꞌõtõ nhoꞌõmo ꞌremhã nima niwĩ wanhitobꞌru norĩ ma, ro sibꞌuwa na ꞌre isaꞌwari mono zô asiwi sabui waꞌaba da hã.
10 Tawamhã asa ma te ãne ãma tãma waꞌrãmi zaꞌra:
— Mare di, wanhibꞌapito. Taha dai õ di. Wa norĩ hã aima romhuriꞌwa norĩ, mra wa te ꞌmaiꞌuipra zaꞌra da si wa tô we aiꞌabaꞌré ni.
11 Wa norĩ hã simisutu na wamama wama ꞌre ihâimana zaꞌra mono ꞌra. Duré apito, wa norĩ hã dama wapsãiꞌaꞌwa norĩ õ di. Sena na iꞌuwaibaba na si ꞌre iwahâimana zaꞌra mono.
12 — Te ãma asaze zaꞌra waꞌaba õ di. Tô tiꞌai waꞌõtõ nhoꞌõmo ꞌremhã nima niwĩ ro sibꞌuware na ꞌre isaꞌwari mono zô asiwi waihuꞌu aba da, te we aiꞌabaꞌréi waꞌwa. — Ãne ma te asa tãma ãma waꞌrãmi na sahu zaꞌra.
13 Tawamhã asa te duré ãne tãma siwasuꞌu zaꞌra:
— Wa norĩ hã Canaꞌã ãma wa ꞌre wahâimana zaꞌra. Duré wa norĩ hã aré wamama ꞌra 12 na wahâiba zaꞌra hã. Tane nherẽ, wano misi ma tô wawi aimani zaꞌra. Waꞌrãsutu si te wamama ꞌratamhã nhamra, ãhã na hã.
14 Tawamhã Zuzé ma te duré asa ãma tãma waꞌrãmi zaꞌra ãne:
— Mare di. Te tô we dama iwapsãiꞌa zaꞌra waꞌaba mo.
15 Aimreme zaꞌra waꞌwa sena zô, wa za pé ãne na hã aima ꞌmanharĩ zaꞌra waꞌwa. Anoi waꞌwa we ãwamhã wisi õ nherẽ, ã hawimhã niwamhã aiwairébé aba da hã mare di za. Ã hã apito zadawa para, wa sena na aima ropisutu zaꞌra waꞌwa.
16 Misi te za sô aiꞌmaimorĩ ꞌwa, anoi waꞌaba zô hã. Tawamhã a norĩ waꞌwa hã te za asisaꞌu hã dazazéb ꞌremhã aimasa waꞌwa, sena na duré niha wamhã, senai õ na iꞌasiwasuꞌu zaꞌra waꞌaba zém na te iꞌaiwaihuꞌu zaꞌra waꞌaba zéb u. Sena hãi õ wamhã, dama wapsãiꞌaꞌwa na wa za tô aiwaihuꞌu zaꞌra waꞌwa. Ã hã apito zadawa para, wa sena na aima ropisutu zaꞌra waꞌwa, ãne na.
17 Tawamhã siꞌubdatõ bâtâ na dazazéb ꞌre simasab da, ma tô dama ꞌru zaꞌra.
18 Ãhã wa, siꞌubdatõ bâtâ ãma te Zuzé tãma siwasuꞌu zaꞌra ãne:
— Wa hã ꞌRe ihâimana uꞌâsi mono hã wa tô te ꞌre wazé pese. Tahawa, te aima iwaihuꞌu zaꞌra waꞌaba zéb zarina, ĩma ꞌmanharĩ zaꞌra waꞌaba wapsi, da te aiꞌuprosi aba da hã te dama asaꞌré zaꞌra waꞌaba õ di za.
19 Sena na iꞌuwaibaba na si ꞌre aihâimana zaꞌra waꞌaba mono wamhã, te za misi asisaꞌu dazazéb ꞌre aiꞌmanhamra ꞌwa, nima norĩ apâ aiꞌabaꞌréi waꞌaba nherẽ, ꞌwasari aba da amnho hã, aiꞌra norĩ ma mra hã ãma tãma simroi waꞌaba da.
20 Taha parimhã te za aiꞌrãsutuꞌwa we ĩma asiwi isaprõni ꞌwa. Tawapsi sena na aimreme na te aiwaihuꞌu zaꞌra waꞌaba wamhã, iꞌaiꞌutõrĩ aba da hã mare di za.
Tawamhã te te tãma iwaihuꞌu zaꞌra zém na hã ma tô ãma saze zaꞌra.
21 Tahawa te ãne sima nharĩ zaꞌra:
— Sena na wa oto robzépata zaꞌra ni, wanoi ma, wa te tãma irobꞌmanharĩ zaꞌra zarina. Ta hã te te robzépata wa, wapoꞌre naꞌrata te te sina wawi rowaptẽrẽ zaꞌra nherẽ, wa te wasiwi wapari õ di. Tahawa awaꞌawi na wa oto robzépata zaꞌra ni.
22 Tawamhã Rubẽ ma te tino norĩ hã ãma sadaꞌâbâ zaꞌra ãne:
— Wa tô aré aima nharĩ zaꞌra waꞌwa, wanoi ma, marĩ iwasédé tãma ꞌmanharĩ zaꞌra waꞌaba tõ da hã. Tane nherẽ, asiwi ĩwapari aba õ di. Tahawa iwapru sisaꞌwarizé waꞌrãmimhã, wa oto ãhã na hã wasiwi waꞌâbâ ni.
23 Tawamhã Zuzé te te sina isadaihuꞌu zaꞌra zém na, õ norĩ hã te te siwi waihuꞌu õ di, õ norĩ mreme hã nasi da te ãma tãma saprĩ wa, te te sadaihuꞌu zaꞌra õ newa.
24 Tawamhã Zuzé ãne na imreme te te wapari zaꞌra wa, ma tô oto ihawib zaꞌra hã watobro. Tahawa, ma tô aiwaꞌõ. Siwaꞌõi pari, duré apâ itẽme wisi zaꞌra wamhã, ma tô tidubꞌrata norĩ nhoꞌa Simiã, da te dasiwi pawasisi da hã dama tiꞌru.
Zuzéhé dubꞌrata norĩ, Canaꞌã u apâ isiꞌabaꞌrézé wasuꞌu
25 Tawamhã idubꞌrata norĩ saꞌu we te te iꞌwasari ꞌre, amnho da te tãma ꞌmasisi zaꞌra mono da hã ma tô romhuriꞌwa norĩ ma hã tãma ꞌru zaꞌra. Duré apâ robꞌuiprazé ite zaꞌra saꞌui mono bâ, amnho zu da te tãma séme mono da hã ma tô dama ꞌru zaꞌra. Duré bâdâdi na ĩsazé, da te tãma sõmri zaꞌra da zama ma tô duré dama tiꞌru. Ãne ma tô tãma ꞌmanharĩ wẽ zaꞌra.
26 Tawamhã awaru poꞌre pore ba nhisiwi ma tô amnho te te iꞌwasari da hã oto saꞌra zaꞌra. Taha pari, te oto tawamhã aiꞌabaꞌré.
27 Tawamhã isimiꞌwarazéb da, isimizahâri zaꞌra zéb u oto sihutu wamhã, ma tô nima hã tite saꞌu hã wata wasihu, tinhimizama ma, te te tãma a da, ĩsa hã. Tahawa, saꞌui wata ãma robꞌuiprazé amnho zu inomro hã ma tô tisã.
28 Tawamhã tisisãnawã norĩ ma, ma tô tãma ꞌmahârâ zaꞌra ãne:
— Ĩte robꞌuiprazé apâ ma tô ĩma sẽrẽ ni. Ãhãta te nomro, ĩte saꞌui ꞌremhã.
Tawamhã uburé siꞌrãmi zaꞌra wa, ma tô duré tirẽrẽꞌẽ zaꞌra, pahi te. Tahawa te ãne sima nharĩ zaꞌra:
— E niha ma tô ꞌRe ihâimana uꞌâsi mono hã ãne na wama robꞌmanharĩ zaꞌra.
29 Tawamhã oto Canaꞌã u sihutu wamhã, ma tô timama ma, uburé tãma iromhâimana zaꞌra zé hã tãma wasuꞌu zaꞌra, ãne:
30 — Aibâ Ezituhu nhibꞌapito zapari dama iꞌrãnhoꞌu, mreme tete na ma tô wama nharĩ zaꞌra. Taré tiꞌai waꞌõtõ nhoꞌu wa te wasiwi sabu da, wa te dama irobzabu zaꞌra mono na hã.
31 Tahawa, wa ãne ãma tãma waꞌrãmi zaꞌra ni asa hã: “Wa norĩ hã wa aibâ sena na hã ꞌre wahâimana zaꞌra. Tahawa wa te dama iwapsãiꞌa zaꞌra mono da hã we wasiꞌabaꞌréi õ di ãwamhã.
32 Wa norĩ hã aré 12 na wahâiba zaꞌra, wasisãnawã si wamama ꞌra hã. Tane nherẽ, wano misi ma tô aimani. Isõsibi si te Canaꞌã ãma wamama ꞌratamhã ꞌre hâimana.”
33 Tawamhã dama iꞌrãnhoꞌu hã te ãne wama nharĩ zaꞌra: “Sena na iꞌuwaibaba na si ꞌre iꞌaihâimana zaꞌra waꞌaba mono na te aiwaihuꞌu zaꞌra waꞌaba da, te za misi asisaꞌu aiꞌmanhamra ꞌwa, ãme iꞌrata. Ãhã ré, te za niꞌwam norĩ hã dasa iꞌwasari ꞌwa, aiꞌra norĩ ma, mra hã ãma tãma simroi waꞌaba da.
34 Anoi waꞌwa te za duré we ĩma asiwi isaprõni ꞌwa ãwa. Ãne wamhã, sena na wa za aiwaihuꞌu zaꞌra waꞌwa, we dama iwapsãiꞌa zaꞌra waꞌaba mono õ na hã, duré sena na iꞌuwaibaba na si ꞌre iꞌaihâimana zaꞌra waꞌaba mono na hã. Tawapsi duré apâ asisãnawãi waꞌwa te aima hâiba nhomri zaꞌra waꞌaba wamhã, te za ãme tiꞌai ꞌre rowede na duré marĩ uipra na asima ꞌre iromhuri zaꞌra waꞌaba mo.”
35 Tawamhã tite mono bâ saꞌu amnho ré te te oto baba zaꞌra wamhã, ma tô robꞌuiprazéb ré saꞌu dub ꞌrare hã iwa isimiꞌwara mono hã sãmri zaꞌra. Ãhã wa, timama norĩ me robꞌuiprazé te te ꞌmadâꞌâ zaꞌra wamhã, ma tô tãma tipẽꞌẽwara pese zaꞌra.
36 Tahawa te imama Zaco hã ãne tãma nharĩ zaꞌra:
— Ĩꞌra na te za asiwi ĩꞌuba waꞌwa. Zuzéhé ãna hã wa tô ꞌre ĩhâimana. Ãhã na zama duré Simiã hã hâimana õ di. E niha te za duré ãne nherẽ, Bẽzami hã asiwi saprõni aba da, asima iwẽ zaꞌra waꞌwa. E ꞌwa te za ãne wamhã robzépata. Wa hã, wa za tô duré robzépata.
37 Tawamhã Rubẽ te timama ma tinha ãne:
— Ĩmama, we apâ Bẽzamihĩ na te siri õ wamhã, ĩꞌra te za ĩwi ipã. Za té wa hã ãma ĩsiꞌmadâ, te iꞌmadâꞌâ mono zém na hã.
38 Tawamhã imama Zaco ma te asa ãma sadaꞌâ ãne:
— Ĩꞌra, ãma aime zaꞌra waꞌaba hã morĩ õ di za. Zuzé idubꞌrada hã ma tô dârâ. Tahawa Bẽzamihĩ si te oto ĩꞌratamhã ꞌre sãmra. Duré aiꞌabaꞌréi aba ré, marĩ sô watobro wamhã, te za ĩsiꞌihi wa, ĩpẽꞌẽzé zarina tô oto ĩdâꞌâzé hã ĩzô iwazere zaꞌra waꞌwa.
