Zenezi 43:1-34
43 Tawamhã Canaꞌã ãma, te mra hã zahadu da te ꞌre sépata zaꞌẽtẽ zaꞌra.
2 Tawamhã Zacoho ꞌra norĩ, amnho Ezitu hawi te te iꞌãwisi mono oto uburé te te siwi uprosi wamhã, ma tô imama duré tãma nharĩ zaꞌra ãne:
— Aiꞌabaꞌréi waꞌaba apâ, mra suru na wazada ꞌmaiꞌuipra zaꞌra waꞌaba da duré.
3 Tawamhã Zuda poꞌre puꞌu wa, te timama ma tinha ãne:
— Aibâ hã ma tô wama nharĩ siromo zaꞌra, wano wame morĩ zaꞌra õ wamhã, za te te iwawaibui wẽ zaꞌra õ na hã.
4 Tahawa a hã wame satõrĩ zaꞌra wamhã, wa za tô aiꞌabaꞌré ni, mra wa te asada ꞌmaiꞌuipra zaꞌra da hã.
5 Wame zaꞌra morĩ da, satõrĩ õ wamhã, iwasiꞌabaꞌré da hã mare di za. Ãne te duré wama nharĩ zaꞌra, aibâ hã: “Anoi waꞌwa we asiwi saprõni aba wapsi wa za aiwaibui wẽ waꞌwa za.”
6 Tawamhã Zaco te duré tãma tinha ãne:
— E marĩ da, ma tô ropire saꞌẽtẽ na ĩma hâimana da hã asiwi iwazere ꞌwa. Duré e marĩ da, ma tô aibâ ma, ano ihâiba amo aima ihâimana zaꞌra waꞌaba na tãma iwasuꞌu zaꞌra waꞌwa bété.
7 Tawamhã asa ma te ãne duré ãma sadaꞌâbâ zaꞌra:
— Õ hã aibâ hã ma tô nasi wazadanharĩ na sahu zaꞌra, wahâiba na zaꞌra hã duré waꞌra norĩ na. Ãne ma tô duré wazadanharĩ zaꞌra: “E aimama ꞌwa te zahadu hâiba ré ꞌre hâimana. E te duré asisãnawãi waꞌwa aimawi hã ꞌre ꞌmaihâimana.” Tahawa, tô te te nasi wazadanharĩ zaꞌra wamhã, wa tô nasi tô õhõ wamreme na si ãma sadaꞌâbâ zaꞌra ni. E niha wa aré bété waihuꞌu zaꞌra ni, wano wa te itẽme wasiwi saprõni da, te te wawi ihâiba waptẽrẽ zaꞌra zém na hã.
8 Tawamhã Zuda te duré timama ma tinha ãne:
— Maꞌãpé aiꞌra siꞌritéiꞌwa satõrĩ, ãma ĩsiré morĩ da. Ãhã wamhã, awaꞌawi wa za oto aiꞌabaꞌré ni. Ãne wamhã, niꞌwa idâꞌâ da hã mare di za, niha hã wamhã wa norĩ hã, duré a hã, duré waꞌra norĩ hã.
9 Wa hã Bẽzamihĩ na wa za ãma ĩsiꞌmadâ. Duré rowẽ na we apâ te ãma siri õ wamhã, wa hã wa za tô iꞌupaiꞌwa na hã ĩhâiba. Ãhã wamhã, wa za duré te aima ãma iꞌupazém na õne uꞌâsi ꞌre ĩhâimana.
10 Wazô rowaptâꞌâ zaꞌra ãna wahâimana zaꞌra õ ꞌwaꞌâhã, wa aré maparane wasiꞌabaꞌrézém na nasi wasina siri zaꞌra ni, õwamhã duré we apâ hã.
11 Tawamhã te imama ãne tãma tinha:
— Niha hã aimawi hã te oto aima waihuꞌu õ di. Tahawa ãne te za pé asiwi iꞌmanharĩ ꞌwa za: Õ hã aibâ ma, taré tãma asõprub zaꞌra waꞌaba zéb da hã te za ate waꞌaba mono bâ saꞌui ꞌre asiwi iséme aba mo. Wanhiptiꞌai ꞌre, marĩ iwẽ ꞌre ihâimana zaꞌra mono hã te za tãma iꞌwasari ꞌwa, taré tãma sõmri zaꞌra waꞌaba da, suru na baꞌusamo na wedewaꞌu tom nhisi hã, suru na ropĩ hã, suru na dasaiwarĩrĩzé hã, duré suru na amiduwi sine hã.
12 Robꞌuiprazéb zama te za duré ãma isisiwi na tãma iꞌwasari ꞌwa za isiré. E marĩ wa. A norĩ waꞌwa saꞌui ꞌre amnho we iꞌwasari aba zu, isõpẽtẽ zaꞌra waꞌaba waꞌrãmimhã, apâ tãma isõmri zaꞌra waꞌaba da si, ta hã te te aiꞌuptob zaꞌra waꞌaba dâꞌâsina. Ãté ta hã ma te saꞌrese ãna aima séme zaꞌra waꞌaba ni.
13 Te za duré ano asiwi isaprõni ꞌwa pé. Saꞌẽtẽ te za aiꞌabaꞌréi waꞌwa, õ hã aibâ hã duré asiwi sõpẽtẽ aba hâ.
14 ꞌRe ihâimana uꞌâsi mono iwaihuꞌu pese si niha hã aibâ ma, te te iꞌmanharĩ da hã wa ĩsima wẽ, taha zarina aiꞌãma siwamri zaꞌra waꞌaba wa, te te aima waprosi zaꞌra waꞌaba da, asisãnawã norĩ na Bẽzamihĩ me we asiwi siri aba da ãwa. Bété duré ĩꞌra norĩ te simini zaꞌra wamhã, marĩ hã te ꞌmanharĩ dai õ di wa hã. Ĩꞌra ãna wa za tô oto ꞌre ĩhâimana.
15 Tawamhã Zacoho ꞌra norĩ ma tô tinhoprubzé hã duré robꞌuiprazé isisiwi na hã te te sima sé. Taha pari te oto tawamhã Ezitu u aiꞌabaꞌré, tino zaꞌra Bẽzamihĩ ré. Tawamhã sihutu wi, ma tô Zuzéhé ma te te tãma nharĩ zaꞌra da hã itẽme aiꞌabaꞌré.
16 Tawamhã Zuzé, Bẽzami isiré we imorĩ zaꞌra na te te ꞌmadâꞌâ wamhã, ma tô tinhorõwa ꞌmadâꞌâꞌwai ma tinha ãne:
— Ĩnhorõwa u, maꞌãpé ãhã aibâ norĩ hã simroi mono. Duré ĩnhimizama hã ꞌmaiwĩrĩ, dasa hã ãma ꞌmanharĩ da, abzuma za ĩsiré saihuri dâꞌâsina.
17 Tawamhã te te tãma iwaihuꞌuzé hã ma tô ꞌmanha. Tahawa isadawa zarina ma tô isisãnawã norĩ, Zuzéhé nhorõwa u te te simro.
18 Tawamhã isõrõwa u oto sihutu wamhã, ma tô tipahi pese zaꞌra. Tahawa te ãne sima nharĩ zaꞌra:
— Ãwamhã ma tô we te te wanhimro, iwana wamhã, robꞌuiprazé wate zaꞌra saꞌui ꞌre apâ te te wama iséme mono uꞌâbâmhã, amnho zu. Sena na te za tô oto dasiwi wasusi zaꞌra ni. Te za duré wate awaru poꞌre pore norĩ hã wawi waibu zaꞌra ni. Te za duré dasiwi wawaibu ni, wapawaꞌâbâ ãna wa te dama ꞌre romhuri zaꞌra mono da hã.
19 Tawamhã isõrõwa ꞌridawa u oto sihutu wamhã, ꞌri ꞌmadâꞌâꞌwai ma, te tãma nharĩ zaꞌra ãne:
20 — Maꞌãpé wazawi na hã wawapari zaꞌra na. Imorĩꞌrata na mra, wa te ꞌmaiꞌuipra zaꞌra da hã, wa tô we ãwamhã aiꞌabaꞌré ni.
21 Tane nherẽ, wawi hâiwahâ zaꞌra wa, iwanhimiꞌwarazéb u oto wasihutu wamhã, wa tô saꞌu amnho ré wa te iꞌwasari, wa te wata wasihu zaꞌra wamhã, wate zaꞌra robꞌuiprazé wahâiba mono bâ sãmri zaꞌra ni, wawi sô roꞌwanhiꞌriti zaꞌra ãna. Ta hã wa tô duré apâ we ꞌwasari ni.
22 Taha nhipai u hã wa tô duré we ãma wasihâiba waptob zaꞌra ni, robꞌuiprazém na, mra wa te duré ãma iꞌuipra zaꞌra da hã. Wa norĩ hã wa te waihuꞌu zaꞌra õ di, niꞌwa robꞌuiprazé apâ te te duré wama iséme zaꞌra na hã.
23 Tawamhã ꞌri ꞌmadâꞌâꞌwa asa ma te ãne ãma sadaꞌâbâ zaꞌra:
— Asima iwẽ na aihâimana zaꞌra waꞌaba, aipahi zaꞌra waꞌaba ãna. Ãté ꞌRe ihâimana uꞌâsi mono, ate zaꞌra waꞌwa hã, duré aimama te waꞌwa hã ma tô robꞌuiprazé apâ hã aima séme zaꞌra waꞌwa. E marĩ wa. Wa hã wa tô irowaꞌâbâ zaꞌra waꞌaba zé robꞌuiprazé hã tiꞌâ tô.
Tawamhã ꞌri ꞌmadâꞌâꞌwa ma tô Simiã itẽmeb zaꞌra hã oto saprõ.
24 Taha pari ꞌri para u ma tô te te simro. Tawamhã ma tô duré â hã tãma sõmri zaꞌra, ãma sipara upsõ zaꞌra da. Awaru poꞌre pore sazéb zama ma tô duré tãma sõmri zaꞌra, tisa te te ãma ihuri da hã isabâdâb zaꞌra.
25 Tawamhã isisãnawã norĩ, Zuzé abzuma za itẽme wisi zaꞌra wa, te te tãma sõmri zaꞌra da, te te iꞌwasari hã ma tô oto sima sani siromo zaꞌra, te te waihuꞌu zaꞌra wa, za õme ime isa zaꞌra na hã.
26 Tawamhã Zuzé ma tô wi, tinhorõwa u. Wisi wi, ma tô tinhibzari hã tãma sõmri zaꞌra, tizaꞌrui hawi te te siré tãma iꞌwasari hã. Te te tãma sõmri zaꞌra wamhã, ma tô hiꞌrãtitõ isõꞌremhã tãma asimro, tiꞌubu na te te tãma roptob zaꞌra sina, tiꞌai u.
27 Tawamhã tisisãnawã norĩ rowẽ zô te te sadanharĩ zaꞌra pari, te ãne duré sadanharĩ zaꞌra:
— E aimama ꞌwa hã rowẽ na te ꞌre sãmra, ã ĩma iwasuꞌu zaꞌra waꞌwa ihi hã. E zahadu te hâiba ré ꞌre hâimana.
28 — Ĩhe, aima romhuriꞌwa wamama zaꞌra hã te zahadu rowẽ na ꞌre hâimana.
29 Tawamhã Zuzé sibabarãi u te te robꞌmadâꞌâ mono wamhã, ma tô tino Bẽzami hã ꞌmadâ, tina ꞌra hã. Tahawa, te ãne tidubꞌrata norĩ hã ãma sadanharĩ zaꞌra:
— E õhõta asõbabati waꞌwa, ĩma iwasuꞌu zaꞌra waꞌwa hã. ꞌRitéiꞌwaire, ꞌRe ihâimana uꞌâsi mono si iwẽ hã te te aima ꞌre iꞌapisutu mono da si, wa tô ĩsima aiwẽ.
30 Tawamhã tino te te ꞌmadâꞌâ wa, pẽꞌẽ toi uptabi di, Zuzé hã. Tahawa wara sina ma tô watobro, tizaꞌwarizéb u sébré da, tamep si aꞌâ siwaꞌõ da. Tame te oto tô tawamhã aiwaꞌõ.
31 Tawamhã siwaꞌõi ãna oto hâimana da, sitété wamhã, ma tô oto siꞌubu upsõ. Taha pari ma tô duré oto watobro, tisisãnawã norĩ u. Tawamhã te oto dama tinha ãne:
— Maꞌãpé, ĩsa hã tãma saꞌã zaꞌra waꞌaba mono.
32 Tawamhã Zuzéhé ma, ma tô abzuma ĩsa hã tãma sãrĩ ni, danhiti wedeza tãma isabzéb ãma. Ma tô duré isisãnawã norĩ ma, ĩsa hã tãma sõré ni, wedeza aimawi tãma isab zaꞌra zéb ãma. Te duré wedeza aimawi hã za, ezipsiu norĩ tame dasiré isiꞌubumro norĩ, ãma isaihurizéb da hã, ta norĩ hã Izaraéu nhihudu norĩ siré ꞌre saihuri waihuꞌu mono õ wa, tãma zaꞌra hã iwẽ na ꞌre hâimana mono õ wa.
33 Tawamhã isisãnawã norĩ hã te Zuzéhé nhoꞌremhã asimro. Ãhã wa, Zuzé ma tô dadubꞌrata uimrehẽne tisã. Isãnaꞌremhã ma tô duré isõsi hã tisã. Ta hawimhã ꞌre irereꞌe mono sidâpâsi ma tô te te anhoré, tidubꞌrata norĩ hã õ tinoi u. Ãne na õ norĩ siꞌmadâꞌâ zaꞌra wamhã, ma tô siꞌmadâꞌâ pese zaꞌra, siꞌãma tobꞌuzu zaꞌra sina.
34 Tawamhã Zuzéhé ma, ĩsa da te ĩsãrĩ hawi ma tô duré idubꞌrata norĩ ma, da te tãma sõré. Tawamhã Bẽzamihĩ ma si ma tô iꞌamrami na hã 5 na tãma ãma sahu ni, saꞌẽtẽ na. Tawamhã sima iwẽ na ma tô to sina simihâri zaꞌra, Zuzéhé siré.
