Zenezi 44:1-34
44 Tawamhã Zuzé, tinhorõwa ꞌmadâꞌâꞌwai ma, ma tô tãma waihuꞌu ãne:
— Aibâ norĩ tite saꞌu we te te iꞌwasari hã te za mram na tãma iꞌmasisi zaꞌra, isiptete bâ zaꞌra, te te iꞌwasari da hã. Tahawa, te za duré ite mono bâ saꞌui wata ꞌremhã ite zaꞌra robꞌuiprazé apâ tãma iséme mo.
2 Taha pari te za ĩnhimihâsizé ẽtẽ waipo prã prata na iꞌmanharĩ hã danhobabati te saꞌui ꞌre tãma isẽ, robꞌuiprazém na trigu te te ãma iwaꞌâbâ zaꞌra zu.
Tawamhã ꞌri ꞌmadâꞌâꞌwa ma tô Zuzé uburé te te tãma iwaihuꞌuzéb zarina ꞌmanha.
3 Tawamhã tite zaꞌra awaru poꞌre pore ré ma tô Zuzéhé sisãnawã norĩ mararé uptabi wairé, siꞌabaꞌré da oto.
4 Tawamhã ꞌri nhoꞌõmo hawimhã ma tô oto wairé. Tane nherẽ, zahadu sina pahâ zaꞌra õ ré, te Zuzé tinhorõwa ꞌmadâꞌâꞌwai ma tinha ãne:
— Mo oto aibâ norĩ zarina saꞌẽtẽ aimorĩ zaꞌra na. Tawamhã ꞌrâwi sasimri zaꞌra wamhã, te za ãne tãma inharĩ zaꞌra za: “E marĩ da, ma aiwétési iwẽ waꞌrãmi iwasété na si asiwi iwaꞌâbâ ꞌwa.
5 E marĩ da, ma tô ĩnhibꞌihâꞌa nhimihâsizé ẽtẽ waipo prã prata na iꞌmanharĩ hã tiwi isimiꞌuri zaꞌra waꞌwa. Taha na te te ꞌre hâsi. Taha na te duré romnhowamhã marĩ iwatobrozé hã te te ꞌre awaihuꞌu siro. Marĩ iwasété uptabi ma tô iꞌmanharĩ zaꞌra waꞌwa.”
6 Tawamhã ꞌri ꞌmadâꞌâꞌwa ꞌrâwi te te sasimri zaꞌra wamhã, ma tô ãne Zuzé te te tãma iwaihuꞌuzéb zarina tãma nharĩ zaꞌra.
7 Tane nherẽ, ãne ma te asa ãma tãma waꞌrãmi zaꞌra:
— Wanhibꞌapito, e marĩ da, ma tô ãne na ãma wama inharĩ zaꞌra. Ãne hã wa norĩ hã wa te ꞌmanharĩ waihuꞌu zaꞌra õ di. Wama pire zaꞌra di.
8 Tiꞌai waꞌõtõ nhoꞌu Canaꞌã hawi, we apâ wasiꞌabaꞌré na sahu wamhã, wa tô robꞌuiprazé wate zaꞌra saꞌui mono bâ, wa te isõpẽtẽ zaꞌra hã we apâ ãma siri zaꞌra ni. E marĩ da, wa aré bété asibꞌapito te, ẽtẽ waipo prã prata ꞌmanharĩ hã niha wamhã, ẽtẽ waipo pré oru ꞌmanharĩ hã wasiwi simiꞌuri ni. Waihuꞌu õ di.
9 Niꞌwa te ꞌre, hâsizé sõpẽtẽ wamhã, te za wĩrĩ ni za. Tawamhã wa norĩ hã wapawaꞌâbâ ãna aima romhuri zaꞌra waꞌaba ꞌwa na wa za ꞌre wahâimana zaꞌra.
10 Tawamhã ꞌri ꞌmadâꞌâꞌwa asa ma te ãma tãma waꞌrãmi zaꞌra ãne:
— Tane tô. Wa ãma asaze zaꞌra waꞌwa. Tane nherẽ, niꞌwa te ꞌre, te isãmri si te za ĩma romhuriꞌwa na ꞌre hâimana. Tawamhã isiré norĩ a norĩ waꞌwa hã te za asima iwẽ na apâ aiꞌabaꞌréi waꞌwa za.
11 Tawamhã tite mono bâ ma tô siꞌabaꞌré na awaru poꞌre pore ba nhisi hawi saꞌu hã sizari zaꞌra, tiꞌai u. Ma tô duré tawamhã wata wasihu zaꞌra, tite mono bâ.
12 Tahawa Zuzéhé nhorõwa ꞌmadâꞌâꞌwa, te amnho ré hã saꞌu te te tiwi sô azabu, ipotoꞌrata te hawi, danhobabati te u. Tawamhã Bẽzamihĩ te, amnho ré saꞌui wata ꞌre ma tô hâsizé hã tisã.
13 Tahawa ma tô isisãnawã norĩ tiꞌuza ꞌrâwi siwi hâiwazu zaꞌra, tiwi robzeiꞌõ zaꞌra wa. Taha pari ma tô marĩ te te iꞌwasari hã awaru poꞌre pore ba nhisiwi apâ sima saꞌra zaꞌra, ꞌri nhoꞌõmo u tino siré te te apâ sina siri zaꞌra da.
14 Tawamhã Zuzé zahadu tinhorõwa ãma hâimana ré, ma tô Zuda tisisãnawã norĩ me apâ itẽme aihutu. Sihutu wi, ma tô isõꞌre hiꞌrãtitõ tãma asimro, tiꞌubu na tiꞌai u te te roptob zaꞌra sina.
15 Tawamhã te Zuzé ãne sadanharĩ zaꞌra:
— E marĩ da, ma tô ãne hã asiwi iꞌmanharĩ ꞌwa. E asiwi ĩwaihuꞌu aba õ di bété, wa hã romnhowamhã marĩ te ꞌre iꞌawaihuꞌu mono zém na hã.
16 Tawamhã Zuda ma te ãma sadaꞌâ:
— Apito, e niha wa za marĩ na aima wasiwasuꞌu zaꞌra ni. E niha na wa za duré marĩ na wasiwi asadaꞌâbâ ni. E niha wa za wawasété zaꞌra ne wahâimanazé hã wasima hiri wẽ zaꞌra ni. Waihuꞌu õ di. ꞌRe ihâimana uꞌâsi mono, ma tô wawasédé wa te ĩꞌmanharĩ zaꞌra zém na wawi aꞌupsibi me. Ãhãta wa ãme wa norĩ hã uburé wahâimana zaꞌra ni. Tahawa wa za aihĩni wa norĩ hã hâsizé ite saꞌui ꞌre inomro me, wapawaꞌâbâ ãna wa te aima ꞌre romhuri zaꞌra taré.
17 Tawamhã Zuzé, ma te duré ãma sadaꞌâ:
— Mare di. Niwamhã tane hã te iꞌmanharĩꞌõ. Ĩnhimihâsizéb ré ihâimana si te za siwaprosi ĩma romhuriꞌwa na hã ꞌre hâimana. A norĩ waꞌaba si te za aihĩni uburé aimama nhorõwa u rowẽ na apâ asina isiri zaꞌra waꞌwa.
Zuda, Bẽzamihĩ hâiba na te te irowaptẽrẽzé wasuꞌu
18 Tawamhã Zuda, Zuzéhé u ꞌrâwi pesere te te sina ropto wamhã, te ãne tãma tinha:
— Apito, maꞌãpé ĩzawi na hã aꞌâ bâdâ ĩma saꞌré na, ĩsima iwẽ na ĩnhiptete sina te aima nharĩ da. Ĩzada asahi tõ, a hã danhipai u apito uptabi ne aihâimana dâꞌâsina.
19 Iwana wamhã, ma tô a hã iwazadanharĩ zaꞌra ãne: “E aimama ꞌwa te zahadu aima ꞌre hâimana zaꞌra waꞌwa. E duré asisãnawãi waꞌwa aimawi iré hã.”
20 Tawamhã wa tô ãne ãma asadaꞌâbâ zaꞌra ni: “Ĩhe, zahadu wamama te wama ꞌre hâimana zaꞌra. Ma tô siꞌihi pese oto. Duré wano hã te ꞌre ꞌmaihâimana, wamama siꞌihi pese nherẽ, ipodo hã. Wano zaꞌra isõwamhã ma tô dârâ. Tahawa te ãhã na hã siwaprosi tina ma ꞌre hâimana. Te duré wamama hã te te ꞌre sawi pese uptabi.”
21 Tawamhã ma tô wama inharĩ zaꞌra, wano wa te we wasiwi saprõni da, hâiba pibu da, a hã.
22 Tahawa, wa tô duré ãne ãma aima waꞌrãmi zaꞌra ni: “Timama hã te te irẽme da hã waihuꞌu õ di. Te te rẽme da wamhã, te aré imama hã dârâ.”
23 Tawamhã a hã ma tô asa wama inharĩ zaꞌra, wei wasiré zaꞌra morĩ õ wamhã, wawaibui wẽ tõ da.
24 — Tawamhã wanhorõwa u apâ wasihutu wamhã, wa tô wamama ma, uburé tãma asadawa wasuꞌu zaꞌra ni, wama inharĩ zaꞌra zém na hã.
25 Tawamhã ma tô we apâ wazatõrĩ zaꞌra, mra wa te ꞌmaiꞌuipra zahu zaꞌra da.
26 Wa tô wamama ma ãma tãma waꞌrãmi zaꞌra ni ãne: “Wasiꞌabaꞌréi waihuꞌu õ di za. Wano wasiré zaꞌra morĩ õ wamhã, te te u iwawaibui da hã mare di. Tahawa wasiꞌabaꞌré da wamhã, wano hã za wasiré morĩ zaꞌra wapsi.”
27 Tahawa, te wamama hã ãne wama nharĩ zaꞌra: “Aima waihuꞌu pese zaꞌra waꞌaba di, ĩmro Raqueu zéꞌre hawimhã maparane ĩꞌra anoi waꞌaba norĩ ĩma ihâimana zahuré na hã.
28 Misi ma tô siparamhã ĩrẽ. Niwamhã ĩtõmo na te oto ꞌmadâꞌâ na sitéb õ di. Ãté tô abaze zahi ma tô siwi tenhiwazu.
29 Tahawa ãhã na awaꞌawi ãhã zama ĩhawi asiwi saprõni aba wa, duré marĩ iwasédé sô watobro wamhã, te za ĩsiꞌihi wa, ĩpẽꞌẽzé zarina tô oto ĩdâꞌâzé hã ĩzô iwazere zaꞌra waꞌwa.”
30 44:30-31 Ma duré Zuda timreme na ãne ãma tãma uzusi:
— Tahawa apito, ãhã na awaꞌawi na wanoi ãna ĩhâiba si apâ te ĩsina isiri na ĩmama te te ĩꞌmadâꞌâ wi, duré ĩno hâiba zô simrami baba wamhã, te za tô awaꞌawi dârâ, õhõ ãma si oto ꞌre hâimana mono wa. Ãhã wa, wa norĩ, wamama ipẽꞌẽzé na wa te wasiwi pẽꞌẽꞌutõrĩ wamhã, wa za wa te ãma tãma iꞌupa zaꞌra ꞌwa na ꞌre wahâimana zaꞌra.
31 ꞌMadâꞌâ 44:30
32 Zahadu duré ãne: Ĩmama ma hã wa tô ĩsina ropisutu, ĩnoi ãma ĩsiꞌmadâꞌâ da hã. Tahawa wa ãne tãma tinha: “Ĩnoi ãma rowẽ na apâ te we ãma siri õ wamhã, wa za tô iꞌupaiꞌwa na ĩhâiba.”
33 Tahawa apito, maꞌãpé ĩma saꞌré na, ĩno aiꞌreputu nhowaꞌreꞌre aima romhuriꞌwa na ꞌre ĩhâimana mono da. Duré te za tãma iwapro, tidubꞌrata norĩ siré apâ morĩ da hã.
34 E niha wa za ĩnhorõwa u, ĩno aiꞌreputu ĩsiré morĩ õ nherẽ apâ mo. Ĩmorĩ waihuꞌu õ di. Ĩmama ma, ropire za sô iwatobro da hã te ĩsima wẽ õ di, te iꞌmadâꞌâ da hã.
