Zenezi 45:1-28
45 Tawamhã Zuzé, tite romhuriꞌwa norĩ nhoꞌa pẽꞌẽzé uptabi nherẽ, oto sitété waihuꞌu õ di. Tahawa, ma tô mreme ꞌrãihâ sina satõrĩ zaꞌra ãne:
— Mo oto ã hawimhã uburé aiwairébé aba.
Tahawa, niꞌwam norĩ ite romhuriꞌwa hã iꞌrata ꞌmaihâimana õ di, tisisãnawã norĩ ma, Zuzé siwasuꞌu ré hã.
2 Tawamhã wawa ꞌrãihâ na ma tô aiwaꞌõ. Duré ezipsiu norĩ hã ma tô wawai wapari zaꞌra. Tawamhã apito nhimiromhurizé ꞌri u hã ma tô rowasuꞌu wẽ hã wi.
3 Tawamhã Zuzé, te ãne tisisãnawã norĩ ma oto tãma siwasuꞌu zaꞌra:
— Wa hã Zuzé. E ĩmama te zahadu hâiba ré ꞌre hâimana.
Tawamhã ãne na isisãnawã norĩ, imreme te te wapari zaꞌra wamhã, ma tô tãma aꞌrãmi zaꞌra. Tahawa niha na timreme na te te ãma tãma waꞌrãmi waihuꞌu zaꞌra õ di.
4 Tahawa Zuzé te tãma nharĩ zaꞌra ãne:
— We ꞌrâwi ĩtẽme asina rotété zaꞌra waꞌaba.
Ãne wa, oto ꞌrâwi iꞌrata simasa wamhã, te oto ãne tãma siwasuꞌu zaꞌra:
— Wa hã Zuzé, anoi waꞌwa. Ezitu u, we da te dasiwi ĩzaprõni da, asiwi ĩwede ꞌwa, dama.
5 Ãne nherẽ, aiwi robzeiꞌõ zaꞌra waꞌaba tõ. Duré asimiꞌmanharĩ zaꞌra waꞌaba zém na hã asiꞌruiwapari zaꞌra waꞌaba tõ, dama asiwi ĩwede aba na, we ãwa da te dasiwi ĩzaprõni da hã. ꞌRe ihâimana uꞌâsi mono, ma tô we asõwab zaꞌra waꞌaba ĩzaprõ, te daꞌanhoꞌreptu da.
6 Maparane ma tô oto daꞌãma tiwahu, ropâ mra da te ꞌre isépata zaꞌra mono na hã. Zahadu 5 na te za duré daꞌãma tiwahu, tiꞌa da te ꞌre iwaꞌi zaꞌra mono ãna, duré da te ꞌre iroptehâri zaꞌra mono ãna hã.
7 ꞌRe ihâimana uꞌâsi mono, ã hã tiꞌai waꞌõtõ nhoꞌõmo ꞌre, te asõꞌreptu zaꞌra waꞌaba da, duré asihudu norĩ aihawib zaꞌra waꞌaba sidâpâsi ꞌre sitébré zaꞌra mono da hã, ma tô we asõwab zaꞌra waꞌaba ĩzaprõ.
8 Tahawa a norĩ waꞌwa we ãwamhã asiwi ĩzatõrĩ aba õ di. ꞌRe ihâimana uꞌâsi mono si ma tô we ĩzatõ. Ta hã apito Faraꞌoho zapari, dama ĩpire na ꞌre ĩhâimana mono da hã, ma tô ĩwapu na ꞌre ĩhâimana mono zém hawimhã oto ĩzarõtõ hâimo. Tahawa wa tô duré oto tiꞌâ, apito nhimiromhurizé ꞌri ꞌrãihâ ꞌre romhuri hã. Ezitu ꞌremhã danhipai u dama ĩꞌrãnhoꞌõmo na hã wa tô oto ꞌre ĩhâimana.
9 — Tahawa waptu na saꞌẽtẽ aiꞌabaꞌréi waꞌaba, ĩmama ma, ãne na tãma ĩzadawa wasuꞌu zaꞌra waꞌaba da: “Ãne te aiꞌra Zuzé hã we aima tinha: ꞌRe ihâimana uꞌâsi mono, ma tô Ezitu ꞌre dama ĩꞌrãnhoꞌõmo na ꞌre ĩhâimana mono da hã, ĩpisutu. Tahawa te za we ãwamhã aimo, asô rowaptâꞌâ ãna.
10 Tawamhã Gosẽ na romnhisi ãma te za ĩꞌrata ꞌrâwi ꞌre aihâimana mono za — aiꞌra norĩ me, asihudu norĩ me, asimizama poneꞌẽrebâ norĩ ré, poneꞌẽrebâ zéré uzé norĩ ré, ate powawẽ norĩ ré, uburé marĩ aima ꞌre ihâimana zaꞌra mono norĩ ré.
11 Zahadu 5 na te za duré daꞌãma tiwahu, mrab ãna dahâimana zaꞌra ré hã. Tawamhã Gosẽ ãma wa za mra hã aima, aiꞌra norĩ ma hã, duré asimizama norĩ ma hã te ꞌre sõmri zaꞌra za. Ãne wamhã, marĩ zô aiwi irowaptâꞌâ zaꞌra waꞌaba da hã mare di za.”
12 Tawamhã Zuzé, ma timreme na ãne ãma tãma uzusi zaꞌra:
— Uburé a norĩ waꞌaba ma, duré ĩnhosi Bẽzamihĩ ma, aima waihuꞌu pese zaꞌra waꞌaba di oto, atõmo na asiwi ĩhâiba pibu zaꞌra waꞌaba zéb zarina, wa hã tô Zuzé te aima inharĩ zaꞌra waꞌaba na hã.
13 Maꞌãpé ĩmama ma hã tãma ĩwasuꞌu zaꞌra waꞌaba, Ezitu ꞌre dama ĩpire na ꞌre ĩhâimana mono zém na hã. Duré maꞌãpé uburé marĩ atõmo na iꞌmadâꞌâ zaꞌra waꞌwa hã tãma wasuꞌu zaꞌra waꞌaba. Tahawa, maꞌãpé waptu na aiꞌabaꞌréi waꞌaba, ĩmama hã we ãwa asiwi saprõni aba hâ.
14 Tawamhã Zuzé, tinhosi Bẽzami tinhoꞌutu ma tô tiꞌâ. Te te âri wamhã, ma tô ãma aiwaꞌõ. Duré Bẽzami hã tidubꞌrada asa tinhoꞌutu te te âri sina, ma tô ãma aiwaꞌõ.
15 Tawamhã Zuzé zahadu siwaꞌõi ré, te nasi tinhoꞌutumhã tisisãnawã norĩ hã awaibu wawa sina. Te duré nasi hâiba mono bâ tobꞌrata hârâ na azawi. Taha pari ma tô oto idubꞌrata norĩ hã tino norĩ me sima robzanhamri zaꞌra.
16 Tawamhã apito nhimiromhurizé ꞌri ꞌrãihâ u, Zuzéhé sisãnawã norĩ isihutuzé wasuꞌu wisi wamhã, ma tô apito Faraꞌoho norĩ, ite dama rotiꞌwa norĩ me ãma sima romhuꞌu zaꞌra.
17 Tahawa te apito, Zuzéhé ma tinha ãne:
— Maꞌãpé asisãnawã norĩ ma waihuꞌu zaꞌra na, tinhimarĩ hã tinhimizama ba nhisiwimhã te te sima wasisi mono da, Canaꞌã u apâ iré siꞌabaꞌré da.
18 Tawamhã te za aimama hã duré isiré ihawi aꞌuwẽ ꞌre ihâimana zaꞌra mono norĩ hã we te te ĩtẽme siwi simro. Tawamhã wa za tiꞌai waꞌõtõ nhoꞌu Ezitu ãma tiꞌa danhipai u iwẽ uptabi hã tãma sõmri zaꞌra. Tahawa, dasa iwẽ uptabi na hã te za ãma ꞌre saihuri.
19 Asisãnawã norĩ ma, te za duré irobꞌru, Ezitu hawi awaru poꞌre pore na wedewara zapore te te simroi mono da, tirob u. Tawamhã timro hã, tiꞌra norĩ hã, duré timama zaꞌra hã te za we taha na apâ ãma siwi te te simro.
20 Tinhimarĩ te te irẽme zaꞌra na hã hâtâꞌâ zaꞌra õ di za, Ezitu tiꞌai ꞌremhã za marĩ iwẽ uptabi hã tãma ꞌre hâimana zaꞌra mono dâꞌâsina.
21 Tawamhã ãne Zacoho ꞌra norĩ hã ma tô siwi ꞌmanha. Zuzé, apito te te tãma iꞌruzéb zarina, ma tô roꞌwapézém norĩ wedewara zapore hã, duré bâdâdi na ĩsazéb da zama hã tãma sõmri zaꞌra.
22 Tawamhã daꞌuza ihâ téb zama ma tô ihâiba mono bâ misi bâtâ na ãma isiꞌuza zaꞌra da hã, duré isu tãma sõmri zaꞌra. Tane nherẽ, Bẽzamihĩ ma si, ma tô 300 na ẽtẽ waipo prã prata na iwaꞌõtõ waré hã tãma sõmri zaꞌra. Duré 5 bâtâ na ãma isiꞌuza mono zéb da hã, ma tô tãma sõmri zaꞌra, tô 5 na.
23 Tawamhã duré Zuzé, timama ma da, ma tô awaru poꞌre pore norĩ hã, Ezitu ꞌre marĩ iwẽ uptabi ꞌre ihâimana zaꞌra mono ré, 10 na iré te te simroi mono da hã tãma robꞌru zaꞌra. Ma tô duré 10 na tô awaru poꞌre pore norĩ, amnho trigu, duré iꞌuꞌẽtẽ wapu, duré marĩ aimawi bâdâdi na da, imama te te we sisa iduri da hã, tãma robꞌru zaꞌra.
24 Tawamhã Zuzé tisisãnawã norĩ te te oto satõrĩ zaꞌra wa, siꞌabaꞌré da hã, ma tô ãne duré tãma roti zaꞌra:
— Asisada asahi zaꞌra waꞌaba ãna bâdâdi na hã aiꞌabaꞌréi aba za.
25 Ãne Ezitu hawi ma tô oto wairé. Tawamhã Canaꞌã u oto sihutu wamhã, ma tô timama Zacoho nhorõwa u aihutu.
26 Tawamhã te ãne tãma rowasuꞌu zaꞌra:
— Zuzé hã te zahadu hâiba ré ꞌre hâimana! Ta hã Ezitu ãma te dama iꞌrãnhoꞌõmo na te te ꞌre daꞌaꞌmadâꞌâ.
Tawamhã ãne na te te tãma wasuꞌu zaꞌra wamhã, ma tô aré Zaco hã simizaꞌreseꞌõ haiꞌutõ. Iwasuꞌu na te te duré ãma saze waihuꞌu zaꞌra õ di.
27 Tane nherẽ, Zuzé uburé tisisãnawã norĩ ma, te te tãma iwaihuꞌu zaꞌra zé te te tãma wasuꞌu zaꞌra wamhã, duré roꞌwapézé wedewara zapore norĩ, apâ Ezitu u te te ãma isimroi mono da, Zuzé te te sô isatõrĩ zaꞌra zé, te te ꞌmadâꞌâ zaꞌra wamhã, ma tô Zaco hã apâ ãma pẽꞌẽhaptete.
28 Tawamhã te Zaco hã sima tinha ãne:
— Tane tô. Zahadu te tô ĩꞌra Zuzé hã ꞌre hâimana. Tahawa, ĩma hã wẽ di, zahadu ĩdâꞌâ õ ré, te iꞌmadâꞌâ da hã.
