Zenezi 46:1-34
46 Tawamhã Zaco, uburé tinhimarĩ ré ma tô oto watobro. Watobro wamhã, ma tô Beseba u hã wi. Tame ma tô imama Izaquihi te, ꞌRe ihâimana uꞌâsi mono ma, danhimizama zata na tinhopru, ãma iwatazéb da hã.
2 Tawamhã ꞌRe ihâimana uꞌâsi mono, taha mara na ma tô sõtõ ꞌrowim ne tãma tinha. Ãne te tawamhã isisi na hã ꞌmahâ:
— Zaco, Zaco!
— E marĩ. Ãhãta wa ãme ĩhâiba. — Ãne ma asa sadaꞌâ.
3 Tawamhã ꞌRe ihâimana uꞌâsi mono, te ãne tãma tinha:
— Wa hã ꞌRe ihâimana uꞌâsi mono, aimama te, ꞌRe ihâimana uꞌâsi mono na ꞌre ĩhâimana mono. Tahawa aipahi ãna maꞌãpé aimorĩ, Ezitu u hã. Tame wa za asihudu norĩ, ahâ uptabi na sitébré da hã tãma pisutu zaꞌra, aꞌuwẽ misi ãma isitom na dama siptete na ꞌre hâimana zaꞌra mono da.
4 Wa hã wa za Ezitu u hã asiré mo. Apâ wa za duré asihudu norĩ hã we te simro, ã hã tiꞌai u hã. Tawamhã nimahã na oto asiꞌré wamhã, te za aiꞌra Zuzé hã asababa tihâiba za.
5 Tawamhã Zaco, ma tô Beseba hawimhã oto mo. Wedewara zapore Ezitu te, apito te te sô isatõrĩ na, ma tô iꞌra norĩ Zaco hã siwi saprõ. Duré timro norĩ hã, duré tiꞌra norĩ isurure hã ma tô te te ãma siwi simro.
6 Tawamhã Zaco norĩ, uburé Ezitu u zâmorĩ wamhã, ma tô tite powawẽ norĩ siré te te siwi simro. Duré Canaꞌã ãma uburé marĩ te te sima ꞌre isani zaꞌra mono hã ma tô siré ꞌwasa.
7 Uburé tihawi aꞌuwẽ norĩ hã ma tô Zaco siré te te simro ã norĩ hã tiꞌra siꞌaibâ norĩ, tiꞌra sipiꞌõ norĩ, tinhihudu siꞌaibâ norĩ, duré tinhihudu sipiꞌõ norĩ.
8 Ã norĩ hã Izaraéu nhihudu Ezitu u ma tô aiꞌabaꞌré, Zaco, tinhihudu norĩ me, ãne isisi zaꞌra norĩ me: Rubẽ, Zacoho ꞌra potoꞌrada,
9 Rubẽ tiꞌra norĩ ãne isisi zaꞌra norĩ me: Enoqui, Palu, Hezirõ, duré Carmi,
10 Simiã tiꞌra norĩ ãne isisi zaꞌra norĩ me: Zemuꞌé, Zami, Oade, Zaquĩ, Zoa, duré Sau, Canaꞌã sipiꞌõ zéꞌre hawi ipodo hã,
11 Levi, tiꞌra norĩ ãne isisi zaꞌra norĩ me: Gésõ, Coate, duré Merari.
12 Zuda, tiꞌra norĩ ãne isisi zaꞌra norĩ me: Sela, Periz, duré Zera. (Duré maparane iꞌra hâiba amo norĩ hã, Er, duré Ona, Canaꞌã ãma tiwi isiꞌré zahuré hã.) Duré Perizihi ꞌra norĩ hã, Hezirõ, duré Hamul.
13 Isaca, tiꞌra norĩ ãne isisi zaꞌra norĩ me: Tola, Pua, Zasube, duré Sĩrõ.
14 Zébulõ, tiꞌra norĩ ãne isisi zaꞌra norĩ me: Serede, Elõ, duré Zaleꞌeu.
15 Ã norĩ hã Léiaha zéꞌre hawi Mezopotãmia ãma Zacoho ma, iꞌra ipoto zaꞌra. Iꞌra sipiꞌõ te duré piꞌõi misi na Dina na isisi hã tãma tihâimana zahuré. Tawamhã Zacoho nhihudu norĩ, Léiaha me hã, timama norĩ me sina sito wamhã, uburé hã 33 na.
16 Gadi, tiꞌra norĩ ãne isisi zaꞌra norĩ me: Zifiꞌã, Hagui, Suni, Esbõ, Eri, Arodi, duré Areli.
17 Asé, tiꞌra norĩ ãne isisi zaꞌra norĩ me: Imna, Isva, Isvi, Beria, duré ihidiba zaꞌra ãne isisi hã, Sera na. Duré Beriaha ꞌra norĩ ãne isisi zaꞌra hã: Hébé, duré Malquiel.
18 Tawamhã duré ã norĩ hã 16 na Zacoho nhihudu, Ziupaha me, Labã, tiꞌra Léiaha ma, te te tãma isõmri, tãma iromhuriꞌwa da.
19 Raqueu, Zacoho mro zéꞌre hawi iꞌra maparane tãma ipoto zahuré nhisi hã ãne: Zuzé, duré Bẽzami.
20 Zuzéhé ꞌra norĩ, Asenatihi zéꞌre hawi Ezitu ãma ipoto zahuré hã, Manasé, duré Efraĩ. Ta hã Asenati, sasedoti Potifera, ꞌri nhoꞌu Heliopoli na isisi ãma ꞌre ihâimana mono ꞌra.
21 Bẽzamihĩ ꞌra norĩ ãne isisi zaꞌra hã: Bela, Beque, Asbeu, Gera, Naꞌama, Ei, Rosi, Mupĩ, Hupĩ, duré Arde.
22 Ã norĩ hã 14 na ihâiba zaꞌra, Zacoho nhihudu norĩ, Raqueu me.
23 Dã, iꞌra Husĩ na isisi me.
24 Nafitali, iꞌra norĩ ãne isisi zaꞌra norĩ me: Zazeꞌeu, Guni, Zeze, duré Silẽ.
25 Ã norĩ hã 7 na Zacoho nhihudu norĩ, Biraha me, Labã, tiꞌra Raqueu ma tãma iromhuriꞌwa da, te te tãma isõmri me.
26 Tawamhã Ezitu u Zacoho nhihudu isiré isiꞌabaꞌré norĩ hã 66 na ihâiba zaꞌra hã, piꞌõ norĩ hâiba zaꞌrata ana hã.
27 Tawamhã Zuzéhé ꞌra norĩ Ezitu ãma maparane ma tô tipoto zahuré. Ãhã wa Zacoho hawi aꞌuwẽ norĩ hã, Ezitu u isiꞌabaꞌré norĩ hã 70 na ihâiba zaꞌrata zaꞌra na.
Zaco norĩ, Ezitu u isihutuzé wasuꞌu
28 Tawamhã Zaco, ma tô Zudaha ma robꞌru, Zuzéhé tẽme isõwa morĩ da, niha na Gosẽ na romnhisi u tiwisizé hã te te waihuꞌu da.
29 Tawamhã Zuzéhé ma, awaru na wedewara zapore, da te tãma awasisi parimhã, ma tô oto Gosẽ u hã wara, timama te te sõpẽtẽ da. Ãhã wa, timama titõmo na te te oto ꞌmadâꞌâ wamhã, ma tô saꞌẽtẽ itẽme wara, te te sawi da. Tahawa, tinhoꞌutu te te âri sina, ma tô ãma aiwaꞌõi hâ.
30 Tawamhã Zaco, te ãne tiꞌra ma tinha:
— Wa za oto dârâ ĩsima iwẽ na, ĩtõmo na te aiꞌubu ꞌmadâꞌâ wa oto, duré zahadu aihâiba ré ꞌre iꞌaihâimana mono na zama te waihuꞌu wa.
31 Taha pari te Zuzé, tisisãnawã norĩ ma, duré timama hawi aꞌuwẽ norĩ ma tãma nharĩ zaꞌra ãne:
— Ezitu te, apito ma, te rowasuꞌu da wa za mo, ĩsisãnawã norĩ, duré ĩmama hawi uburé aꞌuwẽ norĩ Canaꞌã ãma aré ꞌre isiꞌubumroi mono hã ĩsiré ꞌre hâimana zaꞌra mono da, we oto isiꞌabaꞌré na te tãma wasuꞌu zaꞌra da hã.
32 Ãhã wa, wa za duré danhimizama tébréꞌwa na hã tãma aiwasuꞌu zaꞌra waꞌwa, poneꞌẽrebâ norĩ duré powawẽ norĩ we asiré isimroi waꞌaba mono na, duré uburé marĩ aima ꞌre ihâimana zaꞌra waꞌaba mono we asiré iꞌwasari aba na zama.
33 Tawamhã duré apito Faraꞌo, asô hârâ zaꞌra waꞌaba wa, niha na asimiromhuri zaꞌra waꞌaba zô, te te asadanharĩ zaꞌra waꞌaba wamhã,
34 ãne te za asa ãma tãma iwaꞌrãmi zaꞌra waꞌwa: “Zahadure ré, wa tô wanhimizama hã wa te ꞌre tébré zaꞌra, wahiꞌrata norĩ te te ꞌre iroptébré zaꞌra mono ne.” Ãne zarina te za tawamhã Gosẽ ãma ꞌre aihâimana zaꞌra waꞌaba mono da hã aima rowairébé zaꞌra waꞌwa, ezipsiu norĩ, poneꞌẽrebâ tébréꞌwa norĩ te te siwi ꞌre ꞌruiwapari zaꞌra mono wa.
