Zenezi 47:1-31
47 Tawamhã Zuzé, apito ma, te te rowasuꞌu ãwisi da, ma tô itẽme mo. Ãhã wa, te ãne tãma rowasuꞌu:
— Ĩmama, ĩsisãnawã norĩ me Canaꞌã tiꞌai hawi we izâmorĩ hã, te oto Gosẽ ãma uburé tinhimizama poneꞌẽrebâ norĩ ré, powawẽ norĩ ré, duré uburé marĩ tãma ꞌre ihâimana zaꞌra mono norĩ ré tihâimana zaꞌra.
2 Taha pari te tisisãnawã norĩ 5 na ihâiba zaꞌra na, apito u te te simro, te te tãma hâiba waihuꞌu zaꞌra da.
3 Tawamhã apito te ãne sadanharĩ zaꞌra:
— E marĩ na asimiromhuri zaꞌra waꞌaba zé hã.
Tawamhã ma te ãma sadaꞌâbâ zaꞌra ãne:
— Apito, poneꞌẽrebâ tébré na si, wa wa norĩ hã wa te ꞌre robꞌmaꞌwamarĩ, wahiꞌrata norĩ te te sima ꞌre itébré zaꞌra mono ne.
4 Canaꞌã tiꞌai waꞌõtõ nhoꞌõmo ꞌremhã wanhimizama sazéb da, du hã hâimana õ wa, duré mrab zépada saꞌẽtẽ wa, wa tô we wawairébé ni, ã hã dazaꞌrui ꞌre, ꞌre wahâimana zaꞌra mono da oto. Tahawa maꞌãpé wazawi zaꞌra na hã Gosẽ ãma ꞌre wahâimana zaꞌra mono da wama saꞌré zaꞌra na.
5 Tawamhã apito, te Zuzéhé ma tinha ãne:
— Aimama, asisãnawã norĩ me hã asiré ꞌre hâimana zaꞌra mono da, we atẽme siꞌabaꞌréi wa,
6 te za tô Ezitu tiꞌai waꞌõtõ nhoꞌõmo ꞌremhã niha hã asima irowairébé zaꞌra waꞌwa, asima iwẽ zaꞌra waꞌaba zéb uwaibaba. Gosẽ ãma danhipai u tiꞌa iwẽ uptabi hã te za tãma isõmri zaꞌra, iwa ꞌre hâimana zaꞌra mono da. Te za duré nima norĩ roptébré nhipese ꞌwa, aima iwaihuꞌu pese norĩ hã asimirosaꞌrata na bâ ipisutu zaꞌra, ĩnhimizama ꞌmadâꞌâꞌwa norĩ da hã.
7 Taha parip si te Zuzé, timama Zaco hã saprõ, apito u, te te tãma hâiba waihuꞌu da. Tahawa, Zaco, apito tãma wazéb sina te te sawi parimhã,
8 ma tô ãne sadanha:
— E niha aiꞌãma iwahu hã.
9 Tahawa, Zaco ma tô sadaꞌâ ãne:
— 130 na ma tô oto ĩꞌãma tiwahu, hâiwi si nimomomhã ꞌre ĩmorĩ ré hã. ꞌRe ĩhâimana mono zé hã ꞌruture di, duré pire di. Tahawa, ĩhiꞌrata norĩ ãma wahub ahâ na ꞌre iwahub zaꞌra mono ne, ĩꞌãma iwahub ahâ da hã waihuꞌu õ di.
10 Tawamhã Zaco, apito sisaꞌu iwẽ na te te sawi pari, ma tô oto mo.
11 Tawamhã Zuzé, timama ma, duré tisisãnawã norĩ ma, ma tô Ezitu ãma tiꞌa iwẽ ꞌre isaꞌwari mono hã tãma sõmri zaꞌra, ꞌri nhoꞌu Ramesé na isisi ꞌratamhã apito te te tãma iwaihuꞌuzéb zarina. Tahawa tiꞌa norĩ na ãma site zaꞌra wa, te oto iwamhã ꞌre hâimana zaꞌra.
12 Tawamhã Zuzé, timama, tisisãnawã norĩ hã, duré tisisãnawã siwadi norĩ hã ma tô mram na te te ꞌre upari zaꞌra, iꞌra norĩ hâiba zaꞌratazéb zarina.
Zuzé, mra da te sépata zaꞌra ré, dama isiꞌrãnhoꞌõmozé wasuꞌu
13 Mrab zô hã uburé dazaꞌrui mono bâ tiwi sô irobaba na hã tiwi ꞌmaibaꞌa õ di. Tahawa ma tô mrab zépada hã te te dawi sina hâimo uꞌâsi. Mra, da te ꞌre isépata zaꞌra mono zarina, ma tô Ezitu ãma duré Canaꞌã ãma ꞌre danhibꞌuwa zaꞌra.
14 Tawamhã amnho da te ꞌre iꞌuipra zaꞌra mono zém na robꞌuiprazé, Zuzé te te ꞌre iꞌaꞌubumroi mono hã ma tô apito nhimiromhurizé ꞌri ꞌrãihâ u hã te te ꞌre aꞌmaza.
15 Tawamhã duré Ezitu ãma duré Canaꞌã ãma robꞌuiprazé dawi siꞌutõrĩ mono wamhã, ma tô uburé ezipsiu norĩ, Zuzéhé u hã ꞌre nomro. Ãne te tahawa te te tãma ꞌre nharĩ zaꞌra:
— Maꞌãpé wazawi na hã mra wama a zaꞌra na. Wasiꞌutõrĩ da hã taré waꞌmadâꞌâ zaꞌra tõ, wate robꞌuiprazé hã wawi siꞌutõrĩ zaꞌra wa.
16 Tawamhã Zuzé, ma te ãma sadaꞌâbâ zaꞌra:
— Robꞌuiprazé baba wamhã, maꞌãpé ate zaꞌra waꞌwa powawẽ norĩ hã we simroi waꞌaba mono, mram na te ãma aiwi saprĩ zaꞌra waꞌaba da taré.
17 Tahawa ezipsiu norĩ, Zuzéhé ma, ma tô awaru hã, poneꞌẽrebâ zéré mapure hã, poneꞌẽrebâ zéré uzé hã, powawẽ hã, duré awaru poꞌre pore hã te te tãma simro, tô taha wahum na ãma ihâimana zaꞌra zéb da, mram na hã te te ãma tiwi saprĩ zaꞌra da.
18 Tawamhã wahu oto siꞌutõrĩ wamhã, ma tô wahub amo na apâ Zuzéhé u siꞌabaꞌréi wamhã, ãne tãma nharĩ zaꞌra:
— Wanhibꞌapito, niha na romhâimanazé wa te aiwi udâ waihuꞌu zaꞌra õ di, ãne na hã. Wate robꞌuiprazé hã ma tô wawi aiꞌutõrĩ zaꞌra. Duré tahawa uburé wanhimizama hã oto ate na te ꞌre simasa. Taha zarina marĩ hã wa te aima isõmri zaꞌra da hã waihuꞌu õ di. Wahâiba zaꞌra si te wanhiptiꞌai me hã oto wama tihâimana zaꞌra, wa te aima isõmri zaꞌra da hã.
19 Mrap te, wasiꞌutõrĩ da hã taré waꞌmadâꞌâ zaꞌra tõ. Duré atõmobre, wanhiptiꞌa zaꞌra baba na ꞌre saꞌwari mono da hã, taré ꞌmadâꞌâ tõ. Maꞌãpé waꞌuipra zaꞌra na. Duré wanhiptiꞌa zaꞌra hã uipra na, trigu waꞌrãmi. Tawamhã wa za wa norĩ hã apito Faraꞌoho ma, wapawaꞌâbâ ãna wa te tãma ꞌre romhuri zaꞌra. Duré romnhamare zama wama ꞌmanhomri zaꞌra na, wa te zuri mono wa, wahâimanazém na wa te tô ãma uzusi zaꞌra da, mrap te, wasiꞌutõrĩ tõ da, wanhiptiꞌa zaꞌra iwa robꞌre õ pese na ꞌre saꞌwari tõ mono da taré.
20 Tawamhã Zuzé, uburé Ezitu ãma danhiptiꞌa ma tô apito ma hã uipra, uburé ezipsiu norĩ ma, tiꞌai upana marĩ hã hâimana õ wa, te te iwede zaꞌra da hã, tô mrab zô hã robaba zaꞌẽtẽ wa. Tahawa ma tô oto apito ma, uburé danhiptiꞌa hã tãma tihâimana zaꞌra.
21 Tawamhã tiꞌai waꞌõtõ nhoꞌu Ezitu ꞌre dazaꞌrui mono bâ ma tô Zuzé, ezipsiu norĩ pawaꞌâbâ ãna romhuriꞌwa da hã tãma pisutu zaꞌra.
22 Tane nherẽ, sasedoti norĩ nhiptiꞌa si te te tiwi uipra zaꞌra õ di, apito nhimiꞌuparizé mra hã te te nasi sima waibui wa, ihâimana zaꞌra zéb da hã. Taha zarina ta norĩ hã tinhiptiꞌa te te dame iwede zaꞌra da hã mare di.
23 Tawamhã Zuzé, te ãne dama tinha:
— Maꞌãpé asiwi ĩwapari aba! Ãhã na wa tô tiꞌa aiwi uipra zaꞌra waꞌwa apito Faraꞌoho ma. Ãhãta te ãme romnhamare hã tihâimana zaꞌra, rom na ate buru aba mono na asiwi izuri aba mono da hã.
24 Tawamhã duré ꞌre itehâri zaꞌra waꞌaba mono, misi saꞌu na imrotõ hawip sidâpâsi te za apito Faraꞌoho ma ꞌre isani zaꞌra waꞌaba mo. Duré ihâiba amo maparane siꞌuiwa na ãma sidâpâsi te za ꞌre izuri aba mono da hã duré ãma ꞌre asaihuri aba mono da hã ꞌre isani zaꞌra waꞌaba mo, aiꞌra norĩ sazéb da, duré ꞌri ꞌre, asiré ꞌre ihâimana zaꞌra waꞌaba mono norĩ sazéb da zama.
25 Tawamhã ma te ãma sadaꞌâbâ zaꞌra ãne asa:
— Apito, ma iwanhoꞌreptu zaꞌra. Ma tô duré iwẽ na hã wama iꞌmanharĩ zaꞌra. Tahawa wa za tô wapawaꞌâbâ ãna apito ma romhuriꞌwa na hã ꞌre wahâimana zaꞌra.
26 Ãne ma tô Zuzé, tinhimiroti ta hawim haré ꞌre ihâimana mono da hã ꞌmanha. Ãne na isimiroti hã: Ezitu ãma amnho, da te ꞌre itehâri zaꞌra mono zép sidâpâsi te za misi saꞌu na imrotõ hawip sidâpâsi apito ma, ꞌre hâimana zaꞌra. Sasedoti norĩ nhiptiꞌa si apito ma, ꞌre hâimana zaꞌra mono õ di za.
Zaco, tiꞌra Zuzéhé wi siꞌuirĩ na da, te te irowaptẽrẽzé wasuꞌu
27 Tawamhã Izaraéu nhihudu norĩ hã te Ezitu, Gosẽ na romnhisi ãma ꞌre hâimana zaꞌra, tiꞌa te te siwi iꞌuipra ꞌre. Tawamhã tame ãma isite zaꞌra ꞌre, ma tô tisitébré ahâ zaꞌra.
28 Tawamhã duré Ezitu ãma ꞌre isãmra mono zém na hã ma tô ãma tiwahu 17 na. Ãhã wa, ãma isitom na ma tô ãma tiwahu, 147 na.
29 Oto niha na tidâꞌâzéb da na siwaihuꞌu wamhã, ma tô Zaco, tiꞌra Zuzéhé zô hã hâ. Ãhã wa, te ãne tãma tinha:
— Ĩzawi wamhã, maꞌãpé ĩzadazute ꞌrowi asibꞌrada hã sẽrẽ sina, sena na ĩma ropisutu, asimizawizé ĩꞌãma ihâimana zarina duré ĩma iꞌaiꞌumnhasizéb zarina. Ezitu ꞌremhã ĩꞌãma tiꞌai õ di za.
30 Niwa ĩdâꞌâ wamhã, Ezitu hawimhã te za ĩhâiba hâ hã iwaze, ĩhiꞌrata norĩ da te ꞌre iséme mono zéb ꞌru zababa, sẽrẽ da, ihâiba hâ zaꞌra zu, tame ꞌre saꞌwari mono da.
Tawamhã Zuzé, ma te ãma sadaꞌâ ãne:
— Tane hã wa za ꞌmanha tô, ĩwi iwaptẽrẽzé hã.
31 Te duré Zaco tãma tinha ãne:
— Maꞌãpé ĩma ropisutu, tane na hã.
Tawamhã Zuzé, ma tô ropisudu hã tãma ꞌmanha. Tahawa Zaco, tizaꞌwarizé ꞌrãihâ ãma siwẽꞌẽ sina, ma tô ꞌRe ihâimana uꞌâsi mono ãma wata sina hã mre.
