Zenezi 48:1-22
48 Tawamhã we ronomro pari, te Zuzéhé ma imama hã tãma wasuꞌu ni, ihâzé pire na. Tahawa, te Zuzé te te sabu da itẽme mo, tiꞌra Manasé norĩ ré, Efraĩhĩ me.
2 Ãhã wa, Zacoho ma, ma tô tãma ꞌmairowasuꞌu ni ãne:
— Aiꞌra Zuzé te te asabu da te wei mo.
Ãne wa, Zaco nimaire nherẽ, sahâ na sãmra da, ma tô siptete sina udu.
3 Tawamhã oto itẽme wisi wamhã, ma tô ãne Zuzéhé ma tinha:
— ꞌRe ihâimana uꞌâsi mono danhipai u iwaihuꞌu pe, ꞌri nhoꞌu Rowaꞌa* na isisi ãma ma tô ĩma sihâiꞌré, Canaꞌã tiꞌai ãma ꞌre ĩhâimana mono ré. Tahawa, ma tô ĩwẽ hã ĩma pisutu.
4 Ãhã wa, ma tô ãne ĩma tinha: “Aiꞌra ahâ na aima ꞌre hâimana zaꞌra mono da hã wa za aima pisutu. Duré asihudu norĩ hã te za sipuꞌu pese na aꞌuwẽ ahâ uptabi na ꞌre sitébré zaꞌra. Tawamhã asihudu norĩ ma, wa za ã hã tiꞌa hã duré tãma sõmri zaꞌra, isiptiꞌa na õne uꞌâ tãma ꞌre hâimana zaꞌra mono da oto.”
5 Tawamhã Zaco ma duré timreme na Zuzéhé ma, ãma uzusi ãne:
— Aiꞌra Efraĩ norĩ hã, Manaséhé me we ãwa ĩmorĩ wana ré, Ezitu ꞌre ãme ipoto zahuré hã, te za ĩte na ĩma ꞌre hâimana zahuré. Ĩte uptabi na hã te za ĩma ꞌre hâimana zahuré, Rubẽ norĩ, Simiãhã me, ĩte na ĩma ꞌre ihâimana zahuré mono ne.
6 Ta norĩ zaꞌu aiꞌra norĩ ꞌmaipoto zaꞌra wamhã, ta norĩ hã za oto ate si. Tawamhã duré ta norĩ, Efraĩ norĩ no na Manaséhé me hâimana zaꞌra wa, te za tô iꞌuirĩ na zahuré hã za isimarĩ zahuré hã dame tãma tihâimana zaꞌra.
7 Asépariꞌwa Raqueu hâiba uꞌâbâmhã wa ãne hã ꞌmanha. Mezopotãmia hawi apâ wa te wasina siri zaꞌra ré, ĩwi irobzeiꞌõ pese da hã, ma tô tiꞌai waꞌõtõ nhoꞌu Canaꞌã ãma ĩwi aiꞌutõ, Efrata tẽme oto iwasihutuzéb u. Tawamhã tame wa tô bâdâdi zadaꞌré, ãma tiꞌa, Efrata, Belẽ na isisi amo tẽme bâdâdi zadaꞌré ãma.
8 Tawamhã Zaco, Zuzéhé ꞌra te te ꞌmadâꞌâ zahuré wamhã, ma tô ãma anharĩ zahuré ãne:
— E ꞌwam norĩ hã ã hã.
9 — Ĩꞌra norĩ, ã hã. ꞌRe ihâimana uꞌâsi mono, Ezitu ãma ꞌre ĩhâimana mono ré, te te ĩma isõmri zahuré. — Ãne ma te asa Zuzé hã ãma sadaꞌâ, timama hã.
Tawamhã imama Zaco te tãma tinha, ãne:
— Maꞌãpé we ꞌrâwi ĩꞌrata simizusi, ꞌRe ihâimana uꞌâsi mono ma, ãma ĩmreme zahuré da.
10 Tawamhã Zaco, isiꞌihi pese zarina simirobꞌmadâꞌâ nhibꞌuware di oto. Tahawa te te ꞌmadâꞌâ wẽ zahuré õ di. Tawamhã Zuzé, tiꞌra norĩ, ma tô ꞌrâwi oto itẽme saprõni zahuré. Tahawa imama ma tô tinhihudu norĩ hã te te sitẽme ãma roptob zahuré sina tobꞌrata hârâ na sawi zahuré.
11 Tahawa, Zaco te ãne Zuzéhé ma tinha:
— Wa hã wa tô aré te ꞌre rosaꞌrata, niwa za te iꞌaiꞌmadâꞌâ zahu õ na hã. Tane nherẽ, ꞌRe ihâimana uꞌâsi mono, ãhã na awaꞌawi na ma tô ĩma aihâiba nho, te aiꞌmadâꞌâ zahu da hã. Duré aiꞌra norĩ te ꞌmadâꞌâ zahuré da zama ma tô ĩma hâiba nhomri zahuré.
12 Tawamhã Zuzé, timama waiꞌré hawi ma tô tiꞌra sani zahuré. Te te sani zahuré wamhã, ma tô hiꞌrãtitõ hã nhamra. Duré tiꞌubu na ma tô tiꞌai u hã ropto.
13 Tawamhã Zuzé ma tô Efraĩ tinhimire niwĩmhã paꞌâ. Duré Manasé ma tô tinhimiꞌe niwĩmhã paꞌâ. Tahawa, ma tô duré timama Zacoho ꞌrata ꞌrâwi oto simizusi. Ãhã wa, Efraĩ ma tô Zacoho nhimiꞌe niwĩmhã za. Duré Manasé, ma tô isimire niwĩmhã za.
14 Tawamhã Zaco, tipaihi te te oto sarõtõ wamhã, tinhibꞌrata na duré siwaꞌrãmi wamhã, ma tô tinhibꞌrata nhimire niwĩmhã dano nherẽ, Efraĩhĩ ꞌrã nhisi wimhã tihi. Ma tô duré idubꞌrada Manaséhé ꞌrã nhisi wimhã tinhibꞌrata nhimiꞌe niwĩmhã ãma tihi.
15 Taha pari ma tô tiꞌra Zuzéhé ãma, ꞌRe ihâimana uꞌâsi mono ma hã mre, ãne:“ꞌRe ihâimana uꞌâsi mono, ĩmama norĩ Abraꞌã, Izaquihi me te te aima ꞌre iromhuri zahuré mono hã maꞌãpé ã hã ipréduptém norĩ ma, iwẽ hã tãma ꞌre apisutu zahuré mono.Duré ꞌRe ihâimana uꞌâsi mono, ibâ na ꞌre ĩmorĩ ré ã bâtâ u hã ĩnhimizama ꞌmadâꞌâ na ꞌre ĩhâimana mono ré, we ĩzaprõni wẽ ꞌwa, maꞌãpé iwẽ hã tô tãma ꞌre apisutu zahuré mono.
16 Hâiwa ãma romhuriꞌwa uburé marĩ iwasété wi te te ꞌre ĩpawapto mono ꞌwa hã, ã hã ꞌwatébrémi norĩ iwẽ na te te ꞌre ipawapto zahuré mono da si, ĩma iwẽ hã.Ĩnhisi na duré ĩmama norĩ Abraꞌãhã nhisi na Izaquihi nhisi me ã norĩ hâiba uꞌâbâmhã ãma ꞌre idasipoꞌre puꞌu uꞌâsi zaꞌra mono da si, ĩma iwẽ hã.Duré iꞌra norĩ isihudu norĩ zama daro mono bâ isitébré zaꞌẽtẽ zaꞌra mono da hã wa aiwi waptẽ.”
17 Tawamhã Zuzé, timama nhibꞌrada, Efraĩhĩ ꞌrã nhisiwi te te ihiri na te te ꞌmadâꞌâ wamhã, ma tô wẽꞌõ. Tahawa Efraĩ ꞌrãi hawimhã, ma tô sibꞌrata â, Manaséhé ꞌrã nhisiwi te te sibꞌrata hiri da aré.
18 Taha ré, te ãne ãma tãma tinha, timama ma:
— Ĩmama, mare di. Ta hãi õ di. Ãhãta idubꞌrada. Maꞌãpé asibꞌrata nhimire niwĩmhã, asibꞌrada iꞌrã nhisi wimhã ãma hiri.
19 Tane nherẽ, Zaco te te sima wẽꞌõ di. Tahawa te ãne tãma tinha:
— Ĩꞌra, ĩma waihuꞌu pese di tô. Manaséhé nhihudu norĩ zama te za dama pire na ꞌre hâimana zaꞌra. Tane nherẽ, ino hã te za pire na isipai u tãma ꞌre hâimana. Duré isihudu norĩ hã te za aꞌuwẽ mono bâ sipuꞌu pese na ꞌre sitébré ahâ zaꞌra.
20 Tawamhã Zaco, tô taha bâtâ na te tinhihudu norĩ ãma mre ãne:
— Izaraéu nhihudu norĩ te za asisi waꞌaba na tisiré norĩ ma, marĩ iwẽ te te tãma ꞌre pisutu zaꞌra mono da hã te te ꞌre nharĩ zaꞌra za ãne: “ꞌRe ihâimana uꞌâsi mono, Efraĩhĩ norĩ ma, Manaséhé me, iwẽ te te tãma ꞌre iꞌapisutu zahuré mono ne hã te za aima ꞌmanha.”
Tawamhã Zaco, ma tô Efraĩ ino nherẽ, idubꞌrada Manaséhé ãma saprĩ, imorĩꞌrada pire na ꞌre hâimana mono da hã.
21 Taha pari te Zuzéhé ma oto tinha ãne:
— Wa za oto dârâ. Tane nherẽ, te za ꞌRe ihâimana uꞌâsi mono, asiré zaꞌra waꞌaba ꞌre hâimana, apâ aihiꞌrata zaꞌra waꞌaba nhiptiꞌai u te te asimroi waꞌaba mono da hã.
22 Wa hã, Siquẽ hã wa aima tisõ, mare di asisãnawã norĩ ma hã. Siquẽ hã amoreu norĩ wi te iꞌâri hã, ĩnhiꞌwa na, duré ĩnhimnhiꞌãsi na te sô iꞌaꞌwapé zarina.
Ĩwaꞌõtõ piꞌreba watsuꞌu mono
^ 48:3 Luz na ꞌri nhoꞌõmo nhisi amo hã Bétéu.
