Zenezi 49:1-33
49 Tawamhã Zaco ma tô tiꞌra norĩ zô sima sô tihârâ zaꞌra. Tahawa, ma tô ãne tãma nharĩ zaꞌra:
— Maꞌãpé asiwi ĩꞌuirĩ waꞌaba, aptoꞌoré aihâiba mono bâ waꞌaba za marĩ aima ihâimana zaꞌra waꞌaba zém na te aima nharĩ zaꞌra waꞌaba da.
2 “Zacoho ꞌra norĩ, maꞌãpé asiwi ĩꞌuirĩ waꞌaba, asiwi ĩwapari aba da.Izaraéu aimama aba mreme te za asiwi ĩwapari ꞌwa.
3 “Ĩꞌra Rubẽ, a hã imorĩꞌrata na dama aipoto ꞌrada.A hã, aiꞌuté poto ꞌmanharĩzém na ĩnhiptetezé hã ma tô asina ĩma ꞌre isani mo, asô ꞌre ĩzapaꞌa mono wamhã.Duré imorĩꞌrata na ĩhâiba hawi ĩnhiptetezéb zarina ĩma ꞌre iꞌaihâimana mono,ꞌrâwi asiꞌmadâꞌâ ze zaꞌẽtẽ na ꞌre iꞌaihâimana mono, duré ĩꞌra asisãnawã norĩ nhipai u asiptete na ꞌre iꞌaihâimana mono.
4 A hã asitété waihuꞌu õ, â wara nhiptede ꞌre ipraba mono ne.Tahawa, dama aipire na oto ꞌre aihâimana mono õ di za, ĩmro prãi ré asõtõ wa, taha uꞌâbâ aimama nhimiwaptâ hã wazéb õ wa.
5 “Simiã, Levi tisisãnawãi me, te tinhimnhiꞌãsi na te te ãma dama ꞌre robꞌmanharĩ uꞌâsi zahuré.
6 Isimiroti zahuré ꞌremhã wa hã ĩhâimana õ di za.Duré te te idaꞌrãꞌõtõ zahuré zéb ãma hã ime zahuré ĩhâimana õ di za, sitiꞌru zahuré ré, aibâ norĩ hã te te uprosi zahuré wa,duré sima to zahuré na powawẽ ibaꞌõmo norĩ hã te te amorĩꞌõ zahuré wa.
7 Isitiꞌru zahuré zé ma, ꞌRe ihâimana uꞌâsi mono, iwẽꞌõ te te ipisutu da si, wa ĩsima wẽ, ta hã dapãrĩzé wa.Wa hã wa za Izaraéu nhiptiꞌa na ãma ĩsipoꞌo, isihudu zahuré hã te ãma ropéi mono da, te te sina dahâiba tob zaꞌra wa, isisãnawã nhihudu norĩ siré siwaꞌru ꞌre hâimana zaꞌra mono da.
8 “Zuda, asisãnawã norĩ te za aiꞌãma ꞌre wata zaꞌra.Asõꞌre te za aima ꞌre siwẽꞌẽ zaꞌra.Te za duré asitobꞌru norĩ, ibutu na ꞌre iꞌatété mo.
9 Ĩꞌra Zuda, huꞌu zéré pa ihâiba tém ne hã te ꞌre hâimana. Ta hã ꞌre sisõpãrĩ zaꞌra mono pari te za siwati sina nomro. Ãhã ré hã e niꞌwa sada sibꞌru da bâ, te te irési da hã.
10 Zuda, apito siwazusizé hã te za te te ꞌre tété.Duré isihudu norĩ hã te za õne uꞌâ dama iꞌrãnhoꞌõmo na dama ꞌre hâimana zaꞌra.Te za danhoprubzé hã da te tãma ꞌre ꞌwasari, daro mono bâ.Tawamhã te za duré isimiroti hã da te ꞌre wapari pese zaꞌra.
11 Ta hã te za tite awaru poꞌre pore ꞌrare na iwata wazi na te te ãma ꞌre wasisi, uva ꞌru iwẽ uptabi ꞌre isa mono na hã.Te za uva ꞌrãi waꞌu isé na tiꞌuza te te ꞌre ahâiꞌupsõ.Duré te za uva ꞌrãi waꞌu isé na tisiꞌubuzé hã te te ꞌre upsõ, dawapru ne na robꞌrãi waꞌu na hã.
12 Tawamhã te za duré uva ꞌrãi waꞌu isé te te ꞌre ihâsi uꞌâsi mono zarina, ꞌre topré pusi, Zuda hã.Te za duré powawẽ hâiwaꞌu te te ꞌre hâsi uꞌâsi mono zarina ꞌre ꞌwaꞌãꞌa.
13 “Zébulõ, â poré zaihâ ãma te za ꞌre sãmra, ubaꞌre ꞌre isimizahâri zaꞌra mono zém niwĩ.Tawamhã duré isiptiꞌa zadaꞌré, Sidõ na ꞌri waꞌõtõ nhisi u te za tiꞌrãsutu.
14 “Isaca, awaru poꞌre pore isiptede, tinhimiroꞌwapé waꞌwa ꞌre isaꞌwari mono ne, te ꞌre hâimana.
15 Tawamhã tiꞌai waꞌõtõ nhoꞌu dawaꞌutuzéb da, iwẽ na te te ꞌmadâꞌâ wamhã, te za ahâpâ, marĩ tiba na te te iduri da hã te te sima hiri da.Tahawa, te za duré siwapsari ãna te te ꞌre romhuri, pawaꞌâbâ ãna te te dama ꞌre iromhuri zaꞌra mono ne.
16 “Dã te za tinhihudu norĩ hã ꞌrâwi te te sima ꞌre aꞌmadâꞌâ,ihâiba amo Izaraéu nhihudu norĩ ne.
17 Ta hã wahi, bâdâdi zadaꞌré ꞌre isaꞌwari mono ne, te za ꞌre hâimana,awaru ꞌmaprabaꞌwa, ibabarãi u waptãꞌã da, awaru iparaꞌõtõ wi te te isari ne hã.
18 “Uburé Danhibꞌapito, ĩte ꞌRe ihâimana uꞌâsi mono, ĩnhoꞌreptubzéb zô si wa ꞌre ĩnhimipari uꞌâsi.
19 “Gadi hã te za isimisaihuri norĩ siwi susi za.Tane nherẽ, te za apâ te te duré awanoꞌõ.
20 “Aséhé nhiptiꞌai ꞌremhã, amnho te za tãma ꞌre ꞌrãiwẽ uptabi zaꞌra.Tahawa ã hã amnho hã apito norĩ ma, iwẽ uptabi si hã.
21 “Nafitali, pozé sima iwẽ na rom na ꞌre isisamroi mono ne, te ꞌre hâimana, duré iꞌra iwẽ uptabi tãma ꞌre ipoto zaꞌra mono ne hã.
22 “Zuzé hã te rowede, â naꞌrata ꞌrata ꞌrãi pese na ꞌre isa mono ne ꞌre hâimana, ipanhipti ꞌri ꞌwawi waꞌra ꞌrãihâ na hâimo te te ꞌre irowaibui mono ne.
23 Isitobꞌru norĩ hã te za siwi susi, sada siwaꞌro zaꞌra sina. Tahawa, te za siwi sama, tinhimnhiꞌãsi na, duré tite zaꞌra tiꞌi na.
24 Tane nherẽ, tinhimnhiꞌã te te rési ãna, te za itété tete na hã ãma uzusi.Duré ipaihi siꞌuiwa na paihi nhiptete zahuré di za, Zacoho te ꞌRe ihâimana uꞌâsi mono iwaihuꞌu pese nhiptetezém hawim na wa, Poneꞌẽrebâ ꞌmadâꞌâꞌwa ne Izaraéu nhihudu norĩ te, Ẽtẽ tõmo wawẽ nhisi na hã.
25 Aimama te, ꞌRe ihâimana uꞌâsi mono te za te te ꞌre aipawapto.Iwaihuꞌu pese uptabi te za iwẽ hã te te aima ꞌre anhomri,hâiwa hawi â hã, tiꞌai ꞌrowi â hã, abaze norĩ iꞌahâ hã, aiꞌra iꞌahâ hã,
26 amnho hã, sirãrã iꞌahâ hã,ẽtẽ norĩ duréi ꞌre isimasa mono ꞌre, marĩ ise ꞌre ihâimana uꞌâsi zaꞌra mono hã.Tawamhã uburé ã norĩ iwẽ hã Zuzéhé ꞌrã nhisiwi hâimana zaꞌra da hã, ĩma iwẽ.Uburé ã norĩ iwẽ, hâimana zaꞌra da hã tô ĩma iwẽ, ꞌRe ihâimana uꞌâsi mono isisãnawã norĩ hawi te te ipisudu, uihâ na hã.
27 “Bẽzami, asadaꞌrã abaze isahi uptabi ne hã te ꞌre hâimana,mararé tinhisõpãrĩ te te iꞌrẽne ne,duré hâiwahâ tinhisõpãrĩ nhisiꞌatarẽme na ãma isipoꞌo ne.”
28 Ã norĩ hã Izaraéu ꞌra norĩ 12 na ihâiba zaꞌra hawimhã te za 12 na dawamri dasitébré zaꞌra, iꞌra nhisi mono zarina. Ãne ma tô imama zaꞌra hã tiꞌra norĩ ma waihuꞌu zaꞌra. Tahawa, hâiba mono bâ ma tô romnhowam na iwẽ na hã ãma tãma nharĩ siromo zaꞌra, ite mono bâ.
Zaco, dâꞌâ wa, da te isẽrẽzé wasuꞌu
29 Tawamhã Zaco, ma tô tiꞌra norĩ ma sina tãma rowaihuꞌu siromo zaꞌra:
— Nimahã na romhutu na wa za oto dârâ. Ĩdâꞌâ wamhã, ĩhiꞌrata norĩ ꞌru ãma te za asiwi ĩnherẽ ꞌwa, hitita norĩ siré Efrõhõ nhiptiꞌai ꞌre aꞌubuni wi ẽtẽ na abꞌre siromo wa,
30 Maquipela ãma Mare bâtâ pusizém niwĩ, tiꞌai waꞌõtõ nhoꞌu Canaꞌã ꞌremhã. Ta hã ma tô Abraꞌã Efrõhõ wi uipra, imana wawi tiꞌa inomro siré, daꞌru iwa ꞌre ihâimana uꞌâsi mono da hã.
31 Tame Abraꞌã norĩ, imro Saraha me hã ma tô ãma tiꞌa zahuré ni. Izaqui norĩ, imro Rebecaha me, ma tô duré ãma tiꞌa zahuré ni. Tame, wa tô wa hã Léia hã tisẽ.
32 Tiꞌa, iwa ẽtẽ na abꞌre siro hã ma tô hitita norĩ wi uipra zaꞌra.
33 Tawamhã ãne na Zaco, tiꞌra norĩ ma, te te sina tãma rowaihuꞌu zaꞌra pari, ma tô apâ waptâ wamhã nomro. Tahawa, ma tô õne haré oto tõmo hato, pẽꞌẽ siꞌutõrĩ wa.
