Zenezi 7:1-24
7 Tawamhã Uburé Danhibꞌapito te Noéhé ma tinha ãne:
— Te za oto ubaꞌre wa aimro me, aiꞌra siꞌaibâ norĩ me duré asani aba norĩ me uburé asisisi ꞌwa. E marĩ wa. Aiwétési te iꞌuwaibaba na si ꞌre aimo, tiꞌai ãma asiré ꞌre ihâimana zaꞌra mono norĩ upana.
2 Tahawa te za duré ipoto mono bâ 7 na imro ré abaze iwẽ hã, danhoprubzéb da, izata da hã uiwada pese na asiré iꞌmazasi zaꞌra. Te za duré misi imro ré iwẽꞌõ danhoprubzéb õ da hã ipoto mono bâ uiwada pese na asiré iꞌaꞌmaza.
3 Duré te za ipoto mono bâ 7 na, si norĩ uiwada pese na, asiré iꞌmazasi zaꞌra, apâ sitébré mono da, tiꞌai ꞌremhã.
4 E marĩ wa. Ã hawimhã 7 bâtâ ãma wa za 40 bâtâ ꞌrem na, duré 40 mara na tã taꞌa da hã tãma robꞌru. Ãne wa za tawamhã uburé hâiba ré ꞌre ihâimana zaꞌra mono norĩ hã uprosi.
5 Tawamhã Noé, Uburé Danhibꞌapito te te iwaihuꞌuzéb zarina uburé pese ma tô abꞌmanha.
6 Tawamhã Noéhé ãma 600 na ãma iwahub ãma, ma tô iꞌâ pusi mono zé hã tiꞌa upsi poré.
7 Tahawa, iꞌâ pusi mono wi sisõꞌreptu da ma tô tiꞌra norĩ siré hã, timro siré, duré tisaniꞌaba norĩ siré ubaꞌre ꞌremhã ãzé.
8 Tawamhã abaze ĩwẽ norĩ hã, ĩwẽꞌõ norĩ hã, diꞌi na ꞌre inomro mono norĩ hã, duré si norĩ hã
9 ma tô Noéhé siré asisi uiwada pese na, aibâ na duré piꞌõ na, ꞌRe ihâimana uꞌâsi mono te te tãma iwaihuꞌuzéb zarina.
10 Tawamhã 7 na bâdâ morĩ pari, ma tô oto â, tiꞌa te te iꞌupsibi mono na hã ãma sãnaꞌrata.
11 Tô taha wamhã, 600 na Noéhé ãma iwahubzéb ãma, dia 17 maparane aꞌamoi ãma ma tô tiꞌai hawi ubꞌre hã puꞌu mono.* Duré hâimo â ꞌre ihâimana mono ma, ma tô hâiwa hã tãma siꞌridawa, we sisaꞌwari da hã.
12 Tawamhã ma tô tã hã tiꞌai u titaꞌa, 40 bâtâ ꞌre, duré 40 mara na.
13 Tawamhã tô taha bâtâ na Noé norĩ, timro me hã ma tô tiꞌra Sẽ norĩ siré, Cãhã siré, Zaféhé siré, duré ta norĩ mro zaꞌra siré ubaꞌre ꞌremhã tizasi zahuré.
14 Duré uburé abaze norĩ ipoto mono bâ sipuꞌu pese na ma tô isiré asisi, da te ꞌre itébré zaꞌra mono norĩ hã, rom na ꞌre ihâimana zaꞌra mono norĩ hã, diꞌi na ꞌre inomro mono norĩ hã, duré si norĩ hã.
15 Uburé abaze norĩ uiwada pese na ma tô Noéhé siré ubaꞌre ꞌremhã asisi.
16 Aibâ na, piꞌõ na uiwada pese na ma to abaze norĩ hã ipoto mono bâ asisi, ꞌRe ihâimana uꞌâsi mono, Noéhé ma, te te tãma iwaihuꞌuzéb zarina. Taha pari ꞌRe ihâimana uꞌâsi mono, ma tô oto ubaꞌre hã iré sito.
17 Tawamhã 40 bâtâ na â pusi mono wamhã, hâimo te â siꞌré. Tahawa ma tô oto ubaꞌre hã â te te saꞌré hâimo, tiꞌai hawimhã.
18 Â hã te hâimo siꞌréi uꞌâsi. Tahawa, te duré ubaꞌre hã â nhisiwimhã ꞌre wara uꞌâ.
19 Tawamhã duré â watobro pese wamhã, ma tô uburé ẽne iꞌrãihâ uptabi norĩ hã te te upsibi, ropâ.
20 Taha parimhã 7 metru na â pibuzém na, ma tô ẽtẽꞌrãihâ te te iꞌupsibi zaꞌra mono hawimhã oto â hã tihâiba.
21 Tawamhã uburé tiꞌai ãma ꞌre ihâimana zaꞌra mono, si norĩ hã, abaze da te ꞌre itébré zaꞌra mono norĩ hã, rom na ꞌre ihâimana zaꞌra mono norĩ hã, diꞌi na ꞌre inomro mono norĩ hã, duré aꞌuwẽ norĩ hã ma tô siꞌutõrĩ.
22 Uburé tiꞌai ãma ꞌre ihâimana zaꞌra mono hã ma tô aiꞌutõrĩ pese, pẽꞌẽzani ré ꞌre inomro mono hã.
23 Noéhé siré ubaꞌre wa, ihâimana zaꞌra norĩ si, siꞌutõrĩ õ di. Ubaꞌre wa, isiré ihâimana zaꞌra õ norĩ si ma tô aiꞌutõ, aꞌuwẽ norĩ hã, abaze da te ꞌre itébré zaꞌra norĩ hã, rom na ꞌre ihâimana zaꞌra mono norĩ hã, diꞌi na ꞌre inomro mono norĩ hã, duré si norĩ hã.
24 Tawamhã 150 na bâdâ iꞌâ pusi mono na ãma siꞌutõrĩ parip si, ma tô apâ iꞌâ nhiꞌré mono na hã ãma sãnaꞌrata.
Ĩwaꞌõtõ piꞌreba watsuꞌu mono
^ 7:11 Tiꞌai ꞌrowi ropâ â uꞌâ hã te wasuꞌu.
