Zenezi 8:1-22
8 Tawamhã ꞌRe ihâimana uꞌâsi mono, Noéhé ãma, duré uburé abaze, ubaꞌre wa isiré ihâimana zaꞌra norĩ ãma, ma tô oto poꞌre puru. Tahawa rowaꞌu, tiꞌa nhisiwi te te â wapõrĩ mono da hã, ma tô tãma tinha. Ãhã wa, ma tô duré apâ âꞌré mono na hã ãma sãnaꞌrata.
2 Tawamhã ubꞌre norĩ, hâiwa isiꞌridawa me hã ma tô apâ oto atob zahuré. Tahawa, tã te te oto duré sazâri wamhã,
3 ma tô 150 bâtâ na apâ atãma na â nhiꞌré mono.
4 Tawamhã dia 17, aꞌamo 7 na ihâimana ãma ma tô ubaꞌre Ararati na ẽtẽ wamri ꞌrãihâ nhisiwimhã oto nomro.
5 Tawamhã 10 na aꞌamo zaꞌrata tẽme ma tô â nhiꞌréi uꞌâsi mono, apâ tiꞌai u hã. Tawamhã 10 na aꞌamo zaꞌrata te, bâdâ imorĩꞌrata ãma ma tô ẽtẽ ꞌwasudu hã te te oto urĩrĩ.
6 Tawamhã bâdâ 40 na isiꞌutõrĩ ãma, ma tô Noé romhâimana wana ré, ubaꞌre na zanela ꞌri zadazâri te te iꞌmanharĩ hã ꞌridawa.
7 Tahawa, sitoro corvo na isisi hã ma tô time. Ta hã â, tiꞌa te te iꞌurĩrĩ zô te te sapari sina ma tô ꞌre wara, te te ꞌre saꞌoto mono sina.
8 Taha pari Noé utuꞌu, ma tô duré time, tiꞌai ꞌré zô te te ꞌre robꞌmadâꞌâ mono da.
9 Tane nherẽ, ãma isabzéb da, utuꞌu robꞌré hã te te ꞌmasãmri õ di, zahadu â, tiꞌa hã te te urĩrĩ mono õ wa. Tahawa utuꞌu apâ te te itẽme sina siri wamhã, ma tô Noé tinhibꞌrada hã sô wẽ. Tawamhã te te âri wamhã, ma tô apâ ubaꞌre ꞌri para u hã tisã.
10 Tawamhã Noé, 7 bâtâ na te aꞌâ duré sapa. Taha pari ma tô duré apâ utuꞌu hã time, te te rowaimrami mono da hã.
11 Tahawa hâiwahâ pesere si, ma tô apâ hã wi. Ãhã wa, tiwata na olivera su uzé hã ma tô ãwisi. Tawamhã taha na ma tô Noé waihuꞌu, oto apâ iꞌâꞌré na hã.
12 Tawamhã 7 bâtâ na, ma tô duré aꞌâ sapa. Taha pari, ma tô duré apâ time. Tahawa oto, apâ hã wisi õ di.
13 Ãne Noéhé ãma 600 na ãma iwahub ãma, ma tô apâ â hã tiꞌai ãma hã tiꞌré pese. Tawamhã aꞌamo imorĩꞌrata te na bâdâ imorĩꞌrata ãma ma tô Noé, ubaꞌre upsibizé hã saꞌré. Tahawa, tiꞌa iꞌré ma tô oto ꞌmadâ.
14 Tawamhã aꞌamo isãnaꞌreb ãma, bâdâ 27 ãma, ma tô oto tiꞌa hã tiꞌré pese.
15 Tawamhã te ꞌRe ihâimana uꞌâsi mono, Noéhé ma tinha ãne:
16 — Maꞌãpé, aimro me, aiꞌra norĩ me, duré asaniꞌaba norĩ me ubaꞌre hawimhã oto aiwairébé aba.
17 Duré maꞌãpé uburé abaze norĩ zama asiré sani zaꞌra na, si norĩ hã, abaze da te ꞌre itébré zaꞌra mono norĩ hã, rom na ꞌre ihâimana zaꞌra mono norĩ hã, duré diꞌi na ꞌre inomro mono norĩ hã. Tawamhã ta norĩ uburé tiꞌai mono bâ te te ropéi mono wa, sitébré mono wamhã, te za tiꞌa hã sina sitob zaꞌra.
18 Tawamhã Noé norĩ, timro me, tiꞌra norĩ siré, duré tisaniꞌaba norĩ siré hã ma tô ubaꞌre hawimhã oto tipusi zahuré.
19 Tawamhã duré uburé abaze norĩ hã si norĩ me ma tô imono bâ nasi wairé, isiré zaꞌra.
Noé, ẽtẽ zaꞌra te te iꞌmanharĩzé wasuꞌu
20 Tawamhã Noé, ẽtẽ zaꞌra hã ma tô ꞌmanha, Uburé Danhibꞌapito ma, ãma tãma isõprubzé te te ãma zata da. Taha pari, si norĩ abaze norĩ me, ꞌRe ihâimana uꞌâsi mono ma, iwẽ hã ma tô nima norĩ si ꞌmaiꞌâri zaꞌra. Tawamhã ta norĩ hã ma tô ẽtẽ zaꞌra nhisiwimhã tãma zata zaꞌra.
21 Tawamhã Noéhé nhibzari zadaze, Uburé Danhibꞌapito te te hãi wamhã, ma tô wẽsã. Tahawa te ãne rosaꞌrata na hã sima tinha: “Niwamhã tiꞌai ma, ãne na te irobꞌmanharĩ na isahu da hã mare di za, iwa ꞌre idahâimana zaꞌra mono norĩ uꞌâbâmhã, daprédup tém hawim haré, marĩ iwasété na si da te dasima ꞌre rosaꞌrata uꞌâsi zaꞌra mono nherẽ.
22 Tawamhã duré tiꞌa ꞌre saꞌwari mono ré, te za iwa robꞌrezé hã, duré roptehârizé hã dama ꞌre hâimana zaꞌra. Te za duré rowahâ zé zama hã ꞌre hâimana, duré rowaꞌro hã. Duré wahubzé, tã ꞌre itaꞌa mono zé me te za dama ꞌre hâimana zahuré apâ. Duré bâdâ te te ꞌre irobꞌuiwẽ mono hã ꞌre imara mono me hã te za tô ꞌre hâimana uꞌâsi zahuré.”
