Zuã 10:1-42
10 Tawamhã Zezusi hã te duré rowahutu, ãne:
— Tô sena wa za aima rowasuꞌu zaꞌra waꞌwa, ãne: Niꞌwa hã poneꞌẽrebâ norĩ waꞌra ꞌre, ꞌre isimasa mono zéb u ꞌridawa na za isébré õ hã, waꞌra na si za isarõno hã, ta hã isimisaihuri, duré danhibrob zô dapãrĩꞌwa.
2 Tazahã, ꞌridawa na za isébré hã, ta hã poneꞌẽrebâ ꞌmadâꞌâꞌwa.
3 ꞌRidawa ꞌmadâꞌâꞌwa hã te za tãma ꞌridawa, ꞌridawa hã. Duré poneꞌẽrebâ norĩ zô, isisi na sô ihârâ zaꞌra zé te te wapari zaꞌra wamhã, te za sadaihuꞌu zaꞌra. Itẽme siꞌabaꞌréi wamhã, waꞌra hawi te za oto sani zaꞌra, rob u.
4 Uburé waꞌra nhiti, tinhimizama te te sani zaꞌra parimhã, isõwa te za timorĩ zaꞌra. Tawamhã isarina te za aiꞌabaꞌré, te te siwi mreme waihuꞌu pese wa.
5 Tazahã, niꞌwa iwaihuꞌu õ zarina hã, niwa isiꞌabaꞌré da hã, mare di. Te za tãma ropé, isaꞌreseꞌõ mreme hã tãma waihuꞌu zaꞌra õ wa.
6 Ã hã rowasuꞌu na romnhimiréꞌé na ma tô Zezusi hã rowasuꞌu. Tane nherẽ, niꞌwa hã te te sadaihuꞌu õ di.
Zezusi hã, ꞌridawa na isiwasuꞌuzé
7 Tawamhã Zezusi hã te duré sina tinha, ãne:
— Tô sena wa za aima ĩsiwasuꞌu zaꞌra waꞌwa, ãne: Wa hã ꞌridawa, poneꞌẽrebâ ꞌre isisisi mono zé.
8 Uburé ĩwana we ꞌre inomro mono norĩ hã, ta norĩ hã isimisaihuri norĩ, duré danhibrob zô dapãrĩꞌwa. Tane nherẽ, poneꞌẽrebâ norĩ hã imreme te te ꞌre wapari zaꞌra mono õ di.
9 Wa hã ꞌridawa. Niꞌwa hã ĩꞌãma sébré wamhã, tinhoꞌreptuzé te za sina uwaimra. Sébré wamhã, duré apâ watobro wamhã, ro iwẽ hã te za sõpẽtẽ, rowẽ uꞌâsi ꞌre ihâimana mono zé hã.
10 Isimisaihuri hã simisaihuri da si, te we ꞌre ne, duré dapãrĩ zô si, duré dahâimanazé te te dawi iprub da si. Tazahã, wa hã poneꞌẽrebâ norĩ ma, ihâimanazé te ꞌre anhomri mono da, wa tô wei mo, rowẽ uꞌâsi ꞌre ihâimana zaꞌra mono zé hã.
Zezusi hã, poneꞌẽrebâ ꞌmadâꞌâꞌwa iwẽ na isiwasuꞌuzé
11 — Wa hã poneꞌẽrebâ ꞌmadâꞌâꞌwa ĩwẽ. Poneꞌẽrebâ ꞌmadâꞌâꞌwa iwẽ hã te za sisõ, poneꞌẽrebâ norĩ zawi te.
12 Romhuriꞌwa hã robꞌuiprazém na tipawaꞌâbâ zô si te te ꞌre romhuri. Tahawa ta hã, poneꞌẽrebâ ꞌmadâꞌâꞌwai õ di. Duré poneꞌẽrebâ norĩ hã itei õ di. Tahawa, abaze zahi hã sô imorĩ zaꞌra na te te ꞌmadâꞌâ wamhã, te za tãma rẽme zaꞌra. Te za tãma wara. Tawamhã abaze zahi hã te za wanoꞌõ. Te za duré ãma ropé.
13 Romhuriꞌwa hã te za wara, tipawaꞌâbâ zô si te te ꞌre romhuri mono wa, poneꞌẽrebâ norĩ hã tãma marĩ dai õ wa.
14 Wa hã poneꞌẽrebâ ꞌmadâꞌâꞌwa ĩwẽ. Ĩma waihuꞌu pese di, ĩte poneꞌẽrebâ norĩ hã. Tane duré tãma ĩwaihuꞌu pese zaꞌra di,
15 Ĩmama hã te te ĩwaihuꞌu pese ne, duré Ĩmama hã ĩma iwaihuꞌu pese ne. Tahawa, ĩte poneꞌẽrebâ norĩ da hã ĩsisawi ãna wa za ĩsisõ.
16 Ĩte poneꞌẽrebâ norĩ hã te duré tihâimana zaꞌra, ãme dasiré waꞌra ꞌre, isimasab õ hã. Ta norĩ zama tô iꞌru zahi, te we iꞌãwisi zaꞌra da hã. Tawamhã ta norĩ zama te za ĩmreme hã wapari zaꞌra. Tahawa misi haré te za poneꞌẽrebâ ubumro hã ꞌre hâimana. Duré misi haré za poneꞌẽrebâ ꞌmadâꞌâꞌwa hã.
17 — Tahawa, Ĩmama ma ĩzawi di, ĩhâiba hã za te sõmri wa, apâ te te ĩma sõmri da, ꞌre ĩhâimana uꞌâsi mono zé hã.
18 Niꞌwa hã ĩhâimanazé te te ĩwi iwazere da hã, mare di. Tazahã, ĩsiꞌuihâ na wa za ĩsisõ, te ĩsima iwẽzéb zarina. Ĩnhimiroti pire hã te ĩma tihâiba, ĩsisõmrizéb da hã, duré apâ te ĩsima iꞌâri da hã. Tô ã hã ma tô Ĩmama hã ĩma tiꞌru, te ꞌmanharĩ da.
19 Ãne hã Zudeu norĩ te te wapari zaꞌra wamhã, ma tô duré sima aipoꞌo.
20 Tawamhã daꞌahâ na ma tô ãne hã nharĩ zaꞌra ni:
— Waꞌuburé ré, te tihâiba. Ma duré ꞌrãihaiwamna. E marĩ da, te isimirowasuꞌu hã iwapari zaꞌra waꞌwa.
21 Tane nherẽ, niꞌwam norĩ hã te duré nharĩ zaꞌra, ãne:
— Mare di. Niꞌwa hã waꞌuburé ré, ꞌre morĩ wamhã, ãne hã te te ꞌre rowasuꞌu waihuꞌu mono õ di. E tawamhã waꞌuburé hã isimito pese ré hã.
Zezusi hã, Zudeu norĩ te te siwi iwẽꞌõzé
22 Tawamhã rowaꞌuꞌu wahâ ꞌrowi, te Zeruzalẽ ãma dato hã tihâiba, ꞌRe ihâimana uꞌâsi mono ãma dawatazé* hã.
23 Taha ré, te Zezusi hã tihâiba, ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra ãma, apito Salomahã te, ꞌri zahâpâ nhisi na dazasizéb ꞌrata.
24 Tame ma tô Zudeu norĩ hã imana wawi siꞌrãꞌõtõ. Tahawa te ãne siwi sadanha:
— E mahã bâtâ u wa za wahâimana zaꞌra ni, wasiwawã na hã. Maꞌãpé, sõꞌawi wama asiwasuꞌu zaꞌra na, tô sena a hã Cristu* wamhã.
25 Tawamhã Zezusi hã ma sadaꞌâbâ zaꞌra, ãne:
— Wa tô aima ĩsiwasuꞌu pari zaꞌra waꞌwa. Tane nherẽ, asiwi ĩzazei waꞌaba õ di. Romhuri hã Ĩmama nhisi na te ꞌre iꞌabꞌmanharĩ mono hã, ta hã te te ꞌre ĩwasuꞌu, wa hã niꞌwa na hã.
26 Tane nherẽ, asiwi ĩzazei waꞌaba õ di, a norĩ waꞌwa hã ĩte poneꞌẽrebâi õ wa.
27 Ĩte poneꞌẽrebâ norĩ hã ĩmreme te za wapari zaꞌra. Ta norĩ hã ĩma waihuꞌu pese zaꞌra di. Duré te za ĩzarina aiꞌabaꞌré.
28 Ta norĩ ma, wa za dahâimanazé isiꞌutõrĩꞌõ hã pisutu zaꞌra. Tahawa niwa idâꞌâ zaꞌra da hã, mare di. Niꞌwa ĩnhibꞌrata hawimhã te te ĩwi isani zaꞌra da hã waihuꞌu õ di.
29 Ĩmama, ĩma ipisutuꞌwa zaꞌra hã, uburé danhipai u saꞌẽtẽ uptabi di. Niꞌwa hã Ĩmama nhibꞌrata hawimhã te te tiwi isani zaꞌra da hã waihuꞌu õ di.
30 Wa norĩ hã Ĩmama me hã, misi wa ꞌre wahâimana.
31 Tawamhã Zudeu norĩ hã ma tô duré ẽne hã sada waibu zaꞌra, Zezusihi da, te te ãma siwi wĩrĩ da.
32 Tahawa, Zezusi hã te duré tãma nharĩ zaꞌra, ãne:
— Asõꞌa zaꞌra waꞌaba, wa tô marĩ iwẽ hã ahâ na te ꞌre aꞌmanharĩ, Ĩmama te te ĩma iꞌru hã. E mahã uꞌâbâ te tawamhã asima iwẽ zaꞌra waꞌwa, asiwi ĩwĩrĩ aba da hã.
33 Tawamhã Zudeu norĩ te asa tãma nharĩ zaꞌra, ãne:
— Marĩ ꞌre iꞌabꞌmanharĩ wẽ mono uꞌâbâ, ẽtẽ na wa te wasiwi aiwĩrĩ da, wa te wasima wẽ zaꞌra õ di. Tazahã, tane asina nharĩ wa. Tane asina inharĩ ꞌremhã, ꞌRe ihâimana uꞌâsi mono ãma te iwasé. A hã wasine tiꞌai ãma aꞌuwẽ nherẽ, te asiꞌmadâ, ꞌRe ihâimana uꞌâsi mono na.
34 Tawamhã Zezusi hã te duré tãma nharĩ zaꞌra, ãne:
— Ate zaꞌra waꞌwa roti zahi na robꞌuiꞌéré hã te nomro, ꞌRe ihâimana uꞌâsi mono te te inharĩzé hã, ãne: “A norĩ waꞌwa hã ihâibaꞌõ.”
35 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã tô sena. Duré wama waihuꞌu pese zaꞌra di, ꞌRe ihâimana uꞌâsi mono ma tô ihâibaꞌõ na wamri zaꞌra, niꞌwam norĩ hã ꞌRe ihâimana uꞌâsi mono mreme te te iwapari zaꞌra norĩ hã.
36 Tawamhã wa hã, ꞌRe ihâimana uꞌâsi mono te te ĩpisudu, te te duré we ĩzatõrĩ, tiꞌai ãma ꞌre idahâimana zaꞌra mono u. E niha te ãne nherẽ, ĩma inharĩ zaꞌra waꞌwa, ꞌRe ihâimana uꞌâsi mono ãma te iwasété na hã, te ĩsina nharĩ wa, wa hã ꞌRe ihâimana uꞌâsi mono ꞌra na.
37 Ĩmama ma romhuri hã te ꞌre abꞌmanharĩ mono õ wamhã, asiwi ĩzazei waꞌaba tõ.
38 Tazahã, asiwi ĩzazei waꞌaba õ nherẽ, te ꞌre abꞌmanharĩ mono wamhã, maꞌãpé asimizaze zaꞌra waꞌaba, marĩ te ꞌre iꞌabꞌmanharĩ mono na si, Ĩmama, ĩsiré ꞌre ihâimana mono na duré Ĩmama siré ꞌre ĩhâimana mono na hã waihuꞌu zaꞌra waꞌaba da, duré sadaihuꞌu zaꞌra waꞌaba da zama.
39 Tawamhã Zudeu norĩ hã te te duré aré siwi âri da. Tane nherẽ, ma tô isibꞌrata hawi tiwi tiwatobro zaꞌra.
40 Tawamhã Zezusi hã ma tô apâ saprĩ, Zodã pa na. Ma tô mo, Zuwã Batista hã romhuri na te te sãnaꞌrata wi, â dawabzuri te te dama iꞌabꞌmanharĩzéb u. Tame ma tô nhamra.
41 Tawamhã daꞌahâ uptabi na ma tô itẽme aiꞌabaꞌré ni isãmrazéb u. Ãne ma tô nharĩ zaꞌra ni:
— Zuwã Batista hã niwa te te ꞌmanharĩ õ di, marĩ dama iꞌmanharĩ waihuꞌuꞌõ hã. Tane nherẽ, ã hã aibâ uburé te te dama ꞌre iwasuꞌu mono zé hã, tô sena te te ꞌre wasuꞌu.
42 Tahawa, tame sãmra ré, daꞌahâ na ma tô Zezusi hã saze zaꞌra ni.
Ĩwaꞌõtõ piꞌreba watsuꞌu mono
^ 10:22 Ã hã Festa da Dedicação, Zudeu norĩ hã tinhitobꞌru norĩ wi, Zeruzarẽ apâ te te siwi iꞌârizém na, ꞌRe ihâimana uꞌâsi mono nhorõwa ꞌri ꞌrãihâ zama, dato te te sima ꞌre iꞌmanharĩ zaꞌra mono zé, ãma dasipoꞌrepuꞌuzéb da hã
^ 10:24 Cristu hã, ꞌRe ihâimana uꞌâsi mono te te ipisudu, Danhoꞌreptuiꞌwa da, te wasuꞌu.
