Zuã 14:1-31
14 Tawamhã Zezusi hã te duré tãma nharĩ zaꞌra, ãne:
— Aiwi robzeiꞌõ zaꞌra waꞌaba tõ, aipẽꞌẽ ꞌremhã. ꞌRe ihâimana uꞌâsi mono si saze zaꞌra waꞌaba. Duré ĩzaze zaꞌra waꞌaba.
2 Ĩmama nhorõwa ãma hã robꞌre zaꞌẽtẽ di, ꞌre idasiꞌubumroi mono zéb da hã. Tamemhã wa za asô robzaꞌra pese zaꞌra waꞌwa. Ãnei õ ꞌwaꞌâhã, te aré aima rowasuꞌu zaꞌra waꞌaba õ di.
3 Ĩmorĩ wamhã, duré te asô robzaꞌra pese zaꞌra waꞌaba parimhã, apâ wa za wei mo, ĩsiré te ãma asimroi waꞌaba mono da, ꞌre ĩnhamra mono zéb ãma, ꞌre aiꞌubumroi waꞌaba mono da.
4 Aima waihuꞌu pese zaꞌra waꞌaba di, bâdâdi hã, nimomo za ĩmorĩzé hã.
5 Tawamhã Tome hã ma tô sadanha, ãne:
— Wanhibꞌapito, nimomo iꞌaimorĩzé hã wa te waihuꞌu zaꞌra õ di. E niha wa za waihuꞌu zaꞌra ni, bâdâdi hã.
6 Tawamhã Zezusi hã te tãma siwasuꞌu, ãne:
— Wa hã bâdâdi uptabi duré tô sena ꞌRe ihâimana uꞌâsi mono nhimiroti duré dahâimanazém nhomriꞌwa. Niꞌwa hã ĩꞌãma ꞌre morĩ õ nherẽ, Ĩmama u hã wisi waihuꞌu õ di za.
7 Tô sena aima ĩwaihuꞌu pese zaꞌra waꞌaba wamhã, Ĩmama zama te za duré oto iwaihuꞌu zaꞌra waꞌwa. Tawamhã ã hawim haré te za oto iwaihuꞌu zaꞌra waꞌwa. Ma tô duré iꞌmadâꞌâ zaꞌra waꞌwa.
8 Tawamhã Filipi hã te duré tãma tinha, ãne:
— Wanhibꞌapito, maꞌãpé Aimama hã wama hâiꞌré zaꞌra na. Tawamhã marĩ zô oto wanhimnhasi zaꞌra õ di za.
9 Tahawa Zezusi hã ma sadaꞌâ, ãne:
— Filipi, aiꞌrata wa ꞌre ĩnhamra hâ zaꞌra waꞌwa. E tane nherẽ, zahadu bété ĩwaihuꞌu õ di. Niꞌwa hã te te ĩꞌmadâꞌâ wamhã, Ĩmama zama te duré ꞌmadâ. E niha te ãne nherẽ, ĩma inha: “Maꞌãpé, Aimama hã wama hâiꞌré zaꞌra na.”
10 E ĩzazei õ di, Ĩmama ãma ꞌre ĩhâimana mono na hã duré Ĩmama hã ĩꞌãma ꞌre ihâimana mono na hã.
— Te ꞌre irowasuꞌu mono zé hã ĩsihawib õ di. Tazahã, Ĩmama, ĩsiré ꞌre ihâimana mono te tite romhuri hã te te ꞌre ꞌmanharĩ.
11 Maꞌãpé ĩzaze zaꞌra waꞌaba, ĩsiwasuꞌu wa, Ĩmama ãma ꞌre ĩhâimana mono na duré Ĩmama hã ĩꞌãma ꞌre ihâimana mono na. Ĩsiwasuꞌuzém na ĩzaze zaꞌra waꞌaba dai õ wamhã, niwamhã pé saze zaꞌra waꞌaba, romhuri hã te te ꞌre iꞌaꞌmanharĩ mono zém na si.
12 Tô sena wa za aima waihuꞌu zaꞌra waꞌwa, ãne: Niꞌwa hã te te ĩzazei wamhã, marĩ te ꞌre iꞌabꞌmanharĩ mono zé hã te za te te ꞌre aꞌmanharĩ. Te ꞌre iꞌabꞌmanharĩ mono zém nhipai u te za tô te te ꞌre abꞌmanharĩ, Ĩmama u za oto ĩmorĩ wa.
13 Duré uburé marĩ hã ĩnhisi na ꞌre iwaptẽrẽ zaꞌra waꞌaba mono hã, wa za te aima ꞌre aꞌmanharĩ ꞌwa. Ĩmama ãma ꞌre aiwata zaꞌra waꞌaba mono da, te ãma aima ꞌre aꞌuwaimrami aba mono wa.
14 Uburé siwaꞌru marĩ hã, ĩnhisi na ĩwi ꞌre waptẽrẽ zaꞌra aba mono wamhã, wa za te ãma aima ꞌre aꞌuwaimrami ꞌwa.
Zezusi hã, Timama pẽꞌẽzani na te te iropisutuzé
15 Tawamhã Zezusi hã te duré tãma nharĩ zaꞌra, ãne:
— Aima ĩzawi pese zaꞌra waꞌaba wamhã, ĩnhimiroti te za ꞌre iꞌmadâꞌâ pese zaꞌra waꞌaba mo.
16 Ĩmama wi, wa za waptẽ. Tawamhã ta hã te za we satõ Dapawaptoꞌwa ihâiba amo hã, asiré ꞌre hâimana uꞌâsi zaꞌra waꞌaba mono da.
17 Ĩzazeiꞌõꞌwa tiꞌai ãma ꞌre idahâimana zaꞌra mono hã, ꞌRe ihâimana uꞌâsi mono Pẽꞌẽzani hã da te waibui waihuꞌu õ di, da te ꞌmadâꞌâ waihuꞌu zaꞌra õ wa, duré da te iwaihuꞌu zaꞌra da hã, dama waihuꞌu õ wa. Tanei õ di, a norĩ waꞌwa hã. Aima waihuꞌu pese zaꞌra waꞌaba di, asiré ꞌre hâimana zaꞌra waꞌaba mono wa, duré aipẽꞌẽ ꞌre, za ꞌre hâimana uꞌâsi zaꞌra waꞌaba mono wa.
18 — Aiꞌmadâꞌâ ãna ꞌre aihâimana zaꞌra waꞌaba mono da, te airẽme zaꞌra waꞌaba õ di za. Apâ wa za we atẽme ĩmorĩ ꞌwa.
19 Suru na aiꞌrata aba ĩhâimana parimhã, tiꞌai ãma ꞌre idahâimana zaꞌra mono hã da te oto dasiwi ĩꞌmadâꞌâ õ di za. Tanei õ di, a norĩ waꞌwa hã. Te za asiwi ĩꞌmadâꞌâ ꞌwa za. Ĩhâiba ré, za ꞌre ĩhâimana uꞌâsi mono wa, tane te za duré a norĩ waꞌwa hã aihâiba ré ꞌre aihâimana uꞌâsi zaꞌra waꞌaba mo za.
20 Ta hã bâdâ wisi wamhã, te za iwaihuꞌu zaꞌra waꞌwa, Ĩmama ãma ꞌre ĩhâimana mono na hã duré ĩꞌãma ꞌre iꞌaihâimana zaꞌra waꞌaba mono na hã, aiꞌãma ꞌre ĩhâimana zaꞌra waꞌaba mono ne hã.
21 — Niꞌwai ma ĩnhimiroti hã waihuꞌu pese wamhã, duré te te ꞌre abꞌmadâꞌâ pese mono wamhã, ta hã ĩzawi pese ꞌwa. Te te ꞌre ĩzawi pese mono wa, te za Ĩmama hã te te ꞌre sawi pese. Ĩzama wa za duré te ꞌre sawi pese. Tawamhã wa za tãma hâiꞌré, ꞌre ĩhâimana mono zé hã.
22 Tawamhã Zudasi hã (Zudasi Iscarioti õ di, ihâiba amo) ma tô sadanha, ãne:
— Wanhibꞌapito, e marĩ wa, te za wama zaꞌra si ꞌre asihâiꞌré mo, ꞌre iꞌaihâimana mono zém na hã. E niha bâ bété, uburé tiꞌai ãma asazeiꞌõꞌwa norĩ ꞌre ihâimana zaꞌra mono norĩ ma hã.
23 Tawamhã Zezusi hã ma ãma sadaꞌâ, ãne:
— Niꞌwa hã te te ꞌre ĩzawi pese mono wamhã, te za ĩnhimiroti hã te te ꞌre abꞌmadâꞌâ pese. Taha zarina te za Ĩmama hã te te ꞌre sawi pese. Tawamhã wa za we itẽme wanem ni, isiré ꞌre wahâimana mono da ꞌrâwi.
24 Niꞌwa ĩzawiꞌõꞌwa hã, ĩnhimiroti te te ꞌre abꞌmadâꞌâ mono õ di za. Ã hã ĩnhimiroti iwapari zaꞌra waꞌwa hã, ĩsihawib õ di. Ĩmama we ĩzatõrĩꞌwa nhimiroti.
25 — Aiꞌrata ĩnhamra aba ré, wa tô ãne na ĩnhimiroti na aima roti pese zaꞌra waꞌwa.
26 Tazahã, Dapawaptoꞌwa hã Ĩmama Tipẽꞌẽzani hã, ĩnhisi na za te te we isatõrĩ hã, te za uburé pese marĩ hã te te aima ꞌre waihuꞌu zaꞌra waꞌwa. Uburé ĩnhimiroti na te za duré te te ꞌre aipoꞌre puꞌu zaꞌra waꞌwa.
27 — Rowẽ hã wa ĩsisaꞌu aima rẽme zaꞌra waꞌwa. Ĩte rowẽ hã, wa aima sõmri zaꞌra waꞌwa. Rowẽ tiꞌai ãma ꞌre idahâimana zaꞌra mono te te aima ꞌre isõmri zaꞌra waꞌaba mono nei õ di. Aiwi robzeiꞌõ zaꞌra waꞌaba tõ aipẽꞌẽ ꞌremhã. Duré aipahi zaꞌra waꞌaba tõ.
28 Ma tô ĩwapari zaꞌra waꞌwa, te aima iroti zaꞌra waꞌaba zé hã, ãne: “Wa za oto mo. Tane nherẽ, wa za apâ we atẽme ĩmorĩ ꞌwa.” Ĩzawi pese zaꞌra waꞌaba ꞌwaꞌâhã, te aré asima irowẽ zaꞌra waꞌwa ĩzabâdâ, Ĩmama u za ĩmorĩ na waihuꞌu zaꞌra waꞌaba wa, Ĩmama hã ĩnhipai u, pire wa.
29 Ãne hã wa ãhã na aima waihuꞌu siromo zaꞌra waꞌwa, romhâimana wana ré, za oto romhâimana wamhã, ĩzaze zaꞌra waꞌaba da.
30 Ĩnhimiroti na te ãma aima uzusi zaꞌra waꞌaba õ di za, tiꞌai ãma dawadaꞌuri wasété ꞌwa hã za we oto morĩ wa. Taha ma, ĩꞌãma isimiroti pire hã hâimana õ di.
31 Tane nherẽ, tiꞌai ãma ꞌre idahâimana zaꞌra mono hã, da te iwaihuꞌu zaꞌra da si, Ĩmama hã ĩma isawi uptabi na hã. Tahawa wa za ꞌmanha, uburé te te ĩma iꞌruzé hã.
— Maꞌãpé, aiwahutu zaꞌra waꞌaba, oto wasiꞌabaꞌré da, ã hawi.
