Zuã 2:1-25
2 Tawamhã maparane bâdâ ne pari, ma tô dasina damro hã tihâiba, Cana na ꞌri waꞌõtõ nhisi ãma, Galiléia tiꞌai ꞌremhã. Tame te Zezusihi na hã dame tihâiba.
2 Tawamhã Zezusihi zô duré isiré ꞌre inomro mono norĩ zô zama, dasina damro u sihutu da hã, ma tô sô tahârâ zaꞌra ni.
3 Tawamhã uva ꞌrãi waꞌu isé hã siꞌutõrĩ wa, te Zezusihi ma ina hã tinha, ãne:
— Uva ꞌrãi waꞌu isé hã ma tô aiꞌutõ.
4 Tahawa Zezusi ma sadaꞌâ, ãne:
— Ãté a hã ĩna wẽ te, ĩma ꞌrui õ di za, marĩ te iꞌmanharĩ da hã. E marĩ wa. Ĩte bâdâ hã zahadu iwa waptãꞌã õ wa.
5 Tahawa, te romhuriꞌwa norĩ ma, ina hã tinha, ãne:
— Tiha te te aima ꞌru zaꞌra waꞌaba wamhã, maꞌãpé mreme zamarĩ zaꞌra waꞌaba za.
6 Taha ꞌrata te piza ẽtẽ ꞌmanharĩ hã aimasa, 6 na ihâiba hã. Taha ꞌremhã te â hã ꞌre hâimana zaꞌra, 80 na duré niwamhã 120 litru na â pibuzé hã. Taha pizaꞌa ꞌre, â da te ꞌre iséme mono na te Zudeu norĩ hã ꞌre sisimisõ zaꞌra, sihâiba pese da hã, tihâimanazéb zarina.
7 Tawamhã Zezusi hã te romhuriꞌwa norĩ ma tiꞌru, ãne:
— Maꞌãpé ã hã piza isimasab ꞌre, â hã ꞌmasisi zaꞌra waꞌaba.
Tahawa ma tô ꞌmasisi zaꞌra â hã, isadawa u.
8 Taha parimhã, ma tô Zezusi hã tãma ꞌru zaꞌra, ãne:
— Maꞌãpé, oto â hã suru na amrami zaꞌra waꞌaba, dasina damro wa, datoi ꞌmadâꞌâꞌwai u ꞌwasari aba da.
9 Tawamhã datoi ꞌmadâꞌâꞌwa ma tô téiwa, â isirobꞌrãi waꞌu isé hã. Nima hawim na hã uva ꞌrãi waꞌu isé hã te te waihuꞌu õ di. Romhuriꞌwa norĩ si te te waihuꞌu pese zaꞌra di. Tahawa ma tô aibâ imro téb zô hâ.
10 Ãne te tãma tinha:
— Dasaihuri naꞌrata hawi, te uva ꞌrãi waꞌu isé isei uptabi hã da te dama ꞌre õb zaꞌra, da te ꞌre âhuri mono da hã. Saꞌẽtẽ na da te ꞌre âhuri mono wap si, te iwaꞌu zei prã hã da te dama ꞌre õb zaꞌra. Tanei õ di, a hã. Isei uptabi hã te aꞌâ ité, iꞌrãsutu u da.
11 Ã hã marĩ dama iꞌmanharĩ waihuꞌuꞌõ, Zezusi hã ma tô ꞌmanha imorĩꞌrata na, Cana ãma Galiléia ꞌremhã. Tahawa, waihuꞌu pese uptabi na ꞌre ihâimana mono zé hã ma tô hâiꞌré. Ãne wa, isiré ꞌre inomro mono norĩ hã ma tô saze zaꞌra.
12 Taha pari, Zezusi hã, ina duré ino norĩ duré isiré ꞌre inomro mono norĩ zama, ma tô aiꞌabaꞌré, Cafarnau na ꞌri nhoꞌõmo nhisi u. Tame ma tô niha bâtâ na tihâimana zaꞌra.
Zezusi hã te te idazate mono zé, ꞌRe ihâimana uꞌâsi mono nhorõwa ꞌri ꞌrãihâ hawi
13 Romhuture di oto, Zudeu norĩ te, Pascoa* na dato nhisi ihâimanazéb u hã. Tahawa, Zezusi hã ma tô mo, Zeruzalẽ u.
14 Tawamhã ꞌRe ihâimana uꞌâsi mono nhorõwa ꞌri ꞌrãihâ ãma ꞌri ꞌwawi waꞌra ꞌre, ma tô sõpẽtẽ zaꞌra niꞌwam norĩ, powawẽ te te dama iwede zaꞌra hã duré poneꞌẽrebâ, duré utuꞌu. Ma tô duré ꞌmadâꞌâ zaꞌra, robꞌuiprazém na te te dawi isaprĩ zaꞌra hã, tite wedezai ꞌrata isiꞌubumro hã.
15 Tawamhã Zezusi hã ma tô sada ꞌmaꞌmanharĩ zaꞌra, danhimizama préꞌézé hã wedenhorõ na. Taha na ma tô uburé ta norĩ hã te te sate, duré poneꞌẽrebâ hã duré powawẽ zama. Wedeza hã ma tô duré pizari zaꞌra, robꞌuiprazém na isaprĩꞌwa norĩ wi. Tahawa, robꞌuiprazé isapotore hã ma tô tiꞌai wa ropé.
16 Tawamhã utuꞌu te te iwede zaꞌra norĩ ma, te duré tinha, ãne:
— Ã hã uburé robzani zaꞌra waꞌaba. Sahâri zaꞌra waꞌaba, Ĩmama nhorõwa ãma asima irowede zaꞌra waꞌaba zé hã.
17 Tahawa, isiré ꞌre inomro mono norĩ hã ma tô ãma tipoꞌre puꞌu zaꞌra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré na, ãne: “Asõrõwa, te ꞌre isawi pese mono zé hã, te unhama roꞌo ne ĩma ꞌre hâimana, ĩpẽꞌẽ ꞌremhã.”
18 Tahawa, te Zudeu norĩ ma rotiꞌwa norĩ hã siwi sadanha, ãne:
— E marĩ te za iꞌmanha, dama iꞌmanharĩ waihuꞌuꞌõ hã, wa te ãma aiwaihuꞌu zaꞌra da, asimiroti pire aima ihâimanazéb zarina, ãne iꞌmanharĩ na hã.
19 Tawamhã Zezusi ma sadaꞌâbâ zaꞌra, ãne:
— Ã hã ꞌRe ihâimana uꞌâsi mono nhorõwa ꞌri ꞌrãihâ hã asiwi ꞌri pru pese aba! Tawamhã apâ wa za ꞌri, bâdâ siꞌubdatõ na.
20 Tawamhã asa te tãma nharĩ zaꞌra, ãne:
— E niha te za merẽ bâdâ siꞌubdatõ na apâ iꞌri. Oro ã hã da te dasiwi ꞌri ré hã, 46 na ãma wahub za.
21 Tane nherẽ, ꞌri ꞌrãihâ na te te inharĩ hã, tihâiba te wasuꞌu, Zezusi hã.
22 Hâiwaꞌutu parip si, isiré ꞌre inomro mono norĩ hã ma tô ãma tipoꞌre puꞌu zaꞌra, te te inharĩzém na hã. Tahawa, ma tô saze zaꞌra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã duré Zezusi te te sina inharĩzéb zama.
Zezusihi ma waihuꞌu pese di, uburé danhimirosaꞌrada hã
23 Zezusi hã Pascoa na dato nhisi uꞌâbâ, Zeruzalẽ ãma hâimana ré hã, ma tô daꞌahâ na saze zaꞌra ni, marĩ dama iꞌmanharĩ waihuꞌuꞌõ te te dama ꞌre iꞌabꞌmanharĩ mono zé hã, da te ꞌmadâꞌâ zaꞌra wa.
24 Tane nherẽ, Zezusi hã te te sina daꞌaꞌumnhasi õ di, tãma dawaihuꞌu pese uptabi wa.
25 Niꞌwa hã dahâimanazém na te te tãma ꞌre daꞌawaihuꞌu mono da hã, sô ꞌre simnhasi mono õ di. E marĩ wa. Dahâiba mono bâ, da te ꞌre irosaꞌrata zaꞌra mono zé hã tãma waihuꞌu pese uptabi wa.
Ĩwaꞌõtõ piꞌreba watsuꞌu mono
^ 2:13 Pascoa hã dato nhisi, Zudeu norĩ, ꞌre isipoꞌre puꞌu zaꞌra mono zé, Ezitu hawi, ꞌRe ihâimana uꞌâsi mono te te isani zaꞌra zém na.
