Zuã 21:1-25
21 Ãne parimhã, Zezusi hã ma tô duré sihâiꞌré, isiré ꞌre inomro mono norĩ ma, isõꞌu Tiberiadi ꞌrata. Ãne ma tô tiromhâiba.
2 Tawamhã siré ma tô asimro: Simau Pedru, duré Tome “Didimo” na isisi amo hã; Natãnaéu, Cana na ꞌri waꞌõtõ nhisi hawimhã Galiléia ꞌremhã; duré Zebedeu ꞌra norĩ hã, duré maparane isiré ꞌre ine ihâiba amo norĩ hã.
3 Tawamhã Simau Pedru hã ma tô tisiré norĩ ma tinha, ãne:
— Tepe zô, wa za mo.
Tahawa isiré norĩ hã ma tô duré tãma nharĩ zaꞌra, ãne:
— Wa norĩ zama wa za ãma asiré aiꞌabaꞌré ni, tepe zô.
Tahawa uburé ma tô sô aiꞌabaꞌré. Siré ma tô ubaꞌre wa asisi. Tane nherẽ, taha mara na hã tebe te te ꞌmaiꞌâri zaꞌra õ di.
4 Tawamhã awẽm na oto rowaꞌa wi, Zezusi hã ma tô nhamra, supara ai wa. Tane nherẽ, isiré ꞌre inomro mono norĩ hã te te siwi waihuꞌu õ di.
5 Tawamhã Zezusi hã ma tô sadanharĩ zaꞌra, ãne:
— Ĩsiré norĩ, e tebe hã ma tô iꞌmaiꞌâri zaꞌra waꞌwa.
Ma sadaꞌâbâ zaꞌra, ãne:
— Mare di. Wa te ꞌmaiꞌâri zaꞌra õ di.
6 Tawamhã Zezusi hã ma tô tãma nharĩ zaꞌra, ãne:
— Maꞌãpé, abazipara hã ubaꞌre nhimire niwĩ asiwi mei waꞌaba. Tawamhã tebe hã te za iwaibu zaꞌra waꞌwa.
Tahawa, ma tô sô siwi time, abazipara hã. Te te siwi mei wamhã, â hawimhã te te siwi wazere waihuꞌu õ di, ubaꞌre u hã, tebe ahâ uptabi wa, iꞌremhã.
7 Tawamhã, Zezusihi siré ꞌre imorĩ, te te ꞌre isawi pese mono hã te Pedruhu ma tinha, ãne:
— Õ hã, Wanhibꞌapito Zezusi!
Tawamhã Simau Pedru, Wanhibꞌapito na te te tãma iwasuꞌu na imreme te te wapari wamhã, tiꞌuza ihâpa na ma tô apâ siꞌuza, te te aré sisa wazere wa. Taha pari ma tô âi ba tobro.
8 Tazahã isiré norĩ hã ubaꞌre ma tô siwi tisa tepe ré, romhutu wa supara ai u hã, 100 metru na tiꞌai pibuzé pazaihâ u hã.
9 Ubaꞌre hawi wairébé wamhã, uzâ hã ma tô siwi ꞌmadâ, duré préꞌa nhisiwi tebe isimiꞌwara hã, duré iꞌuꞌẽtẽ wapu zama.
10 Tawamhã Zezusi hã ma tô tãma nharĩ zaꞌra, ãne:
— Tebe hã we asiwi ꞌmaiꞌâri aba, nimosi iwaibu zaꞌra waꞌwa hã.
11 Tawamhã Simau Pedru ma tô ubaꞌre wa ãzé. Ubaꞌre hawi ma tô abazipara hã tisa, supara u. Iꞌremhã ꞌmasisi uptabi di tebe hã. Isaꞌẽtẽ si hã 153 na ihâiba hã. Tane nherẽ, te te sina tari õ di.
12 Tawamhã Zezusi hã ma tô ꞌmahârâ zaꞌra, ãne:
— We aiꞌabaꞌréi waꞌaba, asaihuri aba da.
Tawamhã isiré ꞌre inomro mono norĩ hã, niꞌwa hã sada siꞌaibâ õ di, te te isadanharĩ da hã, ãne: “E ꞌwa hã a hã”, tãma waihuꞌu pese zaꞌra wa, Wanhibꞌapito na hã.
13 Tawamhã Zezusi ma tô iꞌuꞌẽtẽ wapu hã tiꞌâ. Taha pari ma tô tãma sõmri zaꞌra. Tô õne ma tô duré ꞌmanha, tepe norĩ na hã.
14 Ã hã siꞌubdatõ ãma hã ma tô Zezusi hã sihâiꞌré, isiré ꞌre inomro mono norĩ ma, hâiwaꞌutu parimhã.
Zezusi hã Pedru te te sina isadanharĩzé
15 Tawamhã saihuri parimhã, Zezusi hã ma tô Simau Pedru sina sadanha, ãne:
— Simau, Zuwãhã ꞌra, e aima ĩzawi uptabi di, ã norĩ hã te te ꞌre ĩzawi zaꞌra mono nhipai u.
Tawamhã Pedru hã ma sadaꞌâ, ãne:
— Ĩhe. Wanhibꞌapito, aima waihuꞌu pese di, ĩma iꞌasawi uptabi na hã.
Tahawa te Zezusi hã tãma tinha, ãne:
— Maꞌãpé ĩte poneꞌẽrebâ iꞌrare norĩ hã ꞌre abꞌmadâꞌâ pese mono!
16 Taha pari maparane ãma hã te duré sina sadanha, ãne:
— Simau, Zuwãhã ꞌra, e aima ĩzawi uptabi di.
Pedru hã ma duré sadaꞌâ, ãne:
— Ĩhe. Wanhibꞌapito, aima waihuꞌu pese di, ĩma iꞌasawi uptabi na hã.
Tahawa te Zezusi hã duré tãma tinha, ãne:
— Maꞌãpé, ꞌre abꞌmadâꞌâ pese mono, ĩte poneꞌẽrebâ norĩ hã.
17 Tawamhã siꞌubdatõ ãma te duré sina sadanha, ãne:
— Simau, Zuwãhã ꞌra, e aima ĩzawi uptabi di.
Tawamhã Pedruhu wi ma tô tirobzeiꞌõ, Zezusi hã siꞌubdatõ te te duré sadanharĩ wa, ãne: “E aima ĩzawi uptabi di.” Tawamhã ma tô sadaꞌâ, ãne:
— Wanhibꞌapito, uburé marĩ hã aima waihuꞌu pese di. Duré aima ĩwaihuꞌu pese di, ĩma iꞌasawi uptabi na hã.
Tahawa Zezusi hã ma tô duré tãma tiꞌru, ãne:
— Maꞌãpé, ꞌre abꞌmadâꞌâ pese mono, ĩte poneꞌẽrebâ norĩ hã.
18 Aihâiba téb ré hã, te ꞌre asiꞌuza mo, asima ꞌre irowẽ mono zéb uwaibaba, ꞌre ane mono da. Tane nherẽ, wa za tô sena ãne hã aima waihuꞌu: Asiꞌihi wamhã, asibꞌrada hã te za dama iwẽ zahuré. Tawamhã te za aipawasisi ni. Taha pari te za asaprõni ni, asima rowẽ õ nherẽ, nimomo za iꞌaimorĩzéb u hã.
19 Ãne na ma tô Zezusi hã tãma tinha, niha na za idâꞌâzé hã te te tãma waihuꞌu siromo da, duré taha na ꞌRe ihâimana uꞌâsi mono, wẽ uptabi na ꞌre ihâimana mono zé hã te te hâiꞌré da.
Tawamhã Zezusi hã Pedruhu ma, ma tô tinha, ãne:
— We ĩzarina aimorĩ.
Zezusi hã Pedruhu ma, te te irotizé, Zuwãhã ãma
20 Tawamhã Pedru hã sibabarãi u ma tô aipiꞌra. Tahawa ma tô ꞌmadâ, Zezusi te te ꞌre isawi pese mono isarina imorĩ zahuré na hã. Ta hã Zezusihi zababa isãmra, barana saihuri wamhã, Pascoa na dato nhisi ihâimana ãma hã, ꞌrâwi pesere te te itẽme sina irotédé, te te sadanharĩ da, ãne hã: “Wanhibꞌapito, e ꞌwa hã te za dama aihâiba nho.”
21 Tawamhã Pedru hã, isaꞌu imorĩ zahuré te te ꞌmadâꞌâ wamhã, ma tô Zezusi hã ãma sadanha, ãne:
— Wanhibꞌapito. E niha za bété, ã hã.
22 Tawamhã Zezusi hã ma ãma sadaꞌâ, ãne:
— Apâ we ĩmorĩzéb u, dâꞌâ ãna ꞌre hâimana mono da, te ĩsima wẽ wamhã, a hã ãma asiꞌmadâꞌâ dai õ di. Ĩzarina si we aimorĩ, a hã.
23 Tahawa, rowasuꞌu hã ma tô ropé Zezusihi zazeiꞌwa norĩ ꞌremhã, Zezusi te te ꞌre isawi pese mono za idâꞌâ õ na hã. Tane nherẽ, Zezusi hã ãne te te ãma nharĩ õ di. Taré ma tô ãma tinha, ãne: “Apâ we ĩmorĩzéb u, dâꞌâ ãna ꞌre hâimana mono da, te ĩsima wẽ wamhã, e niha te ãma irosaꞌra, a hã.”
24 Ã hã Zezusihi siré re imorĩ, ãne na te te ꞌre irowasuꞌu mono, duré te te ãma irobꞌuiꞌéré. Wama waihuꞌu pese zaꞌra di, isimirowasuꞌu hã tô sena uptabi na hã.
Zuwã te te irobꞌuiꞌéré ꞌrãsutu zé
25 Zezusi hã ahâ uptabi na ma tô duré marĩ hã te te ꞌre abꞌmanharĩ. Uburé pese ãma robꞌuiꞌéré, hâimana zaꞌra ꞌwaꞌâhã, tiꞌai ãma ropâ itepãiwasi ãma robꞌuiꞌéré ré hã aré ꞌre ihâimana zaꞌra mono da hã, tãma robꞌre suꞌure di.
