Zuã 4:1-54
4 Tawamhã farizeu norĩ hã, Zezusihi wasuꞌu ma tô wapari zaꞌra, isimiroti ꞌmadâꞌâ pese ꞌwa hã dasina idahâꞌâ uꞌâsi mono na hã, duré â dawabzuri daꞌahâ na te te nasi dama iꞌabꞌmanharĩ na zama, Zuwãhã nhipai u.
2 (Tane nherẽ, Zezusi hã â dawabzuri te te nasi dama abꞌmanharĩ õ di. Isiré ꞌre inomro mono norĩ si.)
3 Tawamhã Zezusi ãne hã te te waihuꞌu wamhã, ma tô mo Zudéa hawi, apâ Galiléia u.
4 Morĩ wamhã, tô iꞌru zahi Samaria na danhiptiꞌa nhoꞌõmo nhisi waꞌwaibaba te te iroꞌrazâri da hã.
5 Tawamhã ma tô wi, Samaria ꞌre, ꞌri waꞌõno ihâimana, Sica na isisi u. Ta hã, Zaco tiꞌra Zuzéhé ma, tiꞌa te te isõmri ꞌrata, te ꞌre hâimana.
6 Tame te â zô abꞌre, Zacoho te hã ꞌre hâimana. Tawamhã abzuma waꞌwa Zezusi hã sadâꞌâ wa, ma tô tame â zô abꞌre ꞌrata nhamra.
7 Tame sãmra ré, te Samaria hawi piꞌõ hã mo, â zô, te te aꞌâri da. Tawamhã Zezusi hã te ãne tãma tinha:
— Â hã suru na ĩma õ na.
8 (Isiré ꞌre inomro mono norĩ hã ꞌri nhoꞌõmo u siꞌabaꞌréi haré, tisa hã te te sisa ꞌmaiꞌuipra zaꞌra da.)
9 Tawamhã Samaria hawi piꞌõ hã te asa tãma tinha, ãne:
— E niha te â hã ĩwi iwaptẽ, hâꞌrẽne da, a hã Zudeu nherẽ, wa hã duré Samaria ꞌre piꞌõ nherẽ. (Ãne hã piꞌõ Zezusihi ma, ma tô tinha, Zudeu norĩ hã, Samaria ꞌre, ꞌre isiꞌubumroi mono norĩ me hã ꞌre sisadaꞌâbâ wẽ zaꞌra mono õ wa.)
10 Tawamhã Zezusi hã te asa tãma tinha, ãne:
— ꞌRe ihâimana uꞌâsi mono nhoprubzé iwẽ uptabi hã aima waihuꞌu pese ꞌwaꞌâhã, duré â te te aiwi iwaptẽrẽ hã aima waihuꞌu pese ꞌwaꞌâhã, te aré tiwi iwaptẽ. Tawamhã ta hã te aré aima tisõ, â uꞌâ hã.
11 Tawamhã piꞌõ hã te duré asa tãma tinha, ãne:
— Tiha hã aima hâimana õ di, â ãma iꞌaꞌâri da hã. Duré abꞌre ꞌrehâ di. E niha te za tawamhã â uꞌâ hã iꞌaꞌâ.
12 E a hã, wahiꞌrada Zacoho nhipai u aipire di. Ta hã, ã hã â zô abꞌre, ma tô wama sõmri zaꞌra. Ã hawi â hã ma tô te te ꞌre hâsi. Tane duré iꞌra norĩ hã duré isimizama norĩ zama.
13 Tawamhã Zezusi hã te duré tãma tinha, ãne:
— Niꞌwa hã ã hã â te te hâꞌrẽne wamhã, ꞌrubu di za tãma hã, apâ.
14 Tazahã, niꞌwa, â te tãma isõmri hã te te hâꞌrẽne wamhã, niwa apâ tãma iꞌrubu da hã, mare di. E marĩ wa. Â te tãma isõmri hã te za oto â uꞌâsi na tãma ꞌre hâimana. Ta hã te za dahâimanazé isiꞌutõrĩꞌõ hã tãma tisõ.
15 Tahawa te piꞌõ hã isibꞌâ tiwi waptẽ:
— Maꞌãpé, asibꞌâ hã ĩma õ na, niwa apâ ꞌrubu hã ĩma hâimana tõ da, duré niwa ĩnhimnhasi tõ da, â zô we ĩmorĩ zahu da hã, ãwa.
16 Tawamhã Zezusi hã te tãma robꞌru, ãne:
— Mo oto aimro zô aimorĩ. Apâ we aimorĩ za.
17 Tane nherẽ, te piꞌõ hã tãma siwasuꞌu, ãne:
— Ĩmro õ di.
Tahawa Zezusi hã te tãma tinha, ãne:
— Tane tô. Iꞌuwaibaba te ĩma asiwasuꞌu, iꞌaimro õ na hã.
18 Imrotõ na ma tô aimro. Duré ãhã na iré iꞌaihâimana hã aimro õ di tô. Tahawa tô sena te ĩma asiwasuꞌu.
19 Tawamhã piꞌõ te duré tãma tinha, ãne:
— Ãhã na wa tô oto aiwaihuꞌu. A hã, ꞌRe ihâimana uꞌâsi mono zadawa ꞌmahârâꞌwa.
20 Ãme ẽtẽꞌrãihâ ãma te wahiꞌrata norĩ hã ꞌre wata zaꞌra, ꞌRe ihâimana uꞌâsi mono ãma hã. Tane nherẽ, a norĩ waꞌwa hã Zudeu norĩ te ꞌre irowasuꞌu zaꞌra waꞌaba mo, Zeruzalẽ ãma si, za ãma ꞌre idawata zaꞌra mono na hã, ꞌRe ihâimana uꞌâsi mono te te ipisutuzéb zarina.
21 Tawamhã Zezusi hã te piꞌõi ma tinha, ãne:
— Piꞌõ, maꞌãpé saze na, te aima irowasuꞌu zém na hã: Romhutu di oto bâdâ hã, ãme ẽtẽꞌrãihâ ãma duré Zeruzalẽ ãma, Ĩmama ãma za oto ꞌre idawata zaꞌra mono õ zé hã.
22 A norĩ waꞌwa, Samaria ꞌre, ꞌre iꞌaiꞌubumroi waꞌaba mono norĩ hã te ꞌre aiwata zaꞌra waꞌaba mo, aima iwaihuꞌu zaꞌra waꞌaba õ ãma. Tazahã, wa norĩ Zudeu norĩ hã, wama iwaihuꞌu pese ãma, wa ꞌre wawata zaꞌra. E marĩ wa. Zudeu norĩ uꞌâbâ danhoꞌreptuzé hã te wei mo.
23 Tane nherẽ, bâdâ hã te za wi. Ta hã bâdâ hã ma tô oto wi tô, sena na ꞌre iwata zaꞌra mono hã, Ĩmama ãma ꞌre iwata zaꞌra mono da hã, tihâiba uptabi na duré tô sena na. E marĩ wa. Ta norĩ zô te Ĩmama hã te te ꞌre robꞌmadâꞌâ, ãma ꞌre iwata zaꞌra mono norĩ zô.
24 ꞌRe ihâimana uꞌâsi mono hã, ꞌmadâꞌâ waihuꞌu ãna te tihâiba uptabi na si ꞌre hâimana. Tahawa ãma ꞌre iwata zaꞌra mono norĩ hã te za ãma ꞌre wata zaꞌra, tihâiba uptabi na duré tô sena na.
25 Tawamhã te piꞌõ hã ãne tãma tinha:
— Ĩma waihuꞌu pese di, Messias (Cristu na isisi hã) za we imorĩ na hã. Ta hã wei wisi wamhã, te za uburé ãma wama rowasuꞌu pese zaꞌra.
26 Tawamhã Zezusi hã te oto tãma siwasuꞌu, ãne:
— Wa hã Messias! Wa hã wa aima rowasuꞌu.
27 Tawamhã piꞌõi ma siwasuꞌu ré, ma tô isiré ꞌre inomro mono norĩ hã itẽme aihutu. Tahawa ma tô ãma titobꞌuzu zaꞌra, piꞌõi ma nherẽ, te te robzanhamri ré, te te siwi sõpẽtẽ wa. Tane nherẽ, niꞌwa te te sadanharĩ õ di, piꞌõ ãne hã: “E marĩ, te asima iwẽ.” Duré Zezusi hã niꞌwa te te sadanharĩ õ di, ãne hã: “E marĩ wa, te tãma irobzanha.”
28 Tawamhã piꞌõ hã sisaꞌu ma tô piza hã tirẽ. ꞌRi waꞌõtõ u ma tô mo apâ. Tame ma tô dama rowasuꞌu, ãne:
29 — Maꞌãpé we aiꞌabaꞌréi waꞌaba, aibâ hã asiwi ꞌmadâꞌâ aba da, te te ãma ĩma inharĩ hã uburé tiha te ꞌre iꞌabꞌmanharĩ mono zém na. E õhõtai õ di, Cristu hã.
30 Tahawa ma tô tawairébé ni, ꞌri waꞌõtõ hawimhã. Zezusi isãmrazéb u ma tô aiꞌabaꞌré ni.
31 Taha ré, isiré ꞌre inomro mono norĩ hã sadawa zaꞌréi ãna ma tô nasi tãma nharĩ zaꞌra, ãne:
— Rowahutuꞌwa, marĩ hã ꞌmaiꞌrẽne!
32 Tane nherẽ, Zezusi hã ma tô ãne tãma nharĩ zaꞌra:
— Te iꞌrẽne da hã iré hã ĩsa, aima iwaihuꞌu zaꞌra waꞌaba õ hã.
33 Tahawa, te isiré ꞌre inomro mono norĩ hã sisadanharĩ zaꞌra, ãne:
— E ma tô niꞌwa ĩsa hã tãma ꞌmaiꞌãwisi.
34 Tawamhã Zezusi hã ma tãma waihuꞌu zaꞌra, ãne:
— Ĩsa hã te ꞌre iꞌmanharĩ mono zé, we ĩzatõrĩꞌwa te te sima ꞌre iwẽ mono zé, duré te ꞌrãsutu da, ite romhuri hã.
35 Te ꞌre inharĩ zaꞌra waꞌaba mo, ãne: “Maparane siꞌuiwa na aꞌamo hã siꞌutõrĩ parimhã, amnho hã wa za tehâri zaꞌra ni.” Tane nherẽ, wa za ãne aima waihuꞌu zaꞌra waꞌwa: Maꞌãpé robꞌmadâꞌâ zaꞌra waꞌaba, itehâri da si oto, amnho hã.
36 Niꞌwa amnho tehâriꞌwa hã, tô awaꞌawi tipawaꞌâ te za tiꞌâ. Isimiromhuri hã, dahâimanazé isiꞌutõrĩꞌõ, da te ꞌre sõpẽtẽ zaꞌra mono da. Tawamhã ãne wamhã, amnho ꞌreꞌwa hã duré amnho tehâriꞌwai me, te za siré te te sima ꞌre rowẽ zahuré.
37 Ãne wa, te tô sena, da te ꞌre nharĩ zaꞌra, ãne: “Niꞌwa hã te za aꞌre. Tawamhã ihâiba amo hã te za roptehâ.”
38 Wa tô asatõrĩ zaꞌra waꞌwa, roptehâri zaꞌra waꞌaba da, a norĩ waꞌwa hã iꞌaꞌre zaꞌra waꞌaba õ u, aiwana zaꞌra waꞌaba aimawi norĩ te te iromhuri zaꞌra zéb u. Tawamhã a norĩ waꞌwa hã isimiromhuri zarina uburé marĩ hã te oto aima tihâimana zaꞌra waꞌwa.
39 Tawamhã Samaria ãma ꞌre idasiꞌubumroi mono norĩ hã, daꞌahâ na ma tô Zezusi hã saze zaꞌra ni, piꞌõ te te dama wasuꞌu wa, ãne: “Õ hã te ãma ĩma tinha, uburé marĩ te ꞌre iꞌabꞌmanharĩ mono zém na hã.”
40 Samaria ãma ꞌre idasiꞌubumroi mono hã, Zezusi isãmrazéb u sihutu wamhã, ma tô ãma ropti zaꞌra, aꞌâ iꞌrata sãmra zaꞌra da. Tahawa Zezusi hã ma tô maparane bâtâ na nhamra, tame.
41 Tawamhã daꞌahâ na ma tô aimawi norĩ hã saze zaꞌra ni, isimirowasuꞌu uꞌâbâmhã.
42 Tahawa te piꞌõi ma nharĩ zaꞌra, ãne:
— Ãhã na hã wama iwasuꞌu zaꞌra uꞌâbâp si, wa te oto saze zaꞌra õ di. Wasiꞌuihâ na wa te oto wapari zaꞌra wa, wa saze zaꞌra ni. Tawamhã wa waihuꞌu zaꞌra ni, tô õ hã, Uburé Danhoꞌreptuiꞌwa na hã.
Zezusi hã, apito zadawa zapariꞌwai ꞌra te te ipesezé
43 Tame Zezusi hã maparane bâtâ na hâimana parimhã, ma tô oto mo Galiléia u.
44 Ta hã ma tô ãne hã waihuꞌu siro: “ꞌRe ihâimana uꞌâsi mono zadawa ꞌmahârâꞌwa hã, isiptiꞌai ꞌremhã dama wazéb õ di.”
45 Galiléia u wisi wamhã, tame ꞌre isiꞌubumroi mono norĩ hã ma tô siwi âri wẽ, Pascoa na dato nhisi Zeruzalẽ ãma ihâimana u, siꞌabaꞌréi wa, tame Zezusi hã te te siwi ꞌmadâꞌâ wa, uburé marĩ te te iꞌabꞌmanharĩzé hã.
46 Tawamhã Zezusi hã Cana u ma tô apâ wi, Galiléia ꞌremhã, â nherẽ, uva ꞌrãi waꞌu isé isei uptabi na te te iꞌmanharĩzéb u. Tame te tihâiba, apito zadawa zapariꞌwa Cafarnau ãma ꞌre isãmra mono hã. Isõrõwa ꞌremhã iꞌra hã hâzé na te nomro.
47 Tawamhã Zudéa hawi Galiléia u imorĩ na Zezusihi wasuꞌu te te wapari wamhã, ma tô itẽme mo, te te tiwi rowaptẽrẽ da, Cafarnau u morĩ da, iꞌra hã te te tãma pese da, tihâimanazéb ꞌrãsutu u hâimana wa.
48 Tawamhã Zezusi hã te tãma tinha, ãne:
— Marĩ dama iꞌmanharĩ waihuꞌuꞌõ iwẽ uptabi hã te ꞌre iꞌabꞌmanharĩ mono zé hã ꞌre ꞌmadâꞌâ zaꞌra waꞌaba mono wapsi, te asiwi ꞌre ĩzaze zaꞌra waꞌaba mo.
49 Tawamhã apito zadawa zapariꞌwa hã te tãma tinha, ãne:
— Apito, ãma ĩsiré aimorĩ, ĩꞌra hã tihâimanazé te te ꞌrãsutu õ ré.
50 — Apâ aimorĩ asõrõwa u. Aiꞌra hã rowẽ na te za ꞌre hâimana. — Ãne te Zezusi hã tãma tinha.
Tawamhã ma aibâ hã saze, Zezusi te te tãma inharĩzé hã. Apâ ma tô oto mo, tinhorõwa u.
51 Bâdâdi na hâimana ré, ite romhuriꞌwa norĩ hã ma tô siwi sõpẽtẽ. Ãne te tãma rowasuꞌu zaꞌra:
— Aiꞌra hã dâꞌâ õ di. Rowẽ na te nhamra.
52 Tawamhã tite romhuriꞌwa norĩ hã ma tô sadanharĩ zaꞌra, nimahã bâtâ pibuzém na iꞌra ma, rowẽ mono zô. Ãne ma tô tãma rowasuꞌu zaꞌra:
— Ahâmhâ, misi na bâtâ pibuzéb ãma hâiwahâ, iwaꞌro hã ma tô tãma apa.
53 Tawamhã imama hã ma tô waihuꞌu, tô taha bâtâ pibuzéb ãma, Zezusi hã te te tãma inharĩ na hã, ãne: “Aiꞌra hã rowẽ na te za ꞌre hâimana.” Tahawa, aibâ ma tô saze Zezusi hã. Duré uburé isõrõwa ꞌre, ꞌre isiꞌubumroi mono norĩ zama, ma saze zaꞌra.
54 Ã hã maparane ãma, marĩ dama iꞌmanharĩ waihuꞌuꞌõ hã ma tô Zezusi hã ꞌmanha, Zudéa hawi morĩ parimhã, Galiléia u hã.
