Zuã 9:1-41
9 Tawamhã Zezusi hã morĩ ré, ma tô ꞌmadâ, aibâ poto hawim haré itobꞌa hã.
2 Tahawa isiré ꞌre inomro mono norĩ hã ma tô ãma siwi sadanha, ãne:
— Rowahutuꞌwa, e ꞌwa hã ma tô tiwasédé hã ꞌmanha, ã hã aibâ tobꞌa na ipoto da hã. E tô ã hã aibâ, e duré niwamhã imama norĩ.
3 Tahawa Zezusi hã ma ãma sadaꞌâbâ zaꞌra, ãne:
— Mare di. Aibâ hã tiwasédé te te ꞌmanharĩ wab õ di, duré imama norĩ zama. ꞌRe ihâimana uꞌâsi mono hã tiwaihuꞌu pe te te ãma hâiꞌré da, ma tô tobꞌa na podo.
4 Rowaꞌa ré, wa za we ĩzatõrĩꞌwa te romhuri hã wa te ꞌre ꞌmanharĩ zaꞌra. Mara we iwisizé hã romhuture di oto. Tawamhã niꞌwa hã te te oto romhuri waihuꞌu õ di za.
5 Tiꞌai ãma ꞌre ĩnhamra mono ré hã, wa hã dama rowaꞌaꞌwa, tiꞌai ãma ꞌre idahâimana zaꞌra mono norĩ ma hã.
6 Ãne te te sina nharĩ parimhã, Zezusi hã ma tô tizadaipro time tiꞌai u. Taha na ma tô tiꞌa hã warutu. Taha pari ma tô taha na aibâ hã tõmo uꞌré.
7 Ãne te tãma tinha:
— Mo oto aimorĩ, asitõmo upsõ da, Siloé na â ubumrozé isisi ãma.
(Siloé na â ubumro nhisi hã “Da te isatõrĩ” te wasuꞌu.)
Tahawa, aibâ hã tamomo ma tô mo. Ma tô sitõmo upsõ. Sitõmo upsõi wamhã, tõmo wẽ di oto. Taha pari te oto mo, ꞌri tẽme.
8 Isababa isõrõwa norĩ hã te te ꞌre daꞌawari mono ré, te te siwi ꞌre iꞌmadâꞌâ mono hã ma tô ãne ãma sisadanharĩ zaꞌra:
— E ã hãi õ di aibâ hã, aré ꞌre isãmra mono hã te te ꞌre daꞌawari mono da.
9 Tawamhã niꞌwam norĩ hã ma tô nasi nharĩ zaꞌra, ãne:
— Tô õ hã.
Duré niꞌwam norĩ hã ma tô ãne nasi nharĩ zaꞌra:
— Mare di. Taré isine hã.
Tane nherẽ, siꞌuihâ na sadawa zaꞌréi ãna, ma tô nasi siwasuꞌu dama, ãne:
— Tô wa hã. Ĩtobꞌa di aré tô.
10 Tahawa te siwi sadanha, ãne:
— E niha ma tô atõmo wẽ, tawamhã.
11 Tawamhã te tãma siwasuꞌu zaꞌra, ãne:
— Aibâ hã Zezusi na isisi, ma tô tizadaipro na tiꞌa hã ĩzada waiꞌo. Ta hã ĩtõmo ãma ma tô ĩma ahi. Taha pari ma tô ĩma tinha, Siloé â ubumrozéb u ĩmorĩ da, ĩsitõmo upsõ da. Tamomo wa tô mo. Wa tô ĩsitõmo upsõ. Tahawa wa tô oto robꞌmadâ.
12 Tawamhã ma tô duré sô sadanharĩ zaꞌra, ãne:
— E mahãta tawamhã, ta hã aibâ.
Ma ãma sadaꞌâbâ zaꞌra, ãne:
— Me. Te waihuꞌu õ di.
Farizeu norĩ hã aibâ itobꞌa, Zezusi te te ipe, te te siwi isadanharĩzé
13 Tawamhã farizeu norĩ u ma tô aibâ hã dasiwi saprõni ni, tobꞌa na aré ꞌre isãmra mono hã.
14 Sabadu bâtâ ꞌre, Zezusi hã ma tô tizadaipro na tiꞌa hã waiꞌo, aibâ te te ãma tõmo uꞌréi wa, te te ãma ito pesezé hã.
15 Tawamhã farizeu norĩ zama ma tô duré siwi sadanha, niha to pese zô. Ãne te tãma siwasuꞌu zaꞌra:
— Tizadaipro na ma tô tiꞌa hã ĩzada waiꞌo. Taha na ma ãma ĩtõmo uꞌré. Taha pari wa tô ĩsitõmo upsõ. Tahawa, ãhã na hã wa oto robꞌmadâ.
16 Tawamhã nima norĩ farizeu norĩ hã ma tô nharĩ zaꞌra, ãne:
— Ta hã aibâ hã ꞌRe ihâimana uꞌâsi mono hawib õ di, sabadu na roti zahi hã te te wazéb õ wa.
Tane nherẽ, nima norĩ hã ma tô duré ãne nharĩ zaꞌra:
— E niha te za niꞌwa hã ꞌre morĩ wasété nherẽ, bété ꞌmanha, marĩ dama iꞌmanharĩ waihuꞌu õ hã.
Ãne uꞌâbâ ma tô dasima aipoꞌo ni.
17 Tahawa, farizeu norĩ hã te duré aibâ hã siwi sadanha, ãne:
— Te asiwasuꞌu, te te iꞌato pese na hã. E niha õ hã aibâ ãma irosaꞌrada hã.
Aibâ ma duré sadaꞌâbâ zaꞌra, ãne:
— Õ hã, ꞌRe ihâimana uꞌâsi mono zadawa ꞌmahârâꞌwa.
18 Tane nherẽ, Zudeu norĩ hã ãma simizaze zaꞌra õ di, tobꞌa na aré ꞌre isãmra mono na hã duré ito pese zém na hã. Tahawa ma tô imama norĩ zô tihârâ zaꞌra.
19 Tawamhã simasisi zahuré wamhã, ma tô ãne ãma sadanharĩ zaꞌra:
— Ã hã aibâ hã e aiꞌra waꞌwa. Te u iwasuꞌu waꞌwa, tobꞌa na ipoto na hã. E niha te tawamhã oto robꞌmadâ.
20 Tawamhã imama norĩ hã te ãne tãma wasuꞌu zaꞌra:
— Wama waihuꞌu pese di, waꞌra na hã, duré tobꞌa na ipoto na hã.
21 Tane nherẽ, wa te waihuꞌu õ di, niha te te oto irobꞌmadâꞌâ na hã duré niꞌwa te te ito pese na hã. Ãma wahub zaꞌẽtẽ di. Tahawa, maꞌãpé asiwi sadanharĩ aba, ꞌrâwi siwasuꞌu da.
22 Zudeu norĩ ma rotiꞌwa norĩ ma, pahi te, ma tô imama norĩ hã ãne nharĩ zahuré. E marĩ wa. Zudeu norĩ ma rotiꞌwa norĩ hã te te sima rowairébé zaꞌra wa, niꞌwa hã, Zezusi Danhoꞌreptuiꞌwa na te te wasuꞌu wamhã, za Zudeu norĩ te rowahutuzém hawi te te siwi iwazere na hã.
23 Tahawa, ma tô ãne imama norĩ hã nharĩ zahuré: “Asiwi sadanharĩ aba. Ãma wahub zaꞌẽtẽ di.”
24 Tawamhã maparane ãma farizeu norĩ hã ma tô sô tihârâ zaꞌra, aibâ tobꞌa na aré ꞌre isãmra mono zô. Ãne te duré siwi sadanha:
— Maꞌãpé, tô sena wama asiwasuꞌu zaꞌra, ꞌRe ihâimana uꞌâsi mono nhisi na. Wama waihuꞌu pese zaꞌra di, Zezusi hã aibâ ꞌre imorĩ wasédé.
25 Tawamhã aibâ hã ma sadaꞌâbâ zaꞌra, ãne:
— Ĩma waihuꞌu õ di, wasété na ꞌre imorĩ na hã duré niwamhã e mare di. Ãhã si ĩma waihuꞌu pese di: Ĩtobꞌa di aré. Tane nherẽ, wa oto robꞌmadâ.
26 Tawamhã apâ te duré siwi sadanha, ãne:
— E marĩ ma tô aima ꞌmanha. E niha ma ato pese.
27 Tawamhã aibâ hã te tãma nharĩ zaꞌra, ãne:
— Wa tô aima ĩsiwasuꞌu pari zaꞌra waꞌwa. Tane nherẽ, asiwi ĩwapari aba õ di. E marĩ da, wa za duré aima ĩsiwasuꞌu zahu zaꞌra waꞌwa. E a norĩ waꞌaba zama saze zaꞌra waꞌaba da bâ.
28 Tawamhã te te siwi sadawa ꞌrui wa, ma tô ãne tãma nharĩ zaꞌra:
— Aiwétési te isirã zarina ꞌre aimo. Wa norĩ hã Mozésihi zazeiꞌwa.
29 Wama waihuꞌu pese zaꞌra di, ꞌRe ihâimana uꞌâsi mono hã Mozésihi ma, te te ꞌre irobzanhamri mono na hã. Tazahã, ã hã aibâ hã wama waihuꞌu zaꞌra õ di, e ma hawi te wei mo.
30 Tawamhã aibâ hã ma duré sadaꞌâbâ zaꞌra, ãne:
— E niha merẽ iwaihuꞌu õ! Nima hawi we imorĩ na hã aima waihuꞌu zaꞌra waꞌaba õ nherẽ, ma tô ĩto pese, ta hã.
31 Uburé wama waihuꞌu pese zaꞌra di, ꞌRe ihâimana uꞌâsi mono hã wasété na ꞌre inomro mono te te ꞌre iꞌawapari mono õ na hã. Tazahã, te te ꞌre awapari, te te ꞌre iwazéb zaꞌra mono norĩ hã, duré isimiroti te te ꞌre iꞌmadâꞌâ pese zaꞌra mono norĩ zama.
32 Ropoto naꞌrata hawim haré, niwa niꞌwa hã rowasuꞌu te te wapari õ di, niꞌwa hã tobꞌa na poto nherẽ, da te ito pese na hã.
33 Ã hã aibâ hã ꞌRe ihâimana uꞌâsi mono hawib õ ꞌwaꞌâhã, ãne hã te te aré ꞌmanharĩ waihuꞌu õ di.
34 Tawamhã farizeu norĩ hã ma tô tãma nharĩ zaꞌra, ãne:
— Aiwasété zaꞌẽtẽ ré, ma tô aipo. E niha te tane nherẽ asima iwẽ, wama asanho zaꞌra da hã.
Tahawa ma tô oto siwi waze, rowahutuzém hawimhã.
Dapẽꞌẽ ꞌre datobꞌa na ꞌre idanomro mono zém na, Zezusi hã te te inharĩzé
35 Tawamhã Zezusi hã ma tô waihuꞌu, aibâ tobꞌa na aré ꞌre isãmra mono hã rowahutuzém hawi farizeu norĩ te te siwi iwazere na hã. Tahawa ma tô sô rĩni. Te te sõpẽtẽ wamhã, ma tô ãne tãma tinha:
— E ma isaze, Tiꞌai ãma Dasiré Ipodo hã.
36 Tawamhã aibâ hã ma sadaꞌâ, ãne:
— Apito, e ꞌwa hã Tiꞌai ãma Dasiré Ipodo. Maꞌãpé ĩma wasuꞌu na, te saze da.
37 Tawamhã Zezusi hã te tãma siwasuꞌu, ãne:
— Ma tô iꞌmadâ. Ta hã te aima robzanha.
38 Tahawa te aibâ hã Zezusihi ma tinha, ãne:
— Apito, wa asaze.
Tawamhã hiꞌrãtitõ ma tô nhamra. Zezusihi ãma te tiwata.
39 Taha pari, te Zezusi hã dama tinha, ãne:
— Dahâimanazéb zarina te daꞌãma ꞌre arowairébé mono da, wa tô we datẽme mo tiꞌai u, itobꞌa norĩ hã ꞌre to pese zaꞌra mono da, duré tõmo wẽ na ꞌre ihâimana zaꞌra mono hã ꞌre tobꞌa zaꞌra mono da.
40 Tawamhã farizeu norĩ hã ãne te te wapari zaꞌra wa, ma tô ãne siwi sadanha:
— E tawamhã wa norĩ zama watobꞌa zaꞌra di.
41 Tahawa te Zezusi hã tãma nharĩ zaꞌra, ãne:
— Atobꞌa zaꞌra waꞌaba ꞌwaꞌâhã, ate zaꞌra waꞌwa iꞌupa hã aré hâimana õ di. Tane nherẽ, te inharĩ zaꞌra waꞌwa iꞌatõmo wẽ zaꞌra waꞌaba na hã. Tahawa iꞌupa zaꞌra aba zé hã te zahadu aima ꞌre hâimana uꞌâsi zaꞌra waꞌwa.
