Zozué 1:1-18
1 Tawamhã Mozési, Uburé Danhibꞌapito ma romhuriꞌwa, dâꞌâ parimhã, ma tô ꞌRe ihâimana uꞌâsi mono hã ipawaptoꞌwai ma, Zozué na isisi, Nuhu ꞌra ma tinha ãne:
2 — Ĩma romhuriꞌwa Mozési hã ma tô dârâ. Tahawa te za ãhã na a hã, uburé Izaraéu nhihudu norĩ me asima irobꞌubumro zaꞌra waꞌwa za, Zodã pa panhoꞌu â zaꞌẽtẽ na saprĩ zaꞌra waꞌaba da, tiꞌa za te aima isõmri zaꞌra waꞌaba zéb u asisisi aba da.
3 Mozésihi ma, te iropisutuzéb zarina, wa za uburé pese tiꞌa za ꞌre iwatiꞌi zaꞌra waꞌaba mono hã aima sõmri zaꞌra waꞌwa.
4 Ãne asiptiꞌa zadaꞌré mono hã za: Hâiwa nhimire niwĩmhã, rop si ꞌre irosaꞌwari mono u isadaꞌré hã; hâiwa nhimiꞌe niwĩmhã, ẽne Libanu na isisi u isadaꞌré hã; bâtâ pusizém niwĩmhã, panhoꞌu â isaꞌẽne Eufrati na isisi u isadaꞌré hã; uburé hitita norĩ nhiptiꞌai u zama isadaꞌré hã; duré bâtâ zasizém niwĩmhã â poré u isadaꞌré hã.
5 Tawamhã niwamhã da te aiꞌãma iꞌaiꞌuté da hã mare di za. E marĩ wa. Wa hã za asiré ꞌre ĩhâimana uꞌâsi mono wa, Mozésihi siré ꞌre ĩhâimana mono ne. Niwamhã te airẽme õ di za.
6 Asiptete, duré asibꞌru na, a hã za ã hã aꞌuwẽ norĩ hã simroi mono dâꞌâsina, tiꞌa te te siwi âri da hã, ihiꞌrata norĩ ma, te tãma ãma iropisutu zaꞌra hã.
7 Tô asiptete, sada asibꞌru uptabi duré. Taré oto ãma pibui pese, ĩma romhuriꞌwa Mozési, ĩnhimiroti uburé te te aima isõmrizéb zarina si ãma ꞌre aihâimana mono da. Ĩnhimiroti te te aima isõmri wi hã ꞌre aipizari mono tõ. Tawamhã ãne wamhã nimomo ꞌre ane mono sidâpâsi, te za ꞌre iꞌaihâimana mono wẽ zé hã asina ꞌre iꞌaꞌuwaimrami mo za.
8 Maꞌãpé ãma irobꞌuiꞌéré na hã õne uꞌâ ãma ꞌre aimreme mono. Bâtâ na hã duré mara na hã ãhã ibaihâ na ãma ꞌre romnhoré mono, ãma ꞌre asiptete mono wa, uburé ãma irobꞌuiꞌéré zarina asina ãma ꞌre uwaimrami mono da. Tawapsi, te za ꞌre iꞌaihâimana mono wẽ zé hã asina ꞌre iꞌuwaimrami mo.
9 Ĩnhimirowaihuꞌu na aima hã, maꞌãpé ãma aipoꞌre puꞌu: “Asiptete, duré asibꞌru na! Aiwi robzeiꞌõ tõ, duré aipahi tõ! E marĩ wa. Wa hã Uburé Danhibꞌapito, ate ꞌRe ihâimana uꞌâsi mono, nimomo ꞌre ane mono sidâpâsi, wa za asiré ꞌre ĩhâimana.”
Zodã pa na Izaraéu nhihudu norĩ te te saprĩ zaꞌra da, te te sima irobꞌubumro zaꞌra zé wasuꞌu
10 Tawamhã Zozué te Izaraéu nhihudu norĩ ꞌrãnhoꞌõmo norĩ ma waihuꞌu zaꞌra ãne:
11 — Aꞌuwẽ norĩ romhâ ꞌmanharĩ na ꞌri te te sima isõré mono waꞌwaibaba, maꞌãpé ropéi waꞌaba mono, ãne tãma waihuꞌu zaꞌra waꞌaba mono da: “Dasa norĩ hã maꞌãpé asiwi ubumroi waꞌaba mono, siꞌubdatõ bâtâ na ã hawimhã za aiwairébé aba wa, Zodã pa â na saprĩ zaꞌra waꞌaba da, Uburé Danhibꞌapito ate ꞌRe ihâimana uꞌâsi mono ꞌwa, tiꞌa za te te aima isõmri zaꞌra waꞌwa, asiwi âri aba da hã.”
12 Tawamhã Zozué te oto Rubẽhẽ nhihudu norĩ ma, Gadihi nhihudu norĩ ma, duré Manaséhé nhihudu norĩ bâtâ pusizém niwĩ ꞌre ihâimana zaꞌra mono norĩ ma, nharĩ zaꞌra ãne:
13 — Maꞌãpé Uburé Danhibꞌapito ma romhuriꞌwa, Mozésihi nhimirowaihuꞌu na hã ãma aipoꞌre puꞌu zaꞌra waꞌaba: “Uburé Danhibꞌapito, wate ꞌRe ihâimana uꞌâsi mono, te za tiꞌa aima sõmri zaꞌra waꞌwa, iwa ꞌre aihâimana zaꞌra waꞌaba mono da, asima iwẽ na.
14 Tawamhã Mozési, tiꞌa te te aima isõmri zaꞌra waꞌaba ãma te za piꞌõ norĩ ate waꞌwa hã, duré aiꞌra norĩ waꞌwa hã ꞌre hâimana zaꞌra za. Asimizama zaꞌra waꞌwa hã te za ãme isiré zaꞌra hã ꞌre hâimana zaꞌra, Zodã pa zara niwĩ bâtâ pusizém niwĩmhã. Aibâ norĩ si te za daꞌwapéiꞌwa da tinhimnhiꞌã hã waibu zaꞌra, tisiré Izaraéu nhihudu norĩ nhowa te te saprĩ zaꞌra da panhoꞌõmo na hã te te pawapto zaꞌra da dasiꞌwapé na hã.
15 Tawamhã Uburé Danhibꞌapito, wate ꞌRe ihâimana uꞌâsi mono, tiꞌa za te te tãma isõmri zaꞌra na hã te za ãma ate zaꞌra, iwa ꞌre hâimana zaꞌra mono da oto. Ãne niwa marĩ hâimana wamhã, te za asiptiꞌai u apâ we aiꞌabaꞌréi waꞌwa, za iwa ꞌre aihâimana zaꞌra waꞌaba mono da, Mozési, ꞌRe ihâimana uꞌâsi mono ma romhuriꞌwa, ãme te te aima isõmri zaꞌra waꞌaba ãma, Zodã pa â bâtâ pusizém niwĩmhã.”
16 Tawamhã ta norĩ hã ma tô ãma sadaꞌâbâ zaꞌra ãne, Zozué hã:
— Uburé wama iꞌru zaꞌra zé hã wa za ꞌmanharĩ zaꞌra ni tô. Duré ꞌre wazatõrĩ zaꞌra mono sidâpâsi, wa za tô ꞌre wanomro.
17 Õne uꞌâ Mozésihi mreme wa te ꞌre iwapari pese zaꞌra mono ne, wa za tô duré aimreme zama wa te ꞌre wapari pese zaꞌra. Uburé Danhibꞌapito, ate ꞌRe ihâimana uꞌâsi mono, za aime ꞌre hâimana mono da, wa wasima wẽ zaꞌra ni, Mozésihi siré ꞌre ihâimana mono ne.
18 Tawamhã duré niꞌwa hã te te iꞌaimreme wapari õ zarina, siwaꞌru asimirowaihuꞌu wi sipiꞌrai wamhã, te za wĩrĩ ni. Tahawa asiptete na si, duré asibꞌru na si hã aihâimana mono za.
