Zozué 10:1-43
10 Tawamhã apito Adoni-Zédéqui Zeruzalẽ ãmamhã*, ma tô Zozué ꞌri nhoꞌu Ai te te iꞌârizé hã, uburé pese te te iꞌri prubzé hã wapa, duré ite apito te te iwĩrĩzé hã. Tawamhã tô õne hã ma tô duré wapa, Zerico ma iromhâimanazé hã, duré apito ma. Duré Gibiã norĩ, Izaraéu nhihudu norĩ me dasiꞌwapéi ãna dasiré ꞌre idahâimana zaꞌra mono zém na isisaze zaꞌra zé hã ma tô waihuꞌu, duré Izaraéu nhihudu norĩ wazari ꞌre ihâimana zaꞌra mono zéb zama.
2 Tawamhã Zeruzalẽ ãma ꞌre ihâimana zaꞌra mono norĩ hã ma tô tipahi pese zaꞌra, ꞌri nhoꞌu Gibiã saꞌẽtẽ uptabi wa, ꞌri nhoꞌu hã dama iꞌrãnhoꞌõmo nhimiꞌmadâꞌâzéb ré dama saꞌẽtẽ na ꞌre ihâimana zaꞌra mono ne. Ai nhipai u saꞌẽtẽ uptabi di. Duré ite dasiꞌwapéi ꞌmanharĩꞌwa norĩ aibâ norĩ hã isibꞌru si.
3 Tahawa ma tô apito Adoni-Zédéqui rowasuꞌuꞌwa norĩ satõrĩ zaꞌra, ãne na romreme ré siꞌabaꞌré da, Hebrõ na ꞌri nhoꞌõmo nhisi ãma apito Hoãhã u, Zamute na ꞌri nhoꞌõmo nhisi ãma apito Pirãhã u, Laqui na ꞌri nhoꞌõmo nhisi ãma apito Zapiaha u, duré Égrõ na ꞌri nhoꞌõmo nhisi ãma apito Débihi u:
4 — We ĩtẽme aiꞌabaꞌréi waꞌaba, Gibiã norĩ za wa te iwanoꞌõ na asiwi ĩpawapto waꞌaba da. E marĩ wa. Õ norĩ hã, Zozuéhé me sisaze zaꞌra wa, siꞌwapéi ãna za siré ꞌre ihâimana zaꞌra mono na hã.
5 Tawamhã amoreu norĩ te 5 na apito ma tô siꞌrãꞌõtõ, Zeruzalẽ hawimhã, Hebrõ hawimhã, Zamute hawimhã, Laqui hawimhã, duré Égrõ hawimhã. Ta norĩ hã ma tô tite dasiꞌwapéi ꞌmanharĩꞌwa norĩ hã ꞌrãꞌõtõ zaꞌra. Ma tô duré Gibiã hã siwi uirĩ. Tahawa, ma tô siwi sahu.
6 Tawamhã ma tô Gibiã norĩ, Zozuéhé ma Gilga ãma ꞌri nhoré u ãne romreme hã tãma sõmri zaꞌra:
— Warẽme zaꞌra tõ! We aimorĩ aiꞌabaꞌré na, wapawaptob zaꞌra da, duré wanhoꞌreptu zaꞌra da! Uburé apito amoreu norĩ hã ẽtẽ ãma ꞌre ihâimana zaꞌra mono hã ma tô wazada siꞌrãꞌõtõ!
7 Tawamhã Zozué, tite dasiꞌwapéi ꞌmanharĩꞌwa norĩ me Gilga hawi ma tô uburé tipra.
8 Tawamhã Uburé Danhibꞌapito, te Zozuéhé ma tinha, ãne:
— Ã hã apito norĩ ma hã aipahi zaꞌra tõ. Wa hã wa tô aima sõmri siromo zaꞌra, asibꞌratamhã. Tahawa ta norĩ hã tihâiba na te te aima waꞌrãmi waihuꞌu zaꞌra õ di za.
9 Tawamhã Gilga hawi Zozué norĩ oto wairébé wamhã, ma tô marabâre sisarina aiꞌabaꞌré. Tahawa, ma tô simizaꞌrese zaꞌra õ ré siwi sahu.
10 Tawamhã Uburé Danhibꞌapito, amoreu norĩ ꞌrãi waihuꞌu ãna hâimana zaꞌra da hã ma tô tãma ꞌmanharĩ zaꞌra. Ãne ma tô apito norĩ ãmamhã Izaraéu nhihudu norĩ hã ãma aiꞌuté zaꞌra, Gibiã ãma. Bete-Horõ nhoꞌõmo bâdâdi iꞌrãsipra na isarina sisaꞌrei mono sina, ma te te pãrĩ, Azeca na ꞌri nhoꞌõmo nhisi u bâdâdi na, duré Maqueda na ꞌri nhoꞌõmo nhisi u bâdâdi na zama.
11 Tawamhã Izaraéu nhihudu norĩ ma, Bete-Horõ bâdâdi iꞌrãsipra na Azeca u tãma sisaꞌrei mono wamhã, ma tô Uburé Danhibꞌapito hâiwa hawi tãzâ hã isitobꞌru norĩ nhisiwimhã saꞌwa. Tahawa ma tô õne haré aiꞌutõ. Tãnhama na daꞌahâ uptabi na ma tô aiꞌutõrĩ ni, Izaraéu nhihudu norĩ te te idanhimro nhipai u hã.
12 Tawamhã Izaraéu nhihudu norĩ ma, amoreu norĩ ãma Uburé Danhibꞌapito te te ãma iꞌaiꞌuté zaꞌra zé te te tãma isõmri zaꞌra zé bâtâ na, ma tô Zozué hã tãma tinha, Izaraéu nhihudu norĩ nhoꞌa, ãne:
“Bâdâ, maꞌãpé Gibiã nhisi nhoꞌõmoi baba asimizazâri!Duré aꞌamo, maꞌãpé Aizarõ na romharé nhisi nhoꞌõmoi baba asimizazâri!”
13 Tawamhã bâdâ hã ma tô mazazâ. Duré aꞌamo zama ma tô mazazâ, tinhitobꞌru norĩ na aꞌuwẽ isiꞌruiwaꞌâbâ zaꞌra zéb u.
Ãhã na ãma irobꞌuiꞌéré hã te Zasa na ibaihâ nhisi ꞌremhã tihâiba.
Tawamhã ma tô hâiwa nhoꞌõmo mazazâ bâdâ hã. Tahawa ma tô duré misi bâtâ wahuré na timorĩzéb upana hã tihâiba.
14 Niwamhã taha bâtâ na ne iwana hã ihâimana õ, duré niwamhã za ãne hã ihâimana zahu õ, Uburé Danhibꞌapito aibâ mreme te te iwapari ne hã. Ãne ma tô tiromhâiba, Uburé Danhibꞌapito, Izaraéu nhihudu norĩ ãma siꞌwapéi wa.
15 Ãne pari, ma tô Zozué norĩ, tite dasiꞌwapéi ꞌmanharĩꞌwa norĩ me hã apâ aiꞌabaꞌré, Gilga ãma romhâ ꞌmanharĩ na ꞌri nhoré u hã.
16 Tahawa, 5 na apito norĩ ma tô aré dawi aimani zaꞌra, Maqueda ãma ẽtẽ wa abꞌre ꞌre simaꞌuri zaꞌra da.
17 Tane nherẽ, ma tô dasiwi upsibi nhamra ni. Tawamhã Zozuéhé ma, ma tô duré wasuꞌu ni, isimaꞌuri zaꞌra zé hã.
18 Tawamhã Zozué te ãne dama tinha:
— Nima norĩ ẽtẽ tõmo wawẽ hã maꞌãpé pizari zaꞌra waꞌaba mono, ẽtẽ na abꞌre dawa u. Duré iꞌmairobꞌmadâꞌâ zaꞌra waꞌaba da hã niha asiꞌmanhimizusi aba.
19 Tane nherẽ, tamemhã asimroi waꞌaba tõ. Aiꞌabaꞌréi waꞌaba asitobꞌru zarina. Dazaꞌu isiꞌubumro norĩ ꞌwapé zaꞌra waꞌaba. Apâ tite ꞌri nhoꞌõmo u siꞌabaꞌré da hã taré ꞌmadâꞌâ zaꞌra waꞌaba tõ, Uburé Danhibꞌapito wate zaꞌra ꞌRe ihâimana uꞌâsi mono te te aima sõmri zaꞌra waꞌaba wa, siꞌutõrĩ pese da hã.
20 Tawamhã Zozué, dasiꞌwapéi ꞌmanharĩꞌwa Izaraéu nhihudu norĩ me ma tô te te siwi pãrĩ uburé, aré te te siwi iꞌuprosizéb u. Dawi isimani zaꞌra norĩ si ma tô tite ꞌri nhoꞌõmo ꞌwawi waꞌra pese ꞌremhã dawi tihâimana zaꞌra.
21 Tawamhã dasiꞌwapéi ꞌmanharĩꞌwa Izaraéu nhihudu norĩ, ma tô uburé rowẽ na hã apâ sina siri zaꞌra, Maqueda ãma romhâ ꞌmanharĩ na ꞌri nhoré u hã, Zozué ihâimanazéb u. Tawamhã oto niꞌwa hã tinhiptete zarina te te nharĩ waihuꞌu õ di, Izaraéu nhihudu norĩ da, iromhâimanazéb da hã.
22 E marĩ da te za bété ãne ꞌre aihâimana zaꞌra waꞌaba mo. Taha pari te Zozué hã dama tinha, ãne:
— Ẽtẽ wa abꞌre zadawa nhiti ẽne asiwi saꞌréi waꞌaba. Duré 5 na apito norĩ hã we ãwa asiwi simroi waꞌaba mono.
23 Tawamhã ma tô tô ãne hã tãma ꞌmanharĩ zaꞌra. Zeruzalẽ ãma apito, Hebrõ ãma apito, Zamute ãma apito, Laqui ãmap te hã, duré Égrõ ãmap te hã, ẽtẽ na abꞌre hawi te te siwi sani zaꞌra wamhã,
24 ma tô Zozuéhé tẽmemhã te te siwi simro. Tahawa, Zozué te sô tihârâ zaꞌra, aibâ norĩ Izaraéu nhihudu zô. Duré isiré isiꞌabaꞌré norĩ ma hã ma tô tãma waihuꞌu zaꞌra, dasiꞌwapéi ꞌmanharĩꞌwa norĩ ꞌmadâꞌâꞌwai ma, ãne:
— We ãwa aiꞌabaꞌréi waꞌaba, ã hã apito norĩ butu nhisiwi, aipara hã sõré waꞌaba da.
Tahawa ma tô ãne ta norĩ hã tãma ꞌmanharĩ zaꞌra.
25 Tawamhã Zozué te duré ãne tãma nharĩ zaꞌra:
— Aipahi zaꞌra waꞌaba tõ. Duré aiwi robzeiꞌõ zaꞌra waꞌaba tõ. Asiptete zaꞌra waꞌaba, duré asibꞌru zaꞌra waꞌaba. E marĩ wa. Uburé Danhibꞌapito te za ãne hã tinhitobꞌru norĩ ma te te ꞌre abꞌmanharĩ, uburé za asiwi ꞌre iꞌwapé zaꞌra waꞌaba mono norĩ ma.
26 Tawamhã Zozué ma tô apito norĩ hã simro. Ma tô duré wede 5 na isimasam na hâiwi sasõmri zaꞌra. Tahawa, ãma imara zaꞌra zéb u ma tô hâiwim haré amnhatã uꞌâsi.
27 Tawamhã oto bâdâ zébré wamhã, ma tô Zozué hã dama ꞌru zaꞌra, wede hawi, da te dasiwi wamirĩ wa, duré da te dasiwi sãmra da, ẽtẽ na abꞌre wa, dawi isimaꞌuri zaꞌra zéb ꞌre. Tawamhã ẽtẽ tõmo wawẽ norĩ ma tô abꞌre zadawa ãma siwi saꞌra. Ta hawim haré te zahadu ãhã na zama ꞌre simiꞌwara uꞌâsi, tamemhã.
Zozué te te duré daꞌãma iꞌaiꞌuté hâiba amo zé wasuꞌu
28 Tawamhã Zozué, to taha bâtâ na Maqueda te te sahui wamhã, ma tô tiꞌâ. Apito ma tô duré tiwĩ. Duré uburé ꞌri nhoꞌõmo wa, ꞌre ihâimana zaꞌra mono norĩ hã ma tô uprosi. Tahawa, niꞌwa hã hâiba ré hâimana õ di. Ãne ma tô Zerico ãma apito ma, te te iꞌmanharĩzém ne hã ꞌmanha, Maqueda ãma apito ma hã.
29 Taha pari, Zozué, tite dasiꞌwapéi ꞌmanharĩꞌwa norĩ me ma tô aiꞌabaꞌré, Maqueda hawi, Libna na ꞌri nhoꞌõmo nhisi u hã. Tawamhã ma tô ta norĩ zama sahu zaꞌra.
30 Tawamhã Uburé Danhibꞌapito hã, ꞌri nhoꞌõmo ãma, duré apito ãma te te ãma aiꞌuté zaꞌra da hã ma tô tãma sõmri zaꞌra, Izaraéu nhihudu norĩ ma. Tahawa ma tô uburé iwa ꞌre ihâimana zaꞌra mono norĩ hã siwi uprosi. Zerico ãma apito ma te te tãma iꞌmanharĩ zaꞌra ne, ma tô Libna ãma apito ma hã siwi robꞌmanha.
31 Taha pari, Zozué norĩ tite dasiꞌwapéi ꞌmanharĩꞌwa norĩ me ma tô Libna hawimhã aiꞌabaꞌré, Laqui u hã. Tawamhã ꞌri nhoꞌu te te siwi uirĩ wamhã, ma tô duré siwi sahu.
32 Tawamhã maparane bâtâ ãma dasiꞌwapéi ãmamhã, ma tô Uburé Danhibꞌapito, Izaraéu nhihudu norĩ ma hã sõmri zaꞌra, Laqui ãma te te ãma iꞌaiꞌuté zaꞌra zéb da hã. Libna ma, te te iꞌmanharĩ zaꞌra zém ne, ma tô duré uburé siwi daꞌuprosi, Laqui ãmamhã.
33 Tawamhã apito Horã, Geze na ꞌri nhoꞌõmo nhisi te hã ma tô watobro, Laqui te te pawaptob da hã. Tane nherẽ, ma tô Zozué hã ãma aiꞌuté apito ãmamhã, duré isibꞌaꞌuwẽ norĩ ãmamhã. Niꞌwa hâiba ré hã te te rẽme õ di.
34 Tawamhã Zozué norĩ, tite dasiꞌwapéi ꞌmanharĩꞌwa norĩ me ma tô Laqui hawimhã aiꞌabaꞌré, Égrõ u. Sihutu wamhã, ma tô ꞌri nhoꞌu siwi uirĩ. Ma tô duré ta hã siwi sahu.
35 Tahawa, ma tô duré tô taha bâtâ na siwi tiꞌâ. Tawamhã Laqui ma te te iꞌmanharĩ zaꞌra ne, ma tô duré uburé pese siwi daꞌuprosi.
36 Tawamhã Zozué norĩ, tite dasiꞌwapéi ꞌmanharĩꞌwa norĩ me ma tô Égrõ hawimhã aiꞌabaꞌré, ꞌri nhoꞌu Hebrõ u. Tahawa ma tô duré siwi sahu, ta norĩ hã.
37 Ma tô duré siwi tiꞌâ. Apito hã ma tô duré siwi tiwĩ. Duré Hebrõ ꞌre, ꞌre idahâimana zaꞌra mono norĩ zama ma tô siwi uprosi, iwaptoma ꞌre idahâimana zaꞌra mono norĩ zama. Tawamhã Zozué, ꞌri nhoꞌu te te siwi iprub da hã ma tô tiꞌru, Égrõ ma te te iꞌmanharĩ ne, niꞌwa hã hâiba ré hã hâimana ãna.
38 Taha pari Zozué norĩ, tite dasiꞌwapéi ꞌmanharĩꞌwa norĩ me apâ siꞌabaꞌréi wamhã, ma tô siwi sahu, Débi na ꞌri nhoꞌõmo nhisi hã.
39 Tawamhã ma tô duré ꞌri nhoꞌu siwi tiꞌâ, isibꞌapito zama, duré uburé iwaptoma ꞌri nhoꞌõmo norĩ zama. Tawamhã ta norĩ ꞌri nhoꞌõmo mono ꞌre, ꞌre idahâimana zaꞌra mono norĩ hã ma tô uburé siwi uprosi. Ãne ma tô Zozué, Débihi ma hã ꞌmanha, duré ite apito ma hã, Hebrõ ma te te iꞌmanharĩ ne hã, duré Libna ãma apito norĩ ma te te iꞌmanharĩ zaꞌra ne hã.
40 Ãne ma tô Zozué hã uburé tiꞌa norĩ ãmamhã aiꞌuté zaꞌra, ẽtẽ ãma apito norĩ ꞌre ihâimana zaꞌra mono ãmamhã, duré hâiwa nhimire niwĩ norĩ ãmamhã, romharé norĩ ãmamhã, duré ẽtẽ zahâpâm naꞌrata norĩ ãmamhã. Niꞌwa te te rẽme õ di. Uburé pese ma tô uprosi pese aꞌuwẽ hã, Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono hã te te tãma iꞌru zaꞌra zéb zarina.
41 Zozué hã Cade-Banea hawi Gaza u hã ma tô daꞌãma aiꞌuté, duré Gosẽ niwĩ ro ꞌre isaꞌwari mono hawi Gibiã u hã.
42 Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono hã ma tô tinhibꞌaꞌuwẽ norĩ ma, te te aꞌwapé. Tahawa Zozué hã ma tô apito norĩ ãmamhã aiꞌuté zaꞌra, isiptiꞌa zaꞌra ãmam zama, tô misi haré dasiꞌwapézém na hã.
43 Ãne pari ma tô Zozué norĩ tite dasiꞌwapéi ꞌmanharĩꞌwa norĩ me hã apâ aiꞌabaꞌré, Gilga ãma romhâ ꞌmanharĩ na ꞌri nhoré u hã.
Ĩwaꞌõtõ piꞌreba watsuꞌu mono
^ 10:1 Taha ré, ꞌri nhoꞌu Zeruzalẽ hã te zebuzeu norĩ ma, ꞌre hâimana.
